NKHANI YAKUSAMBIRA YA NAMBALA 42
Kumbi Tingaŵawovya Wuli Ŵanthu wo Tisambira Nawu Bayibolu Kuti Abatiziki?—Chigaŵa Chachiŵi
“Nyengu zosi uphweriyengi ndi vo uchita ndipuso vo usambiza.”—1 TIM. 4:16.
SUMU 77 Ukweru mu Charu cha Mdima
VO TISAMBIRENGI MU NKHANI IYI *
1. Kumbi tiziŵa wuli kuti ntchitu yakusambiza ŵanthu kuti aje akusambira, ndi ntchitu yakutaska umoyu wa ŵanthu?
KUSAMBIZA ŵanthu kuti aje akusambira, ndi ntchitu yakutaska umoyu wa ŵanthu! Kumbi tiziŵa wuli venivi? Pa nyengu yo Yesu waperekanga dangu lo le pa Mateyu 28:19, 20, wangukamba kuti: “Lutani mukasambizengi ŵanthu . . . kuti aje akusambira . . . , mukaŵabatizengi.” Ntchifukwa wuli kubatizika nkhwakukhumbika? Kuti munthu wazitaskiki wakhumbika kubatizika. Munthu yo wakhumba kubatizika watenere kugomezga kuti wangazitaskika chifukwa chakuti Yesu wakutifwiya kweniso wakuyuskika. Ndichu chifukwa chaki wakutumika Peturo wangukambiya Akhristu anyaki kuti: “Ubatizu . . . utikutaskani sonu chifukwa chakuyuskika kwaku Yesu Khristu.” (1 Petu. 3:21) Mwaviyo, asani munthu wabatizika, wangaŵa ndi chivwanu chakuti wazamutaskika.
2. Kumbi lemba la 2 Timote 4:1, 2, lititiwovya wuli pa ntchitu yidu yakusambiza ŵanthu?
2 Tikhumbika ‘kuŵasambiza umampha’ ŵanthu kuti aje akusambira. (Ŵerengani 2 Timote 4:1, 2.) Chifukwa wuli? Chifukwa Yesu wakutilamula kuti: “Lutani mukasambizengi ŵanthu . . . kuti aje akusambira ŵangu . . . , mukaŵasambizengi.” Wakutumika Paulo wangukamba kuti tikhumbika ‘kulutirizga’ kugwira ntchitu yeniyi, ‘pakuti asani tachita viyo, tijitaskengi taŵeni ndipuso titaskengi wo atuvwa vo tisambiza.’ Kuti watiwovyi, Paulo wangukamba so kuti: ‘Nyengu zosi tiphweriyengi ndi vo tichita ndipuso vo tisambiza.’ (1 Timo. 4:16) Mwaviyo, tikhumbika kuŵasambiza umampha ŵanthu kuti aje akusambira.
3. Kumbi mu nkhani iyi tikambiskanengenji pa nkhani yakuchitiska masambiru nga Bayibolu?
3 Tisambiza ŵanthu mamiliyoni nganandi uneneska wa mu Bayibolu. Kweni nge mo tingusambiriya sabata yamala, tikhumbika kuziŵa vo tingachita kuti tiwovyi ŵanthu anandi wo tisambira nawu, kuti abatiziki ndi kuja akusambira aku Yesu Khristu. Mu nkhani iyi, tikambiskanengi vinthu vinyaki vinkhondi vo msambizi wakhumbika kuchita kuti wawovyi yo wasambira nayu kuti waluti panthazi ndi kubatizika.
MUGWIRISKIYENGI NTCHITU BAYIBOLU PAKUSAMBIZA
Pemphani mupharazgi walusu kuti wakuwovyeni kusazgiyaku lusu linu kuti mugwiriskiyengi ntchitu ukongwa Bayibolu pakusambiza (Wonani ndimi 4-6) *
4. Ntchifukwa wuli msambizi wakhumbika kukonkhoska fundu zinandi cha pa nyengu yo wachitiska sambiru? (Wonani mazu ngamumphata.)
