1. Ntchifukwa wuli ŵanthu anandi atimbanyizgika?

PE VISOPA vinandi mazuŵa nganu vo vikamba kuti va Chikhristu kweniso kuti visopa Chiuta mu nthowa yakuzomerezeka. Ndichu chifukwa chaki ŵanthu anandi atimbanyizgika! Yiwu atijifumba kuti: “Kumbi pe chisopa chimoza pe chauneneska pamwenga visopa vosi vikondwesa Chiuta?” Kumbi tisimikiza kuti nthowa yo isi tisope mazuŵa nganu ndiyu pe yo yitimukondwesa Yehova? Kumbi tingachita wuli kuti tigomezgengi venivi? Tiyeni tiwoni maukaboni ngaki.

2. Mwakukoliyana ndi 1 Atesalonika 1:5, ntchifukwa wuli wakutumika Paulo wangusimikiza kuti wasaniya uneneska?

² Wakutumika Paulo wenga ndi ukaboni wanthazi wakuti wasaniya uneneska. (Ŵerengani 1 Atesalonika 1:5.) Wanguwugomezga chifukwa chakuti wangukondwa nawu ŵaka cha. Mumalu mwaki, wasambiranga mwakuphwere Mazu ngaku Chiuta. Iyu wagomezganga kuti “Malemba ngosi ngakukambirika ndi Chiuta.” (2 Timo. 3:16) Kumbi vo wangusambira vinguvumbuwanji? Mu Malemba, Paulo wangusaniya ukaboni wambula kususkika wakuti Yesu wenga Mesiya wakulayizgika ndipu Ayuda wo ŵenga alongozgi achisopa angusankha kuwukana ukaboni wenuwu. Alongozgi achinyengu ŵenaŵa akambanga kuti amiya Chiuta kweni amukananga ndi ntchitu zawu. (Tito 1:16) Mwakupambana ndi yiwu, wakutumika Paulo wangusankhapu ŵaka cha vigaŵa va Mazu ngaku Chiuta vakuti wagomezgengi. Iyu wenga wakunozgeka kusambiza kweniso kugwiriskiya ntchitu “ulongozgi wosi waku Chiuta.”—Machi. 20:27.

3. Kuti tije ndi ukaboni wanthazi, kumbi tikhumbika kuziŵa kwamuka kwa mafumbu ngidu ngosi? (Wonani so bokosi lakuti “ Ntchitu Zaku Yehova Kweniso Maŵanaŵanu Ngaki ‘Vinandi Ukongwa Ndipu Vingakonkhoskeka Cha.’”)

³ Ŵanthu anyaki awona kuti chisopa chauneneska chitenere  kumuka mafumbu ngosi chinanga ndi mafumbu ngo kumuka kwaki mu Bayibolu mulivi. Kumbi maŵanaŵanu ngenanga ngakovya? Tiyeni tikambiskani chakuwoniyapu chaku Paulo. Iyu wanguchiska Akhristu anyaki kuti ‘asimikizengi vinthu vosi’ kweni wanguŵakambiya so kuti penga vinthu vinandi vo iyu wavivwisanga cha. (1 Ate. 5:21) Iyu wangukamba kuti: “Tiziŵa vinthu mwakupeleŵere.” Ndipu wangulutirizga kukamba kuti: “Tiwona ŵaka vulumutiyi mwakugwiriskiya ntchitu gilasi lachisulu.” (1 Akori. 13:9, 12) Paulo waziŵanga vinthu vosi cha; nasi tiziŵa vosi cha. Kweni Paulo waziŵanga fundu zakwambiriya zakukwaskana ndi Yehova kweniso khumbu Laki. Vo waziŵanga venga vakukwana kugomezga kuti wasaniya uneneska!

4. Kumbi tingagomezga wuli kuti tikusaniya uneneska? Nanga tikambiskanengenji vakukwaskana ndi Akhristu auneneska?

⁴ Nthowa yimoza yo tingagomezge kuti tikusaniya uneneska nkhuyeruzgiya kusopa ko Yesu wakwambisa ndi vo Akaboni aku Yehova achita mazuŵa nganu. Mu nkhani iyi, tiwonengi kuti Akhristu auneneska (1) akana kusopa angoza (2) atumbika zina laku Yehova (3) atanja uneneska ndipuso (4) atanjana ukongwa.

5. Kumbi tisambiranji kwaku Yesu pa nkhani yakusopa Chiuta mu nthowa yakuzomerezeka? Nanga tingavigwiriskiya wuli ntchitu vo Yesu wakusambiza?

