1-2. Kumbi ntchinthu wuli cho chitovya ateŵeti aku Chiuta kuti akondwengi? (Yakobe 1:​22-25)

 YEHOVA ndi Mwana waki akhumba kuti tikondwengi. Yo wangulemba Salimo 119:2 wangukamba kuti: “Mbakukondwa wo asunga vikumbusu vaki, wo atimupenjapenja ndi mitima yawu yosi.” Yesu nayu wangukamba kuti: “Mbakukondwa wo atuvwa mazu ngaku Chiuta ndi kungasunga!”—Luka 11:28.

² Nge ateŵeti aku Yehova te ŵanthu akukondwa. Ntchifukwa wuli tikamba viyo? Pe vifukwa vinandi. Kweni cho chititiwovya ukongwa kuti tikondwengi ntchakuti tiŵerenga Mazu ngaku Chiuta nyengu zosi kweniso titesesa kugwiriskiya ntchitu vo tisambira.—Ŵerengani Yakobe 1:​22-25.

3. Kumbi tiyanduwa wuli asani tigwiriskiya ntchitu vo tiŵerenga mu Mazu ngaku Chiuta?

³ ‘Kuchita vo mazu ngakamba’ kutitiwovya mu nthowa zinandi. Yinyaki mwa nthowa zenizi njakuti tikondwesa Yehova. Kuziŵa venivi kutitiwovya kuti tikondwengi. (Waku. 12:13) Asani tigwiriskiya ntchitu vo tiŵerenga mu Mazu ngaku Chiuta, vititiwovya kuti tijengi ndi mabanja nga likondwa kweniso kuti tijengi pa ubwezi wamampha ndi Akhristu anyidu. Tikayika cha kuti venivi ndivu vakuchitikiyani pa umoyu winu. Kusazgapu yapa, tikhwecha masuzgu nganandi ngo ŵanthu akumana nangu chifukwa cha kuleka kuvwiya marangu ngaku Yehova. Venivi ndivu so Fumu Davidi yingukamba. Mu sumu yaki, yati yakamba marangu kweniso vyeruzgu vaku Yehova, yingumaliza ndi mazu ngakuti: “Asani munthu wativisunga, walonde mphotu yikulu.”—Salimo 19:​7-11.

4. Ntchifukwa wuli nyengu zinyaki kungaŵa kwakusuzga kugwiriskiya ntchitu vo tiŵerenga mu Mazu ngaku Chiuta?

 ⁴ Mbuneneska kuti nyengu zinyaki ntchipusu cha kugwiriskiya ntchitu vo tisambira mu Mazu ngaku Chiuta. Ve viyo chifukwa chakuti nyengu zinyaki titangwanika. Mwaviyo, tikhumbika kupatuwa nyengu yakuŵerenge kweniso kusambira Bayibolu kuti tivwisi vo Yehova wakhumba kuti tichitengi. Mwaviyo, tiyeni tiwoni masachizgu nganyaki ngo ngangatiwovya kuti tiŵerengengi Mazu ngaku Chiuta nyengu zosi. Tikambiskanengi so vo vingatiwovya kuti tiŵanaŵaniyengepu pa vo tiŵerenga ndipuso tiwonengi mo tingagwiriskiya ntchitu vo tiŵerenga.

MUPATUWENGI NYENGU YAKUŴERENGE MAZU NGAKU CHIUTA

5. Kumbi ndi vinthu wuli vo vikhumbika nyengu yidu?

⁵ Ateŵeti aku Yehova anandi atangwanika. Titangwanika ndi maudindu ngakupambanapambana ngo Bayibolu likamba kuti ngakukhumbika. Mwakuyeruzgiyapu, tanandi tigwira ntchitu zakulembeka kuti tijiphweriyengi kweniso kuti tiphweriyengi mabanja ngidu. (1 Timo. 5:8) Akhristu anandi aphwere abali ŵawu wo atama pamwenga akukota. Kweniso tosi tikhumbika kujiphwere kuti tije ndi liŵavu lanthazi, ndipu venivi vikhumbika nyengu. Kusazgapu yapa, te ndi vakuchita so vinyaki mu mpingu. Ndipu ntchitu yakupharazga ndiyu tikhumbika kuŵikapu ukongwa mtima. Pakuti taŵanthu te ndi vakuchita vinandi, kumbi munthu weyosi pakuyija wangachita wuli kuti wasaniyengi nyengu yakuŵerenge Bayibolu nyengu zosi, kuŵanaŵaniyapu kweniso kugwiriskiya ntchitu vo wasambira?

