1-2. Ntchifukwa wuli titenere kusambira nkhani yaku Samusoni?

 KUMBI ntchinthu wuli chituza mumaŵanaŵanu nginu asani mwavwa zina laku Samusoni? Panyaki mukumbuka kuti Samusoni wenga munthu wanthazi ukongwa. Venivi vauneneska. Kweni nyengu yinyaki, Samusoni wangusankha umampha cha vinthu ndipu wangukumana ndi masuzgu ngakulu. Chinanga kuti venga viyo, Yehova wakumbukanga ukongwa vinthu vamampha vo Samusoni wanguchita pakumuteŵete. Mwakuti wakuwonesesa kuti vo Samusoni wanguchita pakumuteŵete vilembeki mu Bayibolu kuti isi tisambirepu kanthu.

² Yehova wangugwiriskiya ntchitu Samusoni kuchita vakuziziswa kuti wawovyi Ayisirayeli wo ŵenga ŵanthu Ŵaki. Pati pajumpha vyaka mahandiredi kutuliya po Samusoni wangufwiya, Yehova wanguchitiska wakutumika Paulo kuti walembi zina laku Samusoni pa mundandanda wa ŵanthu wo akambika kuti ŵenga ndi chivwanu chakukho. (Ahe. 11:32-34) Chakuwoniyapu chaku Samusoni chingatiwovya ukongwa. Iyu wathembanga Yehova chinanga mphanyengu yo wakumananga ndi masuzgu ngakulu. Mu nkhani iyi, tiwonengi vo tingasambira kwaku Samusoni kweniso mo chakuwoniyapu chaki chingatiwovye.

3. Kumbi Samusoni wangupaskika uteŵeti wuli?

³ Pa nyengu yo Samusoni wanguwiya, Afilisiti alamuliyanga mtundu wa Isirayeli ndipuso awukandirizganga. (Ŵeru. 13:1) Ulamuliru wawu wankhaza unguchitiska kuti Ayisirayeli asuzgikengi ukongwa. Mwaviyo, Yehova wangusankha Samusoni kuti waje “mulongozgi pakutaska Ayisirayeli mu manja mwa Afilisiti.” (Ŵeru. 13:5) Kweni uteŵeti uwu wenga wakusuzga ukongwa! Kuti  Samusoni wafiski kuchita uteŵeti wenuwu wakhumbikanga kuthemba Yehova.

4. Kumbi Yehova wangumutaska wuli Samusoni mumanja mwa Afilisiti? (Ŵeruzgi 15:​14-16)

⁴ Tiyeni tikambiskani mo Samusoni wangulongore kuti wagomezganga Yehova kweniso wamuthembanga kuti wamuwovyengi. Nyengu yinyaki gulu la asilikali la Afilisiti linguza kuziko Samusoni ku Lehi, ndipu viwoneka kuti kwenuku kwenga ku Yuda. Anthulumi aku Yuda anguchita mantha mwakuti angupereka Samusoni mumanja mwa arwani ŵawu. Ŵanthu a mtundu waki, angumanga Samusoni ndi vingwi vifya ndipu anguluta nayu kwa Afilisiti. (Ŵeru. 15:9-13) Kweni “mzimu waku Yehova ungumuchitiska kuti waje ndi nthazi,” ndipu Samusoni wangudomo vingwi vo angumumanga navu. Pavuli paki, “wangusaniya chiwanga chiŵisi chamuchibwanyu cha bulu,” ndipu wanguchito ndi kubayiya anthulumi a Afilisiti 1,000!—Ŵerengani Ŵeruzgi 15:14-16.

