NKHANI YAKUSAMBIRA YA NAMBALA 47
Mungazomerezanga Chechosi Cha Kuti Chikupatuskeni Kwaku Yehova
“Ini ndithemba yimwi, yimwi Yehova.”—SALIMO 31:14.
SUMU 122 Jani Akukho, Ambula Kunderezeka!
VO TISAMBIRENGI MU NKHANI IYI a
1. Kumbi tiziŵa wuli kuti Yehova wakhumba kundere kufupi ndi isi?
YEHOVA watitipempha kuti tindere kufupi ndi iyu. (Yako. 4:8) Iyu wakhumba kuja Chiuta widu, Awusefwi ndipuso Mubwezi widu. Iyu wamuka mapempheru ngidu ndipuso watitiwovya asani takumana ndi masuzgu. Kweniso wagwiriskiya ntchitu gulu laki kuti watisambizi ndipuso kutivikiliya. Kweni kumbi tikhumbika kuchitanji kuti tindere kufupi ndi Yehova?
2. Kumbi tingachita wuli kuti tindere kufupi ndi Yehova?
2 Tingandere kufupi ndi Yehova asani tipemphera kwaku iyu ndipuso kuŵerenga Mazu ngaki ndi kulunguruka pa vo taŵerenga. Asani tichita venivi, titimuyanja ukongwa Yehova ndipuso kumuwonga. Ivi vititiwovya so kuti timuvwiyengi kweniso kumuthamika ndipu iyu ngwakwenere nadi kumuchitiya venivi. (Chivu. 4:11) Asani tamuziŵa umampha ukongwa Yehova, timuthembengi ukongwa kweniso kuthemba gulu laki lo watipaska kuti litiwovyengi.
3. Kumbi Dyaboli wachita wuli kuti watipatuski kwaku Yehova, nanga ndi vinthu wuli vo vingatiwovya kuti tileki kumujowo Chiuta widu kweniso gulu laki? (Salimo 31:13, 14)
3 Kweni Dyaboli watesesa kuti watipatuski kwaku Yehova, ukongwa asani takumana ndi masuzgu. Kumbi iyu wachita wuli venivi? Iyu watesesa kutichitiska kuti kamana ndi kamana tileki kuthemba Yehova ndipuso gulu laki. Kweni tingavikhwecha viŵana vaki. Asani chivwanu chidu ntchakukho ndipuso titimuthemba ukongwa Yehova, tingamujowo cha Chiuta widu ndipuso gulu laki.—Ŵerengani Salimo 31:13, 14.
4. Kumbi tikambiskanengenji mu nkhani iyi?
4 Mu nkhani iyi, tikambiskanengi masuzgu ngatatu ngo tingakumana nangu ngo ngangatuliya ku ŵanthu wo mbakaboni cha ndipu suzgu lelosi lingachitiska kuti tileki kuthemba Yehova kweniso gulu laki. Kumbi masuzgu ngenanga ngangatipatuska wuli kwaku Yehova? Nanga tingachita wuli kuti tilutirizgi kuja akugomezgeka kwaku Yehova ndipuso gulu laki?
ASANI TIKUMANA NDI MASUZGU
5. Kumbi masuzgu ngangachitiska wuli kuti tileki kuthemba Yehova ndipuso gulu laki?
5 Nyengu zinyaki, tingakumana ndi masuzgu nge kususkika ndi ŵanthu a mu banja lidu pamwenga kutuzgika ntchitu. Kumbi masuzgu ngenanga ngangachitiska wuli kuti tileki kuthemba gulu laku Yehova ndipuso kutipatuska kwaku Iyu? Asani takumana ndi masuzgu kwa nyengu yitali tingataya mtima ndipuso tingaguŵa. Asani vaŵa viyo, Satana wachitiska kuti tiŵanaŵanengi kuti Yehova watitiyanja cha. Dyaboli wakhumba kuti tiŵanaŵanengi kuti Yehova pamwenga gulu Laki ndiwu achitiska masuzgu ngo tikumana nangu. Venivi ndivu vinguchitikiya Ayisirayeli anyaki ku Ijipiti. Pakwamba, agomezganga kuti Yehova wangusankha Mozesi ndi Aroni kuti aŵafwatuwi ku ukapolu. (Eki. 4:29-31) Kweni pavuli paki, Farawo wati wachitiska kuti umoyu wawu uje wakusuzga ukongwa, angumba mulandu Mozesi ndi Aroni kuti ndiwu anguchitiska venivi ndipu anguŵakambiya kuti: “Mwachitiska kuti Farawo ndi ateŵeti ŵaki atiwoni kuti te aheni ndipu mwaŵika lipanga mujanja lawu kuti atibayi.” (Eki. 5:19-21) Yiwu anguŵamba mulandu ateŵeti akugomezgeka aku Chiuta. Venivi venga vakupaska chitima ukongwa! Asani mwakunthiyapu masuzgu kwa nyengu yitali, kumbi mungachita wuli kuti mulutirizgi kumuthemba ukongwa Yehova kweniso gulu laki?
