NKHANI YAKUSAMBIRA YA NAMBALA 42
SUMU 103 Aliska Ndi Mphasu
Muwongengi Ŵara wo Yehova Wakukupaskani
“Pa nyengu yo wangukwera kuchanya . . . , wangupereka anthulumi kuja nge mphasu.”—AEFE. 4:8.
FUNDU YIKULU
Mu nkhani iyi tiwonengi mo ateŵeti akovya, ŵara kweniso akuwonere madera atitiwovye. Tiwonengi so vo isi tingachita kuti tilongo kuti tiwonga vo abali ŵenaŵa achita.
1. Kumbi ndi mphasu nizi zo Yesu watitipaska?
PALIVI munthu yo wakuwovyapu ŵanthu kuphara Yesu. Pa nyengu yo wenga pacharu chapasi wagwiriskiyanga ntchitu nthazi zaki zakuziziswa kuti wawovyi ŵanthu. (Luka 9:12-17) Umoyu waki wo wakupereka ndi mphasu yikulu ukongwa yo wakupaska ŵanthu wosi. (Yoha. 15:13) Kutuliya ŵaka po wanguyuskikiya, Yesu walutirizga kuwovya ŵanthu. Nge mo wangulayizgiya, wangupempha Yehova kuti watipaski mzimu waki kuti utisambizi ndi kutipembuzga. (Yoha. 14:16, 17 ndi mazu ngamumphata; 16:13) Ndipuso Yesu wagwiriskiya ntchitu maunganu nga mpingu kuti walutirizgi kutiwovya kuti tisambizengi ŵanthu pacharu chosi.—Mate. 28:18-20.
2. Kumbi mbayani wo ŵe “nge mphasu” wo akambika pa Aefeso 4:7, 8?
2 Tiyeni tikambiskani mphasu yinyaki yo Yesu wakutipaska. Wakutumika Paulo wangukamba kuti Yesu wati wakwere kuchanya, “wangupereka anthulumi kuja nge mphasu.” (Ŵerengani Aefeso 4:7, 8.) Paulo wangukonkhoska kuti Yesu wangupereka abali ŵenaŵa nge mphasu kuti awovyengi mpingu mu nthowa zakupambanapambana. (Aefe. 1:22, 23; 4:11-13) Mazuŵa nganu, abali ŵenaŵa wo ŵe “nge mphasu” asazgapu ateŵeti akovya, ŵara kweniso akuwonere madera. a Kukamba uneneska, abali ŵenaŵa mbambula kufikapu, mwaviyo nawu anangisa. (Yako. 3:2) Kweni Yesu Khristu Ambuyafwi, atiŵagwiriskiya ntchitu kuti atiwovyengi. Yiwu ndi mphasu zo wakutipaska.
3. Kambani chakuyeruzgiyapu chakulongo mo tingawovye abali wo ŵe “nge mphasu.”
3 Abali ŵenaŵa wo ŵe “nge mphasu,” Yesu wakuŵapaska ntchitu yakuti azengi mpingu. (Aefe. 4:12) Kweni tosi tingaŵawovya kuti agwirengi umampha ntchitu yawu. Mwakuyeruzgiyapu, tanyaki tikuziŵa kuzenga Nyumba ya Ufumu. Penipo anyaki angawovya pa ntchitu yeniyi mwakupereka chakurya, thiransipoti ndi vinthu vinyaki. Mwakuyanana ŵaka, tosi tingawovya ateŵeti akovya, ŵara mu mpingu kweniso akuwonere madera kuziya mu vo tikamba ndi kuchita. Tiyeni tiwoni mo ntchitu za abali ŵenaŵa zititiwovye kweniso mo tingalongore kuti titiŵawonga, ndipuso tiwonga Yesu yo wakupereka mphasu zenizi.
ATEŴETI AKOVYA AGWIRA “NTCHITU ZAKOVYA”
4. Kumbi ndi “ntchitu zakovya” nizi zo ateŵeti akovya achitanga mu nyengu ya akutumika?
4 Mu nyengu ya akutumika, abali anyaki anguŵikika kuti ateŵetiyengi nge ateŵeti akovya. (1 Timo. 3:8) Viwoneka kuti abali ŵenaŵa ndiwu achitanga “ntchitu zakovya” zo Paulo wangukamba. (1 Akori. 12:28) Ndipu ateŵeti akovya ŵenaŵa ndiwu aphweriyanga ntchitu zinandi zakukhumbika. Venivi vawovyanga kuti ŵara aŵikengi ukongwa mtima wawu pa ntchitu yakusambiza ndipuso kuchita maulendu ngauliska. Mwakuyeruzgiyapu, ateŵeti akovya ŵenaŵa atenere kuti awovyanga kukope Malemba pamwenga atumikanga kuchigula vinthu vakugwiriskiya ntchitu pakukope Malemba ngenanga.
