1-2. (a) Kumbi vinthu venga wuli ku Yudeya pa nyengu yo wakutumika Paulo wanguŵalembe kalata Akhristu Achiheberi? (b) Ntchifukwa wuli tingakamba kuti kalata yeniyi yenga ya pa nyengu yaki?

 YESU wati wafwa, Akhristu Achiheberi wo ajanga ku Yerusalemu kweniso ku Yudeya angukumana ndi masuzgu ngakulu. Mpingu wachikhristu wati wapangika ŵaka, Akhristu angwamba kutombozgeka ukongwa. (Machi. 8:1) Pavuli paki, pati pajumpha vyaka pafufupi 20, akusambira aku Khristu angwamba kukumana ndi masuzgu nga zachuma. Ndipu masuzgu ngenanga ngatenere kuti ngangwamba chifukwa cha nja yo yengaku mucharu ichi vyaka vakuvuli. (Machi. 11:​27-30) Kweni cha mu ma 61 C.E., Akhristu angujaku mwachimangu kwa nyengu yimanavi kupambana ndi mo vinguziŵiya kunthazi. Pa nyengu yeniyi, wakutumika Paulo wanguŵalembe kalata yo yenga ndi ulongozgi wa pa nyengu yaki.

² Kalata yeniyi yenga ya pa nyengu yaki nadi chifukwa chimangu cho Akhristu Achiheberi ŵenga nachu chingulutiriya cha. Paulo wangupereka ulongozgi wo unguwovya Akhristu ŵenaŵa kuti azikunthiyepu mayeseru ngo ŵenga pafupi kukumana nangu. Vo Yesu wangukambiya limu kuti Yerusalemu kweniso nyumba yakusopiyamu vazamubwangandulika venga pafupi kufiskika. (Luka 21:20) Mbuneneska kuti Paulo kweniso Akhristu a ku Yudeya aziŵanga cha nyengu chayiyu yo venivi vatingi vizichitikiyengi. Kweni Akhristu ŵenaŵa angugwiriskiya ntchitu nyengu yo yingujaku kunozgeke kuti azikunthiyepu kweniso kukholesa chivwanu chawu.—Ahe. 10:25; 12:​1, 2.

3. Ntchifukwa wuli buku la Aheberi ndakukhumbika ukongwa kwa Akhristu mazuŵa nganu?

 ³ Kwaja kamanavi kuti nasi tikumani ndi chisuzgu chikulu kuluska cho Akhristu Achiheberi angukumana nachu. (Mate. 24:21; Chivu. 16:​14, 16) Sonu tiyeni tikambiskani ulongozgi wo Yehova wangupereka kwa Akhristu Achiheberi wo nasi ungatiwovya.

“TIYESESI KUTI TIFIKI PAKUKHWIMA”

4. Kumbi Akhristu Achiyuda angukumana ndi suzgu wuli? (Wonani so chithuzi.)

⁴ Ayuda wo anguja Akhristu akhumbikanga kusintha vinthu vinandi pa umoyu wawu ndipu kuchita venivi kwenga kupusu cha. Nyengu yinyaki kuvuli, Ayuda ŵenga mtundu wakusankhika ndi Yehova. Kwa vyaka vinandi, Yerusalemu ngenga malu ngakuzirwa ukongwa chifukwa fumu yo yamiyanga Yehova yalamuliyanga kutuliya kwenuku kweniso kwenuku ndiku ŵanthu asopiyanga Yehova mwauneneska. Ayuda wosi akugomezgeka alondonga Dangu laku Mozesi lo lakonkhoskekanga ndi alongozgi Achiyuda. Dangu lenili lenga ndi marangu ngakukwaskana ndi vakurya, kudumulika kweniso mo atenere kuchitiya vinthu ndi ŵanthu wo ŵenga Ayuda cha. Kweni Yesu wati wafwa, Dangu laku Mozesi linguleka kugwira ntchitu ndipu Ayuda akhumbikanga so cha kupereka sembi pa nyumba yakusopiyamu. Lenili lenga suzgu kwa Akhristu anyaki Achiyuda wo anguziŵiriya kulondo Dangu laku Mozesi. (Ahe. 10:​1, 4, 10) Chinanga mbakhristu akukhwima nge wakutumika Peturo, angusuzgika kuti akoliyani ndi kusintha kwenuku. (Machi. 10:​9-14; Aga. 2:​11-14) Chifukwa cha kusintha kwenuku Akhristu ŵenaŵa angwamba kutombozgeka ndi alongozgi Achiyuda.

