Nyengu yo abali ndi azichi anandi apharazganga, akhumbikanga mabuku nganandi. Abali ku Beteli ya ku Brooklyn apurintanga wija magazini. Kweni athembanga mbwenu makampani nga ŵanthu anyaki kuti ngaŵapurintiyi mabuku nga vikonkhombi vakulama. Pavuli paki kwa myezi yinandi kampani yeniyi yingutondeka kupurinta mabuku ngakukwana kuti abali ndi azichi angagwiriskiyengi ntchitu pakupharazga. Mwaviyo, Mubali Rutherford wangufumba Robert Martin yo wawoneriyanga ntchitu ya kupurinta mabuku, asani wakuŵanaŵanapu kuti angafiska kupurinta ŵija mabuku ngawu.

Mubali Martin wangukamba kuti “lenili lenga sachizgu lamampha ukongwa chifukwa venivi vang’anamuwanga kuti tiŵengi ndi kampani yidu ya kupurinta kweniso kupanga mabuku.” Abali angupanga lenti nyumba yo yenga ku 18 Concord Street ku Brooklyn ndipu anguŵikamu makina ngakupangiya mabuku.

Mbanthu wosi cha wo angukondwa kuti abali ayambengi kupurinta wija mabuku ngawu. Pulezidenti wa kampani yo yatipurintiya mabuku pakwamba, wanguza kuziwona malu ngidu ngasonu. Iyu wangukamba kuti: “Mwe ndi vipangizu vamampha ukongwa va kupurintiya mabuku kweni palivi weyosi waku yimwi yo waziŵa mo wangavigwiriskiya ntchitu. Mu myezi 6 muŵengi kuti mwananga vipangizu vinu vosi.”

Mubali Martin wangukamba kuti: “Vo munthu uyu wangukamba, vawonekanga nge vauneneska kweni nkhani yeniyi tinguleke Ambuya chifukwa nyengu zosi atiwovyanga.” Mubali Martin waneneskanga chifukwa pambula kuswera, machini ngafya ngapanganga mabuku 2,000 pa zuŵa.

Kusazgiyapu pa kupurinta ŵija nganyaki mwa mabuku ngawu, ŵanthu aku Yehova angwamba kugwiriskiya ntchitu nthowa yasonu yakupharazgiya uthenga wamampha, apharazganga kuziya pa wayilesi. Pa Sabata cha ku msana pa 26 February, 1922, Mubali Rutherford wanguŵereŵeta kakwamba pa wayilesi. Pa wayilesi ya KOG ku Los Angeles, California, U.S.A,  iyu wangukamba nkhani ya mutu wakuti, “Ŵanthu Mamiliyoni wo Alipu Sonu Azamukufwa Cha.”

Ŵanthu pafufupi 25,000 anguvwisiya nkhani yeniyi. Ndipu anyaki mwaku yiwu angulemba makalata kumuwonga mubali Rutherford chifukwa cha nkhani yo wangukamba. Kalata yinyaki yingutuliya kwaku Willard Ashford yo wajanga ku Santa Ana, ku California. Iyu wangumuwonga Mubali Rutherford chifukwa cha nkhani “yakukondwesa” yo wangukamba. Iyu wangulutirizga kukamba kuti: “Mu banja langu ŵanthu atatu atamanga ndipu venga vakusuzga kuti atuwepu pa nyumba. Mwaviyo, tatingi tifiskengi cha kuluta kuchivwisiya nkhani yeniyi chinanga mukayikambiyengi pafupi ndi nyumba yidu.”

Pavuli paki, nkhani zinyaki zingwamba so kukambika kuziya pa wayilesi masabata ngakulondopu. Kukumaliya kwa chaka cha 1922, Chigongwi cha Mlinda chingukamba kuti “ŵanthu pafufupi 300,000 anguvwisiya uthenga kuziya pa wayilesi.”

Chifukwa cha vo ŵanthu akambanga kweniso kulemba kuziya mumakalata, Akusambira Bayibolu angwambisa wayilesi yawu ku Staten Island, kufupi ndi Beteli ya ku Brooklyn. Mu vyaka vakulondopu, Akusambira Bayibolu agwiriskiyanga ntchitu wayilesi yawu ya WBBR, pakupharazga uthenga wa Ufumu ku ŵanthu anandi.

Chigongwi cha Mlinda cha June 15, 1922, chingukamba kuti unganu wamuchitikiya ku Cedar Point, Ohio, kwambiya pa 5 mpaka pa 13 September, 1922. Akusambira Bayibolu angukondwa ukongwa ŵati afika ku Cedar Point Ohio.

Mu nkhani yaki yakwamba, Mubali Rutherford wangukambiya ŵanthu wo ŵenga pa unganu uwu kuti: “Ndisimikiza kuti Ambuya . . . atumbikengi unganu uwu kweniso awonesesengi kuti ntchitu yakupharazga yagwirika ukongwa pacharu chapasi kuluska kuvuli kosi uku.” Wo angukamba nkhani pa unganu uwu anguchiska abali mwakuwerezawereza kugwira ntchitu yakupharazga.

Pavuli paki pa Chinkhondi pa 8 September, ŵanthu pafufupi 8,000 anguwungana mu holu yo mwachitikiyanga unganu ndipu akhumbisiskanga kuvwisiya nkhani ya Mubali Rutherford. Yiwu akhazanga kuti Mubali Rutherford wakonkhoskengi vo mazu ngakuti “ADV,” ngang’anamuwanga ngo ngangulembeka pa timapepala takuŵadaniya ku unganu. Ŵanthu anandi achija pasi atenere kuti anguwona  chisalu chikulu chakuzinga cho chenga pachanya papulatifomu. Arthur Claus yo wangutuliya ku Tulsa, Oklahoma, U.S.A., wanguja pamalu pakuti wangavwisiya umampha nkhani yosi. Venivi venga vakusuzga ukongwa chifukwa pa unganu uwu pengavi mayikulofoni pamwenga vakukweze mazu.

