1. Kumbi Yehova wakhumba kuti ateŵeti ŵaki achitengenji? (Wonani so chithuzi.)

 KUMBI ndiyani yo wangatipembuzga kweniso kutipasa ulongozgi? Tiziŵa kuti ndi Yehova Chiuta yo wangatipembuzga kweniso kutipaska ulongozgi, ndipu tingapemphera kwaku iyu. Venivi ndivu Yehova wakhumba kuti tichitengi. Iyu wakhumba kuti ‘tipempherengi nyengu zosi.’ (1 Ate. 5:17) Tingapemphera kwaku iyu mwakufwatuka kweniso kumupempha kuti watilongozgi pa vosi vo tichita pa umoyu widu. (Nthanthi 3:5, 6) Chifukwa chakuti Yehova ndi Chiuta wakupaska, iyu wakamba kuti tingapemphera kananandi ŵaka mo takhumbiya.

2. Kumbi tikambiskanengenji mu nkhani iyi?

² Titimuwonga ukongwa Yehova chifukwa chakuti watitizomereza kuti tipempherengi kwaku iyu. Kweni chifukwa chakuti titangwanika vingatisuzga kusaniya nyengu yakupemphere. Kweniso tingawona kuti tikhumbika kuyesesa kuti tiperekengi mapempheru ngamampha ukongwa. Kweni chakukondwesa ntchakuti Malemba ngatitichiska kweniso ngatitipaska ulongozgi wa mo tingachitiya venivi. Mu nkhani iyi, tikambiskanengi vo tingachita kuti tipatuwengi nyengu yakupemphere ndipu tichitengi venivi mwakukambiskana vo Yesu wanguchita. Kweniso tikambiskanengi vinthu vinkhondi vo vingatiwovya kuti mapempheru ngidu ngajengi ngamampha ukongwa.

3. Kumbi Yesu waziŵanganji vakukwaskana ndi pempheru?

³ Yesu waziŵanga kuti Yehova wawona kuti mapempheru ngidu ngakukhumbika ukongwa. Wechendazi pacharu chapasi, wawonanga awisi achimuka mapempheru nga anthulumi ndi anthukazi akugomezgeka. Mwakuyeruzgiyapu, Yesu wenga pamphepeti pa Awisi achimuka pempheru lakutuliya pasi pa mtima laku Hana, Davidi, Eliya kweniso ŵanthu anyaki anandi. (1 Samu. 1:10, 11, 20; 1 Mafu. 19:4-6; Salimo 32:5) Ndichu chifukwa chaki Yesu wangusambiza akusambira ŵaki kuti apempherengi nyengu zosi ndipuso ndi mtima wosi.​—Mate. 7:7-11.

4. Kumbi tisambiranji kwaku Yesu pa nkhani ya kupemphera?

⁴ Kuziya mumapempheru ngo wapempheranga kwaku Yehova, Yesu wangulongo chakuwoniyapu chamampha ukongwa kwa akusambira ŵaki. Pa nyengu yosi yo wachitanga uteŵeti waki pacharu chapasi, Yesu wapempheranga kaŵikaŵi. Iyu wapatuwanga nyengu yakupemphere chifukwa kanandi watangwanikanga kweniso ŵanthu anandi azanga kwaku iyu. (Mariko 6:31, 45, 46) Iyu wayukanga ndi mlenjilenji kuti wakapempheri kwaku yija. (Mariko 1:35) Nyengu yinyaki iyu wangupemphera usiku wosi wechendasankhi chinthu chinyaki chakukhumbika ukongwa. (Luka 6:12, 13) Kweniso pa usiku wakuti wafwengi mawa laki, Yesu wangupemphera mwakuwerezawereza kuti waŵiki maŵanaŵanu ngaki ngosi pakufiska chigaŵa chakusuzga ukongwa cha uteŵeti waki wa pacharu chapasi.​—Mate. 26:39, 42, 44.