4 Titingayanja ukongwa Mazu ngaku Chiuta ngo tisambiza ŵanthu. Venivi vingachitiska kuti timukonkhoske vinthu vinandi vo titanja munthu yo tisambira nayu. Chinanga kuti ve viyo, munthu wakhumbika cha kukonkhoska vinthu vinandi pa nyengu yo wachitiska Sambiru la Chigongwi cha Alinda, Sambiru la Bayibolu la Mpingu pamwenga asani wasambira Bayibolu ndi munthu. Mwaviyo, kuti msambizi wagwiriskiyengi ntchitu vo Bayibolu lisambiza, watenere cha kukonkhoska fundu zinandi. Kweniso wakhumbika cha kukonkhoska chechosi chakukwaskana ndi nkhani yinyaki ya mu Bayibolu yo waziŵa. * (Yoha. 16:12) Ŵanaŵaniyani fundu za mu Bayibolu zo mwaziŵanga pa nyengu yo mwabatizikanga, ndi zo muziŵa sonu. Panyaki pa nyengu yeniyi, mwaziŵanga waka visambizu vakwamba va mu Bayibolu. (Ahe. 6:1) Pajumpha vyaka vinandi kuti muziŵi fundu zosi zo muziŵa sonu. Mwaviyo, mungamusambizanga vinthu vinandi cha pa nyengu yimoza munthu yo musambira nayu.
5. (a) Mwakukoliyana ndi 1 Atesalonika 2:13, kumbi tikhumba kuti munthu yo tisambira nayu waziŵenji? (b) Kumbi tingamuchiska wuli munthu yo tisambira nayu kuti wakambengi vinthu vo wasambira?
5 Tikhumba kuti munthu yo tisambira nayu waziŵengi kuti vo wasambira vituliya mu Mazu ngaku Chiuta. (Ŵerengani 1 Atesalonika 2:13.) Kumbi tingachita wuli venivi? Mumuchiskengi yo musambira nayu kuti wakambengi vo wasambira. Mumalu mwakuti nyengu zosi mumukonkhoskiyengi vo Bayibolu likamba, mumupemphengi kuti wakukonkhoskiyeniku fundu zinyaki. Mumuwovyengi kuziŵa mo Mazu ngaku Chiuta ngangamuwovye pa umoyu waki. Mumufumbengi mafumbu ngo ngangamuwovya kuti wakonkhoski vo wavwa pa lemba lo waŵerenga. (Luka 10:25-28) Mwakuyeruzgiyapu, mungafumba kuti: “Kumbi lemba ili lakuwovyani kuziŵa jalidu nili laku Yehova?” “Kumbi fundu ya mu Bayibolu iyi yitikuwovyani wuli?” “Kumbi mutuvwa wuli ndi vo mwaŵerenga?” (Nthanthi 20:5) Kuziŵa waka vinthu vinandi ndiku kwakukhumbika cha. Kweni chakukhumbika ukongwa ndi mo watanjiya vo wasambira kweniso mo wativigwiriskiya ntchitu.
6. Ntchifukwa wuli tikhumbika kuluta ku sambiru lidu ndi mupharazgi yo we ndi lusu?
6 Asani muluta kuchichitiska sambiru, kumbi muluta ndi apharazgi wo ŵe ndi lusu pakusambiza? Asani ndimu muchitiya, muŵafumbengi mo mwachitiskiya sambiru kweniso kuti akukambiyeni asani pakusambiza mwagwiriskiyanga ntchitu ukongwa Bayibolu. Mukhumbika kuja akujiyuyuwa kuti musazgiyeku lusu pakusambiza. (Yeruzgiyani ndi Machitidu 18:24-26.) Pavuli paki, mungafumba mupharazgi yo mwayenda nayu kuti wakambi asani munthu yo musambira nayu, wavwisa vo wasambira. Mungachita so umampha kupempha munthu mwenuyu kuti wakachitiskengi sambiru linu asani yimwi mutuwengepu kwa sabata yimoza pamwenga kujumpha. Venivi viwovyengi kuti sambiru lileki kuma kweniso viwovyengi munthu yo musambira nayu kuwona kuti vo wasambira vakukhumbika. Mungaŵanaŵananga cha kuti ndi sambiru “linu” pe ndipu palivi so munthu munyaki yo wangachitiska sambiru lenili. Venivi vingalongo kuti mutimukhumbiya vamampha munthu yo musambira nayu ndipu mukhumba kuti walutirizgi kuziŵa vinandi vakukwaskana ndi uneneska.