6. Kumbi tisambiranji kwa mchimi Habakuku pa nkhani ya kukunthiyapu masuzgu? (Habakuku 3:17-19)
6 Mumukambiyengi Yehova vosi vo ve mumtima winu ndipu mumuthembengi kuti wakuwovyeningi. Mchimi Habakuku wangukumana ndi masuzgu nganandi. Ndipu nyengu yinyaki wangukayikiya asani Yehova wamuŵanaŵaniyanga nadi. Mwaviyo, iyu wangukambiya Yehova mo wavwiyanga kuti: “Yimwi Yehova kumbi ndiliriyengi chovyu mpaka zuŵanji, kwambula yimwi kuvwa? . . . Ntchifukwa wuli mulekere kukandirizgana?” (Haba. 1:2, 3) Yehova wangumuka pempheru lakutuliya pasi pa mtima la mteŵeti waki wakugomezgeka. (Haba. 2:2, 3) Habakuku wati waŵanaŵaniya ukongwa mo Yehova wangutaskiya ŵanthu ŵaki, wangwamba so kukondwa. Iyu wangusimikiza kuti Yehova wamuŵanaŵaniyanga kweniso kuti wamuwovyengi kukunthiyapu mayeseru ngengosi. (Ŵerengani Habakuku 3:17-19.) Kumbi isi tisambiranjipu? Asani mwakumana ndi masuzgu, pempherani kwaku Yehova ndipu mukambiyeni mo muvwiya. Pavuli paki muthembeni kuti wakuwovyeningi. Asani mwachita viyo, mungasimikiza kuti Yehova wakupaskeningi nthazi kuti mukunthiyepu. Ndipu asani mwawona kuti iyu watikuwovyani mumugomezgengi ukongwa.
7. Kumbi mubali waki waku Shirley wakhumbanga kuti waleki kuchitanji, nanga ndi vinthu wuli vo vingumuwovya kuti walutirizgi kugomezga Yehova?
7 Lutirizgani kuchita vinthu vauzimu. Venivi ndivu vinguwovya mzichi Shirley wa ku Papua New Guinea wati wakumana ndi masuzgu. b Banja laku Shirley lenga likavu ndipu nyengu zinyaki asuzgikanga kusaniya chakurya chakukwana. Mubali waki munyaki, wanguyesesa kumugongowesa kuti waleki kuthemba Yehova. Iyu wangumukambiya kuti: “Ukamba kuti mzimu wakupaturika utikuwovya, sonu chepani yapa chovyu? Banja laku leche likavu, utaya ŵaka nyengu ndi va kupharazga.” Shirley wangukamba kuti: “Ndingujifumba kuti: ‘Kumbi Chiuta watitiŵanaŵaniya pamwenga cha?’ Mwaviyo, nyengu yeniyo ndingupemphera kwaku Yehova ndipu ndingumukambiya vosi vo ndaŵanaŵananga. Ndinguleka cha kuŵerenga Bayibolu kweniso mabuku ngidu ndipu ndingulutirizga kupharazga kweniso kuwungana.” Pati pajumpha nyengu yimanavi, iyu wanguwamu kuti Yehova waphwere banja laki. Banja laki lagonanga ndi nja cha ndipu yiwu akondwanga. Shirley wangukamba kuti: “Ndinguwona kuti Yehova wamukanga mapempheru ngangu.” (1 Timo. 6:6-8) Asani namwi mulutirizga kuchita vinthu vauzimu, muzomerezengi cha kuti masuzgu pamwenga kukayika vikupatuskeni kwaku Yehova.
ASANI ABALI WO ATITILONGOZGA ATOMBOZGEKA
8. Kumbi ndi vinthu wuli vo vingachitikiya abali wo alongozga mugulu laku Yehova?
8 Arwani ŵidu awandisa maboza pamwenga kukamba vinthu vo vingachitiska kuti tikayikiyengi abali wo alongozga mugulu laku Yehova. Yiwu achita venivi kuziya pa wayilesi, pa TV, mumanyuzipepala kweniso pa intaneti. (Salimo 31:13) Abali anyaki amangika kweniso kumbika mulandu. Venivi ndivu so vinguchitikiya abali anyaki a mu nyengu ya akutumika, wakutumika Paulo ŵati amumba mulandu waboza ndipuso kumumanga. Kumbi yiwu anguchita wuli?
