NKHANI YAKUSAMBIRA YA NAMBALA 40
“Atovya Ŵanthu Anandi Kuti Aje Arunji”
“Wo atovya ŵanthu anandi kuti aje arunji, azamuŵala nge nyenyezi, muyaya mpaka muyaya.”—DANI. 12:3.
SUMU 151 Iyu Wazamudana
VO TISAMBIRENGI MU NKHANI IYI *
1. Kumbi ndi vinthu vakukondwesa nivi vo tilindizga vo vazamuchitika mu Ulamuliru wa Vyaka 1,000 waku Khristu?
LAZAMUKUŴA zuŵa lakukondwesa ukongwa asani ŵanthu aziyamba kuyuskika mu Ulamuliru wa Vyaka 1,000 waku Khristu! Ŵanthu wosi wo abali ŵawu akutayika akhumbisiska kuziŵawona so. Yehova nayu wakhumbisiska. (Yobu 14:15) Aŵanaŵaniyani ŵaka mo weyosi wazamukondwe kuwona kuti abali ŵaki ayuskika. Ndipu nge mo tingusambiriya mu nkhani yajumpha, “ŵanthu arunji” wo mazina ngawu nge mubuku la umoyu, “azamuyuka kuti alonde umoyu.” (Machi. 24:15; Yoha. 5:29) Panyaki anandi mwa akwanjiwa ŵidu azamuja mugulu la ŵanthu akwamba kuyuskika * asani Aramagedoni yajumphapu. Fundu yinyaki njakuti, “ambula urunji” wo ŵengavi mwaŵi wakukwana kuti amuziŵi Yehova pamwenga kumuteŵete mwakugomezgeka ŵechendafwi, “azamuyuka kuti ayeruzgiki.”
2-3. (a) Nge mo palongore pa Yesaya 11:9, 10, kumbi ndi ntchitu yikulu niyi yakusambiza yo yazamuchitika pacharu chapasi? (b) Kumbi tikambiskanengenji mu nkhani iyi?
2 Ŵanthu wosi ŵenaŵa wo azamuyuskika, azamukhumbika kusambizika. (Yesa. 26:9; 61:11) Mwaviyo, ntchitu yikulu ukongwa yakusambiza yo yechendachitikepu pacharu chapasi, yazamuchitika. (Ŵerengani Yesaya 11:9, 10.) Chifukwa wuli? Chifukwa chikulu ntchakuti ŵanthu ambula urunji wo azamuyuskika azamukhumbika kusambira vakukwaskana ndi Ufumu waku Chiuta, sembi yaku Yesu kweniso kukhumbika kwa zina laku Yehova ndipuso chifukwa cho Iyu pe ndiyu ngwakwenere kulamuliya. Chinanga mbanthu arunji azamukhumbika kusambira vo Yehova waja wachivumbuliya ŵanthu ŵaki vakukwaskana ndi vo wakhumba kuchitiya ŵanthu pacharu chapasi. Anyaki mwa ŵanthu akugomezgeka ŵenaŵa, angufwa Bayibolu losi lechendamaliziki kulembeka. Ŵanthu arunji ndi ambula urunji, wosi azamusambira vinthu vinandi.
3 Mu nkhani iyi, tikambiskanengi mafumbu yanga: Kumbi ntchitu yikulu yeniyi yazamugwirika wuli? Kumbi ndi vinthu wuli vo vazamuchitikiya ŵanthu wo azamuvwiya vo azamusambizika? Nanga ndi vinthu wuli vo vazamuchitika asani azileka kuvwiya? Kwamuka kwa mafumbu ngenanga, nkhwakukhumbika ukongwa kwaku isi mazuŵa nganu. Nge mo tiwoniyengi, mauchimi ngakukondwesa ngo nge mu buku la Daniyeli kweniso Chivumbuzi, ngatiwovyengi kuvwisa so umampha mo tavwiyanga kali vo vazamuchitika asani akufwa aziyuskika. Chakwamba, tiyeni tikambiskani vinthu vakukondwesa vo vingukambikiya limu mu uchimi wo we pa Daniyeli 12:1, 2.
“WO AGONA MUFUVU . . . AZAMUYUKA”
4-5. Kumbi lemba la Daniyeli 12:1 livumbuwanji vakukwaskana ndi nyengu ya umaliru?
