Fumbu ili ndakukhumbika nadi, ukongwa kwaku wo awolu ŵawu pamwenga arumu ŵawu wo aŵayanjanga akutayika. Ŵanthu aviyo atenere kuti akhumbisiska kuziweriyana ndi awolu ŵawu pamwenga arumu ŵawu wo azamuyuskika m’charu chifya. Munthurumi munyaki yo muwolu waki wakutayika wangukamba kuti: “Ini ndi muwolu wangu takhumbanga cha kuti nthengwa yidu yimali. Takhumbisiskanga kuja pa nthengwa kwamuyaya. Ndeche kuŵanaŵana viyo mpaka sonu.” Kumbi pe chifukwa chakuvwika chakugomezge kuti ŵanthu wo ayuskika azamuto pamwenga kuyirwa? Titiziŵa cha.

Kwa vyaka vinandi, mabuku ngidu ngakamba kuti mazu ngo Yesu wangukamba ngakukwaskana ndi chiyuka ndipuso kuto pamwenga kuyirwa ngatenere kuti ngakamba za ŵanthu wo azamuyuskikiya pacharu chapasi kuti azamuto cha pamwenga kuyirwa. a (Mat. 22:29, 30; Marko 12:24, 25; Luka 20:34-36) Chinanga kuti tisimikizga cha, kumbi penapa Yesu wang’anamuwanga ŵanthu wo ayuskikiya kuchanya? Tiyeni tikambiskani vo iyu wangukamba.

Ŵanaŵaniyani mo nkhani iyi yenge. (Ŵerengani Luka 20:27-33.) Asaduki agomezganga kuti kulivi chiyuka. Mwaviyo, akhumbanga kumuyesa Yesu ndipu angumufumba fumbu lakukwaskana ndi chiyuka kweniso ŵanthu wo atorananga pa ulamu. b Yesu wanguŵamuka kuti: “Ŵana a m’nyengu yinu ato ndi kuyirwa, kweni wo ayeseka kuti mbakwenere kuzilonde umoyu pa nyengu yo kweniso kuziyuskika azamuto cha pamwenga kuyirwa. Ndipu yiwu azamukufwa so cha chifukwa ŵenge angelu ndipuso mbana aku Chiuta mwakuja ŵana a chiyuka.”—Luka 20:34-36, NW.

Nchifukwa wuli mabuku ngidu ngakambanga kuti Yesu wang’anamuwanga ŵanthu wo azamuyuskikiya pacharu chapasi? Ivi venga viyo chifukwa cha vifukwa viŵi. Chakwamba, vinguwoneka kuti Asaduki atenere kuti akambanga za ŵanthu wo azamuyuskikiya pacharu chapasi ndipu awonanga kuti Yesu waŵamukengi umampha. Chakumaliya, Yesu wangumaliza kuŵamuka mwakukamba zaku Abrahamu, Isaki ndi Yakobe apapi ŵidu akugomezgeka wo azamuyuskikiya pacharu chapasi.​—Luka 20:37, 38.

Kweni vikhoza so kuchitika kuti Yesu wakambanga wo ayuskikiya kuchanya. Nchifukwa wuli tikamba viyo? Tiyeni tikambiskani fundu zikuluzikulu ziŵi zo iyu wangukamba.

Fundu yakwamba: “Wo ayeseka kuti mbakwenere . . . kuziyuskika.” Akhristu akusankhika wo mbakugomezgeka ndiwu ‘atenere Ufumu waku Chiuta.’ (2 Ŵat. 1:5, 11) Chiuta watiŵawona kuti mbarunji chifukwa cha sembi yaku Yesu ndipu asani ŵafwa aŵavi mulandu. (Ŵar. 5:1, 18; 8:1) Yiwu akambika kuti ‘mbamwaŵi ndi akupaturika’ kweniso awoneka kuti mbakwenere kuyuskikiya kuchanya. (Chiv. 20:5, 6) Mwakupambana ndi ŵanthu yaŵa, wo azamuyuskikiya pacharu chapasi asazgiyapu so ndi “aziraurunji.” (Mac. 24:15)  Kumbi yaŵa nawu angakambika kuti ‘mbakwenere’ chiyuka?