MUSAMBIZENGI NDI MTIMA WOSI
Mukambiyengi munthu yo musambira nayu vakuyeruzgiyapu va ŵanthu anyaki, vo vingamuwovya kuziŵa mo wangagwiriskiya ntchitu fundu za mu Bayibolu (Wonani ndimi 7-9) *
7. Kumbi ntchinthu wuli cho chingawovya munthu yo musambira nayu kuti wakondwengi ndi vo wasambira?
7 Munthu yo musambira nayu wakhumbika kuwona kuti mutanja kweniso mugomezga uneneska wa mu Bayibolu wo musambiza. (1 Ate. 1:5) Venivi vingawovya kuti wakondwengi ndi vo wasambira. Asani mphakwenere, mungamukambiya mo kugwiriskiya ntchitu fundu za mu Bayibolu kwakuwovyiyani pa umoyu winu. Ivi vimuwovyengi kuziŵa kuti Bayibolu le ndi ulongozgi wamampha wo ungamuwovya.
8. Kumbi ndi vinthu wuli vinyaki vo mungachita kuti muwovyi munthu yo musambira nayu Bayibolu, ndipu mungachita wuli venivi?
8 Pa nyengu yo muchitiska sambiru la Bayibolu, mukambiyeni munthu yo musambira nayu vakuyeruzgiyapu va ŵanthu wo angukumanapu ndi masuzgu ngakuyanana ndi ngo iyu wakumana nangu kweniso mo angungamalisiya. Asani muluta kuchichitiska sambiru, mungachita umampha kuluta ndi mubali pamwenga mzichi yo wangumalanapu ndi suzgu linyaki. Pamwenga mungasaniya nkhani yakuchiska yakukwaskana ndi vo vinguchitikiya abali ndi azichi anyaki, pa jw.org, pa chigaŵa chakuti, “Bayibolu Lisintha Ŵanthu.” * Nkhani ndi mavidiyo vo ve pa chigaŵa chenichi, vingawovya munthu yo musambira nayu kuwona umampha wakugwiriskiya ntchitu fundu za mu Bayibolu pa umoyu waki.
9. Kumbi mungamuchiska wuli munthu yo musambira nayu kuti wakambiyengeku ŵanthu a mubanja laki kweniso mabwezi ngaki vo wasambira?
9 Asani yo musambira nayu wakuyirwa pamwenga kuto, kumbi mulumu pamwenga muwolu waki nayu wasambiraku? Asani ndi viyo cha, mupempheni kuti nayu waŵengepu pa sambiru. Muchiskengi yo musambira nayu kuti wakambiyengeku ŵanthu a mubanja laki kweniso mabwezi ngaki vo wasambira. (Yoha. 1:40-45) Kumbi mungamuchiska wuli? Mungamufumba mafumbu yanga: “Kumbi mungaŵakonkhoske wuli ŵanthu a mubanja linu fundu ya mu Bayibolu iyi?” pamwenga “Kumbi ndi lemba nili lo mungaŵerenge mubwezi winu kuti mulongo kuti fundu yeniyi njauneneska?” Asani muchitengi viyo, musambizengi munthu yo musambira nayu kuti waje msambizi. Pavuli paki, wangayamba kupharazga asani wafiska vo munthu yo wakhumba kuja mupharazgi wambula kubatizika watenere kufiska. Mungamufumba asani waziŵa munthu munyaki yo wakhumba kusambira Bayibolu. Asani walipu, mungasweranga cha kukumana nayu ndipu mukambiyeni kuti musambirengi nayu munthu mwenuyu. Mulongoni vidiyo ya mutu wakuti, Kumbi Sambiru la Bayibolo Lichitika Wuli? *
MUCHISKENGI MUNTHU YO MUSAMBIRA NAYU KUTI WAJE NDI MABWEZI MU MPINGU
Muchiskengi yo musambira nayu kuti wasaniyengi mabwezi mu mpingu (Wonani ndimi 10-11) *