4 Ŵerengani Daniyeli 12:1. Buku la Daniyeli livumbuwa ndondomeku ya vinthu vakukondwesa vo vazamuchitika mu nyengu ya umaliru. Mwakuyeruzgiyapu, lemba la Daniyeli 12:1, livumbuwa kuti Mikayeli yo ndi Yesu Khristu “wama kuti wawovyi ŵanthu [aku Chiuta].” Chigaŵa chinyaki cha uchimi wenuwu, chingwamba kufiskika mu 1914, Yesu wati wasankhika kuja Fumu ya Ufumu waku Chiuta kuchanya.
5 Kweni Daniyeli wangukambirika so kuti Yesu “wazamukuma” pa “nyengu ya suzgu yo yikuŵapu cha kutuliya pa nyengu yo mtundu wa ŵanthu ukuŵiyaku mpaka pa nyengu yo.” “Nyengu ya suzgu” yeniyi ndi nyengu ya “chisuzgu chikulu” cho chikambika pa Mateyu 24:21. Yesu wazamukuma pamwenga kuti wazamuchitapu kanthu kuti wavikiliyi ŵanthu aku Chiuta pakumaliya pa nyengu ya suzgu yeniyi po mpha Aramagedoni. Buku la Chivumbuzi likamba kuti ŵanthu ŵenaŵa kuti mba “mzinda ukulu wo atuwa mu chisuzgu chikulu.”—Chivu. 7:9, 14.
6. Kumbi ntchinthu wuli cho chazamuchitika asani a mzinda ukulu azipona pa chisuzgu chikulu? Konkhoskani. (Wonani so nkhani yakuti “Vo Akuŵerenga Afumba” yo yikonkhoska va chiyuka cha pacharu chapasi mumagazini yeniyi.)
6 Ŵerengani Daniyeli 12:2. Kumbi ntchinthu wuli cho chazamuchitika asani a mzinda ukulu azipona nyengu ya suzgu yeniyi? Kali tavwanga kuti uchimi wa pa Daniyeli 12:2 ukamba va chiyuka chakuyeruzgiya, kung’anamuwa kuyuskika mwauzimu kwa ateŵete aku Chiuta ko kunguchitika mu 1919. * Kweni sonu tituvwa kuti mazu yanga ngang’anamuwa chiyuka cha ŵanthu akufwa cho chazamuchitika mucharu chifya. Ntchifukwa wuli tikamba viyo? Mazu ngakuti ‘fuvu’ ngo ngakugwiriskikiya so ntchitu pa Yobu 17:16 ngayanana ndi mazu ngakuti “Dindi.” Fundu yeniyi yilongo kuti lemba la Daniyeli 12:2 ling’anamuwa chiyuka chayichu cho chazamuchitika asani mazuŵa ngakumaliya ngamala kweniso pavuli pa nkhondu ya Aramagedoni.
7. (a) Kumbi anyaki azamuyuskikiya wuli ku “umoyu wamuyaya”? (b) Ntchifukwa wuli chiyuka chenichi ‘ntchamampha ukongwa’?
7 Kweni kumbi lemba la Daniyeli 12:2, ling’anamuwanji asani likamba kuti anyaki “azamulonde umoyu wamuyaya”? Lemba ili ling’anamuwa kuti ŵanthu wo azamuyuskika ndi kuziŵa Yehova ndi Yesu pamwenga kulutirizga kuŵaziŵa, kweniso kuŵavwiya mu nyengu ya vyaka 1,000, ndiwu pakumaliya paki azamulonde umoyu wamuyaya. (Yoha. 17:3) Chenichi chazamukuŵa “chiyuka chamampha ukongwa” kuluska chiyuka cha ŵanthu anyaki wo anguyuskika mu nyengu yakali. (Ahe. 11:35) Chifukwa wuli? Chifukwa ŵanthu ambula kufikapu ŵenaŵa angufwa so pavuli paki.
