NKHANI YAKUSAMBIRA YA NAMBALA 39
Asani Munthu wa Mubanja Lidu Waleka Kuteŵete Yehova
‘Yiwu kaŵikaŵi amuguŵiskanga.’—SALIMO 78:40.
SUMU 102 ‘Wovyani wo Mbakufoka’
VO TISAMBIRENGI MU NKHANI IYI *
1. Kumbi ŵanthu atuvwa wuli asani munthu munyaki wa a mu banja lawu wasezgeka?
KUMBI munthu munyaki wa mu banja mwinu wakusezgeka? Venivi vakupweteka ukongwa! Mzichi munyaki zina laki Hilda, wangukamba kuti: “Mulumu wangu wakugomezgeka wati wafwa tati taja mu nthengwa kwa vyaka 41, ndinguŵanaŵana kuti chenichi ndichu chenga chinthu chakupweteka ukongwa pa umoyu wangu. * Kweni mwana wangu wati waleka kuteŵete Yehova, waleka muwolu waki kweniso ŵana ŵaki, vingundipweteka ukongwa kuphara nyifwa ya mulumu wangu.”
Yehova waziŵa mo vipweteke asani mubali widu wasezgeka (Wonani ndimi 2-3) *
2-3. Mwakukoliyana ndi Salimo 78:40, 41, kumbi Yehova watuvwa wuli asani ateŵeti ŵaki aleka kumuteŵete?
2 Ŵanaŵaniyani mo Yehova vingumuŵaŵiya angelu ŵaki anyaki ŵati amugarukiya! (Yuda 6) Kweniso so ŵanaŵaniyani mo vingumuguŵiskiya kuwona mo ŵanthu ŵaki Ayisirayeli wo waŵayanjanga, achimugarukiya kaŵikaŵi. (Ŵerengani Salimo 78:40, 41.) Ziŵani kuti Awusefwi achanju akuchanya, nawu vitiŵapweteka ukongwa asani munthu munyaki wa mu banja mwinu waleka kuŵateŵete. Yehova wavwisa mo vitikupwetekiyani. Mwalisungu, iyu wakuwovyeningi kweniso kukuchiskani.
3 Mu nkhani iyi, tikambiskanengi vo tingachita kuti Yehova watiwovyi asani munthu wa mu banja lidu waleka kuteŵete Yehova. Tikambiskanengi so mo tingawovye anyaki mumpingu wo akumana so ndi suzgu nge yeniyi. Kweni chakwamba tiyeni tikambiskani maŵanaŵanu ngaheni ngo tikhumbika kungakhwecha.
MUNGAJIMBANGA MULANDU CHA
4. Kumbi apapi anandi atuvwa wuli asani mwana wawu munthulumi pamwenga munthukazi waleka kuteŵete Yehova?
4 Asani mwana wakwanjiwa munthulumi pamwenga munthukazi waleka kuteŵete Yehova, kanandi apapi aŵanaŵana kuti mphanyi anguchita vinandi kuti awovyi mwana wawu kuti walutirizgi kuja mu uneneska. Mubali munyaki zina laki Luke mwana waki munthulumi wati wasezgeka wanguti: “Ndingujimba mulandu. Ndalotanga malotu ngamampha cha. Nyengu zinyaki ndaliyanga kweniso mtima wangu waŵaŵanga.” Mzichi munyaki zina laki Elizabeth yo nayu mwana waki wangusezgeka kanandi waŵanaŵananga kuti: “Ntchinthu wuli cho ndingunangisa nge mpapi? Ndingujivwa kuti panyaki ndingutondeka kumusambiza uneneska mwana wangu.”
5. Kumbi ntchifukwa chakuyani asani munthu munyaki waleka kuteŵete Yehova?
5 Titenere kukumbuka kuti Yehova wapaska munthu weyosi wanangwa wakusankha. Ivi ving’anamuwa kuti tingasankha kumuvwiya pamwenga cha. Ŵana anyaki apapi ŵawu ŵenga chakuwoniyapu chamampha cha kweni yiwu asankha kuteŵete Yehova ndipu alutirizga kuja akugomezgeka kwaku iyu. Penipo ŵana anyaki, apapi ŵawu angufwiyapu kuŵasambiza kwanja Yehova kweni ŵati akuwa anguleka kumuteŵete. Mwaviyo, weyosi wakhumbika kusankha kuteŵete Yehova pamwenga cha. (Yoswa 24:15) Apapi wo ŵe ndi chitima chifukwa chakuti mwana wawu wakuleka kuteŵete Yehova, angaŵanaŵananga cha kuti yiwu ndiwu akuchitiska!