5. Kumbi tingamuyezga wuli Yesu pa nkhani ya pempheru?

⁵ Chakuwoniyapu chaku Yesu chititisambiza kuti kwali tingatagwanika wuli, tikhumbika kupatuwa nyengu yakupemphere. Nge Yesu, tikhumbika kupatuwa nyengu yakupemphere nge kuyuka mlenjilenji pamwenga kugona mwakusweriyapu kuti tipempheri. Asani tichita viyo, tilongo kuti titimuwonga Yehova chifukwa cha mphasu yapade yeniyi. Mzichi munyaki zina laki Lynne wakumbuka mo wanguvwiya mumtima wati waziŵa kakwamba kuti we ndi mwaŵi wakupemphera kwaku Yehova. Iyu wangukamba kuti: “Ndati ndaziŵa kuti ndingapemphera kwaku Yehova nyengu yeyosi, vingundiwovya kuti ndimuwonengi kuti ndi mubwezi wangu wapamtima kweniso kuti ndikhumbika kuyesesa kuti mapempheru ngangu ngajengi ngamampha ukongwa.” Tikayika cha kuti ndimu so  tanandi tivwiya. Sonu tiyeni tikambiskani vinthu vinkhondi vakukhumbika ukongwa vo tingakamba asani tipemphera.

6. Mwakukoliyana ndi Chivumbuzi 4:10, 11, kumbi Yehova ngwakwenere kulondiyanji?

⁶ Kuthamika Yehova. Mu chiwona chakuziziswa, wakutumika Yohane wanguwona ŵara 24 kuchanya achisopa Yehova. Yiwu athamikanga Chiuta kweniso akambanga kuti iyu ngwakwenere “unkhankhu, ulemu ndipuso nthazi.” (Ŵerengani Chivumbuzi 4:10, 11.) Angelu akugomezgeka nawu so ŵe ndi vifukwa vinandi vakuthamikiya kweniso kupereka ulemu kwaku Yehova. Yiwu aja nayu limoza kuchanya ndipu atimuziŵa umampha. Yiwu awona mijalidu yaku Yehova ndipu venivi vitiŵachiska kuti amuthamikengi asani awona vo iyu wachita.​—Yobu 38:4-7.

7. Kumbi ndi vinthu nivi vo vingachitiska kuti timuthamikengi Yehova?

⁷ Nasi so titenere kuthamika Yehova mumapempheru ngidu. Tingachita venivi mwakumukambiya chifukwa cho titimuyanjiya kweniso cho titimutumbikiya. Pa nyengu yo muŵerenga kweniso kusambira Bayibolu, yesesani kusaniya mijalidu yaku Yehova yo yitikukondwesani. (Yobu 37:23; Aroma 11:33) Pavuli paki, mukambiyeni Yehova mo muvwiya chifukwa cha mijalidu yeniyo. Tingathamika so Yehova chifukwa chakovya isi kweniso abali ndi azichi wosi. Nyengu zosi iyu watitiŵanaŵaniya kweniso kutivikiliya.​—1 Samu. 1:27; 2:1, 2.

8. Kumbi titimuwonga Yehova pa vifukwa vinyaki nivi? (1 Atesalonika 5:18)

⁸ Kuwonga Yehova. Te ndi vifukwa vinandi vo tingamuwonge Yehova mupempheru. (Ŵerengani 1 Atesalonika 5:18.) Tingamuwonga chifukwa cha vinthu vosi vamampha vo tenavu chifukwa mphasu yeyosi yamampha yituliya kwaku iyu. (Yako. 1:17) Mwakuyeruzgiyapu, tingamuwonga chifukwa cha charu chidu chakutowa kweniso vinthu vakuziziswa vo wakulenga. Kweniso tingamuwonga chifukwa chakuti wakutipasa umoyu, ŵanthu a mu banja lidu, mabwezi kweniso vinthu vamampha vo tilindizga kunthazi. Ndipuso tingamuwonga Yehova chifukwa chakutizomereza kuti tije nayu pa ubwezi.

