TIJA mu nyengu yakusuzga ukongwa kuluska kali. (2 Tim. 3:1-5) Zuŵa lelosi tiyeseka kuti tileki kulondo fundu zaku Yehova zaurunji ndipuso kuti tileki kuja nayu pa ubwezi. Yesu wanguyiziŵiya limu nyengu iyi ndipu wangusimikizgiya akusambira ŵaki kuti azamupaskika nthazi kuti akunthiyepu mpaka pakumaliya. (Mat. 24:3, 13; 28:20) Kuti alutirizgi kuja ndi nthazi, iyu wangusankha muŵanda wakugomezgeka kuti waperekengi “chakurya pa nyengu yaki.”​—Mat. 24:45, 46.

Kutuliya po muŵanda wakugomezgeka wangusankhikiya mu 1919, ŵanthu mamiliyoni nganandi a vineneru vakupambanapambana awunganiskikiya m’gulu laku Chiuta ndipu alonde chakurya chauzimu. (Mat. 24:14; Chiv. 22:17) Kweni ŵanthu ŵenaŵa alonde chakurya mwakuyanana cha ndipuso ndi wosi cha wo ŵe ndi mwaŵi wakuŵerenga mabuku ngidu pa Intaneti. Mwakuyeruzgiyapu, ŵanthu anandi alivi mavidiyo ndipuso nkhani zo zisanirika pa jw.org pe. Kumbi ivi ving’anamuwa kuti anyaki atondeka kusaniya chakurya chauzimu cho chingaŵawovya kuti aje pa ubwezi wakukho ndi Yehova? Kuti tiziŵi kwamuka, tiyeni tikambiskani mafumbu nganayi ngakulungakulu.

Pa nyengu yo Satana wayesanga Yesu kuti wasambusi mya kuti ije chakurya, Yesu wangukamba kuti: “Munthu kuti wakajanga ndi umoyu ndi chiŵandi pe cha, kweni ndi nenedu losi likutuwa mu mlomu waku Chiuta.” (Mat. 4:3, 4) Mazu ngaku Yehova ngasanirika m’Bayibolo. (2 Pet. 1:20, 21) Mwaviyo, Bayibolo ndilu chinthu chakwamba cho chiŵikika muchakurya chauzimu cho tilonde.​—2 Tim. 3:16, 17.

Gulu laku Yehova latuzga Bayibolo la New World Translation of the Holy Scriptures pamwenga chigaŵa chaki mu vineneru 120, ndipu vineneru vinyaki visazgikiyaku chaka chechosi. Kusazgiyapu pa Bayibolo lenili, pe so Mabayibolo nganyaki mabiliyoni ngo ngasanirika ngamphumphu pamwenga vigaŵa vaki mu vineneru masawuzandi nganandi. Ivi vikoliyana ndi vo Yehova wakhumba kuti ‘ŵanthu wosi ataskiki ndi kufikapu pa mziŵiru wa uneneska.’ (1 Tim. 2:3, 4) Chifukwa chakuti chinthu chechosi che “mwazi” [pamasu paku Yehova], tisimikizga kuti iyu waŵadaniyengi m’gulu laki wo aziŵa kuti ‘mbasauchi mu mzimu’ ndipuso waŵapaskengi chakurya chauzimu.​—Ŵah. 4:13; Mat. 5:3, 6; Yoh. 6:44; 10:14.

Kuti munthu waje ndi chigomezgu chakukho, wakhumbika kuŵerenga Bayibolo pe cha. Iyu watenere kuvwisisa vo waŵerenga ndipuso kuvigwiriskiya nchitu. (Yak. 1:22-25) Nduna yinyaki ya ku Etiopia ya mu nyengu ya akutumika nayu yinguchita venivi. Po nduna yeniyi yaŵerenganga Mazu ngaku Chiuta, Filipi wanguyifumba kuti: “Kumbi muteska . . . ngeningo muŵerenga?” Nduna iyi yingumuka kuti: “Ndingaziŵa uli, kwambura kuti yumoza wandirongozga?” (Mac. 8:26-31) Filipi wangumukonkhoske umampha fundu za m’Mazu Ngaku Chiuta. Nduna iyi yingukondwa ukongwa ndi vo yingusambira ndipu yingubatizika. (Mac. 8:32-38) Mwakuyana ŵaka, mabuku ngidu ngo ngakonkhoska nkhani za m’Bayibolo ngatitiwovya kuti tiziŵi uneneska. Tikondwa ukongwa ndi mabuku ngenanga ndipu ngatitiwovya kuti tigwiriskiyengi nchitu vo tisambira.​—Ŵakol. 1:9, 10.

Mabuku ngo ateŵeti aku Yehova apaskika ngatiŵawovya kuti aje ndi vinthu vinandi vauzimu kuti ŵaryi ndi kumwa. (Yes. 65:13) Mwakuyeruzgiyapu, Chigongwi cha Alinda, chisanirika mu vineneru vakujumpha 210, ndipu chikonkhoska mauchimi nga m’Bayibolo, mo tingaziŵiya fundu zikuluzikulu za uneneska ndipuso chititiwovya kuti tichitengi vinthu mwakukoliyana ndi fundu za m’Bayibolo. Magazini ya Galamukani! yisanirika mu vineneru 100 ndipu yititiwovya kuziŵa mo Yehova wakulenge vinthu kweniso mo tingagwiriskiya nchitu ulongozgi wa m’Bayibolo. (Nthanthi 3:21-23; Ŵar. 1:20) Muŵanda wakugomezgeka watitipaska mabuku ngo ngakonkhoska fundu za m’Bayibolo mu vineneru vakujumpha 680. Kumbi musaniya nyengu yakuŵerenge Bayibolo zuŵa lelosi? Kumbi muŵerenga magazini ndipuso mabuku ngosi ngo ngatuwa mu chineneru chinu chaka chechosi?

