Mwakukoliyana ndi 1 Akorinto 15:8, Paulo wangukamba kuti: “Pakumaliya paki wanguwoneke kwaku ini nge ku mwana wakuwa muteta.” Kuvuli uku, takonkhoskanga kuti Paulo watenere kuti wakambanga vo vingumuchitikiya pa nyengu yo wanguwona chiwona chaku Yesu we kuchanya. Venga nge kuti wapaskika mwaŵi wakuwaku pamwenga kuyuskikiya ku umoyu wauzimu nyengu yaki yechendakwani, vyaka vinandi chiyuka chenichi chechendachitiki. Kweni tati talifufuza mwakuphwere vesi lenili, tawona kuti mphakwenere kusintha mo talikonkhoskiyanga.

Mbuneneska kuti yapa Paulo wakambanga vinthu vo vingumuchitikiya pa nyengu yo wangusinthiya. Kweni kumbi wang’anamuwanganji po wangukamba kuti ‘wanguwa muteta’? Watenere kuti wang’anamuwanga vinandi.

Kusintha kwaki kunguchitika mwamabuchibuchi kweniso kwenga kwakusuzga. Kanandi mwana muteta wawaku mwamabuchibuchi. Saulo (yo pavuli paki wanguzidanika kuti Paulo) wachiluta ku Damasiko kuti wakatombozgi Akhristu kwenuku, wakhazganga cha kuti wangawona chiwona chaku Yesu yo wanguyuskika. Kusintha kwaku Paulo kunguziziswa iyu pe cha, kweni kunguziziswa so Akhristu wo wakhumbanga kuchiŵatombozga mutawuni yeniyi. Kusazgiyapu yapa, vo vingumuchitikiya venga vakusuzga ukongwa mwakuti kwa mazuŵa ngatatu wanguja wachibulumutiya.​—Machi. 9:1-9, 17-19.

Wangusintha pa nyengu yo ŵanthu akhazanga cha. Mazu nga Chigiriki ngo ngakufwatulika kuti “mwana wakuwa muteta,” ngangang’anamuwa so “mwana wakuwa pa nyengu yiheni.” Bayibolu linyaki likamba kuti: “Venga nge kuti ndinguwaku pa nyengu yo munthu weyosi wakhazganga cha.” (The Jerusalem Bible) Pa nyengu yo Paulo wangusinthiya ndipu Yesu wawere kali kuchanya. Mwakupambana ndi ŵanthu wo Paulo waŵazumbuwa mu mavesi nga kuvuli, iyu wangumuwona cha Yesu wati wayuskika wechendaluti kuchanya. (1 Akori. 15:4-8) Chinanga kuti Yesu wanguwoneke kwaku Paulo mwamabuchibuchi, kweni venivi vingumupaska mwaŵi wakuwona Yesu pavuli pakuti wayuskika, chinanga kuti vingawoneka nge kuti vinguchitika pa “nyengu yiheni” pamwenga pa nyengu yo ŵanthu akhazanga cha.

Iyu wenga wakujiyuyuwa. Mwakukoliyana ndi vo akaswiri anyaki akamba, mazu ngo Paulo wangugwiriskiya ntchitu pa lemba ili, ngalongo nge kuti wajivwanga kuti ngwakwenere cha. Asani ndivu Paulo wang’anamuwanga, ndikuti wajiwonanga kuti wenga wakwenere cha kuja wakutumika. Mwakuti wangukamba kuti: “Ini nde mumana ukongwa pa akutumika wosi, ndipu nde wakwenere cha kudanika kuti wakutumika, chifukwa ndatombozganga mpingu waku Chiuta. Kweni chifukwa cha wezi ukulu waku Chiuta nde wakutumika.”​—1 Akori. 15:9, 10.

Mwaviyo, viwoneka kuti Paulo watenere kuti wang’anamuwanga mo Yesu wanguwoneke kwaku iyu mwamabuchibuchi, kusintha ko kunguchitika pa nyengu yo wakhazganga cha pamwenga fundu yakuti wenga wakwenere cha kuwona chiwona chakuziziswa chenichi. Kwali iyu wang’anamuwanganji, kweni Paulo wawonanga kuti vo vingumuchitikiya venga vakuzirwa ukongwa. Venivi vingumusimikiziya kuti Yesu wakuyuskika nadi ku nyifwa. Ndichu chifukwa chaki asani wapharazgiya ŵanthu vakukwaskana ndi kuyuskika kwaku Yesu, kanandi wakambanga vakukwaskana ndi chiwona chenichi.​—Machi. 22:6-11; 26:13-18.