⁵ Chifukwa chakuti Yesu wayanjanga ukongwa Chiuta, pa nyengu yo wenga kuchanya kweniso pacharu chapasi, wasopanga Yehova pe. (Luka 4:8) Iyu wangusambiza akusambira ŵaki kuti nawu asopengi Yehova pe. Yesu kweniso akusambira ŵaki akugomezgeka angugwiriskiyapu ntchitu vikozgu cha pakusopa. Chifukwa chakuti Chiuta ndi Mzimu, palivi munthu weyosi yo wangapanga chinthu chechosi cho chingayanana ndi  Yehova. (Yesa. 46:5) Kweni wuli vakukwaskana ndi kupanga vikozgu va ŵanthu wo atiŵadana kuti atuŵa mtima kweniso kupemphera kwaku yiwu? Mu Dangu lachiŵi pa marangu 10, Yehova wangukamba kuti: “Ungajipangiyanga chikozgu chakusema cha, pamwenga chikozgu cha chinthu chechosi chakuchanya, chapacharu chapasi . . . Ungavisindamiyanga cha.” (Eki. 20:4, 5) Ŵanthu wo akhumba kukondwesa Chiuta aziŵa kuti iyu wakhumba cha kuti tisopengi vikozgu.

6. Kumbi Akaboni aku Yehova alondo yani pa nkhani yakusopa?

⁶ Akulemba mbiri azomereza kuti Akhristu a mu nyengu ya akutumika, asopanga Chiuta pe. Buku linyaki likamba kuti Akhristu a mu nyengu ya akutumika “atinkhanga” fundu yakuti aŵikengi vikozgu mu malu ngakusopiyamu. (History of the Christian Church) Mazuŵa nganu, Akaboni aku Yehova atezga Akhristu a mu nyengu ya akutumika. Tipemphera cha ku vikozgu va “atuŵa mtima” pamwenga angelu. Tipemphera so cha kwaku Yesu. Ndipu tisopa cha vinthu vo vimiya Charu pamwenga boma. Mwemosi mo vingaŵiya, tisimikiza mtima kuvwiya mazu ngaku Yesu ngakuti: “Yehova Chiuta waku ndiyu utenere kumusopa.”—Mate. 4:10.

7. Kumbi Akaboni aku Yehova apambana wuli ndi visopa vinyaki?

⁷ Mazuŵa nganu, ŵanthu anandi atanja kulondo alongozgi avisopa akutchuka. Yiwu atanja ukongwa alongozgi ŵenaŵa mwakuti atiŵasopa. Ŵanthu andonde ku matchalitchi ngawu, agula mabuku ngawu ndipuso atiŵapaska ndalama zinandi ukongwa alongozgi ŵenaŵa. Ŵanthu anyaki agomezga ukongwa vosi vo alongozgi ŵenaŵa akamba. Vakusuzga kuvwisa kuti asani ŵanthu awona alongozgi ŵenaŵa, akondwa ukongwa mwakuti achita vinthu nge kuti awona Yesu. Kweni wo asopa Yehova mwauneneska asopa munthu cha. Chinanga kuti titumbika ŵanthu wo alongozga, kweni tikoliyana ndi mazu ngaku Yesu ngakuti: “Mosi mwe abali.” (Mate. 23:8-10) Tisopa ŵanthu cha, kwali mbalongozgi avisopa pamwenga alongozgi andali. Ndipu tikoliyana cha ndi vo achita. Mumalu mwaki, tipatukaku ku charu. Mwaviyo, tipambana ukongwa ndi visopa vo vikamba kuti va Chikhristu.—Yoha. 18:36.

8. Kumbi tiziŵa wuli kuti Yehova wakhumba kuti tikankhuskengi zina laki kweniso kuliziŵikisa ku ŵanthu?

⁸ Nyengu yinyaki Yesu wangupemphera kuti: “Ada, kankhuskani zina linu.” Yehova wangumuka pempheru lenili ndi mazu nganthazi kutuliya kuchanya ndipu wangulayizga kuti walikankhuskengi zina laki. (Yoha. 12:28) Pa nyengu yosi yo Yesu wachitanga uteŵeti waki pacharu chapasi, wangukankhuska zina la Awisi. (Yoha. 17:26) Mwaviyo, mphakuvwika kuti Akhristu auneneska awona kuti ndi mwaŵi kugwiriskiya ntchitu zina laku Chiuta kweniso kuliziŵikisa ku ŵanthu anyaki.