5. Kumbi Samusoni wangulongo wuli kuti wathembanga Yehova?

⁵ Ntchifukwa wuli Samusoni wangugwiriskiya ntchitu chiwanga cha muchibwanyu cha bulu? Chenichi chenga chidya chakuchitiya nkhondu cha! Tikayika cha kuti Samusoni wanguziŵa kuti Yehova wamuwovyengi kuthereska Afilisiti ndi chidya chechosi cho wangaŵa nachu. Munthu wakugomezgeka mwenuyu, wangugwiriskiya ntchitu chinthu cho wenga nachu pa nyengu yo kuti wachiti khumbu laku Yehova. Samusoni wanguthereska ŵanthu wosi ŵenaŵa chifukwa chakuti wanguthemba Yehova.

6. Kumbi tingasambiranji kwaku Samusoni pakuchita mauteŵeti ngidu?

⁶ Nasi so Yehova wangatipaska nthazi kuti tichiti chechosi cho iyu watikambiya, chinanga kuti uteŵeti wo tapaskika ungawoneka kuti ngwakusuzga ukongwa. Chiuta wangatiwovya mu nthowa yo isi takhazanga cha. Mwaviyo, mugomezgengi kuti Yehova yo wangupaska nthazi Samusoni, wakuwovyeningi kuti muchiti khumbu Laki asani mutimuthemba ndi mtima wosi.​—Nthanthi 16:3.

7. Kumbi ntchakuwoniyapu nichi cho chilongo kuti tikhumbika kuthemba Yehova kuti watipaski ulongozgi?

⁷ Abali ndi azichi anandi wo agwiraku ntchitu  zakuzenga mu gulu lidu, alongo kuti athemba Yehova. Kuvuli uku, abali ndiwu apanganga mapulanu kweniso kuzenga pafufupi Nyumba za Ufumu zosi ndi nyumba zinyaki za gulu lidu. Kweni chifukwa chakuti chiŵerengeru cha ŵanthu chisazgikiyaku mu gulu laku Yehova, gulu lakhumbikanga kusintha vinthu vinyaki. Abali wo alongozga anguyipemphere nkhani yeniyi kuti Yehova waŵawovyi, ndipu anguyesa nthowa zinyaki zasonu nge kugula nyumba zakuzengazenga ndi kuzinozga. Robert yo wangugwiraku ntchitu zidu zinandi zakuzenga pacharu chosi wangukamba kuti: “Pakwamba venga vakusuzga kuti anyaki akoliyani ndi nthowa zasonu zenizi.” Iyu wangukamba so kuti: “Venga vakupambana ukongwa ndi vo tachitanga vyaka va kuvuli kosi uku. Kweni abali ŵenga akunozgeka kusintha ndipu viwoneke limu kuti Yehova watumbika kusintha kwenuku.” Ichi ntchakuwoniyapu chimoza cho chilongo mo Yehova walongozge ŵanthu ŵaki kuti wafiski khumbu laki. Mwaviyo, weyosi waku isi wajifumbengi kuti, ‘Kumbi ndikhumbisiska kulondo ulongozgi waku Yehova kweniso kuja wakunozgeka kusintha kuti ndikoliyani ndi gulu laki?’

8. Kumbi Samusoni wanguchitanji pa nyengu yo nyota yingumupweteka?

⁸ Panyaki mukumbuka vinthu vakuziziswa vo Samusoni wanguchita. Nyengu yinyaki, wangubaya nkharamu ndipu pavuli paki wangubaya Afilisiti 30 mutawuni ya Ashikeloni. (Ŵeru. 14:5, 6, 19) Samusoni wanguziŵa kuti watingi wafiskengi cha kuchita venivi kwambula kuwovyeka ndi Yehova. Venivi vinguwoneka pa nyengu yo nyota yingumupweteka wati wabaya Afilisiti 1,000. Kumbi iyu wanguchitanji? Mumalu mwakupenja yija maji kuti wamwi, wangupempha Yehova kuti wamuwovyi.—Ŵeru. 15:18.