Kuti paŵevi vakutimbanyizga, cheyamani wangupharazga kuti munthu weyosi yo waswera wazomerezekengi cha kusere muholu pa nyengu yo Mubali Rutherford wakamba nkhani. Nyengu yati yakwana hafu 9 mlenji, Mubali Rutherford wangwamba kukamba nkhani yaki mwakuko mazu ngo Yesu wangukamba pa Mateyu 4:17 ngakuti: “Ufumu wakuchanya we pafupi.” Wachikamba mo ŵanthu azamuvwiya vakukwaskana ndi Ufumu wenuwu iyu wanguti: “Yesu wangukamba kuti pa nyengu yakuŵapu kwaki wazamugwira ntchitu yakuvuna ŵanthu ŵaki, po wazamuwunganisa Akhristu auneneska kweniso akugomezgeka.”

Mubali Claus yo nayu wenga muholu wangukamba kuti: “Tavwisiyanga mwakuphwere mazu ngengosi.” Kweni mwamabuchibuchi wangutama ndipu wakhumbikanga kutuwamu muholu. Claus wangutuwamu muholu chinanga kuti wakhumbanga cha kutuwamu, chifukwa waziŵanga kuti asani watuwamu wazamuzomerezeka so cha kusere.

Pati pajumpha maminiti ngamanavi, wangwamba kuvwa umampha. Iyu wangukamba kuti we pafupi kufika ku holu wanguvwa chiwawa chikulu cha ŵanthu wo ambanga manja. Venivi vingumukondwesa ukongwa. Iyu wanguŵanaŵana kuti wangayivwisiya umampha ukongwa nkhani yosi asani wangakwera pachanya pa holu. Mwaviyo, mubali Claus yo pa nyengu iyi wenga ndi vyaka 23, wangusaniya nthowa yakukwere pachanya pa holu yeniyi. Mawindu nga pachanya pa holu yeniyi ngenga ngakujulika ndipu wati wafika pafupi, iyu wangukamba kuti “wavwanga umampha nkhani yosi yo yakambikanga.”

Kweni Arthur wenga yija cha. Mabwezi ngaki nganyaki ngenga so pachanya penapa. Munyaki waku yiwu wenga Frank Johnson, yo wanguluta po penga iyu ndi kumufumba kuti, “Kumbi we ndi kachimayi kamana kamuthumba?”

 Arthur wangumuka kuti: “Hinya ndenaku.”

Frank wangukamba kuti: “Mapempheru ngidu ngamukika.” “Kumbi wachiwona chisalu chakuzinga cho che po? Ntchikwangwani cho achimangiliya ku mizumali iyi. Umuvwisiyi mwakuphwere Judge * asani wakamba kuti, ‘ndipu mutenere kupharazga, kupharazga,’ mbwenu udumuwi vingwi vinayi ivi.”

Mwaviyo, Arthur wenga ndi chimayi mujanja laki ndipu iyu limoza ndi anyaki alindizganga kuti avwi mazu ngakulongo kuti sonu angadumuwa vingwi. Pambula kuswera Mubali Rutherford wangufika pa fundu yikulu ya nkhani yaki. Mubali Rutherford wangukondwa ukongwa ndipu wangudaniriza kuti: “Jani akaboni akugomezgeka kweniso auneneska a Ambuya. Lutirizgani kupharazga mpaka po chisopa chosi chaboza chabwangandulikiya. Pharazgani uthenga kwekosi. Charu chitenere kuziŵa kuti Yehova ndi Chiuta ndipuso kuti Yesu Khristu ndi Fumu ya mafumu kweniso Mbuya wa ambuya. Zuŵa ili ndakukhumbika ukongwa kuphara mazuŵa nganyaki ngosi. Awonani, Fumu yiwusa! Yimwi ndimwi ateŵeti ŵaki akupharazga za Ufumu uwu. Mwaviyo, pharazgani, pharazgani, pharazgani za Fumu ndi Ufumu waki!”

Arthur wangukamba kuti iyu ndi abali anyaki wo wenga nawu, angudumuwa vingwi ndipu chikwangwani chinguzunguluka umamphaumapha. Mwakukoliyana ndi vilembu va “ADV,” chikwangwani ichi chingulembeka kuti: “Pharazgani za Fumu ndi Ufumu waki.”

Unganu wo unguchitikiya ku Cedar Point unguwovya abali kuŵika mtima pa ntchitu yakukhumbika ukongwa yakupharazga va Ufumu, ndipu wo ŵenga ndi mtima wakujipereka ŵenga akukondwa kugwiraku ntchitu yeniyi. Kopotala munyaki (mazuŵa nganu kopotala wadanika kuti mpayiniya) wa ku Oklahoma, U.S.A., wangulemba kuti, “Tapharazganga muchigaŵa cho ŵanthu anandi agwiranga ntchitu mimigodi ndipu ŵenga akavu ukongwa.” Iyu wangukamba kuti kanandi asani ŵanthu avwa uthenga wa mu magazini ya Golden Age, “ayambanga kuliya.” Iyu wangukamba kuti: “Tikondwa ukongwa kuŵapembuzga.”

Akusambira Bayibolu awonanga kuti mazu ngo Yesu wangukamba pa Luka 10:2 ngakukhumbika ukongwa. Yesu wangukamba kuti: “Ntchitu yakuvuna njikulu kweni antchitu mbamana.” Chaka cha 1922 chichimala, yiwu ŵenga akukhumbisiska kupharazga uthenga wa Ufumu pacharu chosi kuluska kali.