1. Nchifukwa wuli tikhumbika kuja pa ubwezi wakukho ndi Yehova?

 KUMBI mukujipatuliya ndipuso mukubatizika ndi kuja Kaboni waku Yehova? Asani ndi viyo, ndikuti mwe pa ubwezi ndi Chiuta ndipu uwu ndi mwaŵi ukulu ukongwa. Kweni ubwezi winu ungatimbanyizgika chifukwa te m’charu chaku Satana kweniso te ambula kufikapu. Ivi ndivu Akhristu wosi akumana navu. Ndichu chifukwa chaki, tikhumbika kuja pa ubwezi wakukho ndi Yehova.

2. (a) Kumbi ubwezi nchinthu wuli? (Wonani mazu ngamumphata.) (b) Kumbi tingachita wuli kuti ubwezi widu ndi Yehova uje wakukho?

² Kumbi ubwezi winu ndi Yehova we wuli? Kumbi mungayanja kuja pa ubwezi wakukho ndi Yehova? Lemba la Yakobe 4:8 likamba vo mutenere kuchita. Ilu likamba kuti: “Ndereni kufupi kwaku Chiuta, ndipu wanderengi kufupi kwinu.” Wonani kuti lemba ili likamba vinthu viŵi. a Chakwamba, titenere kuja pa ubwezi ndi Chiuta ndipu chachiŵi, nayu wajengi so nasi pa ubwezi. Asani tichita ivi nyengu zosi, ubwezi widu ndi Yehova utamba kukho  kamanakamana. Pavuli paki, tingayamba kuwona kuti te pa ubwezi nadi ndi Chiuta. Tingaja ndi chivwanu nge cho Yesu wenga nachu. Iyu wangukamba kuti: ‘Wakundituma ngwakuneneska, . . . Ini nditumziŵa.’ (Yoh. 7:28, 29) Kumbi ndi vinthu wuli vo mungachita kuti muje pa ubwezi wakukho ndi Yehova?

3. Kumbi mungakambiskana wuli ndi Yehova?

³ Kukambiskana nyengu zosi ndi Yehova nchinthu chakukhumbika ukongwa kuti tije nayu paubwezi wakukho. Kumbi mungakambiskana wuli ndi Yehova? Kumbi muchita wuli asani mukhumba kukambiskana ndi bwezi linu lo lija kutali? Tikayika cha kuti mulemberana makalata ndi kumbirana foni kaŵikaŵi. Mwakuyana ŵaka, namwi mukambiskana ndi Yehova asani muromba kwaku iyu kaŵikaŵi. (Ŵerengani Sumu 142:2.) Kweniso, muzomerezga kuti Yehova wakambiskani namwi asani nyengu zosi muŵerenga Mazu ngaki ndi kulunguruka. (Ŵerengani Yesaya 30:20, 21.) Sonu, tiyeni tikambiskani mo vinthu viŵi venivi vingatiwovye kuti ubwezi widu ndi Yehova uje wakukho vo vingachitiska kuti tiwonengi kuti te pa ubwezi nadi ndi Chiuta.

4, 5. Kumbi Yehova walongoro namwi wuli kuporote m’Mazu ngaki? Kambani chakuwoniyapu.

⁴ Tigomezga kuti namwi muzomerezga kuti m’Bayibolo mwe uthenga waku Chiuta wo ukwaska ŵanthu wosi. Kweni kumbi Bayibolo likamba so mo imwi mungajaliya pa ubwezi ndi Yehova? Likamba nadi viyo. Nanga mungachita wuli? Asani muŵerenga ndi kusambira Bayibolo kaŵikaŵi, muŵanaŵaniyengi vo likamba ndi kuwona mo mungavigwiriskiya nchitu. Asani muchita viyo, ndikuti muzomerezga Yehova kuti walongorongi namwi kuporote m’Mazu ngaki. Ivi vingachitiska kuti muyambi kuja nayu pa ubwezi wakukho.—Ŵah. 4:12; Yak. 1:23-25.

⁵ Mwakuyeruzgiyapu, ŵerengani ndi kulunguruka mazu ngaku Yesu ngakuti, “mungajiŵikiya mbiku panupasi cha.” Asani muwona kuti muŵika panthazi vinthu va Ufumu ziŵani kuti Yehova wakondwa namwi. Kweni asani muwona kuti mukhumbika kusintha vinthu vinyaki pa umoyu winu kuti muŵikengi panthazi vinthu va Ufumu ndikuti Yehova wakuziŵiskani chigaŵa cho mutenere kugwiriyapu nchitu kuti muje nayu pa ubwezi.​—Mat. 6:19, 20.

