NKHANI YAKUSAMBIRA YA NAMBALA 45
Mo Yehova Watitiwovye Kufiska Uteŵeti Widu
“Amuziŵa nadi kuti mchimi wenga pakati pawu.”—EZEKI. 2:5.
SUMU 67 “Pharazga Mazu”
VO TISAMBIRENGI MU NKHANI IYI a
1. Kumbi ndi vinthu wuli vo vingatichitikiya asani tipharazga, kweni ndi vinthu wuli vo tikayikiya cha?
PO TIGWIRA ntchitu yidu yakupharazga, ŵanthu anyaki angatisuska. Ndipu venivi vingazichitika ukongwa kunthazi. (Dani. 11:44; 2 Timo. 3:12; Chivu. 16:21) Kweni tisimikiza kuti Yehova wazakutiwovya. Chifukwa wuli? Chifukwa nyengu zosi Yehova waja wachiwovya ateŵeti ŵaki kufiska uteŵeti wawu, chinanga ungaŵa wakusuzga wuli. Mwakuyeruzgiyapu, tiyeni tikambiskani vinthu vinyaki vo vinguchitika pa umoyu waku Ezekiyeli yo wangupharazgiya Ayuda wo ŵenga ku ukapolu ku Babiloni.
2. Kumbi Yehova wangukamba kuti Ezekiyeli wamupharazgiya ŵanthu amtundu wuli? (Ezekiyeli 2:3-6)
2 Kumbi mbanthu amtundu wuli wo Ezekiyeli wakhumbikanga kuchiŵapharazgiya? Yehova wangukamba kuti yiwu ŵenga “amtafu,” “a mtima unononu” kweniso ‘akugaruka.’ Yiwu ŵenga akupweteka nge minga ndipuso akofya nge vipiriri. Ndichu chifukwa chaki Yehova wangukambiya Ezekiyeli mwakuwerezawereza kuti: “Ungaŵawopanga cha.” (Ŵerengani Ezekiyeli 2:3-6.) Ezekiyeli wangufiska kugwira ntchitu yakupharazga chifukwa (1) wangutumika ndi Yehova, (2) mzimu waku Chiuta ungumupaska nthazi ndipuso (3) Mazu ngaku Chiuta ngangukholesa chivwanu chaki. Kumbi vinthu vitatu venivi vingumuwovya wuli Ezekiyeli? Nanga vititiwovya wuli isi mazuŵa nganu?
EZEKIYELI WANGUTUMIKA NDI YEHOVA
3. Kumbi Ezekiyeli watenere kuti wanguchiskika ndi mazu nanga, nanga Yehova wangumusimikiziya wuli kuti wamuwovyengi?
3 Yehova wangukambiya Ezekiyeli kuti: “Nditikutuma.” (Ezeki. 2:3, 4) Mazu ngenanga ngatenere kuti ngangumuchiska ukongwa Ezekiyeli. Chifukwa wuli? Chifukwa watenere kuti wangukumbuka kuti Yehova wangugwiriskiya ntchitu mazu ngakuyanana ndi ngenanga pa nyengu yo wangusankha Mozesi ndi Yesaya kuja achimi Ŵaki. (Eki. 3:10; Yesa. 6:8) Ezekiyeli wanguziŵa so mo Yehova wanguwovye achimi ŵaŵi ŵenaŵa kufiska uteŵeti wakusuzga. Mwaviyo, Yehova wati wakambiya Ezekiyeli kaŵi kuti: “Nditikutuma,” iyu wenga ndi vifukwa vakuvwika vakugomezge kuti Yehova wamuwovyengi. Kusazgiyapu yapa, Ezekiyeli wangulemba kananandi waka mazu ngakuti: “Yehova wangulongoro nani.” (Ezeki. 3:16) Kweniso mwakuwerezawereza iyu wangulemba kuti: “Yehova wangulongoro so nani.” (Ezeki. 6:1) Tikayika cha kuti Ezekiyeli wangusimikiza kuti Yehova ndiyu wangumutuma. Ndipuso chifukwa chakuti awisi aku Ezekiyeli ŵenga asembi, yiwu atenere kuti amusambizanga kuti nyengu zosi Yehova wakambiyanga achimi Ŵaki kuti waŵawovyengi. Mwakuyeruzgiyapu, Yehova wangukambiya Isaki, Yakobe ndi Yeremiya kuti: “Ini nde nawi.”—Gene. 26:24; 28:15; Yere. 1:8.