5. Kumbi ndi ntchitu nizi zo ateŵeti akovya achita mazuŵa nganu?
5 Ŵanaŵaniyani ntchitu zakovya zo ateŵeti akovya achita mu mpingu winu. (1 Petu. 4:10) Yiwu angapaskika ntchitu yakuphwere ndalama za mpingu pamwenga kuphwere vigaŵa, kudanisa mabuku ndi kupereka kwa apharazgi, kuphwere vipangizu va ku sawundi, kulonde alendu pamwenga kuwovyaku pa ntchitu yakunozga Nyumba ya Ufumu. Ntchitu zosi zenizi zakukhumbika kuti vinthu viyendengi umampha mu mpingu. (1 Akori. 14:40) Kusazgiyapu yapa, ateŵeti akovya anyaki akamba nkhani za mu Unganu wa Umoyu Wachikhristu Ndipuso Uteŵeti kweniso akamba nkhani za chisanisani. Mteŵeti wakovya wangapempheka so kuti wawovyengi kuwonere kagulu ka uteŵeti. Nyengu zinyaki ateŵeti akovya akwenere angalutiya limoza ndi ŵara ku maulendu nga uliska.
6. Ntchifukwa wuli titiŵawonga ukongwa ateŵeti akovya?
6 Kumbi ntchitu zo ateŵeti akovya achita zitovya wuli mu mpingu? Mzichi munyaki wa ku Bolivia zina laki Beberly b wangukamba kuti: “Nditiŵawonga ukongwa ateŵeti akovya chifukwa atindiwovya kuti ndiyanduwengi ndi maunganu. Vo achita vitovya kuti ndimbengi sumu, ndimukengepu pa maunganu, ndivwisiyengi nkhani kweniso ndisambirengi vinandi pa mavidiyo ndipuso vithuzi vo awonesa. Yiwu awonesesa kuti te akuvikilirika pa maunganu kweniso alumikiza ŵanthu anyaki pa maunganu kuziya pa vidiyokoniferensi. Asani maunganu ngamala, yiwu aja panthazi kutowesa Nyumba ya Ufumu, kuphwere ndalama kweniso awonesesa kuti te ndi mabuku ngo tikhumba. Nditiŵawonga ukongwa abali ŵenaŵa!” Leslie wa ku Colombia yo mulumu waki wateŵete nge mura wangukamba kuti: “Alumu ŵangu athemba ateŵeti akovya kuti aŵawovyi pa ntchitu zakupambanapambana. Kukamba uneneska, asani kwengavi ateŵeti akovya ŵenaŵa, alumu ŵangu atingi atangwanikengi ukongwa. Mwaviyo, nditiŵawonga ukongwa chifukwa cha phamphu ndipuso kujipereka kwawu.” Tosi titiŵawonga nadi ateŵeti akovya.—1 Timo. 3:13.
7. Kumbi tingalongo wuli kuti titiŵawonga ateŵeti akovya? (Wonani so chithuzi.)
7 Chinanga kuti mumtima titiŵawonga ukongwa ateŵeti akovya, kweni Bayibolu lititichiska kuti: “Longoni kuti muwonga.” (Ako. 3:15) Kristofer yo wateŵete nge mura ku Finland, watiŵawonga ukongwa ateŵeti akovya. Iyu wangukamba kuti: “Nditimutumiziya kadi pamwenga meseji yo ndalembamu lemba ndipu ndizumbuwamu vinthu chayivu vo mteŵeti wakovya yo watindichiska navu pamwenga chifukwa cho ndiwonge vo wachita.” Pascal ndi Jael, wo aja ku New Caledonia, atiŵapemphere ateŵeti akovya. Pascal wangukamba kuti: “Mazuŵa nganu, asani tipereka mapempheru nga kupempha, kuŵeyere kweniso kuwonga, kanandi tizumbuwamu abali audindu ŵenaŵa a mu mpingu mwidu.” Yehova wavwisiya mapempheru ngenanga ndipu mpingu wosi uyanduwa.—2 Akori. 1:11.
