1. Kumbi tanandi titondeka kufiskanji?

 KUMBI mukujiŵikiyapu chilatu chauzimu kweni vingukusuzgani kuchifiska? b Asani ndi viyo mwe mwija cha. Mwakuyeruzgiyapu, Philip wakhumbanga kuti waperekengi mapempheru ngamampha kweniso kuti wapempherengi kaŵikaŵi kwaku Yehova. Kweni iyu watondekanga kusaniya nyengu yakupemphere. Chilatu chaku Erika chenga chakuti wachelerengi pa unganu wakunozgeke uteŵeti, kweni wafikanga mbwenu mwakuswera. Tomáš wangwesa maulendu nganandi kuti waŵerengi Bayibolu losi. Iyu wangukamba kuti: “Ndakondwanga cha kuŵerenga Bayibolu. Ndingwesa kuliŵerenga katatu kosi kweni ndamaliyanga ŵaka pa buku la Levitiko.”

2. Ntchifukwa wuli titenere cha kugongowa asani techendafiski chilatu chidu?

² Asani pasonu panu mutondeka kufiska chilatu chinyaki mungagongowanga cha. Kuti munthu wafiski chilatu chipusu pangakhumbika so nyengu kweniso kufwiyapu. Chifukwa chakuti mukhumbisiska kufiska chilatu chinu, vilongo kuti muwona kuti ubwezi winu ndi Yehova ngwakukhumbika ukongwa kweniso mukhumba kuti mumupaski vinthu vamampha. Yehova wakondwa ndi vo muyesesa kuchita. Ndipu iyu wakhaza kuti muchiti vinthu vo mungatondeka kufiska cha. (Salimo 103:14; Mika 6:8) Mwaviyo, asani musankha chilatu muwonesesengi kuti musankha chilatu chakuti mungachifiska. Asani mwajiŵikiya chilatu, kumbi mungachitanji kuti muchifiski? Tiyeni tikambiskani masachizgu nganyaki ngo ngangakuwovyani.

3. Kumbi mtima wakukhumbisiska kufiska chilatu ngwakukhumbika wuli?

³ Kuja ndi mtima wakukhumbisiska nkhwakukhumbika ukongwa kuti munthu wafiski chilatu chaki. Asani mwe ndi mtima wakukhumbisiska kuti mufiski chilatu chinu mbwenu mufwiyengepu kuchifiska. Mtima wakukhumbisiska tingawuyeruzgiya ndi mphepu yo yitutuzga boti kuti likafiki ko litiya. Asani mphepu yilutirizga kuputa, ndikuti munthu yo watendesa boti wangachifika ko waluta. Ndipu asani kwe mphepu yanthazi wangachifika liŵi. Mwakuyanana ŵaka, asani tikhumbisiska ukongwa, mbwenu tingafiska vilatu vidu. David mubali wa ku El Salvador wanguti: “Asani utichikhumbisiska chinthu ufwiyapu. Uzomereza cha kuti chechosi chikutondekesi kufiska chilatu chaku.” Kumbi mungachita wuli kuti mukhumbisiskengi kufiska chilatu chinu?

4. Kumbi tingamupemphanji Yehova? (Afilipi 2:13) (Wonani so chithuzi.)

⁴ Mupempherengi kuti muje ndi mtima wakukhumbisiska kufiska chilatu chinu. Yehova wangagwiriskiya ntchitu mzimu waki kuti muje ndi mtima wakukhumbisiska kufiska chilatu chinu. (Ŵerengani Afilipi 2:13.) Nyengu zinyaki titijiŵikiya chilatu chifukwa tiziŵa kuti ndivu tikhumbika kuchita ndipu mbumampha kuchita viyo. Kweni nyengu zinyaki tingakhumbisiska cha kuchifiska. Venivi ndivu vinguchitikiya mzichi munyaki wa ku Uganda zina laki Norina. Iyu wenga ndi chilatu chakuti wasaniyi sambiru la Bayibolu. Chinanga kuti venga viyo, Norina wengavi mtima wakukhumbisiska chifukwa chakuti wajiwonanga kuti ndimujira kusambiza. Kumbi ndi vinthu wuli vo vingumuwovya? Iyu wangukamba kuti: “Ndingwamba kumupempha Yehova zuŵa lelosi kuti wandipaski mtima wakukhumbisiska kwamba kuchitiska sambiru la Bayibolu. Kuti ndichiti vinthu mwakukoliyana ndi mapempheru ngangu, ndayesesanga kusazgiyaku lusu langu lakusambiza. Pati pajumpha myezi yimanavi ndinguwona kuti ndayamba kuja ndi mtima wakukhumbisiska kuchitisa sambiru la Bayibolu. Mu chaka chenichi pe, ndingwambisa masambiru nga Bayibolu ngaŵi.”