6. Kumbi wachinyamata wangakwaskika wuli asani mpapi waleka kuteŵete Chiuta?
6 Nyengu zinyaki mpapi waleka uneneska kweniso waleka banja laki. (Salimo 27:10) Venivi vakutimbanyizga ku ŵana wo awonanga mpapi wawu nge chakuwoniyapu chamampha. Esther yo awisi angusezgeka wangukamba kuti: “Kanandi ndaliyanga chifukwa ndinguziŵa kuti awuleka ŵaka cha uneneska. Kweni asankhiya dala kuleka kuteŵete Yehova. Nditiŵayanja ukongwa ada. Mwaviyo, ŵati asezgeka kanandi ndafipanga mtima kuti vinthu viŵayendiyengi wuli. Mwakuti vandipwetekanga ukongwa.”
7. Kumbi Yehova watimuwona wuli wachinyamata yo mpapi waki wasezgeka?
7 Yimwi achinyamata, asani apapi ŵinu asezgeka, titikulengiyani lisungu ukongwa! Ziŵani so kuti Yehova waziŵa mo vitikupwetekiyani. Iyu watikuyanjani kweniso wakondwa chifukwa cha kugomezgeka kwinu. Ndipuso isi abali ndi azichi ŵinu mumpingu tikondwa so namwi. Kumbukani so kuti ndimwi cha mukuchitiska kuti mpapi winu waleki kuteŵete Yehova. Nge mo takambiyapu kali, Yehova wakupaska munthu weyosi wanangwa wakusankha. Munthu weyosi yo wakujipereka kweniso kubatizika, watenere ‘kunyamuwa udindu waki.’—Aga. 6:5, mazu ngamumphata.
8. Kumbi ŵanthu anyaki akugomezgeka a mu banja la munthu yo wakusezgeka, angachitanji po alindizga kuti iyu wawere kwaku Yehova? (Wonani so bokosi lakuti, “ Weriyani Kwaku Yehova.”)
8 Asani munthu munyaki wa mu banja linu waleka kuteŵete Yehova, mukhazga kuti zuŵa linyaki wazamuwere kwaku Iyu. Kumbi pasonu panu mukhumbika kuchitanji muchilindizga venivi? Muchitengi vosi vo mungafiska kuti mulutirizgi kuja ndi chivwanu chakukho. Asani muchitengi viyo, mujengi chakuwoniyapu chamampha ku ŵanthu anyaki a mu banja linu kweniso panyaki ku munthu yo wakusezgeka. Kweniso musaniyengi nthazi zo mukhumbikiya kuti mukunthiyepu chitima cho mwenachu. Sonu tiyeni tikambiskani vo mungachita kuti mulutirizgi kuja ndi chivwanu chakukho.
VO MUNGACHITA KUTI MULUTIRIZGI KUJA NDI CHIVWANU CHAKUKHO
9. Kumbi ndi nthowa nizi zo zingakuwovyani kuti musaniyi nthazi kutuliya kwaku Yehova? (Wonani so bokosi lakuti, “ Malemba ngo Ngangakupembuzgani Asani Munthu Munyaki mu Banja Linu Waleka Yehova.”)
9 Muchitengi vosi vo mungafiska kuti mulutirizgi kuja ndi chivwanu chakukho. Vingaŵa umampha ukongwa kuti mulutirizgi kuja ndi chivwanu chakukho kweniso kuchiska ŵanthu anyaki a mu banja linu. Kumbi mungachita wuli venivi? Mungasaniya nthazi kutuliya kwaku Yehova mwakulutirizga kuŵerenga Mazu ngaku Chiuta ndi kuŵanaŵaniyapu kweniso kuwungana. Joanna yo awisi kweniso mku waki akuleka uneneska wangukamba kuti: “Ndifipa ukongwa mtima cha asani ndiŵerenga vakukwaskana ndi ŵanthu wo azumbulika mu Bayibolu nge Abigelu, Esiteri, Yobu, Yosefi kweniso Yesu. Vakuwoniyapu vawu, vitindichiska ndipuso vitindiwovya kuti ndije ndi maŵanaŵanu ngakwenere. Ndipuso sumu za mu Broadcasting zinditichiska ukongwa.”