ŴARA MU MPINGU “AGWIRA NTCHITU MWAPHAMPHU PAKATI PINU”
8. Ntchifukwa wuli Paulo wangukamba kuti ŵara mu nyengu ya akutumika ‘agwiranga ntchitu mwaphamphu’? (1 Atesalonika 5:12, 13)
8 Ŵara mu nyengu ya akutumika agwiranga ntchitu mwaphamphu kuti awovyi mpingu. (Ŵerengani 1 Atesalonika 5:12, 13; 1 Timo. 5:17) Yiwu ‘alongozganga’ mu mpingu ndipu achitanga venivi mwakuchitiska maunganu kweniso kusankha vakuchita nge wupu wa ŵara. Yiwu ‘alunguchizganga’ abali ndi azichi mwa kuŵapaska ulongozgi wachanju kweni wambula kuyeŵapu mani kuti avikiliyi mpingu. (1 Ate. 2:11, 12; 2 Timo. 4:2) Abali ŵenaŵa ayesesanga so kuphwere mabanja ngawu kweniso ayesesanga kukholesa chivwanu chawu.—1 Timo. 3:2, 4; Tito 1:6-9.
9. Kumbi ndi ntchitu nizi zinyaki zo ŵara agwira mazuŵa nganu?
9 Ŵara mazuŵa nganu atangwanika ukongwa. Yiwu mbapharazgi. (2 Timo. 4:5) Ndipu alongo chakuwoniyapu chamampha pa nkhani yakupharazga mwaphamphu, anozga mo ntchitu yakupharazga yingayende muchigaŵa cha mpingu wawu, ndipuso atitisambiza mo tingapharazgiya kweniso kusambiza ŵanthu mwalusu. Yiwu ateŵete so nge akweruzga alisungu kweniso ambula kwanjiya. Asani Mkhristu wachita ubudi ukulu, ŵara atesesa kuti amuwovyi kuti wawere so pa ubwezi ndi Yehova. Pa nyengu yeniyi pe, awonesesa kuti mpingu ulutirizgi kuja wakutowa. (1 Akori. 5:12, 13; Aga. 6:1) Kusazgapu yapa, yiwu mbaliska, ndipu yeniyi ndiyu ntchitu yawu yikulu ukongwa. (1 Petu. 5:1-3) Yiwu akamba nkhani zo atizinozgeke umampha, ayesesa kuziŵa weyosi mu mpingu ndipuso achita maulendu nga uliska. Ŵara anyaki atovya pakuzenga ndi kunozga Nyumba za Ufumu, agwira ntchitu zakujipereka pa maunganu ngachigaŵa, ateŵete mu Makomiti Ngakukambiskana ndi Achipatala, Magulu Ngakuwona Akutama kweniso achita mauteŵeti nganyaki ngakupambanapambana. Ŵara agwira ntchitu mwaphamphu chifukwa chaku isi!
10. Ntchifukwa wuli titiŵawonga ukongwa ŵara wo agwira ntchitu mwaphamphu?
10 Yehova wakukambiya limu kuti aliska azakutiphwere umampha ndipu “[tazamuwopa] so cha pamwenga kuchita mantha.” (Yere. 23:4) Johanna wa ku Finland wangusimikiza kuti mazu ngenanga ngauneneska pa nyengu yo anyina angutama ukongwa. Iyu wangukamba kuti: “Chinanga kuti vitindisuzga kuti ndikonkhoski mo ndivwiya, kweni mura munyaki yo ndalekanga kumuziŵa umampha wangundivwisiya mwakuphwere, wangupemphera nani kweniso wangundisimikiziya kuti Yehova watindiyanja ukongwa. Ndikumbuka umampha cha vo iyu wangukamba kweni ndikumbuka ŵaka kuti ndingujivwa kuti nde wakuvikilirika. Ndiwona kuti Yehova wangumutuma kuti wandiwovyi pa nyengu chayiyu yakwenere.” Kumbi ŵara mu mpingu winu akuwovyanipu wuli?
