MLENGI widu wakutipaska wanangwa wakusankha tija vakuchita. Iyu watumbika ŵanthu wo agwiriskiya nchitu wanangwa wenuwu kuti kusopa kwa uneneska kuluti panthazi. Kweniso, watumbika wo atesesa kuwovya kuti zina laki litowi ndipuso kuti khumbu laki lifiskiki. Yehova wakhumba cha kuti timuvwiyengi chifukwa cha mantha. M’malu mwaki, iyu wakhumba kuti tijiperekengi kwaku iyu chifukwa chakuti titimuyanja ukongwa ndipuso tiwonga vo watitichitiya.

Mwakuyeruzgiyapu, pa nyengu yo Ayisraele ŵenga mubozwa ku Sinai, Yehova wanguŵakambiya kuti azengi nyumba yakusopiyamu. Iyu wangukamba kuti: “Tonimu mukati mwinu mpasku ku Ambuya; weyosi wakuŵa ndi mtima wakupaska, wazi ndi chaulera cha Ambuya.” (Chit. 35:5) Munthu weyosi wachiyisraele wakhumbikanga kupereka vo wangafiska mwambula kuphwere kanthu kuti ndi vinthu wuli pamwenga vinandi wuli. Venivi vawovyanga kuti chilatu chaku Chiuta chifiskiki. Kumbi ŵanthu anguchita wuli?

“Yosi yo mtima waki ungumutuntha [pamwenga kuti ungumutuma] ndi yosi yo mzimu waki ungumusongono,” wangupereka vo wenga navu “ndi mtima wakukhumba.” Anthurumi ndi anthukazi azanga kuzipereka ku nchitu yaku Yehova vinthu nge: aphini, ndeŵereŵi, mpheti, golidi, siliva, mkuŵa, salu zabulu, salu zakufyuŵala, salu ziyera, salu zakuwolofoka, weya wa mbuzi, vikopa va mbereri vakubiza mu utotu uyera, vikopa va akatumbwi, mathabwa nga mlombwa, mya yakuzirwa ndi mafuta. Vinthu vo vinguperekeka “venga vakukwana kuchita nchitu yosi, ndi vingujapu.”​—Chit. 35:21-24, 27-29; 36:7.

Yehova wakondwanga ukongwa chifukwa chakuti ŵanthu aperekanga vinthu vinandi cha kweni chifukwa aperekanga ndi mtima wosi kuti awovyi kusopa kwa uneneska. Yiwu agwiriskiyanga so nchitu nyengu yawu ndipuso nthazi zawu kuti agwiri nchitu yeniyi. Nkhani iyi yilutirizga kuti: “Anthukazi wosi wo ŵenga akuziŵa, anguwomba [pamwenga kuti alukanga vinthu] ndi manja ngawu. . . . Anthukazi wosi azeru anguwomba weya wa mbuzi.” Kweniso, Yehova wangupaska Bezalele “kuziŵa, ndi kuwamu ndi chinjeru, ndi umisiri wosi.” Yehova wanguwovya Bezalele ndi Oholiaba kuti aje ndi lusu lakugwiriya nchitu yosi yo akhumbikanga kuchita.​—Chit. 35:25, 26, 30-35.

Yehova wati wapempha Ayisraele kuti apereki vinthu, wenga ndi chigomezgu chakuti weyosi waperekengi ndi mtima wosi kuti wawovyi pa nchitu yakuzenga nyumba yakusopiyamu. Pavuli paki, Yehova wanguŵatumbika ukongwa wosi wo aperekanga ndi mtima wosi ndipu waŵalongozganga kweniso waŵawovyanga kuti ajengi akukondwa. Mwaviyo, Yehova wangulongo kuti watumbika ateŵeti ŵaki akujipereka kweniso wawonesesa kuti asoŵa vinthu cha vakugwiriya nchitu pamwenga ŵanthu alusu wo angawovya kuti khumbu laki lifiskiki. (Sumu 34:9) Yehova wakutumbikeningi ukongwa asani mutimuteŵete ndi mtima wakujipereka.