10. Nge mo pakambiya pa 1 Atesalonika 2:7, 8, kumbi msambizi wangamuyezga wuli Paulo?
10 Abali ndi azichi wo asambiza ŵanthu Bayibolu, akhumbika kulongo kuti atiŵayanja ŵanthu wo asambira nawu. Muŵawonengi kuti pambula kuswera yiwu aŵengi abali ndi azichi. (Ŵerengani 1 Atesalonika 2:7, 8.) Ntchipusu cha kuleka kucheza ndi mabwezi ngo achezanga nangu ndi kusintha kuti ayambi kuteŵete Yehova. Mwaviyo, tikhumbika kuŵawovya kuti asaniyi mabwezi ngamampha mu mpingu. Mutenere kuja bwezi la munthu yo musambira nayu. Ndipu mukhumbika kucheza nayu pa nyengu yo musambira nayu pe cha, kweni chinanga mphavakuchitika vinyaki. Mungalongo kuti mutimuŵanaŵaniya ukongwa, asani mutimumbiya foni, kumulembe meseji pamwenga kuchimuwona.
11. Kumbi munthu yo tisambira nayu, tikhumba kuti wasaniyenji mu mpingu, nanga ntchifukwa wuli?
11 Nthanthi yinyaki ya Chitonga yikamba kuti: “Mwana walivi mweneku.” Nasi tingakamba kuti: “Vithemba mpingu wosi kuti munthu waje wakusambira.” Ndichu chifukwa chaki apharazgi alusu atovya ŵanthu wo asambira nawu kuti aziŵi abali ndi azichi mu mpingu. Ve viyo chifukwa abali ndi azichi ŵenaŵa, angawovya wakusambira kuti waje pa ubwezi wamampha ndi Yehova. Venivi vingaŵawovya wo asambira Bayibolu kuti akondwengi kucheza ndi ŵanthu aku Chiuta, wo angaŵachiska kuti aje akukho mwauzimu kweniso kuti akunthiyengepu masuzgu. Tikhumba kuti munthu weyosi yo tisambira nayu wajivwengi kuti ntchigaŵa cha mpingu kweniso kuti we mubanja lauzimu. Tikhumba so kuti wawonengi chanju cho abali ndi azichi ŵenachu mu mpingu. Ivi vingawovya kuti waleki kucheza ndi ŵanthu wo angamuchiska cha kuti wayanjengi Yehova. (Nthanthi 13:20) Asani ŵanthu wo wachezanga nawu kali aleka kucheza nayu, waziŵengi kuti wasaniyengi mabwezi ngamampha mugulu laku Yehova.—Mariko 10:29, 30; 1 Petu. 4:4.
MUMUKAMBIYENGI KUKHUMBIKA KWA KUJIPEREKA KWENISO KUBATIZIKA
Mukuluta kwa nyengu, munthu yo wasambira Bayibolu wangakhumbika kuchita vinthu vinyaki kuti wabatiziki!(Wonani ndimi 12-13)
12. Ntchifukwa wuli tikhumbika kukambiskana ndi munthu yo tisambira nayu nkhani ya kujipereka kweniso kubatizika?
12 Nyengu zosi mumukambiyengi mwambula kubisa munthu yo musambira nayu Bayibolu chifukwa cho watenere kujipereke kwaku Yehova ndi kubatizika. Tisambira Bayibolu ndi ŵanthu, kuti tiŵawovyi kuja pa ubwezi ndi Yehova ndipuso kubatizika. Asani pajumpha myezi yimanavi kutuliya po mwayambiya kusambira Bayibolu ndi munthu, ndipuso asani wayamba ŵaka kuwungana, iyu wakhumbika kuziŵa kuti tisambira nayu Bayibolu, kuti timuwovyi kwamba kuteŵete Yehova nge yumoza wa Akaboni Ŵaki.
