Abali ku Beteli angugwira ntchitu mwaphamphu kujumpha chaka kuti azengi siteshoni ya wayilesi ya WBBR ku Staten Island, ku New York City. Ŵati amaliza kunozga malu, anguzenga nyumba yakujamu wo agwiranga ntchitu kweniso nyumba yinyaki yakusungamu vipangizu va siteshoni ya wayilesi. Ntchitu iyi yati yamala, abali angwamba kulumikiza vipangizu kuti siteshoni ya wayilesi iyambepu kugwira ntchitu. Kweni kuti venivi vichitiki, akhumbikanga kumalana ndi masuzgu nganandi.

Abali angusuzgika ukongwa kuŵika antena ya siteshoni ya wayilesi. Antena iyi yenga yitali mamita 91 ndipu anguyipayika pamapolu ngaŵi ngo ngenga ngatali mamita 61. Pakwamba angutondeka kuyipayika antena yeniyi. Kweni pakumaliya, abali yaŵa angufiska kuyipayika chifukwa chakuti anguthemba Yehova. Calvin Prosser, yo wangugwiraku ntchitu yeniyi wangukamba kuti: “Asani tingupayika kamoza ndi kamoza antena yeniyi tatingi tijiŵikengemu kuti, ‘Wonani vo tafiska, isi mphatali!’” Mumalu mwaki, abali anguthamika Yehova chifukwa cha vo angufiska kuchita. Kweni masuzgu ngangumaliya penapa cha.

Siteshoni ya wayilesi yenga yifya ndipu venga vakusuzga kugula vipangizu vaki. Mwaviyo abali angusaniya thiranzimita ya nthazi mawati 500 yo munthu munyaki wangupanga. Mumalu mwakugula mayikulofoni chayiyu, angugwiriskiya ntchitu mayikulofoni ya telefoni. Zuŵa linyaki ndi usiku mu mwezi wa February, angwamba kuyesa siteshoni ya wayilesi yeniyi. Yiwu akhumbikanga pulogilamu yakuti ayesere pa wayilesi. Mwaviyo, abali angumba sumu za Ufumu. Mubali Ernest Lowe wakumbuka vakusekesa vo vinguchitika pa nyengu yo abali ambanga sumu  zenizi. Mubali Judge Rutherford, b wangumba foni wati wavwa sumu zo pa wayilesi ku Brooklyn, wo wenga mtunda wa makilomita pafufupi 25 kutuwa kwenuku.

Mubali Rutherford wangukamba kuti: “Lekani kumba ko, muvwika nge ambwiyawu!” Abali wo anguchita soni ndipu anguzimwisa liŵiliŵi thiranzimita, kweni anguziŵa kuti siteshoni ya wayilesi njakunozgeka kwamba kugwira ntchitu.

Pa 24 February, 1924, pa nyengu yo Mubali Rutherford wajuliyanga siteshoni ya wayilesi yeniyi wangukamba kuti Siteshoni ya wayilesi iyi, “yigwirengi ntchitu yo Khristu Fumu wakuŵapaska kuti achiti.” Iyu wangukamba kuti wayilesi iyi “yiwovyengi ŵanthu kuti avwisengi uthenga wa mu Bayibolu kweniso kuti nyengu yo tijamu njakukhumbika ukongwa.”

Kujalikiskika kwa siteshoni ya wayilesi yeniyi kunguwovya ukongwa. Wayilesi ya WBBR yingugwiriskikiya ntchitu kwa vyaka 33 pakupharazga mapulogilamu nga gulu laku Yehova.

Mu July 1924, Akusambira Bayibolu anguchita unganu ku Columbus, Ohio. Akusambira Bayibolu angutuliya muvyaru vakupambanapambana ndipu anguvwisiya nkhani mu Chiarabu, Chingelezi, Chifurenchi, Chijeremani, Chigiriki, Chihungariya, Chiitaliya, Chilufuniya, Chipolishi, Chirashiya, vineneru va ku Scandinavia kweniso Chiyukireni. Vigaŵa va pulogilamu yeniyi vingupharazgika pa wayilesi ndipu angunozga vakuti nyuzipepala ya Ohio State Journal yikambengi malipoti nga vinthu vosi vo vachitika pa unganu.

Pa Chinayi pa 24 July, ŵanthu akujumpha 5,000 wo anguza pa unganu angugwiraku ntchitu yukupharazga. Yiwu angugaŵiya mabuku pafufupi 30,000 ndipu anguyambisa masambiru nga Bayibolu masauzandi. Chigongwi cha Mlinda chingukamba kuti zuŵa lenili lenga “lakukondwesa ukongwa pa unganu wenuwu.”