5. Kumbi tikhumbika kulunguruka pa vinthu nivi vo vingatiwovya kuti tikhumbisiski kufiska chilatu chidu?

⁵ Mulungurukengi pa vo Yehova wakuchitiyani. (Salimo 143:5) Wakutumika Paulo wangulunguruka pa wezi ukulu wo Yehova wangumulongo ndipu venivi vingumuchiska kuti wafwiyepu kuteŵete Yehova. (1 Akori. 15:9, 10; 1 Timo. 1:12-14) Mwakuyanana ŵaka, asani mulunguruka pa vo Yehova wakuchitiyani, mbwenu mukhumbisiskengi kufiska chilatu chinu. (Salimo 116:12) Tiyeni tikambiskani vo vinguwovya mzichi waku Honduras kuti wafiski chilatu chaki chakuja mpayiniya wa nyengu zosi. Iyu wangukamba kuti: “Ndinguŵanaŵaniya mo Yehova watindiyanjiya. Iyu watindiphwere kweniso kundivikiliya. Kuŵanaŵaniya venivi, kunguchitiska kuti ndimuyanjengi ukongwa kweniso kukhumbisiska kufiska chilatu changu chakuchita upayiniya wa nyengu zosi.”

6. Kumbi ntchinthu wuli cho chingatiwovya kuti tikhumbisiskengi kufiska chilatu chidu?

⁶ Muŵikengi mtima pa vitumbiku vo mungasaniya asani mwafiska chilatu chinu. Wonani vo vinguwovya Erika yo tamuzumbuwapu kali kuti wafiski chilatu chaki chakuti wafikengi liŵi pa unganu wakunozgeke uteŵeti. Iyu wanguti: “Ndinguziŵa  kuti ndapambananga ndi vinthu vinandi chifukwa chakuswera. Kweni kufika liŵi kwandiwovyanga kuti nditawuzanengi ndi abali kweniso azichi. Ndipuso vandiwovyanga kuti ndivwisiyengi masachizgu ngo ngangandiwovya kuti ndikondwengi ndi uteŵeti kweniso ndipharazgengi umampha.” Erika wanguŵika mtima pa vitumbiku vo wangasaniya chifukwa cha kuchelera pa unganu wakunozgeke uteŵeti ndipu wangufiska chilatu chaki. Kumbi yimwi mungaŵanaŵaniya vitumbiku wuli? Asani chilatu chinu ntchakuti muŵerengengi Bayibolu kweniso kupemphera, ŵanaŵaniyani mo chilatu cho chingakuwovyiyani kuti muje pa ubwezi wakukho ndi Yehova. (Salimo 145:18, 19) Asani chilatu chinu ntchakuti muŵi ndi jalidu linyaki la chikhristu, ŵanaŵaniyani mo jalidu lenili lingakuwovyiyani kuti muje pa ubwezi wamampha ndi ŵanthu anyaki. (Ako. 3:14) Ndipu muwonengepu kaŵikaŵi po mukulemba. Tomáš, yo tamuzumbuwapu kali wangukamba kuti: “Asani nde ndi vifukwa vinandi vakuti ndifiskiyi chilatu changu, mbwenu ndiyesesengi kuchifiska.”

7. Kumbi ndi vinthu wuli vo vinguwovya Julio ndi muwolu waki kuti afiski chilatu chawu?

⁷ Muchezengi ndi ŵanthu wo angakuchiskani kuti mufiski chilatu chinu. (Nthanthi 13:20) Wonani vo vinguwovya Julio kweniso muwolu waki kuti afiski chilatu chawu chakuchita vinandi pa ntchitu yakupharazga. Iyu wangukamba kuti: “Tingusankha mabwezi ngo ngatichiskanga kuti tifiski chilatu chidu. Ndipu kanandi takambiskananga nangu vakukwaskana ndi chilatu chenichi. Anandi ŵenga akuti akufiska kali vilatu vakuyanana ndi vidu, mwaviyo atipaskanga masachizgu ngakovya. Mabwezi ngidu ngenanga ngatifumbanga so mo vinthu vitende pakufiska vilatu vidu ndipu atichiskanga asani mphakwenere.”