10. Kumbi lemba la Salimo 32:6-8, lingatiwovya wuli kuti tikunthiyepu?
10 Mumukambiyengi Yehova vinthu vo vitikufipiskani mtima. Asani mwaguŵa mungalekanga cha kupemphera kwaku iyu. Mupemphengi Chiuta widu wachanju kuti wakuwovyeni kuwona nkhani yo nge mo iyu watiyiwone ndipuso kuti ‘wakupaskeni kuwamu kweniso wakusambizeni nthowa yo mutenere kwendamu.’ (Ŵerengani Salimo 32:6-8.) Mbuneneska kuti vingaŵa vakusuzga ukongwa kuti mumukambiyi Yehova mo muvwiya. Kweni Yehova wavwisa mo vitikuŵaŵiya mumtima. Iyu watikuyanjani ukongwa ndipu watikupemphani kuti mumujuliyengi mtima winu.—Eki. 34:6; Salimo 62:7, 8.
11. Mwakukoliyana ndi Aheberi 12:11, ntchifukwa wuli tikhumbika kugomezga chilangu chakutuliya kwaku Yehova? (Wonani so bokosi lakuti, “ Kusezga Munthu Kulongo Kuti Yehova Watitiyanja.”)
11 Mukoliyanengi ndi vo ŵara asankha. Kusezga ndi nthowa yimoza yo Yehova wachenye munthu mwachanju. Venivi vitovya weyosi kusazgapu munthu yo wabuda. (Ŵerengani Aheberi 12:11.) Anyaki angakamba kuti ŵara achita umampha cha kusezga munthu yo wachita vinthu viheni. Kweni kumbukani kuti kanandi ŵanthu aviyo, akamba cha vinthu viheni va munthu yo wakusezgeka. Isi tiziŵa nkhani yosi cha. Mwaviyo, ndi zeru kugomezga kuti ŵara wo aphweriyanga nkhani yo, ayesesa kugwiriskiya ntchitu fundu za mu Malemba ndipu ‘ayeruzgiya Yehova.’—2 Mbiri 19:6.
12. Kumbi ŵanthu anyaki ayanduwa wuli chifukwa chakuti akoliyana ndi ndondomeku yo Yehova wakujalikiska kuti munthu yo wabuda walondiyengi chilangu?
12 Asani mukoliyana ndi vo ŵara asankha kuti munthu wa mu banja linu wasezgeki, mungamuwovya kuti wawere kwaku Yehova. Elizabeth yo tamukambapu kali wanguti: “Venga vakusuzga ukongwa kuleka kuchitiya vinthu limoza ndi mwana wangu munthulumi. Kweni mwana wangu wati wawere kwaku Yehova, iyu wangukamba kuti penga pakwenere kuti wasezgeki. Pati pajumpha nyengu, iyu wangukamba kuti wangusambirapu kanthu. Ndingwamba kuwona kuti chilangu chakutuliya kwaku Yehova ntchamampha.” Mark mulumu waku Elizabeth wangukamba so kuti: “Pati pajumpha nyengu, mwana widu wangundikambiya kuti iyu wakhumbanga kuwere kwaku Yehova chifukwa chinthu chinyaki cho chingumuwovya chenga chakuti tinguleke limu kuchitiya nayu vinthu limoza. Ndikondwa ukongwa kuti Yehova wangutiwovya kuti timuvwiyi.”
13. Kumbi ntchinthu wuli cho chingakuwovyani kuti mukunthiyepu asani munthu munyaki mu banja linu walonde chilangu?
13 Mukambiyengeku mabwezi nginu ngo ngavwisa mo muvwiya. Muchezengi ndi Akhristu akukhwima mwauzimu wo angakuwovyani kuti mulutirizgi kuja ndi maŵanaŵanu ngakwenere. (Nthanthi 12:25; 17:17) Joanna, yo tamuzumbuwapu kali wanguti: “Ndajivwanga kuti nde ndija. Kweni kukambiyaku mabwezi ngangu ngakuthembeka kungundiwovya kuti ndikunthiyepu.” Kweni kumbi mungachita wuli asani ŵanthu anyaki mumpingu awoneka kuti akamba vinthu vo vingakusazgiyaniku chitima?