Pa Chinkhondi pa 25 July, Mubali Rutherford wachikamba nkhani yaki yinyaki wanguŵerenga chikalata cho chasuskanga vo alongozgi a visopa achita. Iyu wangukamba kuti alongozgi andali, avisopa kweniso a mabizinesi “atondekesa ŵanthu kusambira uneneska wakukwaskana ndi Ufumu waku Chiuta, wo wazamugwiriskiya ntchitu kuti watumbiki ŵanthu.” Yiwu angukamba so kuti ŵanthu ŵenaŵa anangisa chifukwa “atovya wupu wa League of  Nations ndipu akamba kuti ‘ndi nthowa yo Chiuta wagwiriskiya ntchitu kuti walamuliyi charu.’” Akusambira Bayibolu akhumbikanga chiganga kuti apharazgiyi ŵanthu uthenga wenuwu.

Pati pajumpha nyengu, nkhani yinyaki ya mu Chigongwi cha Mlinda yingukamba kuti: “Unganu wenuwu wo unguchitikiya ku Columbus unguwovya abali ndi azichi kuja ndi chivwanu chakukho . . . , unguŵawovya kuti akapharazgengi mwachiganga chinanga kuti angasuskika.” Leo Claus, yo wanguchitaku unganu wenuwu wangukamba kuti: “Unganu uwu wati wamala, tenga akunozgeka kuchipharazgiya ŵanthu a muchigaŵa chidu uthenga wenuwu.”

Mu October, Akusambira Bayibolu angwamba kugaŵiya ŵanthu timapepala tamutu wakuti Ecclesiastics Indicted, mo mwenga uthenga wo Mubali Rutherford wanguŵerenga wakukwaskana ndi alongozgi a visopa. Mutawuni yimana ya Cleveland, ku Oklahoma, Frank Johnson wangumaliza kugaŵiya timapepala ndipu wakhumbikanga kulindizga kwa 20 minisi kuti abali ndi azichi azimuto ko wenga. Iyu wakhumbikanga kulindizgiya pakweru cha chifukwa ŵanthu a mutawuni yeniyi wo angukwiya ndi ntchitu yakupharazga yo wachitanga amupenjanga. Mwaviyo, Mubali Johnson wangubisama mutchalitchi. Pakuti mutchalitchi ili mwengavi weyosi, iyu wanguŵika timapepala ta Ecclesiastics Indicted mu Bayibolu la mulongozgi wa tchalitchi lenili. Ndipuso wangusiya kapepala kamozakamoza pampandu wewosi. Iyu wangutuwa mutchalitchi lo mwaliŵiliŵi. Chifukwa chakuti nyengu yenga yeche waka, iyu wanguluta so kumatchalitchi nganyaki ngaŵi ndipu wanguchichita so viyo.

Mwaliŵiliŵi, Mubali Frank wanguwere pamalu ngo akhumbikanga kuzimutole. Iyu wangubisama kuseri kwa filling station kuti wawonengi ŵanthu akukwiya wo amupenjanga. Yiwu angujumpha ndipu angumuwona cha. Ŵanthu wo ŵati aluta, abali ndi azichi wo apharazganga chapafupi anguza ndi kuzimuto.

Mubali munyaki wangukamba kuti: “Tichituwa mutawuni iyi, tingujumpha matchalitchi ngatatu. Panthazi pa tchalitchi lelosi panguma ŵanthu pafufupi 50. Anyaki mwa ŵanthu wo aŵerenganga timapepala, penipo anyaki atilongonga ku mulongozgi wawu. Yapa, tingutuwapu pa nyengu yaki! Tingumuwonga ukongwa Yehova Chiuta widu pakutivikiliya kweniso kutipaska zeru kuti tipharazgi uthenga wa Ufumu kwambula kutiko.”

Muvyaru vinyaki navu, Akusambira Bayibolu apharazganga mwachiganga. Kunkhondi kwa charu cha France, Józef Krett wapharazgiyanga ŵanthu wo agwiranga ntchitu mumigodi wo angutuwa kucharu cha Poland. Iyu wangupempheka kuti wakakambi nkhani yamutu wakuti: “Akufwa Ayukengi Pambula Kuswera.” Ŵanthu a mutawuni yeniyi ŵati adanika kuti azivwisiyi nkhani yeniyi, wasembi wangukaniza ŵanthu ŵaki kuti angalutangaku cha. Kweni vo wakhumbanga ndivu vinguchitika cha. Ŵanthu akujumpha 5,000 anguza kuzivwisiya nkhani yeniyi, kusazgapu wasembi yo wakanizanga ŵanthu. Mubali Krett wangupempha wasembi mwenuyu kuti wakonkhoski chifukwa cho wagomezge visambizu va chisopa chaki kweni wangukana. Mubali Krett wangugaŵiya mabuku ngosi ngo wenga nangu chifukwa ŵanthu wo wanguŵaphazgiya akhumbisiskanga kuti avwi Mazu ngaku Chiuta.—Amosi 8:11.