6. Kumbi mungachita wuli kuti muwonesesengi kuti muŵerenga Bayibolu nyengu zosi? (Wonani so chithuzi.)

⁶ Kuŵerenga Bayibolu ntchimoza mwa “vinthu vakukhumbika ukongwa” vo Akhristu atenere kuchita. Mwaviyo titenere kuwonesesa kuti titiliŵerenga. (Afi. 1:10) Pakukamba va munthu yo wakondwa, salimo lakwamba likamba kuti: “Wakondwa ndi dangu laku Yehova, ndipu waŵerenga ndi kulunguruka dangu Laki msana ndi usiku.” (Salimo 1:​1, 2) Yapa viwoneke limu kuti tikhumbika kupatuwa nyengu yakuŵerenge Bayibolu. Kumbi nyengu yamampha ukongwa  yakuŵerenge Bayibolu ndi niyi? Vingatole nyengu yo munthu wangayiwona kuti njamampha ukongwa kwaku iyu. Kweni chakukhumbika ukongwa ntchakuti mutenere kusankha nyengu yo muwona kuti mungafiska kuŵerenga Bayibolu nyengu zosi. Mubali Victor wangukamba kuti: “Nditanja kuŵerenga Bayibolu ndi mlenji. Chinanga kuti vitindisuzga kuyuka ndi mlenji, kweni nyengu yeniyi ndiyu ndiwona kuti njamampha chifukwa kuŵavi vakutimbanyizga vinandi. Pa nyengu yeniyi ndiŵanaŵaniya vinthu vinandi cha, maŵanaŵanu ngangu ngosi ngaja pa vo ndiŵerenga.” Kumbi namwi muwona viyo? Jifumbeni kuti, ‘Kumbi nyengu yamampha ukongwa kwaku ini yakuŵerenge Bayibolu ndi niyi?’

MUŴANAŴANIYENGI VO MUŴERENGA

7-8. Kumbi ntchinthu wuli cho chingatitondekesa kuvwisa vo tiŵerenga mu Bayibolu? Kambani chakuyeruzgiyapu.

⁷ Nyengu zinyaki, tingaja ndi chiziŵiriza chakuŵerenga vinthu vinanandi kweni kwambula kutopu kanthu. Kumbi vikukuchitikiyanipu kuti mwaŵerenga nkhani yinyaki mbwenu pavuli paki palivi cho mukumbukapu? Tosi vititichitikiya pe venivi. Ndipu vingachitika so asani tiŵerenga Bayibolu. Panyaki tikusankha kuti tiŵerengengi machaputala nganandiku zuŵa lelosi. Asani ndi viyo, mbwenu tikusankha umampha. Tikhumbika kujiŵikiya vilatu ndipu tiyesesengi kuvifiska. (1 Akori. 9:26) Asani mukwambapu kuŵerenga Bayibolu, mbwenu mukuchita umampha, kweni uku nkhwamba ŵaka. Tikamba viyo, chifukwa pe vinandi vo titenere kuchita kuti tivwisengi vo tiŵerenga mu Mazu ngaku Chiuta.

⁸ Mwakuyeruzgiyapu, vakume vikhumbika vuwa kuti vikuwengi umampha. Kweni asani vuwa yawa yinandi ukongwa mu kanyengu kamanavi ŵaka, dongu lizaza vimaji pe. Asani vaŵa viyo, vuwa yinyaki yingakhumbika dankha cha. Kweni vija umampha asani vuwa yituwa kamanakamana chifukwa vitovya kuti maji ngasereriyani mudongu ndipu mbewu zikuwa umampha. Mwakuyanana ŵaka, titenere cha kuŵerenga Bayibolu mwakuthaŵiriya chifukwa venivi vingachitiska kuti tileki kulivwisa, kukumbuka kweniso kugwiriskiya ntchitu vo taŵerenga.—Yako. 1:24.

