MALEMBA ngakonkhoska vifukwa vo kali ŵanthu aparuliyanga vakuvwala vawu. Mazuŵa nganu ŵanthu angazizwa kweni Ayuda aziŵanga kuti munthu wachitanga viyo asani wamala zeru, wachita chitima, walengeskeka, wakwiya ndipuso waliya.

Mwakuyeruzgiyapu, Rubene “wanguparuwa vakuvwala vaki” wati wasaniya kuti mvurwa waki Yosefe amuguliska nge muŵanda ndipu watondeka kumupozomoska. Awiskewu a Yakobe, ‘anguparuwa vakuvwala vawu’ ŵati aziŵa kuti Yosefe wabayika ndi nyama ya kudondu. (Chiy. 37:18-35) Jobu, “wanguparuwa munjirira waki” wati wavwa kuti ŵana ŵaki wosi abayika. (Jobu 1:18-20) Munthu munyaki wenga ndi ‘vakuvwala vakuparuka’ muliŵavu wachiluta kwaku Eli, Mura wa Asembi kuchimukambiya kuti Ayisraele athereskeka ku nkhondu, ŵana ŵaki ŵaŵi anthurumi abayika kweniso kuti arwani alonda bokosi la phanganu. (1 Sam. 4:12-17) Josiya wati wavwa mazu ngo nganguŵerengeka m’Buku la Marangu ndipuso kuziŵa kuti ŵanthu ŵaki angunanga, ‘wanguparuwa vakuvwala vaki.’​—2 Ŵakar. 22:8-13.

Pa nyengu yo Yesu amumbanga mulandu, Kayafa yo wenga Mura wa Asembi, “wanguparuwa minjirira yaki” wati wayeruzga mwambula urunji kuti Yesu wanyozanga Chiuta. (Mat. 26:59-66) Mwakukoliyana ndi mudawuku wo alongozgi ndi asambizi achiyuda angujalikiska, munthu yo wavwa zina laku Chiuta lichinyozeka, wakhumbikanga kuparuwa vakuvwala vaki. Kweni nyumba yakusopiyamu ku Yerusalemu yati yabwangandulika, angujalikiska dangu lo lakambanga kuti, “mazuŵa nganu nyengu yosi yo munthu wavwa Zina Laku Chiuta lichinyozeka, wakhumbika cha kuparuwa vakuvwala vaki, chifukwa asani wangachita viyo vifikengi kuja malizwazwa.”

Kukamba uneneska, kuparuwa ŵaka vakuvwala kwenga kwakuzirwa cha pa masu paku Chiuta pijapija asani munthu yo walapa nadi. Ndichu chifukwa chaki Yehova wangukambiya ŵanthu ŵaki kuti ‘aparuwi mitima yawu, vakuvwala vawu cha, ndipu ang’anamukiyi kwaku iyu.’​—Yoele 2:13.