8. Kumbi ntchinthu wuli cho chingachitika asani tichitapu kanthu kuti tifiski chilatu chidu pa nyengu yo te ndi mtima wakukhumbisiska pe? (Wonani so chithuzi.)

⁸ Kweni uneneska ngwakuti nyengu zinyaki tosi tiŵavi mtima wakukhumbisiska. Kumbi venivi ving’anamuwa kuti tingafiska cha vilatu vidu? Awa ndimu viliri cha. Mwakuyeruzgiyapu, mphepu yingaŵa yanthazi ukongwa mwakuti yingatutuzga boti mpaka kuchifika ko liluta. Kweni nthazi ya mphepu yisinthasintha ndipu mazuŵa nganyaki kungaŵavi mphepu. Kumbi venivi ving’anamuwa kuti wakwendesa boti wangalutirizga cha ulendu waki? Viŵi cha. Mwakuyeruzgiyapu, maboti nganyaki nga injini penipo nganyaki avuŵiya nkhafu. Mwaviyo, yo watendesa boti wangagwiriskiya ntchitu injini pamwenga nkhafu kuti wakafiki ko watiya. Mtima widu wakukhumbisiska kufiska chilatu chidu tingawuyeruzgiya ndi mphepu. Mazuŵa nganyaki tingakhumbisiska ukongwa kuphara nganyaki. Ndipu mazuŵa nganyaki tingaŵiyavi limu mtima wakukhumbisiska kufiska chilatu chidu. Mwaviyo, tingafiska cha vilatu vidu asani tikhumba kuvifiska pijapija asani mtima widu ukhumbisiska. Nge mo wakwendesa boti wachitiya kuti wasaniya nthowa zinyaki zakuchifikiya ko waluta, nasi tingafwiyapu kuti tifiski chilatu chidu chinanga kuti tilivi mtima wakukhumbisiska. Chinanga kuti ntchipusu cha kuchita viyo, kweni tingakondwa asani tafiska chilatu chidu. Techendakambiskani vo tingachita, chakwamba tiyeni tikambiskani fumbu lo tingaŵa nalu.

9. Kumbi mbuheni kuyesesa kufiska chilatu chidu chinanga kuti tikhumba cha kuchita viyo? Konkhoskani.

 ⁹ Yehova wakhumba kuti timuteŵetiyengi mwalikondwa kweniso mwakukhumba kwidu. (Salimo 100:2; 2 Akori. 9:7) Mwaviyo, kumbi tikhumbika kulutirizga kufiska chilatu chidu chinanga ndi po tiwona kuti tikhumba cha kuchifiska? Tiyeni tikambiskani vo vinguchitikiya wakutumika Paulo. Iyu wangukamba kuti: “Ndichenya mwanthazi liŵavu langu ndipu nditililongozga nge kapolu.” (1 Akori. 9:25-27) Chinanga kuti Paulo wakhumbisiskanga cha kuchita vo Yehova wakhumbanga kuti iyu wachiti, iyu wajichichizganga mbwenu kuvichita. Kumbi Yehova wakondwanga ndi vo Paulo wachitanga pakumuteŵete? Hinya! Ndipu Yehova wangumutumbika chifukwa cha phamphu laki.​—2 Timo. 4:7, 8.

10. Kumbi tingayanduwa wuli asani tiyesesa kufiska chilatu chidu chinanga kuti tilivi mtima wakukhumbisiska kuti tichifiski?

¹⁰ Mwakuyanana ŵaka, Yehova wakondwa kuwona kuti tiyesesa kufiska chilatu chidu chinanga kuti tikhumbisiska cha kuchita viyo. Iyu wakondwa chifukwa chakuti tichita venivo chifukwa chakuti titimuyanja chinanga kuti vo tichita titiviyanja cha. Nge mo Yehova wangutumbikiya Paulo, nasi watitumbikengi chifukwa cha vo tiyesesa kuchita pakumuteŵete. (Salimo 126:5) Ndipu asani tiwona kuti Yehova watititumbika, tiyambengi kuja ndi mtima wakukhumbisiska. Mzichi waku Poland zina laki Lucyna wanguti: “Nyengu zinyaki ndikhumba cha kuluta kuchipharazga, ukongwa asani ndavuka. Kweni chinanga kuti vingaŵa viyo, likondwa lo ndisaniya asani ndaluta mu uteŵeti ndi mphasu yamampha ukongwa.” Mwaviyo, tiyeni tiwoni vo tingachita asani tilivi mtima wakukhumbisiska.