9. Kumbi mungachita wuli asani mukuziŵiriya kuŵerenga Bayibolu mwakuthaŵiriya?

 ⁹ Kumbi nyengu zinyaki muwona kuti muthaŵiriya ukongwa pakuŵerenga Bayibolu? Kumbi mutenere kuchitanji? Muzikirengi pakuŵerenga. Yesesani kuŵanaŵaniya vo muŵerenga pamwenga vo mwaŵerengapu kali. Venivi vakusuzga cha. Mungasazgiyaku nyengu yakusambiriya Bayibolu kuti musazgiyeku nyengu yakuŵanaŵaniya vo musambira. Pamwenga mungasankha kuŵerenga mavesi ngamanavi kuti nyengu yo yajaku muyigwiriskiyengi ntchitu pakuŵanaŵaniya vo mwaŵerenga. Victor yo tamukambapu kali wangukamba kuti: “Ndiŵerenga mavesi ngamanavi ŵaka nga mu Bayibolu, panyaki chaputala chimoza pe. Chifukwa chakuti ndiŵerenga Bayibolu ndi mlenji, vitindiwovya kuti ndiŵanaŵaniyengi vo ndaŵerenga zuŵa losi lamphumphu.” Kwali mwasankha kuŵerenga vinthu vinandi wuli kweni chakukhumbika ukongwa nkhuŵerenga mwambula kuthaŵiriya kuti mufiskengi kuŵanaŵaniya vinthu vo mwaŵerenga.—Salimo 119:97; wonani bokosi lakuti “ Mafumbu ngo Mutenere Kungaŵanaŵaniya.”

10. Kambani chakuyeruzgiyapu cha mo mungagwiriskiya ntchitu vo musambira. (1 Atesalonika 5:​17, 18)

¹⁰ Kwali muŵerenga Bayibolu nyengu wuli pamwenga mutiliŵerenga kwa nyengu yitali wuli, muyesesengi kugwiriskiya ntchitu vo muŵerenga. Muchiŵerenga mavesi nga mu Bayibolu jifumbeni kuti, ‘Kumbi fundu zenizi ndingazigwiriskiya wuli ntchitu sonu pamwenga munthazi?’ Kuti tivwisi, tiyeruzgiyi kuti muŵerenga 1 Atesalonika 5:​17, 18. (Ŵerengani.) Asani mwaŵerenga mavesi ngaŵi ngenanga, mungama dankha ndi kujifumba kuti, Kumbi ini ndipemphera kaŵikaŵi kweniso ndi mtima wosi? Kweniso mungaŵanaŵaniya vinthu vo mungamuwonga Yehova. Pamwenga mungamuwonga Yehova mwakuchita kuzumbuwa vinthu vitatu vo wakuchitiyani. Chinanga kuti mungaŵanaŵaniyapu kwa kanyengu kamanavi ŵaka vo mwaŵerenga mu Bayibolu, kweni vingakuwovyani kuti muvwisengi ndipuso kuti muchitengi vo Mazu ngaku Chiuta ngakamba. Ŵanaŵaniyani mo kuchita venivi kungakuwovyiyani zuŵa lelosi asani muŵerenga Bayibolu. Kukamba uneneska, vikuwovyeningi kuti muje munthu yo wachita vo Mazu ngaku Chiuta ngakamba. Kweni kumbi mungachita wuli asani mwasaniya kuti pe vinthu vinandi vo mukhumbika kusintha?

MUJIŴIKIYENGI VILATU VO MUNGAFISKA

11. Ntchifukwa wuli mungagongowa nyengu zinyaki? Kambani chakuyeruzgiyapu.

¹¹ Asani muŵerenga Bayibolu, nyengu zinyaki mungagongowa chifukwa mungawona kuti pe vinthu vinandi vo mukhumbika kusintha. Tiyeruzgiyi kuti msanawale, muŵerenga nkhani ya mu Bayibolu yo yikamba kuti titenere cha kwanjiya. (Yako. 2:​1-8) Mwawona kuti  mukhumbika kusintha mo muchitiya vinthu ndi ŵanthu anyaki. Mwaviyo, mwasankha kuti muchitepu kanthu. Yapa mwasankha umampha ukongwa! Mbwenu mawa laki, muŵerenga mavesi ngo ngakamba kuti tikhumbika kuphwere ndi vo tikamba. (Yako. 3:​1-12) Mwawamu kuti nyengu zinyaki mulongoro umampha cha. Mwaviyo, musankha kuti mulongorongi vinthu vakuchiska asani mukambiskana ndi anyinu. Zuŵa lachitatu, muŵerenga mavesi ngo ngatcheŵesa kuti mbumampha cha kuja bwezi la charu. (Yako. 4:​4-12) Yapa muwona kuti mukhumbika kuphwere asani musankha vakukondwesa. Lichifika zuŵa lachinayi mungawona kuti pe vinthu vinandi ukongwa vo mukhumbika kusintha pa umoyu winu.

12. Ntchifukwa wuli mutenere cha kugongowa asani pakuŵerenga Bayibolu mwasaniya kuti pe vinthu vinandi vo mutenere kusintha? (Wonani so mazu ngamumphata.)