14. Ntchifukwa wuli tikhumbika ‘kulutirizga kuzizipizgiyana kweniso kugowokiyana ndi mtima wosi?’
14 Muzikirengi ndi abali kweniso azichi ŵinu. Kukamba uneneska ndi munthu weyosi cha yo wangakamba vinthu vakwenere. (Yako. 3:2) Tosi te ambula kufikapu. Mwaviyo, mungazizwanga cha asani ŵanthu anyaki aziŵa cha vo angakamba pamwenga asani akamba vinthu vo vakuŵaŵani ukongwa chinanga kuti ndivu ang’anamuwanga cha. Mukumbukengi ulongozgi wa wakutumika Paulo wakuti: “Lutirizgani kuzizipizgiyana kweniso kugowokiyana ndi mtima wosi chinanga munyaki wangaŵa ndi chifukwa chakudandawuliya vakukwaskana ndi munyaki.” (Ako. 3:13) Mzichi munyaki yo mubali waki wangusezgeka wangukamba kuti: “Yehova wangundiwovya kuti ndigowokiyengi abali wo andichiskanga chinanga kuti vo akambanga vandipwetekanga.” Kumbi mpingu ungawovya wuli ŵanthu akugomezgeka wo mubali wawu wasezgeka?
MPINGU UNGAWOVYA
15. Kumbi ntchinthu wuli cho chingawovya ŵanthu wo mubali wawu wasezgeka pambula kuswera?
15 Muchitengi nawu vinthu mwalisungu kweniso mwaubwezi ŵanthu a mubanja lo, munyaki wasezgeka. Mzichi munyaki zina laki, Miriam wangukamba kuti wafipanga mtima kuluta ku maunganu, mzichi waki wati wasezgeka. Iyu wanguti: “Ndachitanga mantha ndi vo ŵanthu amukamba. Kweni abali ndi azichi anandi, andilengiyanga lisungu ndi vo vinguchitika ndipu akambanga viheni cha vakukwaskana ndi mzichi wangu. Nditiŵawonga ukongwa chifukwa chakuti angundileka ndija cha pa nyengu yakusuzga yeniyi.” Mzichi munyaki wangukamba kuti: “Mwana widu munthulumi wati wasezgeka, mabwezi ngidu ngazanga kuzitipembuzga. Anyaki akambanga kuti aziŵanga cha cho angakamba. Yiwu aliyanga nani pamwenga kundilembe mazu ngakupembuzga. Vo yiwu anguchita vingundiwovya ukongwa!”
Mpingu ungawovya ŵanthu wo mubali wawu wasezgeka (Wonani ndimi 17) *
16. Kumbi mpingu ungalutirizga wuli kovya ŵanthu wo mubali wawu wasezgeka?
16 Lutirizgani kuwovya ŵanthu wo mubali wawu wasezgeka. Yiwu akhumbika kuŵayanja ukongwa kweniso kuŵachiska kuphara kali. (Ahe. 10:24, 25) Nyengu zinyaki, ŵanthu wo mubali wawu wasezgeka, awonapu ŵanthu anyaki achiŵakhwecha mumpingu. Mungazomerezanga cha kuti venivi vichitiki! Achinyamata wo apapi ŵawu akuleka uneneska ndiwu ukongwa akhumbika kuchiskika kweniso kuwongeka. Maria yo mulumu waki wangusezgeka ndi kuleka banja laki wangukamba kuti: “Mabwezi ngangu nganyaki ngazanga ku nyumba kwangu ndipu ngabikanga chakurya kweniso achitanga nasi kusopa kwa pabanja.” Yiwu avwisanga chitima cho ndenga nachu ndipu aliyanga nani. Yiwu andivikiliyanga asani ŵanthu akamba vinthu vaboza vakukwaskana ndi ini. Yiwu angundichiska ukongwa.”—Aro. 12:13, 15.
17. Kumbi ŵara angachita wuli kuti apembuzgi abali ndi azichi wo asuzgika maŵanaŵanu chifukwa chakuti mubali wawu wasezgeka?