9. Kumbi Yehova wangumumuka wuli Samusoni wati wapempha kuti wamuwovyi? (Ŵeruzgi 15:19)

⁹ Yehova wangumuka pempheru laku Samusoni ndipu wangumupaska maji mwakuziziswa. Samusoni wati wamwa maji ngenanga, “nthazi zaki zinguweriyamu.” (Ŵerengani Ŵeruzgi 15:19.) Viwoneka kuti chisimi chifya chenichi chingulutirizga kuŵaku kwa vyaka vinandi ndipu chengaku mu nyengu yo mchimi Samuyeli wangukambirika kulemba buku la Ŵeruzgi. Ayisirayeli wo awonanga chisimi chenichi, atenere kuti akumbukanga kuti Yehova ngwakuthembeka nyengu zosi, ndipu watovya ateŵeti ŵaki akugomezgeka pa nyengu yo akhumbika chovyu.

10. Kumbi titenere kuchitanji kuti Yehova watiwovyi? (Wonani so chithuzi.)

¹⁰ Nasi tikhumbika kuthemba Yehova kuti watiwovyi, kwali te ndi lusu, zeru pamwenga tifiska kuchita vinthu vinyaki pakumuteŵete. Titenere kuja akujiyuyuwa kweniso kuziŵa fundu yakuti tingafiska kuchita vo Yehova watipempha asani titimuthemba. Samusoni wangusaniya nthazi wati wamwa maji ngo Yehova wangumupaska. Nge Samusoni tikhumbika kugwiriskiya ntchitu vinthu vosi vo Yehova watitipaska kuti tilutirizgi kuja akugomezgeka kwaku iyu.​—Mate. 11:28.

11. Kumbi tingalongo wuli kuti tithemba Yehova? Kambani chakuwoniyapu.

¹¹ Tiyeni tikambiskani vo vinguchitikiya mubali Aleksey wa ku Russia yo walutirizga kuteŵete Yehova chinanga kuti watombozgeka. Kumbi ntchinthu wuli chitimuwovya kukunthiyapu mayeseru ngenanga? Iyu ndi muwolu waki asambira Bayibolu kweniso achita kusopa kwa pabanja nyengu zosi. Iyu wangukamba kuti: “Nditesesa kusambira pakundija ndipuso kuŵerenga Bayibolu zuŵa lelosi. Mlenji wewosi, ini ndi muwolu wangu tikambiskana lemba la zuŵa kweniso tipemphera kwaku Yehova limoza.” Kumbi isi tisambiranjipu penapa? Mumalu mwakujithemba, tithembengi Yehova. Kumbi tingachita wuli venivi? Nyengu zosi tichitengi vinthu  vo vingakholesa chivwanu chidu nge kusambira Bayibolu, kupemphera, kuwungana ndipuso kupharazga. Asani tachita venivi, Yehova watiwovyengi kuti tilutirizgi kumuteŵete. Iyu wangumupaska nthazi Samusoni, ndipu tikayika cha kuti nasi wangatipaska nthazi.

12. Kumbi Samusoni wangunangisanji, nanga vo vinguchitika pa nyengu iyi vingupambana wuli ndi vo vinguchitikapu kuvuli?

¹² Samusoni wenga wambula kufikapu nge isi. Mwaviyo, nyengu zinyaki wasankhanga umampha cha vinthu. Ndipu chinthu chinyaki cho wanguchita chingumusereza mu masuzgu ngakulu. Samusoni wati wateŵete nge wakweruzga kwa kanyengu, wangwanja munthukazi munyaki mu Dambu la Soreki yo wadanikanga kuti Delila. (Ŵeru. 16:4) Nyengu yinyaki ivi vechendachitiki, Samusoni wakhumbanga kuto munthukazi wachifilisiti, kweni “venivi vingutuliya kwaku Yehova, pakuti Iyu wapenjanga mpata wakuthereske Afilisiti.” Pati pajumpha nyengu, Samusoni wanguja munyumba ya huli linyaki mutawuni ya Afilisiti ku Gaza. Pa nyengu yeniyi, Chiuta wangupaska nthazi Samusoni zakuti watuzgepu visasa va geti la tawuni ndipu venivi vinguchitiska kuti tawuni yeniyi yije yambula kuvikilirika. (Ŵeru. 14:1-4; 16:1-3) Kweni ndimu venge cha ndi Delila chifukwa chakuti munthukazi uyu watenere kuti wenga Myisirayeli. Mwaviyo, vo Samusoni wanguchita kuti watorani ndi Delila, vingutuliya kwaku Yehova cha.

