Sumu yinyaki yakuthamika Mulengi yo Fumu Davidi yingumba, yititi: “Ndikondwere kuchita khumbu linu, A Chiuta wangu; dangu linu le mukati mumtima wangu.” (Sumu 40:8) Chinanga kuti wakumananga ndi masuzgu nganandi pa umoyu waki, Davidi wangulutirizga kuchita khumbu laku Chiuta. Iyu wenga yija pe cha yo wateŵetiyanga Chiuta wauneneska.

Wakutumika Paulo wangulongo kuti mazu nga pa Sumu 40:8 ngakamba zaku Mesiya pamwenga kuti Khristu. Iyu wangulemba kuti: “Khristu wachiza mu charu, watiti, ‘“Sembi ndi mpasku kuti mungukhumba cha, kweni liŵavu mwandirongosole; mu sembi zakocha ndimu mpasku wapa vilakwa kuti mungukondwere cha.” Sonu ndinguti, “Awona, ndaziya (mu chizinga cha buku kwalembeka paku ini) kwachichita khumbu linu, Achiuta.”’”​—Ŵah. 10:5-7.

Po Yesu wenga pacharu chapasi wakondwanga ndi chilengedu, kuja ndi mabwezi kweniso kurya chakurya limoza ndi anyaki. (Mat. 6:26-29; Yoh. 2:1, 2; 12:1, 2) Kweni iyu wakhumbanga ukongwa kuchita khumbu la Awiski akuchanya. Ndichu chifukwa chaki wangukamba kuti: “Chakurya changu nchakuti ndichitengi khumbu la wakundituma yo, ndi kuti ndifiski mlimu waki.” (Yoh. 4:34; 6:38) Yesu wangusambiza akusambira ŵaki mo angajaliya ndi likondwa lenechu. Yiwu akondwanga ndipuso akhumbisiskanga kupharazgiya ŵanthu mwaphamphu uthenga wamampha wa Ufumu.​—Luka 10:1, 8, 9, 17.

Yesu wangukambiya akulondo ŵaki kuti: “Lutani, sambizani mitundu yosi, ŵakuŵabatiziya mu zina la Ada ndi la Mwana ndi la Mzimu ŵakupaturika: ŵakuŵasambiza [kusunga] vosi vo ndalanguliya imwi: ndipu wonani, ini nde namwi mazuŵa ngosi mpaka ku umari wa mgonezi wo.” (Mat. 28:19, 20) Kugwira nchitu yo Yesu wangukamba, kusazgapu kufikiya ŵanthu kwekosi ko angasanirika, kuweriyaku kwaku wo alongo linweka ndipuso kwamba  kusambira nawu Bayibolo. Asani tigwiraku nchitu yeniyi, tiŵengi ndi likondwa likulu.

Chinanga kuti ŵanthu angavwisiya uthenga widu pamwenga cha, vakuchita vidu vingatiwovya kuti tikondwengi asani tipharazga. Nchifukwa wuli tilutirizga kupharazga uthenga wamampha chinanga kuti ŵanthu avwisiya cha? Nchifukwa chakuti tiziŵa kuti kugwira nchitu yakupharazga Ufumu kweniso kusambiza ŵanthu ndi nthowa yimoza yakulongole kuti titanja Chiuta kweniso ŵanthu. Kukamba uneneska, umoyu widu kweniso wa ŵanthu anyaki we pangozi. (Ezek. 3:17-21; 1 Tim. 4:16) Tiyeni tiwoni fundu zinyaki zo zawovya ateŵeti anyidu kuti alutirizgi pamwenga kuti ayambi so kuchita uteŵeti mwaphamphu mu vigaŵa vakusuzga.

Kugwiriskiya nchitu mafumbu ngakwenere mu uteŵeti nkhwakovya ukongwa. Zuŵa linyaki ndi mulenji, Amalia wangusaniya munthu munyaki yo waŵerenganga nyuzipepala kumalu ngakuŵetiyaku nyama zakupambanapambana. Iyu wangwamba kukambiskana nayu ndipu wangumufumba asani waŵerengamu uthenga wewosi wamampha. Wati wamuka kuti waŵerengapu cha, Amalia wangumukambiya kuti, “Ndakupingiyani uthenga wamampha wa Ufumu waku Chiuta.” Ivi vingumukondwesa ndipu wanguzomera kusambira nayu Bayibolo. Amalia wangwambisa masambiru nga Bayibolo ngatatu kumalu ngenanga.