Gulu laku Yehova lilemba so ma autilayini nga nkhani za m’Bayibolo ngo ngakambika pa maunganu nga mpingu, ngachigaŵa, ngapade ndi ngadera. Kumbi muyanduwa ndi maseŵeru ndipuso nkhani zo zija ndi vigaŵa va kufumba kweniso vakuyeruzgiyapu pa maunganu ngenanga? Kukamba uneneska, Yehova watitinozge phwandu lauzimu!—Yes. 25:6.

Awa. Tingazizwanga cha kuti nyengu zinyaki ateŵeti aku Yehova angaja ndi chakurya chinandi chauzimu kuluska anyawu. Chifukwa wuli? Ŵanaŵaniyani vo vinguchitikiya akutumika. Yiwu alondiyanga ulongozgi wakupambanapambana kuluska akusambira anandi wo ŵengaku mu nyengu yawu. (Marko 4:10; 9:35-37) Chinanga kuti venga viyo, akusambira anyaki atondekanga cha kusaniya chakurya chauzimu. Yiwu alondiyanga chakurya chakukwana.​—Ŵaef. 4:20-24; 1 Pet. 1:8.

Tikhumbika so kuziŵa kuti ndi vosi cha vo Yesu wangukamba ndi kuchita weche pacharu chapasi vo vikulembeka m’Bayibolo. Wakutumika Yohane wangulemba kuti: “Kweni kwe vinyaki vinandi so vo Yesu wanguchita, venivo asani vingulembeka chimoza ndi chimoza, ndiŵanaŵana kuti chinanga ndi charu ichi kuti chatingi chiziŵengi cha kufungiya mabuku ngo ngatingi ngalembekengi.” (Yoh. 21:25) Chinanga kuti akusambira aku Yesu a mu nyengu ya akutumika aziŵanga vinandi vakukwaskana ndi Yesu weche pacharu chapasi kuluska isi, kweni tipambana cha. Yehova watiwovya ukongwa kuti tiziŵi vinandi vakukwaskana ndi Yesu ndi chilatu chakuti tije akusambira ŵaki.​—1 Pet. 2:21.

Ŵanaŵaniyani so makalata ngo akutumika alembiyanga mipingu ya mu nyengu yawu. Viwoneka kuti ndi kalata yimoza pe yaku Paulo yo yikulembeka cha m’Bayibolo. (Ŵakol. 4:16) Kumbi tisoŵa chakurya chauzimu chifukwa chakuti tilivi kalata yeniyi? Awa. Yehova waziŵa umampha vo tikhumbika ndipu watipaska chakurya chauzimu chinandi kuti tilutirizgi kuja nayu pa ubwezi wakukho.​—Mat. 6:8.

Mazuŵa nganu, ateŵeti anyaki aku Yehova ŵe ndi chakurya chinandi chauzimu kuluska anyaki. Kumbi mwe ndi mabuku ngamanavi mu chineneru chinu? Asani ndi viyo, ziŵani kuti Yehova watikuŵanaŵaniyani. Muŵerengengi mabuku ngo mwenangu ndipuso muyesesengi kuwungana ndi mpingu wa chineneru cho mutuvwa. Yehova wakuwovyeningi kuti mulutirizgi kuja nayu pa ubwezi wakukho.​—Sumu 1:2; Ŵah. 10:24, 25.

Pa Webusayiti yidu pasanirika magazini ndipuso mabuku nganyaki ngo ngatovya ŵanthu kuti asambiri Bayibolo. Pasanirika so nkhani zo zitovya mabanja, achinyamata ndipuso ŵanthu wo ŵe ndi ŵana anamana. Mabanja ngayanduwa ukongwa asani ngakambiskana nkhani zenizi Pakusopa kwa Pabanja. Pa Webusayiti iyi pasanirika lipoti laku wo amalizga Sukulu ya Gilayadi, lipoti la unganu wapachaka, vipharazgu vakukwaskana ndi abali wo akumana ndi masoka ngachilengedu kweniso milandu yo ŵanthu atumba Akaboni aku Yehova. (1 Pet. 5:8, 9) Webusayiti iyi yitovya so ukongwa pa nchitu yakupharazga ndipu venivi vichitiska kuti uthenga wamampha ufikengi chinanga ndi muvyaru mo uthenga widu ukanizgika.

Kweni mukhoza kulutirizga kuja pa ubwezi wakukho ndi Yehova, kaya mwe ndi mwaŵi wakugwiriskiya nchitu Webusayiti yeniyi pamwenga cha. Muŵanda wayesesa kulemba ndi kupereka mabuku kwa ateŵeti aku Yehova kuti agutengi mwauzimu. Mwaviyo, mungajichichizganga cha kuti muguli chipangizu cho chingakuwovyani kuti mugwiriskiyengi nchitu jw.org. Anyaki akhoza kukopa nkhani zinyaki zo ziŵikika pa Webusayiti iyi ndi kupaska wo alivi mwaŵi wakugwiriskiya nchitu Intaneti. Kweni mipingu yikhumbika cha kuchita viyo.

Titimuwonga ukongwa Yesu chifukwa cha kufiska mazu ngaki kuti watiphweriyengi mwauzimu. Po mazuŵa ngakumaliya nge pafupi kumala, tikhumbika kuja ndi chigomezgu chakuti Yehova walutirizgengi kutipaska chakurya chauzimu “pa nyengu yaki.”