9. Kumbi Akhristu anyaki anguchita wuli wakutumika Paulo wati waŵikika mujeri?
9 Akhristu anyaki a mu nyengu ya akutumika, anguleka kovya wakutumika Paulo wati waŵikika mujeri ku Roma. (2 Timo. 1:8, 15) Chifukwa wuli? Kumbi yiwu achitanga nayu soni Paulo chifukwa chakuti ŵanthu amuwonanga nge wakuchita vinthu viheni? (2 Timo. 2:8, 9) Pamwenga awopanga kuti nawu so atombozgekengi? Kwali yiwu ŵenga ndi chifukwa wuli chakuchitiya venivi, kweni ŵanaŵaniyani mo wakutumika Paulo watenere kuti wanguguŵiya. Iyu wangukunthiyapu masuzgu nganandi ndipu wanguŵika umoyu waki pangozi chifukwa chaku yiwu. (Machi. 20:18-21; 2 Akori. 1:8) Tikhumbika cha kuja nge ŵanthu wo anguleka kovya Paulo pa nyengu yo wakhumbikiyanga chovyu! Kumbi titenere kukumbukanji asani abali wo alongozga atombozgeka?
10. Kumbi titenere kukumbukanji asani abali wo alongozga atombozgeka, nanga ntchifukwa wuli?
10 Tikumbukengi chifukwa cho titombozgeke kweniso yo wachitiska venivi. Lemba la 2 Timote 3:12 likamba kuti: “Ŵanthu wosi wo akhumba kuja ndi umoyu wakujipereka kwaku Chiuta mwakukoliyana ndi Khristu Yesu, nawu azamutombozgeka.” Mwaviyo, titenere cha kuzizwa kuti Satana walimbana ukongwa ndi abali wo alongozga. Iyu wakhumba kuti abali ŵenaŵa aleki kuja akugomezgeka kwaku Yehova kweniso wakhumba kuti tichitengi mantha.—1 Petu. 5:8.
Chinanga kuti Paulo wenga mukayidi, Onesiforo wanguchita chiganga kuti wamuwovyi. Mazuŵa nganu, abali ndi azichi widu atovya Akhristu anyawu wo amangika nge mo chithuzi ichi chilongole (Wonani ndimi 11-12)
11. Kumbi tisambiranji kwaku Onesiforo? (2 Timote 1:16-18)
11 Lutirizgani kovya abali wo alongozga ndipu mugomezgekengi kwaku yiwu. (Ŵerengani 2 Timote 1:16-18.) Mkhristu munyaki wa mu nyengu ya akutumika zina laki Onesiforo wanguchita vinthu mwakupambana ndi Akhristu anyaki. Paulo wati waŵikika mujeri ‘iyu wanguchita soni cha chifukwa cha ukayidi waku Paulo.’ Mumalu mwaki, Onesiforo wangumupenja Paulo ndipu wati wamusaniya wanguyesesa kumuwovya. Pakuchita venivi Onesiforo wanguŵika umoyu waki pangozi. Kumbi isi tisambiranjipu? Tingazomerezganga cha kuti kopa ŵanthu kutitondekesi kovya abali ŵidu wo atombozgeka. Mumalu mwaki, tiyesesengi kuŵawovya. (Nthanthi 17:17) Yiwu akhumbika kuŵawovya kweniso kuŵayanja.
12. Kumbi tisambiranji kwa abali ndi azichi ŵidu a ku Russia?
12 Ŵanaŵaniyani mo abali ndi azichi ŵidu ku Russia atovye Akhristu anyawu wo ŵe mujeri. Asani anyaki atiŵamba mulandu, abali ndi azichi anyaki aluta kukhoti kuti akaŵachiski. Kumbi isi tisambiranjipu? Asani abali wo alongozga atiŵapusikiya vinthu viheni, amangika pamwenga kutombozgeka mungachitanga mantha cha. Muŵapempheriyengi, muphweriyengi ŵanthu a mu banja lawu kweniso musaniyengi nthowa zinyaki zo mungaŵawovye.—Machi. 12:5; 2 Akori. 1:10, 11.