4. Kumbi ndi mazu ngakuchiska nanga ngo ngatenere kuti ngangumupaska nthazi Ezekiyeli?
4 Kumbi Ayisirayeli atingi akachitengi wuli ndi uthenga waku Ezekiyeli? Yehova wangukamba kuti: “A munyumba yaku Isirayeli amukana kukuvwisiya, pakuti akhumba cha kundivwisiya.” (Ezeki. 3:7) Kukana Ezekiyeli kwenga kukana Yehova. Mazu ngenanga ngangumusimikiziya Ezekiyeli kuti chinanga kuti ŵanthu amukana kuvwisiya uthenga waki, ving’anamuwa kuti ntchitu ya uchimi yamutonda cha. Yehova wangusimikiziya so Ezekiyeli kuti asani uthenga wacheruzgu wo wamupharazga wazifiskika, ŵanthu ‘azamuziŵa kuti mchimi wenga pakati pawu.’ (Ezeki. 2:5; 33:33) Tikayika cha kuti mazu ngakuchiska ngenanga ngangumupaska nthazi Ezekiyeli kuti wafiski uteŵeti waki.
YEHOVA WATUMA ISI MAZUŴA NGANU
Mwakuyanana ndi Ezekiyeli, tingakumana ndi ŵanthu wo angavwisiya cha uthenga widu kweniso kutisuska kweni tiziŵa kuti Yehova wenasi (Wonani ndimi 5-6)
5. Kumbi lemba la Yesaya 44:8 likamba kuti ndiyani yo watitipaska nthazi?
5 Nasi so tituŵa ndi nthazi chifukwa tiziŵa kuti Yehova ndiyu watituma kuti tipharazgengi. Iyu watitumbika pakutidana kuti “akaboni” ŵaki. (Yesa. 43:10) Ndipu wenuwu ndi mwaŵi ukulu ukongwa! Nge mo Yehova wangukambiya Ezekiyeli kuti: “Ungaŵawopanga cha,” nasi Yehova watitikambiya kuti: “Mungawopanga cha.” Ntchifukwa wuli tikhumbika cha kuŵawopa ŵanthu wo atitisuska? Chifukwa mwakuyanana ndi Ezekiyeli nasi tatumika ndi Yehova ndipu Iyu watitiwovya.—Ŵerengani Yesaya 44:8.
6. (a) Kumbi Yehova watitisimikiziya wuli kuti watiwovyengi? (b) Kumbi ntchinthu wuli cho chititichiska ndipuso kutipaska nthazi?
6 Yehova walayizga kuti watiwovyengi. Mwakuyeruzgiyapu, Yehova wachendakambi kuti: “Yimwi ndimwi akaboni ŵangu,” wangukamba kuti: “Asani ujumpha pamaji, ndazamukuŵa nawi, ndipu asani uporota mumisinji, maji ngazakukubizga cha. Asani ujumpha mumotu, wazamukufya cha, ndipuso mulipu wa motu wazakukuŵawuwa cha.” (Yesa. 43:2) Asani tipharazga nyengu zinyaki tikumana ndi masuzgu nganandi ngo tingangayeruzgiya ndi maji ngo ngangatibiza kweniso mayeseru ngakusuzga ukongwa ngo tingangayeruzgiya ndi motu. Kweni chifukwa chakuti Yehova watitiwovya tilutirizga kupharazga. (Yesa. 41:13) Nge mo venge mu nyengu yaku Ezekiyeli, ŵanthu anandi mazuŵa nganu akana uthenga wo titiŵapharazgiya. Kweni yiwu achita venivi chifukwa chakuti taleka kuŵapharazgiya umampha cha. Chinanga kuti ve viyo, tichiskika ndipuso tija ndi nthazi chifukwa tiziŵa kuti Yehova wakondwa asani tilutirizga kupharazga uthenga waki mwakugomezgeka. Wakutumika Paulo wangulemba kuti: “Munthu weyosi wazamulonde mphotu yaki mwakukoliyana ndi ntchitu yaki.” (1 Akori. 3:8; 4:1, 2) Mzichi munyaki yo wachita upayiniya kwa nyengu yitali wanguti: “Ndikondwa kuziŵa kuti Yehova watitipaska mphotu chifukwa cha phamphu lidu.”