11. Kumbi Yehova wangatiwovya wuli kuti tije ndi jalidu la kujiko?

¹¹ Mupempherengi kuti mujikongi. Kanandi mazu ngakuti kujiko ngang’anamuwa kujikaniza wija kuti uleki kuchita chinthu chiheni. Kweniso jalidu lenili ndakukhumbika so ukongwa kwaku isi kuti tichiti chinthu chamampha, ukongwa asani cho tikhumba kuchita ntchakusuzga pamwenga tilivi khumbu lakuchichitiya. Kumbukani kuti kujiko ndi jalidu lo mzimu utuzga. Mwaviyo, mumupemphengi Yehova kuti wakupaskeni mzimu wakupaturika kuti ukuwovyeni kuti muje ndi jalidu lenili. (Luka 11:13; Aga. 5:22, 23) David yo tamuzumbuwapu kali wangukamba mo pempheru lingumuwovye. Iyu wakhumbanga kuti wasambirengi pakuyija kaŵikaŵi. Iyu wangukamba kuti: “Ndamupemphanga Yehova kuti wandiwovyi kuja ndi jalidu la kujiko. Iyu wangundiwovya kuti ndiyambi kuja ndi ndondomeku yamampha yakusambiriya pakundija kweniso kuti ndichitengi venivi nyengu zosi.”

12. Kumbi lemba la Wakutawula 11:4, lingatiwovya wuli kuti tifiski vilatu vidu?

¹² Mungakhazanga cha kuti vinthu viŵi umampha pe. Mucharu chiheni ichi, ndi nyengu zosi cha po vinthu viŵengi umampha. Asani tikhaza kuti vinthu viŵi umampha pe ndipu tifiskengi chilatu chidu, mbwenu titondekengi kuchifiska. (Ŵerengani Wakutawula 11:4.) Mubali munyaki zina laki Dayniel wanguti: “Palivi nyengu yamampha ukongwa. Mwaviyo, tingalindizganga cha kuti vinthu viŵi dankha umampha. Tiyambepu ŵaka.” Mubali munyaki wa ku Uganda zina laki Paul wangukamba chifukwa chinyaki cho tikhumbikiya cha kuchita vidazi. Iyu wanguti: “Asani tayambapu ŵaka chinanga kuti vinthu veumampha cha, Yehova watiwovyengi.”—Mala. 3:10.

13. Ntchifukwa wuli mbumampha kwamba ndi vilatu vimanavimana?

¹³ Muyambengi ndi vilatu vimanavimana. Tingaŵavi mtima wakukhumbisiska asani tiwona kuti chilatu chidu ntchakusuzga kuchifiska. Asani ndimu viliri ndi yimwi, saniyani pakwambiya mumalu mwakulimbana nachu chosi. Asani chilatu chinu ntchakuti muje ndi jalidu linyaki lamampha, mungachita umampha kwamba kulongo jalidu lenili mu nthowa zimanazimana. Asani chilatu chinu ntchakuŵerenga Bayibolu losi, mungachita umampha kwamba kuliŵerenga kwa nyengu yimanavi ŵaka. Tomáš, yo tamuzumbuwa kukwamba kwa nkhani iyi wasuzgikanga kufiska chilatu  chaki chakumaliza kuŵerenga Bayibolu losi mu chaka chimoza. Iyu wanguti: “Ndingusaniya kuti ndaŵerenganga vinthu vinandi ukongwa pa nyengu yimanavi. Mwaviyo, ndingwamba so kuliŵerenga kweni pa nyengu iyi ndingunozga vakuti ndiŵerengengi ndimi zimanavi ŵaka zuŵa lelosi kweniso kulunguruka pa vo ndiŵerenga. Venivi vinguwovya kuti ndiyanjengi kuŵerenga Bayibolu.” Chifukwa chakuti Tomáš wangwamba kuyanja kuŵerenga Bayibolu, iyu wangwamba kuliŵerenga kwa nyengu yitali. Pakumaliya wangumaliza kuŵerenga Bayibolu losi lamphumphu. c

14. Kumbi ndi vinthu wuli vo vingachitika vo vingatitondekesa kufiska chilatu chidu?

¹⁴ Chinanga tingakhumbisiska wuli pamwenga kujiko pangaŵa mbwenu vinthu vakutondekesa. Mwakuyeruzgiyapu “vinthu vamabuchibuchi” vingatimaliya nyengu yakuti tifiskiyi chilatu chidu. (Waku. 9:11) Tingakumana ndi suzgu yinyaki yo yingatigongowesa kweniso kutimala nthazi. (Nthanthi 24:10) Chifukwa chakuti ndisi ŵanthu ambula kufikapu, tinganangisa ndipu venivi vingachitiska kuti kuŵi kwakusuzga kufiska chilatu chidu. (Aro. 7:23) Pamwenga nyengu zinyaki tingavuka ŵaka. (Mate. 26:43) Kumbi ntchinthu wuli cho chingatiwovya kuti tilimbani ndi vo vingatitondekesa kufiska chilatu chidu?