5. Kumbi Akhristu Achiheberi akhumbikanga kuphwere ndi vinthu wuli?

⁵ Akhristu Achiheberi asuskikanga ndi magulu ngaŵi nga ŵanthu. Gulu lakwamba, lenga la alongozgi a Ayuda wo awonanga Akhristu ŵenaŵa nge kuti mbanthu a mpatuku. Ndipu gulu lachiŵi lenga la ŵanthu anyaki mu mpingu wo akambanga kuti Akhristu akhumbika kulutirizga kulondo Dangu laku Mozesi. Panyaki achitanga venivi kuti aleki kutombozgeka. (Aga.  6:12) Kumbi ndi vinthu wuli vo vinguwovya Akhristu akugomezgeka kuti akolesi uneneska?

6. Kumbi Paulo wanguŵachiskanji Akhristu anyaki? (Aheberi 5:14–6:1)

⁶ Paulo wangulembe kalata Akhristu Achiheberi ndipu wanguŵachiska kuti angasambirengi ukongwa Mazu ngaku Chiuta. (Ŵerengani Aheberi 5:14–6:1.) Paulo wanguko mazu mu Malemba nga Chiheberi ndipu wangukonkhoska kuti nthowa yo Akhristu asope Yehova njapachanya ukongwa kuluska yo Ayuda asopiyanga. a Paulo wanguziŵa kuti kuwuvwisa umampha uneneska kwatingi kuwovyengi Akhristu ŵenaŵa kukana visambizu vaboza vo vatingi viŵalandizgengi.

7. Kumbi isi tikumana ndi masuzgu wuli mazuŵa nganu?

⁷ Mwakuyanana ndi Akhristu Achiheberi, nasi mazuŵa nganu tikumana ndi ŵanthu wo awandisa nkhani zaboza zo zisuskana ndi fundu za urunji zaku Yehova. Ŵanthu anyaki akamba kuti tikhwimisa vinthu ukongwa kweniso tichita nkhaza chifukwa cha kuvwiya vo Bayibolu likamba pa nkhani ya ureŵi. Mo ŵanthu achitiya kweniso mo awone vinthu vipambana ukongwa ndi mo Chiuta wawone. (Nthanthi 17:15) Mwaviyo, tikhumbika kulutirizga kuziŵa kweniso kukana fundu zo ŵanthu akususka agwiriskiya ntchitu kuti atigongowesi pamwenga kutilandizga.—Ahe. 13:9.

8. Kumbi ndi vinthu wuli vo vingatiwovya kuti tiyesesi kufika pa kukhwima?

⁸ Tingachita umampha kugwiriskiya ntchitu ulongozgi wo Paulo wangupereka kwa Akhristu Achiheberi wakuti tiyesesi kufika pakukhwima. Kuti tichiti venivi, titenere so kusambira Bayibolu mwakuphwere kuti tiwuziŵi umampha uneneska kweniso kuchita vinthu mwakukoliyana ndi mo Yehova waŵanaŵaniya. Tikhumbika kulutirizga kuchita venivi chinanga kuti tikujipereka kweniso kubatizika. Vilivi kanthu kuti taja kwa nyengu yitali wuli mu uneneska, tosi tikhumbika kuŵerenga kweniso kusambira Bayibolu nyengu zosi. (Salimo 1:2) Kuja ndi chiziŵiriza cha kusambira Bayibolu pakutija, kungatiwovya kuti tije ndi chivwanu chakukho cho Paulo wanguchididimizga mu kalata yaki yo wangulembe Aheberi.—Ahe. 11:​1, 6.

TIJE “NDI CHIVWANU CHAKUSUNGA MAUMOYU NGIDU”

9. Ntchifukwa wuli Akhristu Achiheberi akhumbikanga kuja ndi chivwanu chakukho?

⁹ Akhristu Achiheberi akhumbikanga chivwanu chakukho kuti aziponi pa chisuzgu chikulu cho chenga pafupi kuchitika ku Yudeya. (Ahe. 10:​37-39) Yesu wangukambiya akusambira ŵaki kuti asani aziwona kuti asilikali azinga Yerusalemu, azithaŵiyi kumapiri. Ulongozgi wenuwu wakwaskanga Akhristu wosi, wo ajanga mu Yerusalemu ndipuso kubwalu kwa tawuni yeniyi. (Luka 21:​20-24) Asani arwani aŵayukiya, ŵanthu wo ajanga kubwalu kwa tawuni kanandi athaŵiyanga mukati mwa tawuni ya Yerusalemu kuti avikiliriki chifukwa yenga ndi mpanda. Ulongozgi wakuti athaŵiyi kumapiri wawonekanga kuti ngwambula kuvwika. Mwaviyo, akhumbikanga kuja ndi chivwanu chakukho kuti avwiyi vo Yesu wangukamba.