6, 7. (a) Kumbi kusambira Bayibolo kutitiwovya wuli kuti tije pa ubwezi wakukho ndi Yehova? (b) Kumbi titenere kuja ndi chilatu wuli asani tisambira Bayibolo pakutija?

⁶ Kusambira Malemba kutitiwovya ŵaka kuziŵa  vo tikhumbika kusintha cha, kweni kutitiwovya so kuti timuwongengi ukongwa Yehova chifukwa chakuti watitiyanja ndipu ivi vichitiska kuti nasi timuyanjengi ukongwa. Asani titimuyanja ukongwa Chiuta, nayu watitiyanja so ukongwa. Ivi vitovya kuti ubwezi widu ndi iyu uje wakukho.​—Ŵerengani 1 Ŵakorinte 8:3.

⁷ Kuti tije pa ubwezi wakukho ndi Yehova tikhumbika kusambira Mazu ngaki ndi chilatu chamampha. Mwakuyeruzgiyapu, lemba la Yohane 17:3 likamba kuti: ‘Ndipu chenichi mbumoyu wamuyaya, kuti ŵanthu ŵakuziŵeni imwi, Chiuta yija muneneska ndi so Yesu Khristu mweniyo mungutuma.’ Mwaviyo, tikhumbika kusambira ŵaka cha kweni titenere so ‘kumuziŵa’ umampha Yehova.​—Ŵerengani Chituwa 33:13; Sumu 25:4.

8. (a) Nge mo lemba la 2 Ŵakaronga 15:1-5 likambiya, kumbi nchinthu wuli cho tingayamba kuŵanaŵana chifukwa cha mo Yehova wanguchitiya vinthu ndi Fumu Azariya? (b) Kumbi kumuziŵa umampha Yehova kungatovya wuli kuti tilekengi kukayikiya vo wachita?

⁸ Kuja pa ubwezi wakukho ndi Yehova kutiwovyengi kuti tileki kutimbanyizgika asani tizizwa ndi mo nkhani zinyaki za m’Bayibolo zikwende. Mwakuyeruzgiyapu, kumbi mutuvwa wuli asani muwona mo Yehova wanguchitiya ndi Fumu ya Yuda, Azariya? (2 Ŵaka. 15:1-5) Chinanga kuti “ŵanthu aperekanga mbwenu sembi ndi kocha vachema pa malu nga pachanya,” Azariya “wanguchita cho chenga chakurunjika mu masu” ngaku Yehova. Kweni pavuli paki, Yehova wangulanga Azariya ndipu “wanguŵa wamakhati mpaka nyifwa yaki.” Nchifukwa wuli wanguchita viyo? Nkhani iyi yikamba cha. Sonu kumbi tikhumbika kuŵanaŵana kuti Yehova wangulanga Azariya kwambula chifukwa? Asani tiziŵa mo Yehova wachitiya vinthu, tingaŵanaŵana viyo cha. Ivi vingasazgapu kuziŵa kuti nyengu zosi Yehova walanga “mwakwenere.” (Yer. 30:11) Kuziŵa venivi kutitovya kugomezga kuti cheruzgu chaku Yehova chenga cha urunji, chinanga kuti tiziŵa cha chifukwa cho Iyu wangulangiya Azariya.

9. Kumbi ndi fundu nizi zo zilongo chifukwa cho Yehova wangulangiya Azariya ndi makhati?

⁹ Pa nkhani iyi, m’Bayibolo mwe so fundu zinyaki zo zingatovya kuziŵa chifukwa cho Yehova wangulangiya Azariya. Fumu Azariya yadanikanga so kuti Fumu Uziya. (2 Ŵaka. 15:7, 32) Pa nkhani yinyaki yo ye pa 2 Mikoka 26:3-5, 16-21, tisambirapu kuti chinanga kuti Uziya wanguchita vinthu vamampha pa masu ngaku Yehova kweni pavuli paki, “wanguŵa wakujikuzga mpaka ku phalanyiku laki.” Iyu wenga ndi mbunu ndipu wangwamba kuchita nchitu zo asembi achitanga. Asembi 81 angumususka ndipu anguyesesa kumukanizga. Kumbi Uziya wanguchita wuli? Iyu wangulongo kuti wenga wakujikuzga ukongwa ndipu ‘wanguŵakaripiya.’ Ndichu chifukwa chaki, Yehova wangumulanga ndi makhati!