ASANI TINYOZEKA
13. Kumbi kunyozeka kungachitiska wuli kuti tileki kuthemba Yehova ndipuso gulu laki?
13 Abali ŵidu wo mbakaboni cha, wo tigwira nawu ntchitu pamwenga wo tisambira nawu sukulu, angatinyoza chifukwa chakuti tipharazga pamwenga chifukwa chakuti tivwiya marangu ngaku Yehova. (1 Petu. 4:4) Yiwu angakamba kuti: “Yimwi pe nditikuyanjani kweni chisopa chinu chinonopesa ukongwa vinthu ndipuso ntchakumaliyapu.” Anyaki angatinena ndi mo tichitiya vinthu ndi ŵanthu akusezgeka ndipu angakamba kuti: “Simukamba kuti mutanja anyinu yimwi, sonu chanju chinu chepani?” Venivi vingachitiska kuti tiyambi kukayika asani marangu ngaku Yehova ngamampha nadi. Tingayamba kujifumba kuti: ‘Kumbi Yehova wakhumba kuti ndichitengi vinthu vo ndingatondeka kufiska? Kumbi gulu laki likhwimisa ukongwa vinthu?’ Asani venivi vitikuchitikiyani, kumbi mungachita wuli kuti mulutirizgi kuthemba Yehova kweniso gulu laki?
Yobu wangukana kugomezga maboza nga ŵanthu wo amunyozanga wo apusikiziyanga kuti ndi mabwezi ngaki. Mumalu mwaki iyu wangusimikiza kuti walutirizgengi kuja wakugomezgeka kwaku Yehova (Wonani ndimi 14)
14. Kumbi titenere kuchita wuli asani ŵanthu anyaki atitinyoza chifukwa chakuti tivwiya marangu ngaku Yehova? (Salimo 119:50-52)
14 Muyesesengi kusunga marangu ngaku Yehova. Yobu wayesesanga kusunga marangu ngaku Yehova chinanga kuti amunyozanga chifukwa chakuchita venivi. Yumoza mwa mabwezi ngaki ngaboza wanguyesesa kumupusika Yobu kuti wagomezgengi kuti Chiuta walivi navu ntchitu vo Yobu wachitanga, chinanga vingaŵa vamampha pamwenga cha. (Yobu 4:17, 18; 22:3) Kweni Yobu wangukana kugomezga maboza ngenanga. Iyu wanguziŵa kuti marangu ngaku Yehova nga chamampha ndi chiheni ngamampha ndipu wangusimikiza kuti wangasungengi. Iyu wanguzomerezga cha kuti ŵanthu anyaki amutondekeski kuja wakugomezgeka. (Yobu 27:5, 6) Kumbi isi tisambiranjipu? Mungazomerezganga cha kuti kunyozgeka kukuchitiskeni kuti mukayikiyengi marangu ngaku Yehova. Ŵanaŵaniyani vo vakuchitikiyani pa umoyu winu. Tikayika cha kuti kananandi ŵaka mwajiwone mwija kuti marangu ngaku Yehova ngamampha ndipuso ngakovya. Mwaviyo, simikizgani kuti nyengu zosi mujengi kuchigaŵa cha gulu lo livwiya marangu ngaku Yehova. Ndipu kwali ŵanthu angakunyozgani wuli, muzomerezgengi cha kuti venivi vikupatuskeni kwaku Yehova.—Ŵerengani Salimo 119:50-52.
15. Ntchifukwa wuli Brizit wanyozekanga?
15 Tiyeni tiwoni vo vinguchitikiya mzichi Brizit wa ku India. Ŵanthu a mu banja laki amunyozanga chifukwa cha vo wagomezga. Pati pajumpha nyengu yimanavi kutuliya po wangubatizikiya mu 1997, mulumu waki yo wenga kaboni cha ntchitu yingumumaliya. Mwaviyo, Brizit wangusankha kuti iyu ndi ŵana ŵaki akajengi ndi apapi a mulumu waki mu tawuni yinyaki. Kweni Brizit wangukumana ndi masuzgu nganyaki ngakulu ukongwa. Chifukwa chakuti mulumu waki angumutuzga ntchitu, iyu wakhumbikanga kugwira ntchitu kwa maora nganandi kuti waphwere banja laki. Kusazgiyapu yapa, mpingu wa kufupi ndi ko wajanga wenga kutali ukongwa mtunda wa makilomita pafufupi 350. Vachitima kuti abali a mulumu waki amususkanga chifukwa cha vo wagomezganga. Kweni vinthu vingufika paheni ukongwa mwakuti Brizit ndi banja laki akhumbikanga kusama so. Pavuli paki, mulumu waki wangufwa mwamabuchibuchi. Pati pajumpha nyengu, mwana waki wachitatu munthukazi wangufwa ndi khansa we ndi vyaka 12. Chakupaska so chitima ukongwa ntchakuti abali ŵaki aku Brizit angumumba mulandu chifukwa cha vo vinguchitika. Yiwu angukamba kuti asani iyu wenga Kaboni waku Yehova cha, masoka ngosi ngo wangukumana nangu ngatingi ngachitikengi cha. Chinanga kuti venga viyo, iyu wangulutirizga kuthemba Yehova ndipuso kukoliyana ndi gulu laki.