10. Kumbi chivwanu chakukho chinguŵawovya wuli Akhristu Achiheberi? (Aheberi 13:17)

¹⁰ Akhristu Achiheberi akhumbikanga so kuthemba ukongwa ŵanthu wo Yesu waŵagwiriskiyanga ntchitu kuti alongozgengi mu mpingu. Ŵanthu wo alongozganga atenere kuti aperekanga ulongozgi wakuvwika umampha kuti uwovyi Akhristu wosi mu mpingu kuti alondongi ulongozgi waku Yesu pa nyengu yakwenere kweniso mu nthowa yakwenere. (Ŵerengani Aheberi 13:17.) Mazu nga Chigiriki ngo ngakugwiriskikiya  ntchitu pa Aheberi 13:17 ngakuti “muvwiyengi” ngalongo kuti munthu munyaki wachiskika kuti wavwiyi chifukwa chakuti wathemba munthu yo watimupaska ulongozgi. Iyu wakhumbika cha kuŵavwiya chifukwa chakuti ŵaka ndivu wakhumbika kuchita kweni chifukwa chakuti watiŵathemba. Mwaviyo, Akhristu Achiheberi akhumbikanga kuthemba ukongwa ŵanthu wo atiŵalongozga chisuzgu chikulu chechendayambi. Asani pa nyengu yo ŵenga pa chimangu Akhristu ŵenaŵa avwiyanga ndi mtima wosi ulongozgi wakutuwa ku ŵanthu wo aŵalongozganga ndikuti vatingi viziŵasuzgengi cha kuvwiya pa nyengu ya chisuzgu chikulu.

11. Ntchifukwa wuli mazuŵa nganu Akhristu akhumbika kuja ndi chivwanu chakukho?

¹¹ Mwakuyanana ndi Akhristu Achiheberi, nasi mazuŵa nganu tikhumbika chivwanu. Tija mu nyengu yo ŵanthu anandi akana kugomezga vo Bayibolu likamba kuti umaliru wa charu chiheni ichi we pafupi ndipu yiwu atitinyoza chifukwa chakuti tigomezga venivi. (2 Petu. 3:​3, 4) Kusazgiyapu yapa, chinanga kuti Bayibolu likamba vinthu vinyaki vo vazamuchitika pa chisuzgu chikulu, kweni pe vinthu vinandi vo titiviziŵa cha. Tikhumbika kuja ndi chivwanu chakukho kuti umaliru wa charu chiheni ichi uzengi pa nyengu yaki yakwenere kweniso kuti Yehova wazakutivikiliya.—Haba. 2:3.

12. Kumbi ndi vinthu wuli vo vazakutiwovya kuti tiziponi pa chisuzgu chikulu?

¹² Tikhumbika so kugomezga ukongwa “kapolu wakugomezgeka ndi wazeru” yo Yehova watimugwiriskiya ntchitu mazuŵa nganu kuti watilongozgengi. (Mate. 24:45) Asani chisuzgu chikulu chaziyamba, tingazilonde ulongozgi wakuvwika umampha wakuvikiliya maumoyu ngidu nge wo Akhristu Achiheberi angulonde asilikali ŵa Aroma ŵati azunguliya Yerusalemu. Sonu ndiyu nyengu yakuti tiwugomezgezgi kweniso kuwuthemba ukongwa ulongozgi wo tilonde kutuliya ku ŵanthu wo alongozga mu gulu laku Yehova. Asani pasonu panu ndipu vititisuzga kuvwiya ulongozgi wenuwu ndikuti pa nyengu ya chisuzgu chikulu vazakutisuzga so ukongwa kuchita venivi.