9. Ntchifukwa wuli tikhumbika kumuwonga Yehova?

⁹ Tikhumbika kuŵanaŵaniya ukongwa vifukwa vo isi pakutija titimuwonge Yehova. Ŵanthu anandi mazuŵa nganu awonga cha. Kanandi ŵanthu aŵika maŵanaŵanu ngawu ngosi pa vinthu vo akhumba mumalu mwakuwonga vinthu vo ŵenavu. Asani nasi tingaŵa ndi mtima wenuwu mapempheru ngidu ngangaŵa ngakupempha pe nyengu zosi. Mwaviyo, kuti tileki kuchita venivi tikhumbika kulutirizga kuwonga Yehova chifukwa cha vinthu vosi vo watitichitiya.​—Luka 6:45.

10. Kumbi kuwonga kungumuwovya wuli mzichi munyaki kukunthiyapu masuzgu? (Wonani so chithuzi.)

¹⁰ Tiyeni tikambiskani vo vinguchitikiya mzichi Kyung-sook, yo nkhani yaki yikulembeka mu Chigongwi cha Mlinda cha January 15, 2015. Iyu angumusaniya ndi khansa ya mumapapu yo yingufika paheni ukongwa. Iyu wangukamba  kuti: “Nthenda iyi yingundiguŵiska ukongwa. Ndajivwanga kuti ndataya chechosi ndipu ndenga ndi mantha ukongwa.” Kumbi ntchinthu wuli cho chingumuwovya kuti wakunthiyepu? Iyu wangukamba kuti usiku wewosi wechendagoni, walutanga pachanya pa nyumba yaki ndi kuchipemphera mwakukweza ndipu mupempheru wazumbuwanga vinthu vinkhondi vo Yehova wamuchitiya pa zuŵa lo. Venivi vingumuwovya kuti walekengi kufipa mtima ukongwa kweniso vamuchiskanga kuti walongongi kuti watanja ukongwa Yehova. Iyu wanguwona mo Yehova watovye ateŵeti ŵaki akugomezgeka asani akumana ndi mayeseru ngakulu. Kweniso wanguziŵa kuti pe vinthu vinandi vo Yehova watitichitiya pa umoyu kuluska mayeseru ngo tikumana nangu. Mwakuyana ndi mzichi Kyung-sook, te ndi vifukwa vinandi vakuwonge Yehova chinanga mphanyengu yo tikumana ndi mayeseru.

11. Ntchifukwa wuli akusambira aku Yesu akhumbikanga chiganga Yesu wati wawere kuchanya?

¹¹ Kupempha Yehova kuti watiwovyi kuja ndi chiganga mu uteŵeti. Wati waja kamanavi kuti wawere kuchanya, Yesu wangukumbusa akusambira ŵaki ntchitu yo angupaskika yakupharazga vakukwaskana ndi iyu “mu Yerusalemu, mu Yudeya mosi ndi mu Samariya mpaka kuvigaŵa vakutali ukongwa va charu chapasi.” (Machi. 1:8; Luka 24:46-48) Pati pajumpha kanyengu kamanavi, alongozgi achiyuda angumanga wakutumika Peturo ndi Yohane ndikuza nawu ku Mphara Yikulu ya Milandu. Yiwu angulamula anthulumi akugomezgeka ŵenaŵa kuti aleki kupharazga ndipuso anguŵawofyeza. (Machi. 4:18, 21) Kumbi Peturo ndi Yohane anguchita wuli?

12. Mwakukoliyana ndi Machitidu 4:29, 31, kumbi akusambira aku Yesu anguchitanji?

¹² Pakumuka alongozgi achiyuda ŵenaŵa, Peturo ndi Yohane angukamba kuti: “Yeruzgani mwija asani ntchakwenere pa masu paku Chiuta, kuvwiya yimwi pamwenga kuvwiya Chiuta.” (Machi. 4:19, 20) Peturo ndi Yohane ŵati afwatulika, akusambira angupemphera kwaku Yehova mwakukweza ndipu anguŵika maŵanaŵanu ngawu ngosi pakuchita khumbu laki. Yiwu angupemphera kuti: “Zomerezani kuti akapolu ŵinu alutirizgi kukamba mazu nginu mwachiganga.” Yehova wangumuka pempheru lawu lakutuwa pasi pa mtima.​—Ŵerengani Machitidu 4:29, 31.