13. Kumbi Delila wanguchitanji kuti Samusoni wasere mu masuzgu?

¹³ Delila wangulonde ndalama zinandi kutuwa kwa Afilisiti kuti wapereki Samusoni. Kumbi panyaki ntchanju cho chingumujala kumasu Samusoni mwakuti wangutondeka kuziŵa vo Delila wakhumbanga kuchita? Kwali vinthu venga wuli, kweni Delila wachichizganga Samusoni  mwakuwerezawereza kuti wasumuwi ko kutuliya nthazi zaki. Ndipu pakumaliya, Samusoni wangumukambiya. Vachitima kuti Samusoni wangujisereza mu masuzgu, vo vinguchitiska kuti nthazi zaki zimali kweniso Yehova wanguleka dankha kumuyanja.—Ŵeru. 16:​16-20.

14. Kumbi Samusoni wangukumana ndi masuzgu wuli chifukwa chakuthemba Delila?

¹⁴ Samusoni wangukumana ndi masuzgu ngakulu chifukwa chakuthemba Delila mumalu mwakuthemba Yehova. Afilisiti anguko Samusoni ndi kumutolo masu. Yiwu angumuŵika mujeri ku Gaza, ko nyengu yinyaki kuvuli wangujinthuwa mageti nga tawuni. Ndipu yiwu angumuŵika kuja kapolu wakupera mbewu. Pavuli paki, Afilisiti ŵati achita phwandu, angumulengesa Samusoni. Yiwu angupereka sembi yikulu kwaku chiuta wawu Dagoni chifukwa chakuti agomezganga kuti waŵawovya kuko Samusoni. Yiwu angutuzga Samusoni mujeri ndi kuza nayu kuphwandu kuti ‘waziŵasekesengi.’​—Ŵeru. 16:21-25.

15. Kumbi Samusoni wangulongo wuli kuti wayamba so kuthemba Yehova? (Ŵeruzgi 16:​28-30) (Wonani chithuzi cha pachikonkhombi.)

¹⁵ Samusoni wangunangisa ukongwa kweni wanguleka cha kuteŵete Yehova. Iyu wangusaniya mpata wakufiskiya uteŵeti wo wangupaskika ndi Chiuta wakuti wathereski Afilisiti. (Ŵerengani Ŵeruzgi 16:28-30.) Samusoni wangupempha Yehova kuti: “Ndizomerezeni kuti ndiweze Afilisiti.” Chiuta wauneneska wangumuka pemphu laku Samusoni ndipu wangumupaska so nthazi zaki zakuchitiya vakuziziswa. Pa nyengu yeniyi, Samusoni wangubaya Afilisiti anandi kuphara wo wangubayapu kuvuli kosi uku.

16. Kumbi tisambiranji pa vo Samusoni wangunangisa?

¹⁶ Chinanga kuti Samusoni wangukumana ndi masuzgu ngakulu chifukwa cha vo wangunangisa, kweni wanguleka cha kuchita khumbu laku Yehova. Nasi asani tanangisa chinthu chinyaki ndipu tikhumbika kupaskika ulongozgi pamwenga kuleka kuchita uteŵeti unyaki, titenere cha kuleka kuteŵete Yehova. Tikumbukengi kuti Yehova ngwakunozgeka kutigowoke. (Salimo 103:​8-10) Chinanga tinganangisa vinthu vinyaki, Yehova wangatigwiriskiya ntchitu mbwenu kuti tifiski khumbu laki nge mo wanguchitiya ndi Samusoni.