13. Kumbi munthu yo wasambira Bayibolu wakhumbika kuchitanji kuti wafiki pa kubatizika?
13 Mukuluta kwa nyengu, munthu yo wakhumba kubatizika wangakhumbika kuchita vinthu vinyaki. Chakwamba, wakhumbika kuziŵa ndi kwanja Yehova kweniso kuvwana mwaku Iyu. (Yoha. 3:16; 17:3) Pavuli paki, waja pa ubwezi ndi Yehova kweniso ndi abali ndi azichi mu mpingu. (Ahe. 10:24, 25; Yako. 4:8) Waleka nkharu ziheni zo wachitanga ndi kulapa maubudi ngaki. (Machi. 3:19) Kweniso chivwanu chaki chitimuchiska kuti wakambiyengeku anyaki vo wagomezga. (2 Akori. 4:13) Pakumaliya paki, watijipereka kwaku Yehova ndipu walongo kujipereka kwaki mwakubatizika. (1 Petu. 3:21; 4:2) Zuŵa lenili lija lakukondwesa ukongwa kwaku weyosi. Pa nyengu yo munthu yo musambira nayu wachita vinthu vo vingamuwovya kuti wabatiziki, mumuwongengi kutuliya pasi pa mtima ndipu mumuchiskengi kuti walutirizgi kuchita vinthu venivi.
NYENGU ZOSI MUWONENGI MO WALUTIYA PANTHAZI
14. Kumbi msambizi wangachita wuli kuti wawoni asani munthu yo wasambira nayu waluta panthazi?
14 Titenere kuzikira asani titovya munthu kuti wajipereki kwaku Yehova mpaka kubatizika. Kweni pa nyengu yeniyi pe, tikhumbika so kuziŵa asani wakhumba nadi kuteŵete Yehova Chiuta. Mwakuyeruzgiyapu, kumbi muwona kuti yo musambira nayu watesesa kuvwiya marangu ngaku Yesu? Pamwenga wakhumba waka kusambira fundu zinyaki za mu Bayibolu?
15. Kumbi ndi vinthu wuli vo vingawovya msambizi kuziŵa asani munthu yo wasambira nayu waluta panthazi?
15 Nyengu zosi muziŵengi asani munthu yo musambira nayu waluta panthazi pamwenga cha. Mwakuyeruzgiyapu, kumbi walongo kuti watanja Yehova? Kumbi wapemphera kwaku Yehova? (Sumu 116:1, 2) Kumbi watanja kuŵerenga Bayibolu? (Sumu 119:97) Kumbi waungana nyengu zosi? (Sumu 22:22) Kumbi wakusintha nkharu yaki? (Sumu 119:112) Kumbi watiŵakambiyaku ŵanthu a mubanja laki kweniso mabwezi ngaki vinthu vo wasambira? (Sumu 9:1) Kuluska vosi, kumbi wakhumba kuja yumoza wa Akaboni aku Yehova? (Sumu 40:8) Asani munthu yo musambira nayu wachitapu kanthu cha pa vosi vo takambiskana, ziŵani chifukwa cho watondeke ndipu kambiskanani nayu nkhani yeniyi mwachanju, kweni mwambula kubisa. *
16. Kumbi ndi vinthu wuli vo vingachitiska kuti tileki kusambira ndi munthu?
16 Nyengu zosi muwonengi asani mphakwenere kulutirizga kusambira Bayibolu ndi munthu yo musambira nayu pamwenga cha. Jifumbeni kuti: ‘Kumbi munthu mwenuyu wanozgeke cha sambiru? Kumbi wakhumba cha kuwungana? Kumbi weche kuchita mijalidu yiheni? Kumbi weche kuluta kuchisopa chaki?’ Asani kwamuka kwa mafumbu yanga nkhwakuti hinya, ndikuti kulutirizga kusambira Bayibolu ndi munthu waviyo, kungayanana ndi kusambiza munthu mo wangasambiriya munyanja kweni wakhumba cha kuzumbwa! Asani munthu yo musambira nayu watanja cha vo wasambira kweniso wakhumba cha kusintha nkharu yaki, palivi chifukwa chakulutirizgiya kusambira nayu!