¹² Mungagongowanga cha asani muwona kuti pe vinthu vinandi vo mukhumbika kusintha. Wenuwu mbukaboni wakuti mwe akujiyuyuwa kweniso mwe ndi maŵanaŵanu ngamampha. Munthu wakujiyuyuwa ndipuso yo wachita vinthu mwauneneska, waŵerenga Malemba kuti wawoni vinthu vo iyu mweneku wakhumbika kusintha. a Kumbukani kuti kuvwala “umunthu wufya” kumala cha. (Ako. 3:10) Kumbi ntchinthu wuli cho chingakuwovyani kuti mulutirizgi kuchita vo Mazu ngaku Chiuta ngakamba?

13. Kumbi mungachita wuli kuti mujiŵikiyi vilatu vo mungavifiska nadi? (Wonani so vithuzi.)

¹³ Mumalu mwakusintha vosi nyengu yimoza, mujiŵikiyengi vilatu vo mungafiska. (Nthanthi 11:2) Yesani kuchita ivi: Lembani vinthu vo mukhumbika kusintha. Sankhanipu dankha chimoza pamwenga viŵi ndipu vinyaki vosi muzivichiti kunthazi. Kumbi mungayambiya pani?

14. Kumbi mungayamba ndi vilatu wuli?

¹⁴ Mungachita umampha kwamba ndi chilatu  cho muwona kuti ntchipusu kuchifiska. Pamwenga mungayamba kusintha vo muwona kuti mukhumbika kusintha ukongwa. Asani mwaziŵa vinthu vo mukhumbika kusintha, fufuzani mu mabuku ngidu ndipu mungagwiriskiya ntchitu Watch Tower Publications Index pamwenga Kabuku Kakufufuziya Nkhani ka Akaboni aku Yehova. Mukambiyeni Yehova vinthu vo mukhumba kusintha ndipu mupempheni “vosi viŵi, khumbu kweniso nthazi zakuchitiya.” (Afi. 2:13) Pavuli paki, gwiriskiyani ntchitu vinthu vo mwasambira. Asani mwafiska chilatu chinu chakwamba, vikuwovyeningi kuti muje ndi mtima wakukhumbisiska kufiska chilatu chinu chinyaki. Asani mwawona kuti mwafiska kusintha vinthu vinyaki, vikuwovyeningi kuti musinthi so vinthu vinyaki ndipu vingaŵa vipusu kuvisintha.

ZOMEREZANI KUTI MAZU NGAKU CHIUTA ‘NGAGWIRENGI NTCHITU MWAKU YIMWI’

15. Kumbi ŵanthu aku Yehova apambana wuli ndi ŵanthu anandi wo aŵerenga Bayibolu? (1 Atesalonika 2:13)

¹⁵ Ŵanthu anyaki akamba kuti akuŵerengapu Bayibolu kananandi ŵaka. Kweni kumbi agomezga nadi vo Bayibolu lisambiza? Kumbi yiwu achita vinthu mwakukoliyana ndi vo Bayibolu lisambiza ndi kusintha umoyu wawu? Awa. Ŵanthu anandi agwiriskiya ntchitu fundu za mu Bayibolu cha pa umoyu wawu. Venivi vipambana ukongwa ndi ŵanthu aku Yehova. Nge Akhristu a mu nyengu ya akutumika, tiwona Bayibolu “nge mazu ngaku Chiuta ndipu ndimu ngaliri nadi.” Kweniso tiyesesa kungagwiriskiya ntchitu pa umoyu widu.—Ŵerengani 1 Atesalonika 2:13.

16. Kumbi ntchinthu wuli cho chingatiwovya kuti tichitengi vo Mazu ngaku Chiuta ngakamba?

¹⁶ Nyengu zinyaki vingaŵa vakusuzga kuŵerenga kweniso kugwiriskiya ntchitu Mazu ngaku Chiuta pa umoyu widu. Tingasuzgika kusaniya nyengu yakuŵerenge pamwenga tingaŵerenga mwakuthaŵiriya ukongwa kwambula kutopu kanthu pa vo taŵerenga. Pamwenga tingagongowa chifukwa chakuti tasaniya vinthu vinandi vo tikhumbika kusintha. Kweni kwali mwe ndi suzgu wuli pa nkhani yakuŵerenga Bayibolu, ziŵani kuti mungamalana nalu. Yehova wakuwovyeningi kumalana ndi suzgu lo. Tiyeni tizomerezi kuti Yehova watiwovyi ndipu titenere cha kuja munthu yo watuvwa ndi kuluwa, kweni yo wachita vo Mazu ngaku Chiuta ngakamba. Kukamba uneneska, tikondwengi ukongwa asani titesesa kuŵerenga Mazu ngaku Chiuta ndi kugwiriskiya ntchitu vo taŵerenga pa umoyu widu.—Yako. 1:25.