17-18. Kumbi vo vinguchitikiya Michael vitikuchiskani wuli? (Wonani so chithuzi.)

¹⁷ Tiyeni tikambiskani vo vinguchitikiya mubali munyaki wachinyamata zina laki Michael. Iyu watangwanikanga ndi kuteŵete Yehova, ndipu wateŵetiyanga nge mteŵeti wakovya kweniso mpayiniya wa nyengu zosi. Kweni vachitima  kuti nyengu yinyaki wangunangisa vinthu vinyaki vo vinguchitiska kuti waleki kuchita mauteŵeti nganyaki mu mpingu. Iyu wangukamba kuti: “Pa nyengu iyi ndatangwanikanga ukongwa pakuteŵete Yehova. Kweni mwamabuchibuchi, vinthu vingundigadabukiya. Chinanga kuti ndaziŵanga kuti Yehova wangandijowo cha, kweni ndakayikiyanga asani ubwezi wangu ndi iyu wazamuja so nge po wenge pakwamba. Ndakayikiyanga so asani ndazamufiska kumuteŵete mu mpingu nge mo ndachitiyanga pakwamba.”

¹⁸ Vakukondwesa kuti Michael wanguleka cha kuteŵete Yehova. Iyu wangukamba kuti: “Ndinguŵika maŵanaŵanu ngangu ngosi pakunozga ubwezi wangu ndi Yehova ndipu ndapempheranga kutuliya pasi pa mtima, ndasambiranga Bayibolu kweniso kulunguruka pa vo ndaŵerenga.” Pati pajumpha nyengu, Michael wanguzomerezeka so kuchita mauteŵeti ngo wachitanga kali. Pasonu panu iyu wateŵete nge mura ndipuso mpayiniya wa nyengu zosi. Iyu wakamba kuti: “Mo abali angundiwovye kweniso kundichiska ukongwa ŵara, vingundiwovya kuziŵa kuti Yehova wechekundiyanja. Sonu nditeŵete mu mpingu ndi njuŵi yamampha. Vo vandichitikiya vandisambiza kuti Yehova wangagowoke weyosi yo walapa ndi mtima wosi.” Isi nasi tingasimikiza kuti Yehova watigwiriskiyengi ntchitu kweniso kutitumbika chinanga kuti tinganangisa vinthu vinyaki, chikulu tichita vosi vo tingafiska kuti tinozgi vo tingunangisa ndi kulutirizga kumuthemba.​—Salimo 86:5; Nthanthi 28:13.

19. Kumbi nkhani yaku Samusoni yakuchiskani wuli?

¹⁹ Mu nkhani iyi takambiskanapu ŵaka vinthu vimanavi vo vinguchitika pa umoyu waku Samusoni. Iyu wenga wakufikapu cha kweni wanguleka cha kuteŵete Yehova wati wanangisa kusumuliya Delila chisisi cha nthazi zaki. Ndipu Yehova nayu wangumujowo cha Samusoni. Iyu wangumupaska so nthazi Samusoni kuti wafiski kuchita khumbu laki. Yehova wamuwonanga mbwenu kuti wenga munthu wachivwanu chakukho ndipu we pa mundandanda wa ŵanthu achivwanu wo azumbulika mu Aheberi chaputala 11. Vakuchiska ukongwa kuziŵa kuti titeŵete Awusefwi akuchanya wo atitiyanja ukongwa ndipu akhumbisiska kutipaska nthazi ukongwa pa nyengu yo tikhumbika chovyu! Mwaviyo, nge Samusoni, tipemphengi Yehova kuti: “Ndikumbukeni chondi, ndipu ndipaskeni nthazi.”​—Ŵeru. 16:28.