MZIMU WAKU CHIUTA UNGUMUPASKA NTHAZI EZEKIYELI
Ezekiyeli wawona chiwona cha galeta laku Yehova lakuchanya cho chitimuwovya kusimikiza kuti Yehova wamuwovyengi kufiska uteŵeti waki (Wonani ndimi 7)
7. Kumbi Ezekiyeli wavwanga wuli asani waŵanaŵaniya chiwona cho wanguwona? (Wonani chithuzi cho che pachikonkhombi.)
7 Ezekiyeli wanguwona kuti mzimu waku Chiuta ngwanthazi ukongwa. Vo iyu wanguwona mu chiwona vingumuwovya kuziŵa kuti mzimu wakupaturika wawovyanga angelu anthazi kweniso wayendesanga vingelengeli vikuluvikulu va galeta lakuchanya. (Ezeki. 1:20, 21) Kumbi Ezekiyeli wanguchita wuli ndi vo wanguwona? Iyu wangulemba kuti: “Ndati ndawona venivi, ndingujikama ndi kusindama mpaka chisku changu pasi.” Ezekiyeli wanguzizwa ukongwa ndi vo wanguwona mwakuti wanguwa pasi. (Ezeki. 1:28) Ndipu nyengu yeyosi asani Ezekiyeli waŵanaŵaniya chiwona chenichi chitenere kuti chamuwovyanga kusimikiza kuti mzimu waku Chiuta umuwovyengi kufiska uteŵeti waki.
8-9. (a) Kumbi ndi vinthu wuli vo vinguchitikiya Ezekiyeli Yehova wati wamulamula kuti “soka”? (b) Kumbi Yehova wangumuchiska so wuli Ezekiyeli kuti wakafiski kupharazgiya ŵanthu a mtafu?
8 Yehova wangulamula Ezekiyeli kuti: “Yiwi mwana wa munthu, soka kuti ndilongoro nawi.” Yehova wati wakambiya Ezekiyeli kuti wasoki, iyu wangupaskika nthazi zo wakhumbikiyanga kuti wayuki. Ezekiyeli wangulemba kuti: “Mzimu unguza mwaku ini, ndipu unguchitiska kuti ndimi.” (Ezeki. 2:1, 2) Pavuli paki ndipuso pa uteŵeti waki wosi, Ezekiyeli walongozgekanga ndi “janja” laku Chiuta, kung’anamuwa mzimu wakupaturika waku Chiuta. (Ezeki. 3:22; 8:1; 33:22; 37:1; 40:1) Mzimu waku Chiuta ungumupaska nthazi Ezekiyeli kuti wafiski uteŵeti waki wa kupharazgiya ŵanthu wo ŵenga ‘a mtafu ndipuso a mtima unononu.’ (Ezeki. 3:7) Yehova wangukambiya Ezekiyeli kuti: “Ndachitiska kuti chisku chaku chiŵi chinononu nge visku vawu ndipuso ndachitiska kuti pachisku chaku paŵi panononu nge pavisku vawu. Ndachitiska kuti chisku chaku chiŵi nge dayamondi, kuti chiŵi chinononu kuluska mwa wa sangalawi. Ungaŵawopanga cha pamwenga kuchita mantha chifukwa cha visku vawu.” (Ezeki. 3:8, 9) Yapa, venga nge kuti Yehova wakambiya Ezekiyeli kuti: ‘Ungazomerezanga cha kuti mtafu wa ŵanthu ukugongowesi. Ini ndikukholesengi.’
