PETRO wanguliya ukongwa wati waziŵa kuti wakana Yesu. Chinanga kuti wakhumbikanga kuyesesa kuti waje so pa ubwezi ndi Yehova, Yesu wakhumbanga kumugwiriskiya nchitu kuti wakawovyi anyaki. Ndichu chifukwa chaki Yesu wangumukambiya kuti: “Asani waweriyaku ukachiski abali ŵaku.” (Luka 22:32, 54-62, NW) Petro wanguja so muzati wa mpingu wachikhristu m’nyengu ya akutumika. (Ŵag. 2:9) Mwakuyana ŵaka, m’bali yo wakuteŵetiyapu nge mura wakhoza kuteŵete so pa udindu wenuwu ndipu wangasaniya likondwa mwakuchiska anyaki mwauzimu.

Abali anyaki wo ŵenga ŵara angajiwona kuti mbakutondeka. Julio a yo wanguteŵetiyapu nge mura ku South America kwa vyaka vakujumpha 20, wangukamba kuti: “Kunozgeke nkhani, kuwona abali ndipuso kuchita maulendu nga uliska ndivu ndakondwanga navu ukongwa pa umoyu wangu. Uteŵeti wangu ungumala mwamabuchibuchi ndipu venivi vinguchitiska kuti ndisoŵi chakuchita. Kukamba uneneska, iyi yenga nyengu yakusuzga ukongwa.” Sonu, Julio wateŵete so nge mura.

Wakutumika Yakobe wangulemba kuti: “Mwa abali ŵangu, muchipimi chimwemwi pe” po mukumana ndi mayeseru ngakupambanapambana. (Yak. 1:2) Yapa Yakobe wang’anamuwanga mayeseru ngo tingakumana nangu chifukwa chakutombozgeka ndipuso chifukwa chakuti te ambula kufikapu. Iyu wangukamba so za jalidu lambunu, sankhu ndi vinyaki va viyo. (Yak. 1:14; 2:1; 4:1, 2, 11) Tingavwa kuŵaŵa asani Yehova watitilanga. (Ŵah. 12:11) Kweni ivi vingatilondanga likondwa cha.

Chinanga kuti tikusiskika pa udindu mumpingu, teche ndi mwaŵi wakuti tiwoni asani teche kugomezga Yehova ndipuso kumuyanja. Tikhoza kuŵanaŵaniya so chifukwa cho tateŵetiyanga pa nyengu yo. Kumbi takhumbanga kuti tiyanduwi ndisi pamwenga tateŵetiyanga  chifukwa chakuti tayanjanga Chiuta ndipuso tingusimikizga kuti mpingu uwu ngwaki ndipu ukhumbika kuwuphwere? (Mac. 20:28-30) Abali wo akusiskika pa udindu ndipu sonu alutirizga kupharazga mwaphamphu, alongo kuti atanja Yehova kutuliya pasi pamtima.

Fumu Davidi yati yachenyeka chifukwa cha ubudi ukulu wo yinguchita, yinguzomerezga kunanga kwaki ndipu Yehova wanguyigowoke. Iyu wangukamba kuti: “Ngwakutumbikika yo wagowokereka kwananga kwaki, mweniyo kulakwa kwaki kwawundika. Wakutumbikika ndi munthu yo Ambuya kuti atimupimiya kubende cha, yo mu mzimu waki mulivi uryarya.” (Sumu 32:1, 2) Chilangu chingusintha umoyu waku Davidi ndipu chingumuwovya kuti waje muliska wamampha wa ŵanthu aku Chiuta.

Kanandi, abali wo anguteŵetiyapu nge ŵara aja aliska amampha ukongwa kuluska mo ŵenge kali. Mura munyaki wangukamba kuti: “Sonu ndiziŵa umampha mo ndingachitiya ndi ŵanthu wo ananga.” Mura munyaki nayu wangukamba kuti: “Sonu ndiwona kuti kuteŵete abali ndichu chinthu chakukhumbika ukongwa.”