16. Kumbi Brizit wangutumbikika wuli chifukwa cha kulutirizga kuthemba Yehova ndipuso gulu laki?
16 Chifukwa chakuti Brizit wajanga kutali ukongwa ndi mpingu, wakuwonere dera wangumuchiska kuti wapharazgengi muchigaŵa chaki kweniso kuti wachitengi maunganu pa nyumba paki. Chinanga kuti pakwamba wanguwona kuti venivi vakusuzga ukongwa kweni wangulondo ulongozgi wo wangupaskika. Iyu wapharazganga uthenga wamampha, wachitanga maunganu pa nyumba paki ndipuso wachitanga kusopa kwa pabanja ndi ŵana ŵaki sabata yeyosi. Kumbi ndi vinthu wuli vo vinguchitika pavuli paki? Iyu wangwamba kusambira Bayibolu ndi ŵanthu anandi ndipu anandi mwaku yiwu angubatizika. Mu 2005 Brizit wangwamba kuchita upayiniya wa nyengu zosi. Iyu wangutumbikika chifukwa cha kuthemba Yehova ndipuso kukoliyana ndi gulu. Ŵana ŵaki ateŵete Yehova mwakugomezgeka ndipu pasonu panu kwenuku kwe mipingu yiŵi. Brizit wasimikiza kuti Yehova wangumupaska nthazi kuti wakunthiyepu masuzgu kweniso kunyozeka ndi ŵanthu a mu banja laki.
LUTIRIZGANI KUJA AKUGOMEZGEKA KWAKU YEHOVA NDI GULU LAKI
17. Kumbi tisimikiza mtima kuchitanji?
17 Satana wakhumba kuti tigomezgengi kuti Yehova watitijowo asani takumana ndi masuzgu kweniso kuti Yehova wangatiwovya cha kuti tilutirizgi kuja akugomezgeka ku gulu laki. Iyu wakhumba kuti tichitengi mantha asani abali wo alongozga atiŵapusikiya vinthu viheni, atombozgeka pamwenga kuŵikika mujeri. Ndipuso iyu wagwiriskiya ntchitu ŵanthu kuti atinyozengi ndi chilatu chakuti tileki kuvwiya marangu ngaku Yehova ndipuso kugomezga gulu Laki. Chinanga kuti ve viyo, mauryarya ngaki titingaziŵa umampha ndipu wangatipusisa cha. (2 Akori. 2:11) Lutirizgani kukana maboza ngaku Satana ndipuso lutirizgani kuja akugomezgeka kwaku Yehova ndi gulu Laki. Mukumbukengi kuti Yehova wakujowoningipu cha. (Salimo 28:7) Mwaviyo, mungazomerezganga chechosi cha kuti chikupatuskeni kwaku Yehova!—Aro. 8:35-39.
18. Kumbi tazamukambiskananji mu nkhani ya sabata yamawa?
18 Mu nkhani iyi, takambiskana masuzgu ngo tingakumana nangu ngakutuliya ku ŵanthu wo Mbakaboni cha. Kweni masuzgu ngakutuliya kwa abali ndi azichi, ngangachitiska so kuti tileki kuthemba Yehova ndi gulu laki. Kumbi tingamalana nangu wuli masuzgu ngenanga? Tazamusambira venivi mu nkhani yakulondopu.
SUMU 118 “Tisazgiyeniku Chivwanu”
a Kuti tikunthiyengepu mwakugomezgeka tikhumbika kulutirizga kuthemba Yehova kweniso gulu laki. Dyaboli wagwiriskiya ntchitu mayeseru kuti tileki kuthemba Yehova. Nkhani iyi yikonkhoskengi vinthu vitatu vo Dyaboli wachita kweniso vo tingachita kuti tilutirizgi kuja akugomezgeka kwaku Yehova ndipuso gulu laki.
b Mazina nganyaki ngasinthika.