9. Kumbi Akhristu a mu nyengu ya akutumika, angulongo wuli kuti atumbikanga zina laku Chiuta?

⁹ Mu nyengu ya akutumika, mpingu wachikhristu wati wajalikiskika ŵaka, Yehova “wangung’anamukiya kakwamba ku ŵanthu amitundu yinyaki kuti watomu ŵanthu akuti aziŵikengi ndi zina laki.” (Machi. 15:14) Akhristu a mu nyengu ya akutumika ŵenaŵa, ayanjanga kugwiriskiya ntchitu zina laku Chiuta ndipuso aliziŵikisanga ku ŵanthu. Yiwu angugwiriskiya ntchitu ukongwa zina laku Chiuta mu uteŵeti kweniso pa nyengu yo alembanga Bayibolu. * Yiwu angulongo pakweru kuti ŵenga ŵanthu wo aziŵikisanga zina laku Chiuta.—Machi. 2:14, 21.

10. Kumbi pe ukaboni wuli wo ulongo kuti Akaboni aku Yehova mbanthu wo aziŵika ndi zina laku Yehova?

 ¹⁰ Kumbi Akaboni aku Yehova mbanthu wo aziŵika ndi zina laku Yehova? Tiyeni tikambiskani ukaboni waki. Mazuŵa nganu, alongozgi avisopa agwiriskiya ntchitu mazaza ngawu kubisa fundu yakuti Chiuta we ndi zina laki. Yiwu atuzgamu zina laku Chiuta mu Mabayibolu ngawu ndipu nyengu zinyaki akanizga kugwiriskiya ntchitu zina laku Chiuta pakusopa. * Kumbi walipu yo wangasuska kuti Mbakaboni aku Yehova pe wo atumbika zina laku Chiuta? Isi tija ndisi tiziŵikisa ukongwa zina laku Chiuta pacharu chapasi kuphara chisopa chinyaki chechosi! Mwaviyo, titesesa kuchita vinthu mwakukoliyana ndi zina lidu lakuti Akaboni aku Yehova. (Yesa. 43:10-12) Tasindikiza Mabayibolu nga Charu Chifya ngakujumpha 240 miliyoni ngo nge ndi zina laku Chiuta mumalu mo akufwatuliya Mabayibolu nganyaki akutuzgamu. Tisindikiza mabuku ngakukonkhoska Bayibolu ngo nge ndi zina laku Yehova muvineneru vakujumpha 1,000!

11. Kumbi Akhristu a mu nyengu ya akutumika angulongo wuli kuti ayanjanga uneneska?

¹¹ Yesu wayanjanga uneneska, kung’anamuwa uneneska wakukwaskana ndi Chiuta kweniso khumbu Laki. Yesu wachitanga vinthu mwakukoliyana ndi uneneska ndipu  wapharazganga uneneska wenuwu ku ŵanthu anyaki. (Yoha. 18:37) Akusambira auneneska aku Yesu nawu so awuyanjanga ukongwa uneneska. (Yoha. 4:23, 24) Wakutumika Peturo wangukamba kuti chisopa cha Chikhristu ndi “nthowa ya uneneska.” (2 Petu. 2:2) Chifukwa chakuti awuyanjanga ukongwa uneneska, Akhristu a mu nyengu ya akutumika akananga visambizu vachisopa, midawuku kweniso maŵanaŵanu nga ŵanthu ngo ngakoliyananga cha ndi uneneska. (Ako. 2:8) Mwakuyanana ŵaka, Akhristu auneneska mazuŵa nganu atesesa kulutirizga “kwenda mu uneneska” ndipu atesesa kuti vosi vo agomezga kweniso kuchita pa umoyu wawu, vituliyengi mu Mazu ngaku Yehova.—3 Yoha. 3, 4.

12. Kumbi ntchinthu wuli cho chichitika asani abali wo alongozga awona kuti tikhumbika kusintha fundu zinyaki? Ndipu ntchifukwa wuli achita viyo?

¹² Ŵanthu aku Chiuta mazuŵa nganu akambapu cha kuti nyengu zosi avwisa vosi vo ve mu Bayibolu. Nyengu zinyaki yiwu anangisa asani akonkhoska fundu zinyaki zo Bayibolu lisambiza pamwenga mo vinthu vitenere kwende mu gulu laku Yehova. Tikhumbika cha kuzizwa ndi venivi. Malemba ngakamba mwakuvwika umampha kuti pato nyengu kuti tiwuziŵi umampha uneneska. (Ako. 1:9, 10) Yehova wavumbuwa uneneska kamanakamana ndipu titenere kuzikira kuti ukweru wa uneneska uŵali. (Nthanthi 4:18) Asani abali wo alongozga awona kuti tikhumbika kusintha fundu zinyaki zakukwaskana ndi uneneska, achitapu kanthu liŵi. Matchalitchi nganandi Ngachikhristu chaboza mazuŵa nganu, ngasintha visambizu vawu chifukwa akhumba kuti akondwesi ŵanthu ŵawu pamwenga kuti visambizu vawu vikoliyani ndi charu ichi. (Yako. 4:4) Kweni Akaboni aku Yehova asintha vinthu chifukwa akhumba kuti aje paubwezi wakukho ndi Chiuta kweniso kuti amusopengi mu nthowa yo Yesu wangujalikiska. Tisintha fundu zinyaki chifukwa chakuti maŵanaŵanu nga ŵanthu ngasintha mucharu ichi cha, kweni chifukwa chakuti tivwisa umampha Malemba. Titanja uneneska!—1 Ate. 2:3, 4.