13. Kumbi tisambiranji kwaku Jin-hyuk?

¹³ Tingayezga akusambira aku Yesu mwakulutirizga kupharazga asani ŵaraŵara aboma atitikaniza. Tiyeni tikambiskani chakuwoniyapu cha mubali Jin-hyuk yo wangumangika chifukwa cha kukana kusere usilikali. Mujeri iyu wangupaskika ntchitu yakupereka chakurya kwenso vinthu vinyaki ku mukayidi weyosi yo wajanga mukachipinda kakuyija. Kweni Jin-hyuk wazomerezekanga cha kukambiskana nawu nkhani yeyosi yo yileka kukwaskana ndi ntchitu yeniyi, kusazgapu kuŵapharazgiya. Iyu wangupempha Yehova kuti waje ndi chiganga kweniso lusu lakuti wapharazgengi asani wasaniya mpata wewosi. (Machi. 5:29) Iyu wangukamba kuti: “Yehova wangumuka mapempheru ngangu mwakundiwovya kuja ndi chiganga kweniso zeru kuti ndichitiskengi masambiru nga Bayibolu kwa maminiti ngankhondi pamakhomu ngamaselu. Ndi usiku ndalembanga makalata ngakuti nkhapaski akayidi anyangu mawa laki.” Nasi tingagomezga kuti Yehova watiwovyengi kuti tifiski uteŵeti widu. Mwakuyana ndi mubali Jin-hyuk, tingamupempha Yehova kuti watipaski chiganga kweniso zeru.

14. Kumbi ntchinthu wuli chingatiwovya kukunthiyapu masuzgu? (Salimo 37:3, 5)

¹⁴ Kupempha Yehova kuti watiwovyi kukunthiyapu masuzgu. Tanandi tikunthiyapu masuzgu nge kutama, kusuzgika maŵanaŵanu, nyifwa ya munthu yo tamuyanjanga, masuzgu nga mubanja, kutombozgeka, pamwenga masuzgu  nganyaki. Ndipu vinthu nge mulili ndipuso nkhondu, vachitiska kuti kuŵi kwakusuzga ukongwa kukunthiyapu masuzgu ngenanga. Mwaviyo, mumukambiyengi Yehova mo muvwiya mumtima. Mumukambiyengi masuzgu nginu nge mo mungachitiya ndi mubwezi winu wapamtima. Ndipu mugomezgengi kuti Yehova ‘wakuwovyeningi.’​—Ŵerengani Salimo 37:3, 5.

15. Kumbi pempheru lingatiwovya wuli kukunthiyapu masuzgu? Kambani chakuwoniyapu.

¹⁵ Kufwiyapu kupemphera kungatiwovya kuti ‘tikunthiyepu masuzgu.’ (Aroma 12:12) Yehova waziŵa masuzgu ngo ateŵeti ŵaki akumana nangu ndipu “watuvwa kuliya kwawu kwakupempha chovyu.” (Salimo 145:18, 19) Mpayiniya munyaki wa vyaka 29 zina laki Kristie wawona kuti venivi vauneneska. Mwamabuchibuchi iyu wangwamba kutama ukongwa. Chifukwa cha venivi, wangwamba kusuzgika maŵanaŵanu. Pavuli paki, anyina anguŵasaniya ndi matenda nganyaki ngo ngatingi ngaŵabayengi. Kristie wangukamba kuti: “Ndingupemphera kwaku Yehova kutuliya pasi pa mtima kuti wandipaski nthazi kuti ndikunthiyengepu zuŵa lelosi. Ndayesesanga kulutirizga kuchita vinthu vauzimu nge kuwungana kweniso kusambira Bayibolu pakundija.” Iyu wangukamba so kuti: “Pempheru lingundiwovya kukunthiyapu pa nyengu yo ndasuzgikanga ukongwa. Ndaziŵanga kuti Yehova wenani. Ndipu kuziŵa venivi, kwandiwovyanga ukongwa kuti ndivwengi umampha. Chinanga kuti ndinguchira nyengu yeniyo cha, Yehova wangumuka mapempheru ngangu mwakundipaska chimangu chamumtima kweniso mtima wakuzika.” Mwaviyo, tingaluwanga cha kuti “Yehova waziŵa kutaska ŵanthu akujipereka kwaku iyu asani ayeseka.”​—2 Petu. 2:9