8. Kumbi ŵanthu anyaki wo azamuyuskika, “azamulengeseka kweniso azamuyuyulika kwamuyaya” mu nthowa wuli?
8 Kweni ndi wosi cha wo azamuyuskika wo azamukhumba kusambizika ndi Yehova. Uchimi waku Daniyeli ulongo kuti ŵanthu anyaki wo azamuyuskika “azamulengeseka kweniso azamuyuyulika kwamuyaya.” Chifukwa chakuti yiwu azamugaruka, mazina ngawu ngazamulembeka cha mubuku la umoyu ndipu azamulonde cha umoyu wamuyaya. Mumalu mwaki, yiwu “azamuyuyulika kwamuyaya” pamwenga kuti azamubayika. Mwaviyo, lemba la Daniyeli 12:2, likamba vo pakumaliya vazamuchitikiya wosi wo azamuyuskika mwakukoliyana ndi vo azamuchita pavuli pakuti ayuskika. * (Chivu. 20:12) Anyaki azamulonde umoyu wamuyaya penipo anyaki cha.
“ATOVYA ŴANTHU ANANDI KUTI AJE ARUNJI”
9-10. Kumbi ndi vinthu wuli so vo vazamuchitika pavuli pa chisuzgu chikulu, nanga mbayani wo “azamuŵala ukongwa nge mo kuchanya kuŵaliya”?
9 Ŵerengani Daniyeli 12:3. Kumbi ndi vinthu wuli so vo vazamuchitika asani nyengu ya “suzgu yajumphapu”? Kusazgiyapu pa vo lemba la Daniyeli 12:2 likamba, vesi 3 likamba za chinthu chinyaki cho chazamuchitika asani chisuzgu chikulu chajumphapu.
10 Kumbi mbayani wo “azamuŵala ukongwa nge mo kuchanya kuŵaliya”? Mazu ngo Yesu wangukamba pa Mateyu 13:43, ngatitiwovya kuziŵa kuti yiwu mbayani. Iyu wanguti: “Pa nyengu yeniyo ŵanthu arunji azamuŵala ukongwa nge lumwi mu Ufumu wa Awusewu.” Muchaputala ichi Yesu wakambanga vakukwaskana ndi ‘ŵana a Ufumu,’ abali ŵaki akusankhika wo wamuteŵete nawu limoza mu Ufumu wakuchanya. (Mate. 13:38) Mwaviyo, lemba la Daniyeli 12:3 litenere kuti likamba va Akhristu akusankhika kweniso ntchitu yo azamugwira mu Ulamuliru wa Vyaka 1,000.
A 144,000 azamukoliyana ukongwa ndi Yesu Khristu pakulongozga ntchitu yakusambiza yo yazamuchitika pacharu chapasi mu nyengu ya vyaka 1,000 (Wonani ndimi 11)
11-12. Kumbi ndi ntchitu wuli yo a 144,000 azamuchita mu vyaka 1,000?
11 Kumbi akusankhika azamuwovya “ŵanthu anandi kuti aje arunji” mu nthowa wuli? Akhristu akusankhika azamukoliyana ukongwa ndi Yesu Khristu pakulongozga ntchitu yakusambiza yo yazamuchitika pacharu chapasi mu nyengu ya vyaka 1,000. Akhristu a 144,000 amulamuliya nge mafumu kweniso amuteŵete nge asembi. (Chivu. 1:6; 5:10; 20:6) Mwaviyo, azamuwovya ‘pakuchizga mitundu ya ŵanthu’ ndipuso kamana ndi kamana, azamuwovya ŵanthu kuja akufikapu. (Chivu. 22:1, 2; Ezeki. 47:12) Tikayika cha kuti akusankhika azamukondwa ukongwa!
12 Kumbi mbayani wo azamuja mugulu la “ŵanthu anandi” wo azamuwovyeka kuti aje arunji? Yiwu asazgapu ŵanthu wo azamuyuskika, wo azamupona pa Aramagedoni kweniso mwana weyosi yo wangazibalika mucharu chifya. Kukumaliya kwa vyaka 1,000, ŵanthu wosi wo azamuja pacharu chapasi, azamukuŵa akufikapu. Sonu kumbi mphanyengu niyi po mazina ngawu ngazamulembeka mu buku la umoyu kwamuyaya ndi inki ndi pensulu cha?
KUYESEKA KWAKUMALIYA
13-14. Kumbi ŵanthu wosi akufikapu pacharu chapasi azamukhumbika kulongonji ŵechendalonde umoyu wamuyaya?
13 Titenere kukumbuka kuti kuja ŵaka munthu wakufikapu ndiku cha kungachitiska kuti munthu walonde umoyu wamuyaya. Ŵanaŵaniyani vaku Adamu ndi Heva. Yiwu ŵenga ŵanthu akufikapu, kweni akhumbikanga kulongo kuti avwiya Yehova Chiuta, ŵechendapaskiki umoyu wamuyaya. Ntchachitima kuti yiwu angumuvwiya cha Yehova.—Aro. 5:12.