9 Pavuli paki, mzimu waku Chiuta ungumunyamuwa Ezekiyeli ndi kuluta nayu kuchigaŵa cho watingi wakapharazgengeku. Ezekiyeli wangulemba kuti: “Janja laku Yehova lingwamba kugwira ntchitu mwanthazi paku ini.” Vingumutole sabata yamphumphu mchimi mwenuyu kuti wavwisi uthenga wo wakhumbikanga kuchipharazga kuti wakawupharazgi ndi mtima wosi. (Ezeki. 3:14, 15) Pavuli paki Yehova wangumukambiya kuti waluti kuchidika ko “mzimu ungusere mwaku [iyu].” (Ezeki. 3:23, 24) Yapa, Ezekiyeli wenga wakunozgeka kwamba uteŵeti waki.
MZIMU WAKU CHIUTA UTITIPASKA NTHAZI MAZUŴA NGANU
Nge mo venge ndi Ezekiyeli, kumbi ndi vinthu wuli vo vititiwovya kufiska uteŵeti widu? (Wonani ndimi 10)
10. Kumbi ntchinthu wuli cho chititiwovya kuti tifiski ntchitu yidu yakupharazga, ndipu ntchifukwa wuli?
10 Kumbi ntchinthu wuli cho chititiwovya kuti tifiski ntchitu yidu yakupharazga? Kuti tisaniyi kwamuka titenere kuŵanaŵaniya so vo vinguchitikiya Ezekiyeli. Iyu wechendayambi kupharazga, mzimu waku Chiuta ungumupaska nthazi zo wakhumbikiyanga. Nge mo venge ndi Ezekiyeli, nasi tingafiska kupharazga pija asani mzimu waku Chiuta utitiwovya. Chifukwa wuli? Chifukwa chakuti Satana wachita nasi nkhondu kuti watilekesi kupharazga. (Chivu. 12:17) Ŵanthu anandi aŵanaŵana kuti Satana ngwanthazi ukongwa mwakuti tingafiska cha kulimbana nayu. Kweni kuziya mu ntchitu yidu yakuchitiya ukaboni titimuthereska! (Chivu. 12:9-11) Mu nthowa wuli? Asani tipharazga tilongo kuti titopa cha nthowa zo Satana wagwiriskiya ntchitu pakutiwofyeza. Ndipu nyengu yeyosi yo tipharazga Satana wathereskeka. Sonu kumbi tingakamba kuti ndi vinthu wuli vo vititiwovya kufiska ntchitu yidu yakupharazga chinanga kuti tisuskika? Yapa viwoneke limu kuti mzimu wakupaturika utitipaska nthazi kweniso kuti Yehova wakondwa nasi.—Mate. 5:10-12; 1 Petu. 4:14.
11. Kumbi mzimu waku Chiuta ungatiwovya wuli, nanga tingachita wuli kuti tilutirizgi kuwulonde?
11 Kumbi tisambiranji so asani tiŵanaŵaniya mo Yehova wangumupaskiya nthazi Ezekiyeli kuti wafiski kupharazga? Mzimu waku Chiuta ungatipaska nthazi zo tikhumbikiya kuti tifiski kumalana ndi suzgu yeyosi yo takumana nayu mu uteŵeti. (2 Akori. 4:7-9) Sonu kumbi tikhumbika kuchitanji kuti tilutirizgi kulonde mzimu waku Chiuta? Titenere kuwupempha mwachitatata te ndi chigomezgu kuti Yehova wamukengi mapempheru ngidu. Yesu wangusambiza akusambira ŵaki kuti: “Lutirizgani kupempha, . . . lutirizgani kupenja, . . . lutirizgani kugong’oska.” Ndipu Yehova waperekengi “mzimu wakupaturika ku ŵanthu wo [atimupempha].”—Luka 11:9, 13; Machi. 1:14; 2:4.