13. Ntchifukwa wuli ulongozgi wo we pa Aheberi 13:5 wenga wakwenere?

¹³ Achilindizga vo vatingi viŵawovyengi kuziŵa kuti athaŵi, Akhristu Achiheberi akhumbikanga so kuja umoyu wambula kukhumba vinandi kweniso kukana umoyu wa “kwanja ndalama.” (Ŵerengani Aheberi 13:5.) Anyaki angusuzgikapu ndi nja kweniso ukavu. (Ahe. 10:​32-34) Chinanga kuti anyaki akhumbisiskanga kukunthiyapu masuzgu chifukwa cha uthenga wamampha, kweni anyaki atenere kuti angwamba kupenjapenja chuma chinandi kuti chiŵavikiliyi. Kweni ndalama zatingi ziziŵataskengi cha pa nyengu yo Yerusalemu wazibwangandulikiyanga. (Yako. 5:3) Ndipu munthu weyosi yo wayanjanga ukongwa vinthu vakuliŵavu vatingi vimusuzgengi kuti wathaŵi ndi kuleka nyumba kweniso katundu waki.

14. Kumbi vo tisankha pa nkhani ya vinthu vakuliŵavu vingalongo wuli kuti te ndi chivwanu chakukho?

¹⁴ Tingakana kwanja ukongwa vinthu vakuliŵavu asani tigomezga ukongwa kuti umaliru wa charu chiheni ichi we pafupi ukongwa. Pa chisuzgu chikulu, ndalama zazamuja zambula phindu. Bayibolu likamba kuti ŵanthu “azamutaya siliva wawu mumisewu” chifukwa azamuziŵa kuti “siliva wawu pamwenga golidi wawu, vazakuŵataska cha pa zuŵa la ukali waku Yehova.” (Ezeki. 7:19) Mumalu mwakujiwunjikiya chuma, tikhumbika kuchita vinthu vo vingatiwovya kuti tisaniriyengi mabanja ngidu vinthu vakukhumbika pa umoyu uku titeŵete umampha Yehova. Venivi visazgapu kukana ngongoli zambula kwenere pamwenga kumaliya nyengu yinandi pakuphwere katundu widu. Ndipuso titenere kuwonesesa kuti titimuyanja ukongwa cha katundu widu. (Mate. 6:​19, 24) Chivwanu chidu chingayeseka pa nkhani ya mo tiwone  vinthu vakuliŵavu kweniso vinthu vinyaki po tilindizga umaliru wa charu chiheni ichi.

“MUKHUMBIKA KUKUNTHIYAPU”

15. Ntchifukwa wuli Akhristu Achiheberi akhumbikanga kukunthiyapu?

¹⁵ Akhristu Achiheberi akhumbikanga kukunthiyapu vinthu vakuyesa chivwanu chawu pa nyengu yo vinthu vingufika paheni ku Yudeya. (Ahe. 10:36) Chinanga kuti Akhristu Achiheberi anyaki angutombozgeka ukongwa, kweni anandi angwamba kuteŵete Chiuta pa nyengu yo Akhristu angujaku mwachimangu kamanavi. Mwaviyo, Paulo waŵakumbusanga kuti anozgeke kutombozgeka ukongwa kweniso kuti aje akunozgeka kuja akugomezgeka mpaka nyifwa nge mo Yesu wanguchitiya. (Ahe. 12:4) Ayuda anandi angukwiya ukongwa chifukwa chakuti ŵanthu anandi anguja Akhristu. Nyengu yinyaki, ŵanthu achiwawa anguyukiya Paulo pa nyengu yo wapharazganga ku Yerusalemu. Ayuda akujumpha 40 “anguchita kulapizga kuti aryengi pamwenga kumwa chechosi cha mpaka po abayiya Paulo.” (Machi. 22:22; 23:​12-14) Chinanga kuti Akhristu atinkhikanga kweniso kutombozgeka, akhumbikanga kulutirizga kuwungana, kupharazga uthenga wamampha kweniso kulutirizga kuja ndi chivwanu chakukho.