17 Ŵara muyesesengi kusaniya mpata kuchiska abali ndi azichi wo mubali wawu wasezgeka. Yimwi mwe ndi udindu wapade wakupembuzga ŵanthu wo abali ŵawu aleka kuteŵete Yehova. (1 Ate. 5:14) Muyambengi ndimwi kuŵachiska maunganu ngechendayambi kweniso asani ngamala. Muŵayendiyengi kweniso muŵapempheriyengi. Mupharazgengi nawu limoza pamwenga nyengu zinyaki muŵapemphengi kuti muchitiyengi nawu limoza kusopa kwa pabanja. Ŵara akhumbika kuphwere ŵanthu wo asuzgika maŵanaŵanu chifukwa chakuti mubali wawu wasezgeka ndipu aŵayanjengi ndi kuŵalongo lisungu.—1 Ate. 2:7, 8.
MUNGATAYANGA MTIMA CHA NDIPU LUTIRIZGANI KUTHEMBA YEHOVA
18. Mwakukoliyana ndi 2 Peturo 3:9, kumbi Chiuta wakhumba kuti ŵanthu wo abuda achitenji?
18 Yehova “wakhumba cha kuti weyosi wanangiki, kweni wakhumba kuti weyosi walapi.” (Ŵerengani 2 Peturo 3:9.) Chinanga kuti munthu wangachita ubudi ukulu, kweni umoyu waki ngwakuzirwa mbwenu kwaku Chiuta. Ŵanaŵaniyani mtengu ukulu wo Yehova wangupereka, sembi ya Mwana waki wakwanjiwa chifukwa cha ŵanthu akubuda. Yehova mwachanju watesesa kovya ŵanthu wo aleka kumuteŵete kuti awere kwaku iyu. Iyu walindizga kuti achitengepu kanthu nge mo ntharika yaku Yesu ya mwana wakusoŵa yilongole. (Luka 15:11-32) Ŵanthu anandi wo anguleka uneneska akuwere so kwa Awusewu akuchanya. Ndipu mpingu unguŵalonde ndi manja ngaŵi. Elizabeth yo tamukambapu kali, wangujiwone yija likondwa lo munthu watuŵa nalu mwana waki wati wawezgeke mumpingu. Asani wakumbuka vo vinguchitika iyu wakamba kuti: “Ndiwonga ukongwa ŵanthu wo angundichiska kuti ndileki kutaya mtima.”
19. Ntchifukwa wuli tingalutirizga kuthemba Yehova?
19 Nyengu zosi tithembengi Yehova. Iyu watitipaska cha ulongozgi wo ungatipweteka. Iyu ngwakupaska kweniso Mbada alisungu wo atanja ukongwa ŵanthu wo atiŵayanja kweniso kuŵasopa. Ziŵani kuti Yehova wakujowoningi cha mu nyengu ya masuzgu. (Ahe. 13:5, 6) Mark yo tamukambapu kali wanguti: “Yehova wangutijowo cha. Iyu waja nasi patali cha asani tikumana ndi masuzgu.” Yehova walutirizgengi kukupaskani ‘nthazi yakujumpha yo mutuŵa nayu.’ (2 Akori. 4:7) Kukamba uneneska mungalutirizga kuja akugomezgeka kweniso kulindizga chinanga kuti mubali winu waleka kuteŵete Yehova.
SUMU 44 Pempheru la Munthu Wakusuzgika
^ ndimi 5 Vipweteka ukongwa asani munthu wa mu banja lidu waleka kuteŵete Yehova! Nkhani iyi yikonkhoska mo Chiuta wavwiya asani venivi vachitika. Yikonkhoska so vinthu vakovya vo ŵanthu akugomezgeka a mu banja lo angachita kuti akunthiyepu kweniso kulutirizga kuja ndi chivwanu chakukho. Mu nkhani yeniyi, tiwonengi so vo ŵanthu wosi mumpingu angachita kuti awovyi kweniso kuchiska banja lo lakwaskika.
^ ndimi 1 Mazina nganyaki ngasinthika mu nkhani iyi.
^ ndimi 79 VITHUZI: Asani mubali waleka banja laki kweniso Yehova, muwolu waki ndi ŵana ŵaki asuzgika.
^ ndimi 81 VITHUZI: Ŵara ŵaŵi ŵaza kuzichiska banja la mumpingu wawu.