15. Ntchifukwa wuli tikhumbika cha kuleka kufiska chilatu chidu chinanga pangaŵa vinthu vinyaki vo vingatitondekeska kuchifiska? Konkhoskani. (Salimo 145:14)

¹⁵ Mukumbukengi kuti asani vinthu vinyaki vitikutondekeskani kufiska chilatu chinu, ving’anamuwa kuti mwatondeka cha kuchifiska. Bayibolu likamba kuti nyengu zinyaki tingakumana ndi masuzgu mwakuwerezawereza. Kweni likamba so kuti tingafiska chilatu chidu, ukongwa asani Yehova wangatiwovya. (Ŵerengani Salimo 145:14.) Mubali Philip yo tamuzumbuwapu kali wangukamba kuti: “Mumalu mwakuŵanaŵaniya kuti ndatondeka kalinga kufiska chilatu changu, ndiŵanaŵaniya ukongwa po ndinguyesesa kuchifiska.” David yo tamuzumbuwapu kali wangukamba kuti: “Nditesesa kuwona kuti vinthu vo vitinditondekesa kufiska chilatu changu ndi mwaŵi wakulongore  kuti nditimuyanja ukongwa Yehova.” Asani mutesesa kufiska chilatu chinu, chinanga mphanyengu yo vakusuzga kuchita viyo, mutimulongo Yehova kuti mukhumbisiska kumukondwesa. Yehova wakondwa ukongwa kuwona kuti mulutirizga kufwiyapu kuti mufiski chilatu chinu.

16. Kumbi tingasambiranji pa vinthu vo vingutitondekesa kufiska chilatu chidu?

¹⁶ Musambirengepu kanthu pa vinthu vo vingukutondekesani kufiska chilatu chinu. Ŵanaŵaniyani vo vinguchitika ndipu jifumbeni kuti: ‘Kumbi ndikhumbika kuchitanji kuti venivi vizileki so kuchitika?’ (Nthanthi 27:12) Nyengu zinyaki vinthu vo vingutitondekeska kuti tifiski chilatu chidu, vingalongo kuti tingusankha chilatu chakuti tingachifiska cha. Asani ndimu viliri ndi yimwi, ŵanaŵaniyani chilatu chinu ndipu wonani asani mungachifiska nadi. d Yehova wakuwoneningi kuti mwe akutondeka cha chifukwa chakuti mungufiska cha chilatu chakujumpha msinkhu winu.​—2 Akori. 8:12.

17. Ntchifukwa wuli tikhumbika kukumbuka vinthu vinyaki vo tikufiskapu kali?

¹⁷ Mukumbukengi vinthu vinyaki vo mukufiskapu kali. Bayibolu likamba kuti “Chiuta ngwambula urunji cha kuti wangaluwa ntchitu yinu.” (Ahe. 6:10) Mwaviyo, namwi mungaluwanga cha. Muŵanaŵaniyengi vilatu vinyaki vo mukufiskapu kali nge kuja pa ubwezi ndi Yehova, kupharazgiya ŵanthu pamwenga kubatizika. Nge mo mungufiskiyapu vilatu vinyaki kuvuli, sonu napu mungalutirizga kuyesesa kuti mufiski vilatu vinu vasonu.​—Afi. 3:16.

18. Kumbi tikhumbika kukumbukanji po tiyesesa kufiska vilatu vidu? (Wonani so chithuzi.)

¹⁸ Yehova wangakuwovyani kuti mufiski chilatu chinu, nge mo munthu yo watendesa boti wangakondwe kuti wafika ko waluta. Kweni kumbukani kuti, akwendesa maboti anandi nawu, akondwa ndi ulendu wawu. Mwakuyanana ŵaka, po muyesesa kulutirizga kuti mufiski chilatu chinu, nyengu zosi muwonengi mo Yehova watikuwovyiyani. Ndipu venivi vikuwovyeningi kuti mukondwengi po muyesesa kufiska vilatu vinu. (2 Akori. 4:7) Asani mutesesa kufiska vilatu vinu Yehova wakutumbikeningi ukongwa.​—Aga. 6:9.