MAZU NGAKU CHIUTA NGANGUKHOLESA CHIVWANU CHAKU EZEKIYELI
12. Mwakukoliyana ndi Ezekiyeli 2:9–3:3, kumbi mpukutu ungutuliya pani, nanga mungulembekanji?
12 Kusazgiyapu pa mzimu waku Chiuta, Mazu ngaku Chiuta nangu ngangumuwovya so Ezekiyeli kuti waje ndi chivwanu chakukho kuti wafiski uteŵeti waki. Mu chiwona, Ezekiyeli wanguwona janja lo lingukoleze mpukutu. (Ŵerengani Ezekiyeli 2:9–3:3.) Kumbi mpukutu wenuwu ungutuliya pani? Kumbi mungulembekanji? Kumbi ungumuwovya wuli Ezekiyeli kuja ndi chivwanu chakukho? Tiyeni tiwoni. Mpukutu uwu ungutuliya ku mpandu waufumu waku Chiuta. Yehova watenere kuti wangutuma mungelu yumoza pa angelu anayi wo Ezekiyeli wanguwona pakwamba kuti wakamupaski mpukutu wenuwu. (Ezeki. 1:8; 10:7, 20) Mumpukutu uwu mwenga Mazu ngaku Chiuta, kung’anamuwa uthenga wacheruzgu wo Ezekiyeli wakhumbikanga kuchikambiya Ayuda akugaruka wo ŵenga ku ukapolu. (Ezeki. 2:7) Uthenga uwu ungulembeka kosikosi mumpukutu wenuwu.
13. Kumbi Yehova wangukambiya Ezekiyeli kuti wachitenji nawu mpukutu, nanga ntchifukwa wuli wanong’omiyanga?
13 Yehova wangukambiya mchimi waki kuti waryi mpukutu ndipu ‘wawuzazi mulufu laki.’ Ezekiyeli wanguvwiya ndipu wangurya mpukutu wosi. Kumbi chigaŵa cha chiwona ichi ching’anamuwanji? Ezekiyeli wakhumbikanga kuwuvwisa umampha ukongwa uthenga wakuti wakapharazgi. Iyu wakhumbikanga kuwugomezga uthenga wenuwu kuti umuchiski kuchipharazga. Pavuli paki chinthu chinyaki chakuziziswa chinguchitika. Ezekiyeli wanguwona kuti mpukutu wenuwu “wanong’omiyanga nge uchi.” (Ezeki. 3:3) Chifukwa wuli? Kwaku Ezekiyeli mwaŵi wakumiya Yehova chenga chinthu chakunong’ome pamwenga kuti chakukondwesa. (Salimo 19:8-11) Iyu wanguwonga ukongwa kuti Yehova wangumusankha kuti wamuteŵete nge mchimi waki.
14. Kumbi ndi vinthu wuli vo vinguwovya Ezekiyeli kuja wakunozgeka kwambapu uteŵeti waki?
14 Pavuli paki, Yehova wangukambiya Ezekiyeli kuti: “Sunga mumtima ndi kuvwisiya mazu ngangu ngosi ngo nditikukambiya.” (Ezeki. 3:10) Yapa, Yehova wakambiyanga Ezekiyeli kuti wakumbukengi uthenga wo wenga mumpukutu kweniso kuŵanaŵaniyapu mwakuphwere. Asani Ezekiyeli wachita venivi chivwanu chaki chajanga chakukho. Mpukutu wenuwu ungumuwovya so kukumbuka uthenga wo watingi wakapharazgiyengi ŵanthu. (Ezeki. 3:11) Ezekiyeli wati wawuvwisa umampha uthenga waku Chiuta ndipuso kuwugomezga, iyu wenga wakunozgeka kwambapu kupharazga kweniso kulutirizga kugwira ntchitu yeniyi mpaka pakumaliya.—Yeruzgiyani ndi Salimo 19:14.
MAZU NGAKU CHIUTA NGAKHOLESA CHIVWANU CHIDU MAZUŴA NGANU
15. Kumbi tikhumbika ‘kusunganji mumtima’ mwidu kuti tikunthiyengepu?
15 Kuti tikunthiyengepu pa ntchitu yakupharazga, nasi tikhumbika kuzomereza Mazu ngaku Chiuta kuti ngalutirizgi kukholesa chivwanu chidu. Titenere ‘kusunga mumtima’ vosi vo Yehova watitikambiya. Mazuŵa nganu, Yehova walongoro nasi kuziya mu Mazu ngaki Bayibolu. Kumbi tingachita wuli kuti Mazu ngaku Chiuta ngalutirizgi kusintha maŵanaŵanu ngidu, mo tivwiya kweniso vo tikhumba?