11. Kumbi tingalongo wuli kuti titiŵawonga ŵara? (Wonani so chithuzi.)
11 Yehova wakhumba kuti tilongongi kuti titiŵawonga ukongwa ŵara “chifukwa cha ntchitu yawu.” (1 Ate. 5:12, 13) Henrietta yo waja ku Finland wangukamba kuti: “Ŵara atitiwovya ndi mtima wosi, kweni venivi ving’anamuwapu cha kuti yiwu ŵe ndi nyengu yinandi kweniso nthazi kuphara ŵanthu anyaki. Ndipuso ving’anamuwapu cha kuti aleka kukumana ndi masuzgu pa umoyu wawu. Nyengu zinyaki nditiŵakambiya ŵaka kuti: ‘Kumbi muziŵa kuti ndimwi mura wamampha ukongwa? Ndakhumba ŵaka kuti muziŵi venivi.’” Mzichi munyaki wa ku Türkiye c zina laki Sera wangukamba kuti: “Ŵara akhumbika kuŵachiska kuti alutirizgi kuyigwira umampha ntchitu yawu. Mwaviyo, tingaŵalembe kadi, tingaŵadana kuti aziryi nasi chakurya pamwenga kulutiya nawu limoza mu uteŵeti.” Kumbi walipu mura yo yimwi muwonga ukongwa phamphu lo wachita pa uteŵeti waki? Asani ndi viyo, mbwenu saniyani nthowa zakumuwonge.—1 Akori. 16:18.
Mungachiska abali a udindu kuti alutirizgi kugwira umampha ntchitu yawu (Wonani ndimi 7, 11, 15)
AKUWONERE MADERA ATITICHISKA
12. Kumbi ndi vinthu wuli vo vinguwovya kuti mipingu ya mu nyengu ya akutumika yije yakukho? (1 Atesalonika 2:7, 8)
12 Yesu Khristu wakutipaska so ŵara anyaki “nge mphasu” wo ateŵete mu nthowa yinyaki. Mwakulongozgeka ndi Yesu, ŵara ku Yerusalemu angutumiza Paulo, Baranaba kweniso ŵara anyaki kuti akateŵetiyengi nge akuwonere madera. (Machi. 11:22) Chifukwa wuli? Pa chifukwa chakuyanana ndi cho ateŵeti akovya kweniso ŵara anguŵikikiya, chakuti azengi mipingu. (Machi. 15:40, 41) Ŵara ŵenaŵa angujipereka ukongwa kuti achiti uteŵeti wenuwu. Ndipu anyaki aŵikanga maumoyu ngawu pangozi kuti asambizi kweniso achiski Akhristu anyawu.—Ŵerengani 1 Atesalonika 2:7, 8.
13. Kumbi ndi ntchitu zinyaki nizi zo wakuwonere dera wachita?
13 Akuwonere madera atenda ukongwa. Anyaki atenda mitunda yitali kuti akacheze mipingu. Sabata yeyosi wakuwonere dera wakamba nkhani zakupambanapambana, wachita maulendu nga uliska, wachitiska unganu wa apayiniya, wa ŵara kweniso maunganu ngakunozgeke uteŵeti. Iyu wanozgeke nkhani kweniso wachita vosi vo vikhumbika kuti unganu wadera kweniso wachigaŵa ukayendi umampha. Iyu wasambiza pa sukulu ya apayiniya, wachitiska unganu wa apayiniya mudera laki kweniso nyengu zinyaki waphwere nkhani zinyaki zo zikhumbika kuchitapu kanthu mwaliŵi zo ofesi ya nthambi yamupempha.
14. Ntchifukwa wuli titiŵawonga ukongwa akuwonere madera wo agwira ntchitu mwaphamphu?
14 Kumbi mipingu yiyanduwa wuli ndi akuwonere madera wo ŵe nge mphasu? Pakukamba vakukwaskana ndi ntchitu yakucheze mipingu yo akuwonere madera achita, mubali munyaki wa ku Türkiye wangukamba kuti: “Ulendu wewosi wo wakuwonere dera wacheze mpingu widu, ndichiskika kuti ndiwovyengi abali ndi azichi. Ndakumanapu ndi akuwonere madera anandi kweni palivi yo wakundilongopu kuti ngwakutangwanika ukongwa pamwenga ngwambula kufikirika.” Mzichi Johanna yo tamukambapu kali, zuŵa linyaki wangwende limoza ndi wakuwonere dera mu uteŵeti kweni angusaniya munthu weyosi cha munyumba za ŵanthu. Iyu wangukamba kuti: “Kweni ndazakuliluwapu cha zuŵa lenili. Pa nyengu yeniyi ndipu aku ŵangu wosi ŵaŵi asama ndipu ndinguŵasoŵa ukongwa. Wakuwonere dera wangundichiska ukongwa ndipu wangundiwovya kuwona kuti nyengu zinyaki abali ndi mabwezi ngidu angasamiya kunyaki. Kweni mucharu chifya tazamuja ndi mwaŵi wakuja nawu limoza kwamuyaya.” Akuwonere madera anandi atanjika ukongwa ndi abali kweniso azichi wo atiŵateŵete.—Machi. 20:37–21:1.