13. Kumbi ndi jalidu lakukhumbika ukongwa nili lo Akhristu a mu nyengu ya akutumika angulongo? Nanga Akaboni aku Yehova atililongo wuli jalidu lenili mazuŵa nganu?

¹³ Akhristu a mu nyengu ya akutumika aziŵikanga ndi mijalidu yinandi yamampha kweni jalidu lakukhumbika ukongwa lo aziŵikanga nalu lenga chanju. Yesu wangukamba kuti: “Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.” (Yoha. 13:34, 35) Mazuŵa nganu, Akaboni aku Yehova pacharu chosi chapasi atanjana kweniso akoliyana. Tipambana ukongwa ndi visopa vinyaki vosi chifukwa chakuti te nge banja limoza chinanga kuti tipambana vyaru, mitundu kweniso midawuku. Tiwona ukaboni wakuti titanjana nadi pa maunganu ngampingu, ngadera kweniso ngachigaŵa. Venivi vilongo kuti Yehova wazomereza kusopa kwidu.

14. Mwakukoliyana ndi Akolose 3:12-14, kumbi ndi nthowa yakukhumbika ukongwa niyi yo tingalongore kuti titanjana?

¹⁴ Malemba ngatitichiska kuti ‘tiyanjanengi ukongwa.’ (1 Petu. 4:8) Nthowa yimoza yo tingalongore jalidu la chanju nkhugowokiyana kweniso kuzizipizga vo anyidu anangisa. Titesesa kuja akupaska kweniso kucheza ndi Mkhristu weyosi mumpingu kusazgapu wo akutinangiya. (Ŵerengani Akolose 3:12-14.) Chanju chenichi chilongole limu kuti te Akhristu auneneska.

15. Ndi nthowa nizi zinyaki zo zilongo kuti tichita vinthu nge Akhristu a mu nyengu ya akutumika pa nkhani ya kusopa?

¹⁵ Tiyezga Akhristu a mu nyengu ya akutumika pa nkhani ya kusopa mu nthowa zinyaki so. Mwakuyeruzgiyapu, titendesa vinthu nge mo Akhristu a mu nyengu ya akutumika achitiyanga. Te ndi akuwonere madera, ŵara kweniso ateŵeti akovya. (Afi. 1:1; Tito 1:5) Nge yiwu, titumbika marangu ngaku Yehova pa nkhani yakugonana kweniso nthengwa, tiwona kuti ndopa zakupaturika, kweniso titesesa kuvikiliya mpingu ku ŵanthu ambula kulapa.—Machi. 15:28, 29; 1 Akori. 5:11-13; 6:9, 10; Ahe. 13:4.

16. Kumbi tisambiranji pa mazu ngo nge pa Aefeso 4:4-6?

¹⁶ Yesu wangukamba kuti ŵanthu anandi azamukamba kuti mbakusambira ŵaki kweni ndi wosi cha wo azamuja akusambira ŵaki auneneska. (Mate. 7:21-23) Malemba ngangutcheŵeske so limu kuti mu mazuŵa ngakumaliya, ŵanthu anandi azamuwoneka nge kuti “mbakujipereka kwaku Chiuta.” (2 Timo. 3:1, 5) Kweni Bayibolu lititikambiya kuti pe “chivwanu chimoza” pe cho Chiuta wazomereza.—Ŵerengani Aefeso 4:4-6.

17. Kumbi mbayani mazuŵa nganu wo alondo Yesu kweniso wo ŵe ndi chivwanu chimoza chauneneska?

¹⁷ Kumbi mbayani wo ŵe ndi chivwanu chimoza chauneneska mazuŵa nganu? Tawona maukaboni. Tawona mo Yesu kweniso Akhristu a mu nyengu ya akutumika anguchitiya pa nkhani ya kusopa kwauneneska. Mwaviyo, kumuka nkhwakuti Mbakaboni aku Yehova pe wo achita venivi. Te ndi mwaŵi ukongwa kuja ŵanthu aku Yehova kweniso kuziŵa uneneska wakukwaskana ndi Yehova ndipuso khumbu laki! Mphanyi ukaboni wanthazi watiwovya kukolesa uneneska.