Wakulemba sumu munyaki wangukamba kuti: “[Yehova] kuti wakachenyanga nyengu yosi cha.” (Sumu 103:9) Mwaviyo, tingaŵanaŵananga cha kuti Chiuta wangamugomezga so cha munthu yo wanguchitapu ubudi ukulu. Ricardo yo wangusiskika pa udindu nge mura pavuli pakuti wateŵete pa udindu wenuwu kwa vyaka vinandi wangukamba kuti: “Ndingudandawula ukongwa chifukwa chakuti ndenga wakutondeka. Kwa nyengu yitali, maŵanaŵanu ngakuti nde wambula kwenere nganditondekeskanga kuti ndiyambi so kuteŵete abali nge mura. Ndajikayikiyanga kuti ŵanthu angandigomezga so cha. Kweni chifukwa chakuti ndayanjanga kovya ŵanthu, vandiwovyanga kuti ndichitiskengi masambiru nga Bayibolo, ndiwovyengi abali pa Nyumba ya Ufumu kweniso ndiyendengi nawu mu uteŵeti wakumunda. Ivi vingundiwovya so kuti ndijiwonengi mwakwenere ndipu sonu nditeŵete so nge mura.”

Kusunga vifukwa kungachitiska m’bali kuti waleki kuteŵete nge mura. Tikhumbika kuja nge Davidi,  mteŵeti waku Yehova, yo wathaŵanga Fumu Sauli, yo yamuchitiyanga sanji! Davidi wangukana kuwezge Sauli chinanga kuti wasaniyanga mpata wakuti wangamuwezge. (1 Sam. 24:4-7; 26:8-12) Sauli wati wafwa pa nkhondu, Davidi wanguliya ndipu wakambanga kuti iyu ndi mwana waki Jonafani, ŵenga ‘akwanjiwa ndi amampha.’ (2 Sam. 1:21-23) Davidi wangusunga vifukwa cha.

Asani mwayambana ndi munthu pamwenga asani anyaki akuchitiyani vinthu vambula urunji, mungasunganga vifukwa cha. Mwakuyeruzgiyapu, pa nyengu yo William wangusiskika pa udindu nge mura pavuli pakuti wateŵete pa udindu wenuwu kwa vyaka 30 ku Britain, iyu wangwamba kusungiya vifukwa ŵara anyaki mumpingu. Kumbi nchinthu wuli cho chingumuwovya kuti wasinthi? Iyu wangukamba kuti: “Kuŵerenga buku laku Jobu kungundiwovya ukongwa. Nge mo Yehova wanguwovye Jobu kuti waje pa chimangu ndi anyaki atatu, nani wangandiwovya kuti ndije pa chimangu ndi ŵara mumpingu!”​—Jobu 42:7-9.

Asani mungusankha kuti muleki kuteŵete nge muliska wa mbereri zaku Chiuta, mungachita umampha kujifumba chifukwa cho mukuleke. Kumbi chenga chifukwa chakuti mungukumana ndi masuzgu nganandi pa umoyu winu? Kumbi mungwamba kuwona kuti vinthu vinyaki vakukhumbika ukongwa kuluska udindu? Kumbi munguguŵa ndi anyinu wo nawu mbambula kufikapu? Mwemosi mo vingaŵiya, mutenere kukumbuka kuti pa nyengu yo mwenga pa udindu nge mura, mwaŵawovyanga ukongwa abali ŵinu. Nkhani zo mwakambanga, chakuwoniyapu chinu chamampha kweniso maulendu nga uliska, vaŵachiskanga ukongwa abali ŵinu kuti akunthiyengepu mayeseru. Yehova wakondwanga ukongwa chifukwa cha uteŵeti wo mwachitanga mwakugomezgeka.​—Nthanthi 27:11.

Yehova wawovya anthurumi kuti aje so ndi likondwa ndipuso khumbu lakuti aje so ndi udindu mumpingu. Asani mukuleka kuteŵete nge mura pamwenga mukusiskika pa udindu, mukhoza kuja so ‘mura mumpingu.’ (1 Tim. 3:1) Paulo ‘wanguleka cha kuromba’ kuti Akhristu a ku Kolose aziŵi vinandi vakukwaskana ndi khumbu laku Chiuta kuti ‘ayendengi kwakwenere Ambuya, ndi kwakuŵakondweska.’ (Ŵakol. 1:9, 10) Asani mwaja so mura, mupemphengi Yehova kuti wakupaskeni nthazi, wakuwovyeni kukunthiyapu ndipuso kuti mujengi ndi likondwa. M’mazuŵa nganu ngakumaliya, ŵanthu aku Chiuta akhumbika kuchiskika ndi ŵara achanju. Kumbi mwe akunozgeka kuchiska abali ŵinu?