15. (a) Mwakukoliyana ndi 3 Yohane 5-8, kumbi tingalongo wuli kuti titiŵawonga akuwonere madera? (Wonani so chithuzi.) (b) Ntchifukwa wuli tikhumbika so kuŵanaŵaniya awolu ŵa abali wo ŵe ndi maudindu mu mpingu, nanga tingachita wuli venivi? (Wonani bokosi lakuti “ Mukumbukengi So Awolu Ŵawu.”)
15 Wakutumika Yohane wangupempha Gayo kuti waŵalonde umampha abali wo anguza ndipu ‘walayirani nawu mu nthowa yakukondwesa Chiuta.’ (Ŵerengani 3 Yohane 5-8.) Nasi tingachita venivi mwakumudana wakuwonere dera kuti tiziryi nayu chakurya kunyumba kwidu. Tingachita so venivi asani tisanirikapu pa unganu wakunozgeke uteŵeti wo wachitiska. Leslie yo tamukambapu kali, nayu walongo kuwonga mu nthowa so zinyaki. Iyu wangukamba kuti: “Nditiŵapemphere kuti Yehova waŵapaskengi vo akhumbika. Nyengu zinyaki ini ndi mulumu wangu titiŵalembe makalata ndi kuŵakambiya mo tachiskikiya pa nyengu yo anguza kuziticheze mu mpingu widu.” Kumbukani kuti akuwonere madera nawu mbanthu nge isi. Nyengu zinyaki nawu atama, afipa mtima kweniso aguŵa. Nyengu zinyaki Yehova wangamuka mapempheru ngawu kuziya mu mazu nginu ngakuchiska ngo mungakamba pamwenga kamphasu ko mungaŵapaska!—Nthanthi 12:25.
TIKHUMBIKA ANTHULUMI WO NDI “MPHASU”
16. Mwakukoliyana ndi lemba la Nthanthi 3:27, kumbi ndi mafumbu nanga ngo abali angajifumba?
16 Pacharu chosi chapasi, pakhumbika abali anandi kuti ateŵetiyengi “nge mphasu.” Asani ndimwi mubali wakubatizika, kumbi ‘mungafiska kuwovya’? (Ŵerengani Nthanthi 3:27.) Kumbi mukhumbisiska kuti muzije mteŵeti wakovya? Asani ndimwi mteŵeti wakovya, kumbi mwe akunozgeka kuja mura kuti muziphweriyengi abali ndi azichi? d Kumbi mungasintha vinthu pa umoyu winu kuti mukasere Sukulu ya Apharazgi a Ufumu? Sukulu yeniyi yakukuwovyani kuja akunozgeka kuti mugwiriskikiyi ntchitu ndi Yesu mu nthowa zinandi. Asani muwona kuti mwe akwenere cha pasonu panu, mupempheni Yehova kuti wakuwovyeni. Mupempheni kuti wakuwovyeni ndi mzimu waki kuti muchitengi umampha uteŵeti wewosi wo mungapaskika.—Luka 11:13; Machi. 20:28.
17. Kumbi abali wo ŵe nge “mphasu” avumbuwanji vakukwaskana ndi Fumu yidu, Khristu Yesu?
17 Abali wo Yesu wakuŵapereka nge “mphasu” mbukaboni wakuti iyu watitilongozga mu mazuŵa nganu ngakumaliya. (Mate. 28:20) Mwaviyo titenere kuwonga ukongwa kuti te ndi Fumu yo yititiyanja, yititiwovya, yiziŵa vo tikhumbika kweniso yititipaska abali kuti atiwovyengi. Mwaviyo, muyesesengi kulongo kuti mutiŵawonga abali ŵenaŵa wo agwira ntchitu mwaphamphu. Ndipu mungaluwanga cha kumuwonga Yehova yo wapereka “mphasu yeyosi yamampha ndipuso yakufikapu.”—Yako. 1:17.
SUMU 99 Abali Mamiliyoni Nganandi
a Ŵara wo ateŵete mu Wupu Wakulongozga, abali wo atovya Wupu Wakulongozga, abali a mu Komiti ya Nthambi kweniso abali wo achita mauteŵeti nganyaki mugulu laku Yehova nawu so ndi “mphasu.”
b Mazina nganyaki ngasinthika.
c Kali charu ichi chadanikanga kuti Turkey.
d Kuti muziŵi vo mungachita kuti muyenere kuja mteŵeti wakovya pamwenga mura wonani nkhani yakuti “Kumbi Abali Muyesesa Kuti Muje Ateŵeti Akovya?” kweniso yakuti “Kumbi Abali Muyesesa Kuti Muje Ŵara?” mu Chigongwi cha Mlinda cha November 2024.