Claude Brown wanguluta ku Gold Coast, ku Africa ko sonu kudanika kuti ku Ghana kuti wakapharazgi uthenga wamampha. Nkhani zo wakambanga kweniso mabuku ngo wagaŵiyanga vinguwovya kuti uneneska wa mu Bayibolu uwandi mwaliŵi mucharu chenichi. John Blankson, yo pa nyengu iyi wasambiranga va chipatala, wanguvwisiya nkhani ya Mubali Brown. Iyu wanguwamu nyengu yeniyo kuti wasaniya uneneska. Iyu wangukamba kuti: “Uneneska  ungundiwovya kuti ndikondwengi ukongwa ndipu ndingukambiyaku ŵanthu anandi kusukulu.”

Zuŵa linyaki, John wanguluta kutchalitchi la Anglican kuti wakafumbi wasembi nkhani yakuti kwe achiuta atatu. Pa nyengu iyi ndipu waziŵa kuti Bayibolu likambapu cha venivi. Wasembi yo wangumudikisa ndipu wangumuchawuta kuti: “We Mkhristu cha, ndiwi mwana waku Dyaboli. Tuwapu panu!”

John wati wafika kunyumba kwaki, wangumulembe kalata wasembi yakumudana kuti wazikonkhoski pamasu pa ŵanthu chisambizu chakuti kwe achiuta atatu. Wasembi wangudanisa John kuti azikumani ku ofesi ya msambizi mura wa vachipatala yo wangumufumba kuti wakambi asani wangumulembe nadi kalata wasembi.

John wangumuka kuti: “Hinya, ndingulemba nadi.”

Msambizi yo wangulamula John kuti walembi kalata yakupepesa wasembi. Mwaviyo, John wangulemba kuti:

“Msambizi wangu wandituma kuti ndikulembiyeni kalata yakukupepesani ndipu nde wakunozgeka kuchita venivi. Kweni ndikupepeseningi asani mwazomereza kuti musambiza vaboza.”

Msambizi yo mutu unguma ndipu wangufumba kuti: “Blankson, ndivu walemba ivi?”

Iyu wangumuka kuti: “Hinya, venivi ndivu ndikhumbika kulemba.”

Msambizi yo wangumukambiya kuti: “Sukulu yikumaliyengi. Ungamulembe wuli kalata yaviyo wasembi wa tchalitchi lo boma ligomezga mbwenu ukhaza kuti boma lenilo so likulembengi ntchitu?”

John wangufumba kuti: “Kweni yimwi . . . asani mutitisambiza ndipu vo mutitisambiza tavivwisa cha, asi titikufumbani mafumbu?”

Msambizi yo wangumuka kuti: “Hinya mufumba nadi.”

John wangukamba kuti: “Venivo ndivu vinguchitika. Doda liya latisambizanga Bayibolu ndipu ini ndingulifumba waka fumbu. Asani yiwu atondeka kumuka fumbu, sonu ntchifukwa wuli mutindichichizga kuti ndiŵapepesi?”

Blankson sukulu yingumumaliya cha ndipu wangulemba cha kalata yakupepesa.

Chigongwi cha Mlinda chingukamba mwakudumuwa vo vinguchitika mu chaka chenichi kuti: “Tingakoliyana ndi vo Davidi wangukamba kuti: ‘Yimwi mundipaskengi nthazi zakuchitiya nkhondu.’ (Salimo 18:39) Chaka ichi chaja chakuchiska limu chifukwa tawona janja la Ambuya . . . Ateŵeti ŵaki akugomezgeka . . . akondwa ukongwa kupharazga uthenga wamampha.”

Chakukumaliya kwa chaka, abali angunozga vakuti aje ndi siteshoni yinyaki ya wayilesi. Mwaviyo, abali angwamba so kuzenga siteshoni ya wayilesi yinyaki kufupi ndi Chicago. Siteshoni ya wayilesi iyi yingudanika kuti MAZU chifukwa chakuti yapharazganga Mazu ngaku Chiuta. Wayilesi yeniyi yagwiriskiyanga ntchitu thiranzimita ya mawati 5,000. Venivi vinguwovya kuti ŵanthu wo ajanga kutali ukongwa aviwisiyengi uthenga wa Ufumu mpaka kuchifika kumpotu ku Canada.

Mu chaka cha 1925, Akusambira Bayibolu ŵenga pafupi kuvwisa lemba la Chivumbuzi chaputala 12. Venivi vinguguŵiska ŵanthu anyaki. Kweni ŵanthu anyaki anandi angukondwa kuti avwisa umampha vo vinguchitika kuchanya kweniso kuziŵa mo vingukwaskiya ŵanthu aku Chiuta pacharu chapasi.