Janice nayu wapharazga kumalu nga nchitu. Mulonda munyaki ndipuso munthu yo wagwiranga nayu nchitu angukondwa ndi nkhani yo yenga mu Chigongwi cha Alinda ndipu Janice wanguŵapempha kuti waŵapaskengi magazini mwezi wewosi. Wanguchita so venivi ndi munthu yo wagwiranga nayu nchitu yo wangukondwa ndi nkhani zakupambanapambana za mu Chigongwi cha Alinda ndipuso Galamukani! Ivi vinguchitiska kuti munyaki yo wagwiranga nayu nchitu wapemphi so magazini ngenanga. Janice wangukamba kuti, “Yehova wanditumbika ukongwa!” Pakumaliya, ŵanthu 11 waŵapaskanga magazini mwezi wewosi kunchitu kwaki.

Wakuwonere dera munyaki wangukamba kuti apharazgi atenere cha kukambiya mweneku wa nyumba kuti azengi zuŵa linyaki asani apharazga nyumba ndi nyumba. M’malu mwaki, angamufumba kuti: “Kumbi mungayanja kuti ndizikulongoni mo tisambiriya Bayibolo?” pamwenga “Ndingaza so zukwanji ndipuso nyengu wuli kuti tizilutirizgi kukambiskana nkhani yeniyi?” Iyu wangukamba mo nthowa iyi yinguwovye abali ndi azichi a mumpingu wo wateŵetiyangaku kuti kwa sabata yimoza pe, angwambisa masambiru nga Bayibolo 44.

Tiweriyengeku liŵi ku ŵanthu wo atidana kuti tikakambiskani nawu. Chifukwa wuli? Chifukwa chakuti asani tichita viyo, tilongo kuti tikhumbisiska kuwovya ŵanthu a mtima wamampha kuti aziŵi vo Bayibolo likamba. Munthukazi munyaki wati wafumbika chifukwa cho wanguzomere kusambira Bayibolo ndi Akaboni aku Yehova, wangumuka kuti,  “Ndingwamba kusambira nawu Bayibolo chifukwa chakuti akhumbisiskanga kundisambiza ndipuso angulongo kuti atindiyanja.”

Madaí wati wasere Sukulu ya Uteŵeti wa Upayiniya, wangwamba kuchitiska masambiru nga Bayibolo 15 ndipu nganyaki 5 wangupaska apharazgi anyaki kuti achitiskengi. Anandi mwa ŵanthu wo wasambiranga nawu Bayibolo angwamba kuwungana mwakujalikiskika. Kumbi nchinthu wuli cho chinguwovya Madaí kuti wayambi kusambiza ŵanthu anandi viyo? Sukulu yeniyi yingumuwovya kuti waweriyengeku ku ŵanthu wo waŵapharazgiya. Kaboni munyaki yo wawovya ŵanthu anandi kuti aziŵi uneneska wa m’Bayibolo wangukamba kuti, “Ndasambira kuti tikhumbika kuyesesa kuweriyaku ku ŵanthu wo taŵapharazgiya kuti tiŵawovyi kuziŵa Yehova.”

Pakhumbika phamphu kuti tiweriyengeku ku ŵanthu wo titiŵapharazgiya kweniso wo titiŵasambiza Bayibolo. Vitumbiku vo tisaniya viluska phamphu lo tingaŵa nalu. Asani tiyesesa kugwiraku nchitu yakupharazga Ufumu, tingawovya ŵanthu anyaki “kufikapu pa mziŵiru wa uneneska,” ndipuso kuti azitaskiki. (1 Tim. 2:3, 4) Kuchita viyo, kungatiwovya kuti tikhorwengi kweniso tikondwengi ukongwa.