17. Mwakukoliyana ndi 1 Timote 4:16, kumbi abali ndi azichi wo asambiza ŵanthu Bayibolu akhumbika kuchitanji?
17 Tiwona kuti udindu widu wakusambiza ŵanthu kuti aje akusambira ngwakukhumbika ukongwa. Ndipu tikhumba kovya ŵanthu wo tisambira nawu kuti aluti panthazi ndi kubatizika. Ndichu chifukwa chaki titenere kugwiriskiya ntchitu Bayibolu asani tisambiza kweniso tisambizengi ndi mtima wosi. Tiŵachiskengi wo tisambira nawu kuti ajengi ndi mabwezi mu mpingu. Ndipu nyengu zosi tiŵakonkhoskiyengi kukhumbika kwa kujipereka kwaku Yehova ndi kubatizika. Kweniso nyengu zosi tiwonengi mo ŵanthu ŵenaŵa alutiya panthazi. (Wonani bokosi la mutu wakuti, “ Vo Msambizi Wakhumbika Kuchita Kuti Wawovyi Munthu yo Wasambira Nayu Kuti Wabatiziki,” lo le papeji 13.) Tikondwa kuti nasi tigwiraku ntchitu yakutaska umoyu yeniyi! Mwaviyo, tiyeni tiyesesi kuchita vosi vo tingafiska kuti tiwovyi ŵanthu wo tisambira nawu Bayibolu kuti abatiziki.
SUMU 79 Asambizeni Kuti Aje Akukho
^ ndimi 5 Pa nyengu yo tichitiska masambiru nga Bayibolu, tituŵa ndi mwaŵi wakovya ŵanthu kuti aŵanaŵanengi kweniso kuchita vinthu nge mo Yehova wakhumbiya. Nkhani iyi yikonkhoskengi so fundu zinyaki zo zingatiwovya kuti tisazgiyeku lusu lidu pakusambiza.
^ ndimi 4 Wonani nkhani ya mutu wakuti “Vinthu vo Mukhumbika cha Kuchita Asani Muchitisa Sambiru la Bayibolu,” mu Kabuku ka Unganu wa Umoyu Widu Wachikhristu Ndipuso Uteŵeti, ka September 2016.
^ ndimi 8 Pa jw.org, lutani pachigaŵa chakuti VAKUKWASKANA NDI ISI > VAKUCHITIKA PA UMOYU WA AKABONI AKU YEHOVA.
^ ndimi 9 Pa JW Library®, lutani pachigaŵa chakuti MEDIA > OUR MEETINGS AND MINISTRY > TOOLS FOR THE MINISTRY.
^ ndimi 15 Wonani nkhani ya mutu wakuti, “Kwanja Yehova ndi Kuwonga vo Watikuchitiyani Kungakuchitiskani kuti Mubatiziki” kweniso yakuti, “Kumbi Mwe Akunozgeka Kubatizika?” mu Chigongwi cha Alinda cha March 2020.
^ ndimi 77 CHITHUZI: Pavuli pakuchitiska sambiru, mzichi walusu watovya mupharazgi yo wachitiskanga sambiru kuti wakhumbika cha kukonkhoska vinthu vinandi asani wasambiza.
^ ndimi 79 CHITHUZI: Pa nyengu ya sambiru, wakusambira Bayibolu wasambira mo wangajaliya munthukazi wamampha. Pavuli paki, wakambiyaku mulumu waki vo wasambira.
^ ndimi 81 CHITHUZI: Munthu mwenuyu pamoza ndi mulumu waki akondwa kucheza kunyumba ya mubali ndi mzichi wo akumana nawu ku Nyumba ya Ufumu.