14 Kumbi vinthu vazamukuŵa wuli ku ŵanthu wo azamuja pacharu chapasi, kukumaliya kwa vyaka 1,000? Wosi azamukuŵa kuti mbakufikapu. Kweni kumbi ŵanthu wosi ŵenaŵa, azamukoliyana ndi ulamuliru waku Yehova ndi mtima wosi kwamuyaya? Pamwenga anyaki azamuja nge Adamu ndi Heva wo chinanga kuti ŵenga akufikapu anguja ambula kugomezgeka? Mafumbu ngenanga ngakhumbika kumukika kweni mu nthowa wuli?
15-16. (a) Kumbi mphanyengu niyi po ŵanthu wosi azamupaskika mwaŵi wakulongo kugomezgeka kwawu kwaku Yehova? (b) Kumbi ndi vinthu wuli vo vazamuchitika pakuyeseka kwakumaliya?
15 Satana wazamumangika kwa vyaka 1,000. Pa nyengu yeniyi, iyu wazamulandizga munthu weyosi cha. Kweni kukumaliya kwa vyaka 1,000, Satana wazamufwatulika. Pa nyengu yeniyi, iyu wazamuyesesa kuti walandizgi ŵanthu akufikapu. Pa nyengu ya kuyeseka kwenuku, ŵanthu wosi akufikapu pacharu chapasi azamukhumbika kulongo asani atumbika zina laku Chiuta kweniso akoliyana ndi ulamuliru waki. (Chivu. 20:7-10) Vo azamuchita pa nyengu yeniyi, vazamulongo asani mphakwenere kuti mazina ngawu ngalembeki kwamuyaya mu buku la umoyu pamwenga cha.
16 Bayibolu lititikambiya kuti ŵanthu anyaki azamuja ambula kugomezgeka nge mo ve nge ndi Adamu ndi Heva ndipu azamukana ulamuliru waku Yehova. Kumbi ndi vinthu wuli vo vazakuŵachitikiya? Lemba la Chivumbuzi 20:15 lititikambiya kuti: “Weyosi yo zina laki lingulembeka cha mubuku la umoyu, wanguponyeka munyanja ya motu.” Mwaviyo, ŵanthu akugaruka ŵenaŵa azamubayikiya limu kwamuyaya. Kweni ŵanthu anandi akufikapu azamupunda pakuyeseka kwakumaliya kwenuku. Pavuli paki, mazina ngawu ngazamulembeka kwamuyaya mu buku la umoyu.
MU “NYENGU YA UMALIRU”
17. Kumbi ndi vinthu wuli vo mungelu wangukambiya Daniyeli kuti vazamuchitika mu nyengu yidu? (Daniyeli 12:4, 8-10)
17 Vakukondwesa ukongwa kuŵanaŵaniya vinthu venivi vo vichitikengi kunthazi! Kweni Daniyeli wangulonde so uthenga unyaki wakukhumbika ukongwa wakukwaskana ndi nyengu yidu, “nyengu ya umaliru.” (Ŵerengani Daniyeli 12:4, 8-10; 2 Timo. 3:1-5) Mungelu wangukambiya Daniyeli kuti: “Ŵanthu . . . azamuziŵa vinthu vinandi vauneneska.” Kukamba uneneska, ŵanthu aku Chiuta atingi azingavwisengi umampha ukongwa mazu nga uchimi nga mubuku laki. Mungelu wangukamba so kuti pa nyengu yeniyi “ŵanthu aheni azamuchitanga vinthu viheni, ndipu palivi munthu muheni yo wazamuvwisa vinthu.”
18. Kumbi ndi vinthu wuli vo vichitikiyengi ŵanthu aheni pambula kuswera yapa?
18 Mazuŵa nganu vingawoneka kuti ŵanthu aheni alangika cha chifukwa cha vinthu viheni vo achita. (Mala. 3:14, 15) Kweni pambula kuswera yapa, Yesu wazamuyeruzga ŵanthu wo ŵe nge mbuzi ndipu wazakuŵapatuwa ku ŵanthu wo ŵe nge mbereri. (Mate. 25:31-33) Ŵanthu aheni ŵenaŵa azamupona cha pa chisuzgu chikulu pamwenga azamuyuskika cha kuti azije mucharu chifya. Mazina ngawu ngazamusanirikamu cha ‘mubuku la chikumbusu’ lo likambika pa Malaki 3:16.
