Tiyeni tikambiskani mo Bayibolu limukiya mafumbu ngenanga.

Lemba la Machitidu 24:15 likamba kuti kwazamuja “chiyuka cha ŵanthu arunji ndi ambula urunji.” Arunji mbanthu wo anguvwiya Chiuta ŵechendafwi, mwakuti mazina ngawu ngakulembeka mubuku la umoyu. (Mala. 3:16) Ŵanthu ambula urunji asazgapu wo ŵengavi mwaŵi wakukwana kuti asambiri vakukwaskana ndi Yehova ŵechendafwi, mwakuti mazina ngawu ngakulembeka cha mubuku la umoyu.

Lemba la Yohane 5:28, 29 likamba so za magulu ngaŵi ngo ngazumbulika pa Machitidu 24:15. Yesu wangukamba kuti “wo anguchita vinthu vamampha azamuyuka kuti alonde umoyu, kweni wo anguchita vinthu viheni azamuyuka kuti ayeruzgiki.” Ŵanthu arunji anguchita vinthu vamampha ŵechendafwi. Mwaviyo, yiwu azamuyuka kuti alonde umoyu chifukwa mazina ngawu ngeche mubuku la umoyu. Kweni ŵanthu ambula urunji anguchita vinthu viheni ŵechendafwi. Ndipu yiwu azamuyuka kuti ayeruzgiki. Mazina ngawu ngakulembeka cha mubuku la umoyu ndipu Yesu wazamuwonesesa mwakuphwere vo azamuchitanga pamwenga wazakuŵayesa. Pa nyengu yeniyi, yiwu azamupaskika mwaŵi wakusambira vakukwaskana ndi Yehova kuti mazina ngawu ngalembeki mubuku la umoyu.

Lemba la Chivumbuzi 20:12, 13 likonkhoska kuti ŵanthu wosi wo azamuyuskika azamukhumbika kuvwiya “vinthu vo vikulembeka mumpukutu,” kung’anamuwa marangu ngafya ngo Chiuta wazakutipaska mucharu chifya. Ndipu wo azamuleka kuvwiya azamubayika.—Yesa. 65:20.

Lemba la Daniyeli 12:2 lingukambiya limu kuti ŵanthu anyaki wo agona mu tulu ta nyifwa, azamuyuka kuti alonde “umoyu wamuyaya ndipu anyaki azamulengeseka kweniso azamuyuyulika kwamuyaya.” Vesi ili likamba va cheruzgu chakumaliya cho ŵanthu wo azamuyuskika azamulonde, “umoyu wamuyaya” pamwenga ‘kuyuyulika kwamuyaya.’ Mwaviyo, pakumaliya pa vyaka 1,000, ŵanthu anyaki azamulonde umoyu wamuyaya; penipo anyaki azamubayika.​—Chivu. 20:15; 21:3, 4.

Tiyeni tiwoni chakuyeruzgiyapu. Magulu ngaŵi nga ŵanthu wo azamuyuskika, tingangayeruzgiya ndi alendu wo akhumba kuchija mucharu chaŵeni. Ŵanthu arunji ŵe nge ŵanthu wo alonde chikalata chakuŵazomereza kuti agwiriyengi ntchitu mucharu chinyaki pamwenga chikalata chakuŵazomereza kuja mucharu chinyaki, cho chitovya kuti aziŵikengi ndi boma kweniso kuja ndi wanangwa. Penipo ŵanthu ambula urunji ŵe nge alendu wo angapaskika chikalata chakuŵazomereza kuja mucharu chaŵeni kwa mazuŵa ngamanavi. Alendu wosi ŵenaŵa angakhumbika kuvwiya marangu nga mucharu cho kuti azomerezeki kulutirizga kuja mucharu chenichi. Mwakuyanana waka, ŵanthu ambula urunji wo azamuyuskika azamukhumbika kuvwiya marangu ngaku Yehova kweniso kulongo kuti mbarunji kuti azilutirizgi kuja mu Paradayisu. Ndipu kwali alendu ŵenaŵa pakwamba angapaskika chikalata cha mtundu wuli asani afika waka mucharu chaŵeni, mukuluta kwa nyengu anyaki angazomerezeka kujaliya limu penipo anyaki angadikisika. Nkharu yawu kweniso vo achita ndivu pakumaliya paki vingachitiska kuti azomerezeki kuja mucharu cho pamwenga cha. Mwakuyanana waka, ŵanthu wosi wo azamuyuskika, pakumaliya angaziyeruzgika kuti mbakwenere kuja mucharu chifya pamwenga cha, chifukwa cha kugomezgeka kwawu kweniso vo azamuchita.

Yehova ndi Chiuta walisungu ndipuso waurunji. (Doto. 32:4; Salimo 33:5) Iyu wazamulongo kuti we ndi chanju mwa kuyuska ŵanthu arunji kweniso ambula urunji. Kweni wazamukhumba kuti ŵanthu wosi azivwiyengi marangu ngaki nga chamampha ndi chiheni. Ŵanthu ŵija wo azakumuyanja ndipuso kuvwiya marangu ngaki, ndiwu azamuzomerezeka kuja kwamuyaya mucharu chifya.