16. Ntchifukwa wuli tikhumbika chovyu chaku Yehova kuti tikani mayeseru?

¹⁶ Kupempha Yehova kuti watiwovyi kukana mayeseru. Chifukwa chakuti te ŵanthu ambula kufikapu, kanandi tikhumbika kufwiyapu kukana kuchita chinthu cho ntchiheni. Satana wachita vosi vo wangafiska kuti tisuzgikengi kulimbana ndi mayeseru. Vakusangaluska viheni  ndi nthowa yimoza yo Satana wagwiriskiya ntchitu kuti watimbanyizgi maŵanaŵanu ngidu. Vakusangaluska venivi, vingachitiska kuti tiŵanaŵanengi vinthu viheni vo vingananga ubwezi widu ndi Yehova kweniso kutichitiska kuti tichiti ubudi.​—Mariko 7:21-23; Yako. 1:14, 15.

17. Asani tapemphera kuti Yehova watiwovyi, kumbi titenere kuchitanji kuti tikhwechi mayeseru? (Wonani so chithuzi.)

¹⁷ Tikhumbika chovyu chaku Yehova asani tikhumba kukana mayeseru ngakuti tichiti chinthu chiheni. Mupempheru lakuwoniyapu, Yesu wangukamba kuti: “Mungatitoliyanga ku mayeseru cha, kweni titaskeni ku muheni yo.” (Mate. 6:​13) Yehova wakhumbisiska kutiwovya kweni tikhumbika kumupempha kuti watiwovyi. Tikhumbika so kuchita vinthu mwakukoliyana ndi mapempheru ngidu. Titenere so kuyesesa kukhwecha kuŵerenga kweniso kuvwisiya vinthu viheni vo vawanda ukongwa mucharu chaku Satana ichi. (Salimo 97:10) Tiŵerengengi kweniso tisambirengi Bayibolu kuti mumaŵanaŵanu ngidu tiŵikengemu vinthu vamampha. Kuwungana kweniso kupharazga kungavikiliya so maŵanaŵanu ngidu. Kusazgiyapu yapa, Yehova walayizga kuti wazomerezengi cha kuti tiyeseki kujumpha po tingakunthiyapu.​—1 Akori. 10:12, 13.

18. Pa nkhani ya pempheru, kumbi tosi tikhumbika kuchitanji?

¹⁸ Weyosi waku isi, wakhumbika kupemphera ukongwa kuti walutirizgi kuja wakugomezgeka kwaku Yehova munyengu zakusuzga zinu zakumaliya. Zuŵa lelosi mupatuwengi nyengu yakupemphere kwaku Yehova. Iyu wakhumba kuti ‘timujuliyengi mitima yidu’ kuziya mupempheru. (Salimo 62:8) Muthamikengi Yehova kweniso mumuwongengi chifukwa cha vinthu vosi vo watikuchitiyani. Mumupemphengi kuti wakuwovyeni kuja ndi chiganga mu uteŵeti. Mupempheni kuti wakuwovyeni kukunthiyapu masuzgu ngengosi kweniso kuti mukanengi mayeseru ngengosi ngo mungakumana nangu. Mungazomerenga cha kuti chinthu chechosi pamwenga munthu weyosi wakutondekeseni kupemphera kwaku Yehova kaŵikaŵi. Kweni kumbi Yehova wamuka wuli mapempheru ngidu? Mu nkhani yakulondopu, tikambiskanengi fumbu lenili.