16. Kumbi kalata yo Paulo wangulembe Aheberi yingatiwovya wuli kuti tiwonengi mayeseru mu nthowa yakwenere? (Aheberi 12:7)

¹⁶ Kumbi ndi vinthu wuli vo vinguwovya Akhristu Achiheberi kukunthiyapu mayeseru ngo angukumana nangu? Paulo wanguziŵa kuti akhumbikanga kungawona mwakwenere mayeseru ngo akumananga nangu. Iyu wanguŵakambiya kuti asani Akhristu akumana ndi mayeseru, Chiuta wagwiriskiya ntchitu mayeseru ngeningo kuti waŵasambizi. (Ŵerengani Aheberi 12:7.) Venivi vatingi viwovyengi kuti asambiri pamwenga kuja ndi mijalidu yakukhumbika ukongwa yo yikondwesa Yehova. Kuŵanaŵaniya vinthu vamampha vo vatingi vichitikengi chifukwa chakukunthiyapu kwatingi kuwovyengi Akhristu Achiheberi ŵenaŵa kuti afiski kukunthiyapu mayeseru.—Ahe. 12:11.

17. Kumbi Paulo wangusambiranji pa nkhani yakukunthiyapu mayeseru?

 ¹⁷ Paulo wanguchiska Akhristu Achiheberi kuti akunthiyengepu mayeseru ndi mtima wosi. Iyu wenga wakwenere kuŵalembe kalata yakukwaskana ndi venivi. Pakuti kali watombozganga Akhristu, iyu waziŵanga vo akumananga navu. Iyu waziŵanga so mo angakunthiyapu kutombozgeka. Ve viyo chifukwa chakuti iyu wangukumana ndi mayeseru ngakupambanapambana wati waja Mkhristu. (2 Akori. 11:​23-25) Mwaviyo, Paulo wangukamba venivi chifukwa waziŵanga umampha vo vikhumbika kuti munthu wakunthiyepu. Iyu wanguŵakumbusa Akhristu ŵenaŵa kuti asani akunthiyapu mayeseru akhumbika cha kujithemba kweni athembengi Yehova. Venivi ndivu vawovyanga Paulo kuja ndi chiganga ndipu wangukamba kuti: “Yehova ndiyu watindiwovya; ndiwopengi cha.”—Ahe. 13:6.

18. Kumbi ndi vinthu wuli vo tikhumbika kuziŵa vo vingazitiwovya kukunthiyapu mayeseru kunthazi?

¹⁸ Po tikambiya panu viyo, abali ndi azichi ŵidu anyaki atombozgeka ndipu akunthiyapu. Tingaŵawovya abali ŵenaŵa asani titiŵapemphere ndipuso kuŵawovya munthowa zinyaki. (Ahe. 10:33) Kweni Bayibolu likamba mwakuvwika umampha kuti: “Ŵanthu wosi wo akhumba kuja ndi umoyu wakujipereka kwaku Chiuta mwakukoliyana ndi Khristu Yesu, nawu azamutombozgeka.” (2 Timo. 3:12) Mwaviyo tosi tikhumbika kunozgeke vo tingazikumana navu kunthazi. Tiyeni tilutirizgi kuthemba Yehova ndi mtima wosi kuti watiwovyengi kukunthiyapu mayeseru ngengosi ngo tingakumana nangu. Pa nyengu yakwenere, iyu wazamutaska ateŵeti ŵaki wosi akugomezgeka.—2 Ate. 1:​7, 8. 

19. Kumbi ndi vinthu wuli vo vingatiwovya kuti tinozgeke chisuzgu chikulu? (Wonani so chithuzi.)

¹⁹ Tikayika cha kuti kalata yo wakutumika Paulo wangulembe Aheberi yinguwovya Akhristu a mu nyengu ya akutumika kuti anozgeke chisuzgu chikulu cho anguzikumana nachu. Paulo wanguchiska Akhristu anyaki kuti asambirengi mwakuphwere kweniso angavwisengi umampha Malemba. Kuchita venivi kwatingi kuŵawovyengi kuziŵa kweniso kukana nkhani zo zatingi zidewezengi chivwanu chawu. Iyu wanguŵachiska kuti akholesi chivwanu chawu kuti avwiyengi liŵi ulongozgi waku Yesu kweniso wakutuliya ku ŵanthu wo aŵalongozganga mu mpingu. Ndipu iyu wanguwovya Akhristu kukunthiyapu kuti awonengi mayeseru mu nthowa yakwenere kweniso kuti angawonengi kuti ndi mwaŵi wakuti asambiziki ndi Awusewu achanju. Nasi tikhumbika kugwiriskiya ntchitu ulongozgi wa mu Bayibolu wenuwu. Venivi vingatiwovya kuti tifiski kukunthiyapu mpaka pakumaliya.—Ahe. 3:14.