16. Kumbi titenere kuchitanji nangu Mazu ngaku Chiuta, nanga tingachita wuli kuti tingavwisi?
16 Asani titurya chakurya ndipuso chigayika, liŵavu lidu lija lanthazi. Mwakuyanana waka, asani tisambira Mazu ngaku Chiuta kweniso kuŵanaŵaniyapu chivwanu chidu chija chakukho. Venivi ndivu tisambira pa chiwona cha mpukutu. Yehova wakhumba kuti ‘tizazi lufu lidu’ ndi Mazu ngaki, kung’anamuwa kungavwisa umampha mazu ngenanga. Tingachita venivi asani tipemphera, tiŵerenga kweniso kulunguruka vo taŵerenga. Chakwamba, tipemphera kuti tinozgekeresi mtima widu kuti tisambiri maŵanaŵanu ngaku Chiuta. Pavuli paki tiŵerenga mavesi nga mu Bayibolu ndipu tituma dankha kuti tilunguruki vo taŵerenga. Kumbi ndi vinthu wuli vo vichitika pakumaliya paki? Asani tilunguruka, titingavwisa umampha ukongwa Mazu ngaku Chiuta ndipu venivi vitovya kuti chivwanu chidu chikho.
17. Ntchifukwa wuli tikhumbika kulunguruka pa vo taŵerenga mu Bayibolu?
17 Ntchifukwa wuli kuŵerenga Bayibolu kweniso kulunguruka pa vo taŵerenga nkhwakukhumbika? Chifukwa kuchita venivi kutitipaska nthazi kuti tipharazgengi uthenga wa Ufumu kweniso vazakutiwovya pa nyengu yo titenere kuti tazamupharazga uthenga wanthazi wacheruzgu kunthazi. Ndipuso asani tiŵanaŵaniya mijalidu yakukondwesa yaku Yehova ubwezi widu ndi iyu ujengi wakukho ukongwa. Venivi vitiwovyengi kukondwa ndi chinthu chinyaki chakunong’ome pamwenga chakukondwesa ukongwa, kung’anamuwa chimangu chamumtima ndipuso kukhorwa.—Salimo 119:103.
VO VITITIWOVYA KUKUNTHIYAPU
18. Kumbi ŵanthu wo titiŵapharazgiya azamuziŵanji, ndipu ntchifukwa wuli?
18 Isi te achimi cha nge mo Ezekiyeli wenge. Chinanga kuti ve viyo, tikhumbisiska kulutirizga kupharazga uthenga waku Yehova wo wakuwulemba mu Mazu ngaki, mpaka po iyu wakambiya kuti tileki kupharazga. Asani nyengu ya cheruzgu yafika, ŵanthu a muchigaŵa cho tipharazgaku azamuŵavi chifukwa chakuvwika chakukambiya kuti angulonde cha uthenga wakutcheŵeska pamwenga kuti Chiuta wanguŵatoliyaku kanthu cha. (Ezeki. 3:19; 18:23) Mumalu mwaki, yiwu azamuziŵa kuti uthenga wo tapharazganga wenga wakutuliya kwaku Chiuta.
19. Kumbi ndi vinthu wuli vo vititipaska nthazi kuti tifiski uteŵeti widu?
19 Kumbi ndi vinthu wuli vo vititipaska nthazi kuti tifiski uteŵeti widu? Ndi vinthu vitatu vo vingupaska nthazi Ezekiyeli. Tilutirizga kupharazga chifukwa tiziŵa kuti Yehova ndiyu watituma, mzimu wakupaturika waku Chiuta utitipaska nthazi kweniso Mazu ngaku Chiuta ngakholesa chivwanu chidu. Ndipu chifukwa chakuti Yehova watitiwovya, tichiskika kulutirizga kuchita uteŵeti widu kweniso kukunthiyapu “mpaka pakumaliya.”—Mate. 24:13.
SUMU 65 Luta Panthazi!
a Mu nkhani iyi, tikambiskanengi vinthu vitatu vo vinguwovya mchimi Ezekiyeli kuti wafiski ntchitu yaki yakupharazga. Tikambiskanengi mo Yehova wanguwovye mchimi waki ndipu venivi vitiwovyengi kusimikiza kuti nasi Yehova watiwovyengi kufiska uteŵeti widu.