Fundu yachiŵi: “Yiwu azamukufwa so cha.” Mabayibolo nganyaki ngafwatuliya mazu ngenanga kuti “yiwu angafwa so cha” ndipuso kuti “nyifwa yilivi nthazi paku yiwu.” Mwaviyo, Akhristu akusankhika wo atufwa ŵeche akugomezgeka, ayuskikiya kuchanya ndipu apaskika umoyu wo ungafwa cha pamwenga kunangika. (1 Ŵakor. 15:53, 54) Nyifwa yilivi so nthazi paku yiwu. c

Pa vo takambiskana, kumbi tingakamba kuti wuli? Vingachitika kuti mazu ngo Yesu wangukamba ngakukwaskana ndi kutorana kweniso chiyuka, ngang’anamuwa ŵanthu wo ayuskikiya kuchanya. Asani ndi viyo, ndikuti mazu ngaki ngenanga ngatitikambiya vinandi vakukwaskana ndi wo ayuskikiya kuchanya: Yiwu ato cha pamwenga kuyirwa, angafwa cha kweniso munthowa yinyaki ŵenge angelu. Fundu zenizi zizisa so mafumbu nganandi.

Fumbu lakwamba: Nchifukwa wuli Yesu wakambanga zaku wo ayuskikiya kuchanya po wamukanga Asaduki wo atenere kuti akambanga za ŵanthu wo azamuyuskikiya pacharu chapasi? Kanandi, Yesu wamukanga wo amususkanga mwakukoliyana ndi vo aŵanaŵananga cha. Mwakuyeruzgiyapu, Ayuda ŵati amukambiya kuti waŵapaski chisimikizgu, iyu wanguŵamuka kuti: “Bwanganduwani kasopi uyu, ndipu mu mazuŵa ngatatu ndimuyuskengi.” Yesu watenere kuti wanguziŵa kuti aŵanaŵanengi za kasopi chayiyu kweni “iyu wakambanga va kasopi wa liŵavu laki.” (Yoh. 2:18-21) Panyaki Yesu wanguwona kuti wakhumbika cha kuŵamuka Asaduki achinyengu ŵenaŵa wo agomezganga kuti kulivi chiyuka ndipuso kuti kulivi angelu. (Nthanthi 23:9; Mat. 7:6; Mac. 23:8) M’malu mwaki, iyu wakhumbanga kukonkhoske akusambira ŵaki akugomezgeka fundu zauneneska zakukwaskana ndi ŵanthu wo aluta kuchanya pakuziŵa kuti nawu akhoza kuzija ndi mwaŵi wenuwu.

Fumbu lachiŵi: Nchifukwa wuli m’mazu ngaki ngakumaliya, Yesu wanguzumbuwa Abrahamu, Isaki kweniso Yakobe wo azamuyuskikiya pacharu chapasi? (Ŵerengani Mateyu 22:31, 32.) Wonani kuti Yesu wechendakambi za ŵanthu ŵenaŵa, wangukamba mazu ngakuti “kwakulingana ndi chiyuka.” Panyaki mazu yanga ngalongo kuti Yesu wakhumbanga kuleka kukamba za ŵanthu wo aluta kuchanya ndi kwamba kukonkhoska za ŵanthu wo azamuja pacharu chapasi. Pavuli paki, wangugwiriskiya nchitu mazu ngo Yehova wangukambiya Mosese ngo Asaduki angagomezganga. Iyu wanguchita venivi chifukwa wakhumba kupereka ukaboni wakuti Yehova we ndi chilatu chakuziyuska ŵanthu kuti azije pacharu chapasi.​—Chit. 3:1-6.

Fumbu lachitatu: Asani mazu nga pa Luka 20:34-36 ngakamba za ŵanthu wo aluta kuchanya, kumbi ivi ving’anamuwa kuti ŵanthu wo azamuyuskika kuti aje pacharu chapasi azamuto pamwenga kuyirwa? Mazu Ngaku Chiuta ngamuka mwakudunjika cha fumbu lenili. Asani Yesu wakambanga nadi ŵanthu wo ayuskikiya kuchanya ndikuti mazu ngaki ngakamba chechosi cha chakukwaskana ndi wo azamuja pacharu chapasi.

Kweni sonu tiziŵa ŵaka kuti Mazu Ngaku Chiuta ngakamba kuti nthengwa yimala asani munyaki wafwa. Mwaviyo, yo waja wangajimbanga mulandu cha asani wakhumba kuto pamwenga kuyirwa. Ichi nchakusankha cha munthu ndipu asani wakhumba munthu wakutorana nayu, tingamususkanga cha.​—Ŵar. 7:2, 3; 1 Ŵakor. 7:39.

Mphakuvwika kuja ndi mafumbu nganandi ngakukwaskana ndi vo vazamuchitika pacharu chapasi. M’malu mwakusachizganga ŵaka kwamuka kwa mafumbu ngenanga, tikhumbika ŵaka kulindizga kuti tiziwoni vo vazamuchitika. Kweni tikayika cha kuti ŵanthu akuvwiya Yehova azamuja ndi umoyu walikondwa chifukwa iyu wazakuŵapaska vo akhumba.​—Sumu 145:16.