19. Kumbi tikhumbika kuchitanji pasonu panu, nanga ntchifukwa wuli? (Malaki 3:16-18)
19 Sonu ndiyu nyengu yakuti tilongore kuti te mugulu la ŵanthu aheni cha. (Ŵerengani Malaki 3:16-18.) Yehova wawunganiska ŵanthu wo watiŵawona kuti ‘ntchuma chapade’ kung’anamuwa ŵanthu wo watiŵawona kuti mbakuzirwa kwaku iyu. Kukamba uneneska tikhumbisiska kuja mugulu la ŵanthu ŵenaŵa.
Vazamuja vakukondwesa ukongwa kuwona Daniyeli, akwanjiwa ŵidu kweniso ŵanthu anyaki anandi ‘achima’ kuti alonde chigaŵa chawu mucharu chifya! (Wonani ndimi 20)
20. Kumbi ndi layizgu lakumaliya nili lo Yehova wangukambiya Daniyeli, nanga ntchifukwa wuli mulindizga kufiskika kwa layizgu lenili?
20 Kukamba uneneska, tija mu nyengu zapade ukongwa. Kweni vinthu vinandi vapade, vichitikengi sonu yapa. Pambula kuswera yapa, tiwonengi vinthu vosi viheni vichituzgikapu. Pavuli pa venivi, tazamuwona kufiskika kwa layizgu lo Yehova wangukambiya Daniyeli lakuti: “Kukumaliya kwa mazuŵa, wazamukuma kuti uzilonde chigaŵa chaku.” (Dani. 12:13) Kumbi mukhumbisiska kuti zuŵa lo Daniyeli, limoza ndi akwanjiwa ŵinu ‘azamukuma’ so lifiki? Asani ndi viyo, chitani vosi vo mungafiska pasonu panu kuti muje akugomezgeka ndipu mungasimikiza kuti zina linu lilutirizgengi kuja mubuku laku Yehova la umoyu.
SUMU 80 “Laŵani Ndipu Muwonengi Kuti Yehova Ngwamampha”
^ Nkhani iyi, yikonkhoska kusintha mo tavwiyanga kali pa nkhani ya ntchitu yikulu yakusambiza yo yikonkhoskeka pa Daniyeli 12:2, 3. Tikambiskanengi nyengu yo ntchitu yeniyi yazamugwirikiya kweniso wo azakuyigwira. Tiwonengi so mo ntchitu yakusambiza yeniyi yazamuwovye ŵanthu a pacharu chapasi kunozgeke kuyeseka kwakumaliya, kukumaliya kwa Ulamuliru wa Vyaka 1,000 waku Khristu.
^ Chiyuka chitenere kuti chazamukwamba ndi wo angufwa akugomezgeka mu mazuŵa ngakumaliya ndipu pavuli paki wo angufwa yiwu ŵechendafwi azamuyuskika, mugonezi ndi mugonezi. Asani ndimu vazamuŵiya nadi, ndikuti mugonezi wewosi wazamukuŵa ndi mwaŵi wakulondere ŵanthu wo aŵaziŵanga. Kwali vinthu vazamukuŵa wuli, Malemba ngakamba kuti weyosi “pamalu ngaki” asani ngakamba va chiyuka chakuchanya, ndipu tingasimikiza kuti chiyuka cha pacharu chapasi chazamuchitika so mwandondomeku.—1 Akori. 14:33; 15:23.
^ Venivi visintha mo tavwiyanga kali nge mo vikulembeke mu mabuku yanga, Samalani Ulosi wa Danieli! mutu 17 ndi Chigongwi cha Mlinda cha July 1, 1987, peji 21-25.
^ Mwakupambana ndi venivi, mazu ngakuti “arunji” kweniso “ambula urunji” ngo nge pa Machitidu 24:15 ndipuso mazu ngakuti “wo anguchita vinthu vamampha” kweniso “wo anguchita vinthu viheni” ngo nge pa Yohane 5:29 ngakamba vo ŵanthu wo azamuyuskika anguchita ŵechendafwi.
