Kumbi mukuŵerenga magazini ngosi nga Chigongwi cha Alinda ngo ngatuwa pambula kuswera yapa? Asani ndi viyo, wonani asani mungamuka mafumbu yanga:

Kumbi mwana wambereri wakhumbikanga kubayika nyengu wuli pa Nisani 14?

Mabayibolo nganyaki ngakamba kuti mwana wa mbereri wakhumbikanga kubayika mazulu, lumwi lasere kweni kweche ukweru. (Chit. 12:6)​—12/1, peji 20.

Kumbi ndi fundu nizi za m’Bayibolo zo ampupuka angagwiriskiya nchitu kuti asankhi vinthu mwazeru?

Pe fundu zitatu izi: (1) Lembeni dankha Ufumu waku Chiuta ndi urunji waki. (Mat. 6:19-34) (2) Mukondwengi chifukwa chakuteŵete anyaki. (Mac. 20:35) (3) Teŵetiyani Chiuta mwalikondwa pa unyamata winu. (Wak. 12:1)​—1/1, peji 19-20.

Kumbi ŵanthu anayi wo akwera pa kavalu aja achichitanji kutuliya mu 1914?

Yesu yo wakwera kavalu mutuŵa, wakudikiska Satana ndi mademoni ngaki kuchanya. Yo wakwera pa kavalu muyera wamiya nkhondu zo ŵanthu aja achisuzgika nazu. Yo wakwera pa Kavalu mufipa wamiya nja ndipu yo wakwera pa kavalu wachotu wamiya milili yo yibaya ŵanthu mamiliyoni nganandi. (Chiv. 6:2-8)​—3/1, peji 6-7.

Kumbi ‘nthengwa ya Mwana wa mbereri’ yichitikengi zuŵanji? (Chiv. 19:7)

‘Nthengwa ya Mwana wa mbereri’ yazamuchitika asani fumu Yesu Khristu yamaliza kupunda pa nkhondu ya Aramagedoni. Pa nyengu iyi Babiloni Mukulu wazamuja kuti wabwangandulika kali.​—2/15, peji 10.

Nchifukwa wuli Ayuda a mu nyengu ya akutumika ‘alereziyanga’ Mesiya? (Luka 3:15)

Tingasimikizga cha kuti mu nyengu ya akutumika Ayuda anguvwisa umampha uchimi waku Danyele wakukamba zaku Mesiya nge mo titiwuvwisisiya isi. (Dan. 9:24-27) Chinanga kuti ve viyo, panyaki yiwu anguvwa vo angelu angupharazgiya aliska anyaki ambereri pamwenga vo mchimikazi Anna wangukamba, wati wawona Yesu yo anguza nayu mu nyumba yakusopiyamu pa nyengu yo wenga bonda. Anguvwa so za akusanda nyenyezi wo anguza kuzipenja “yo wakuwa Karonga wa Ayuda.” (Mat. 2:1, 2) Pavuli paki, Yohane M’batizi wangukamba kuti Khristu wazengi pambula kuswera.​—2/15, peji 26-27.

Kumbi tingachita wuli kuti tifiskengi vo talayizga? (2 Ŵakor. 1:18)

Mbuneneska kuti nyengu zinyaki vingatichitikiya vinthu vo vingachitiska kuti titondeki kufiska vo talayizga. Kweni asani talayizga chinthu chinyaki, titenere kuyesesa kuchifiska.​—3/15, peji 32.

Kumbi tingachita wuli kuti tingawoneriyanga cha vinthu vakuyuska chiryokuryoku chakugonana?

Pe nthowa zitatu zakovya. (1) Tikhumbika kulereska kumphepeti mwaliŵi asani tawona vithuzi vakuyuska chiryokuryoku chakugonana. (2) Tivikiliyengi maŵanaŵanu ngidu mwakuŵanaŵana vinthu vamampha ndipuso tirombengi kwaku Chiuta. (3) Tikhumbika cha kuwonere mafilimu ngo ngalongo vinthu vakuyuska chiryokuryoku chakugonana pamwenga kuwonere vinthu venivi pa Intaneti.​—5/1, peji 12-14.

Kumbi ndi masuzgu wuli ngambula kungaŵanaŵaniya ngo Akhristu wo asiya mabanja ngawu kuchipenja nchitu ku charu chinyaki akumana nangu?

Asani apapi aja kutali ndi banja lawu, ŵana asuzgika maŵanaŵanu ndipuso aja ndi mijalidu yiheni. Yiwu akwiyiya apapi ŵawu. Asani munthurumi pamwenga munthukazi waja kutali ndi banja laki, wangayeseka kuti wachiti chigololu.​—4/15, peji 19-20.

Kumbi ndi mafumbu nganayi nanga ngo tikhumbika kuŵanaŵaniya asani tikhumba kupharazgiya ŵanthu?

Kumbi ŵanthu wo ndikhumba kuŵapharazgiya mbayani? Kumbi ndi nunkhu ko ndamukambiskana nawu? Kumbi ndi nyengu wuli yo ndikambiskanengi nawu? Kumbi ndikambiskanengi nawu wuli?​—5/15, peji 12-15.