10. Nchifukwa wuli tikhumbika cha kuti nyengu zosi tiziŵengi chifukwa cho Yehova wachitiya vinthu, nanga tingachita wuli kuti tigomezgengi kuti Yehova wachita vinthu mwaurunji?

¹⁰ Kuti tivwisi umampha nkhani iyi, tiyeruzgiyi kuti Mazu Ngaku Chiuta ngakamba cha chifukwa cho nkhani yinyaki yikuchitikiya. Kumbi mungayamba kukayikiya kuti Chiuta wachita vinthu mwambula urunji? Pamwenga mungayamba kuŵanaŵana kuti Bayibolo le ndi fundu zakukwana zo zilongo kuti nyengu zosi Yehova wachita vinthu vamampha ndipu ndiyu watitiwovya kuziŵa chamampha ndi chiheni? (Mar. 32:4) Asani tingamuziŵa umampha Yehova, timuyanjengi kweniso timuwongengi ukongwa mwakuti tingakhumba so cha kuziŵa chifukwa cho wachitiya chinthu chechosi. Tingalongo kuti titimuwonga asani tisambira ndi kulunguruka Mazu ngaki. (Sumu 77:12, 13) Asani tichita viyo, ubwezi widu ndi Yehova ujengi wakukho ukongwa.

11-13. Kumbi muziŵa wuli kuti Yehova watuvwa marombu nginu? (Wonani chithuzi cho che papeji 19.)

¹¹ Asani tiromba tija pa ubwezi ndi Yehova. Kweniso, titimuthamika, titimuwonga ndipuso titimupempha kuti watilongozgengi. (Sumu 32:8) Kweni kuti muziŵi kuti mwe nadi pa ubwezi ndi Yehova, mutenere kusimikizga kuti watuvwa marombu nginu.

¹² Ŵanthu anyaki agomezga kuti rombu litovya ŵaka kuti munthu wavwengi umampha m’mtima. Yiwu akamba kuti asani uŵanaŵana kuti rombu laku lamukika, chija chifukwa chakuti ukonkhoska vo uŵanaŵana, uziŵa suzgu lo wenalu ndipuso uyesesa kusaniya nthowa yakumalisiya suzgu lo. Vinthu venivi vamampha nadi, kweni mungaziŵa wuli kuti Yehova watuvwa marombu nginu ngakutuliya pasi pa mtima?

¹³ Ŵanaŵaniyani nkhani iyi: Wechendazi pacharu chapasi, Yesu wawonanga Yehova wachimuka marombu nga ateŵeti Ŵaki. Pa nyengu yo wachitanga uteŵeti waki pacharu chapasi, Yesu warombanga kwa Awiski kuti waŵakambiyi maŵanaŵanu ngaki. Ndipu nyengu zinyaki, Yesu warombanga usiku wosi. Kumbi iyu watingi wachitengi nadi venivi asani waŵanaŵananga kuti Yehova wavwanga cha marombu ngaki? (Luka 6:12; 22:40-46) Kumbi iyu watingi waŵakambiyengi akusambira ŵaki kuti arombengi asani waŵanaŵananga kuti rombu litovya ŵaka kuti munthu wavwengi umampha? Viwoneke limu kuti Yesu waziŵanga kuti asani munthu waromba ndikuti walongoro nadi ndi Yehova. Nyengu yinyaki, Yesu wangukamba kuti: “Ada, ndikuwongani kuti mwandivwa. Ini ndaziŵanga kuti nyengu zosi mutindivwa.” Nasi tingaja ndi chigomezgu chakuti Yehova wamuka “marombu.”​—Yoh. 11:41, 42; Sumu 65:2.

14, 15. (a) Kumbi kuzumbuwa vinthu chayivu vo tikhumba asani tiromba kutitovya wuli? (b) Kumbi rombu lingumuwovya wuli mzichi munyaki kuti ubwezi waki ndi Yehova ukho?

¹⁴ Asani muzumbuwa vinthu chayivu vo mukhumba mu rombu, vikuwovyeningi kuziŵa kuti Yehova wamuka marombu chinanga kuti nyengu zinyaki mungaziŵa cha kuti wamuka. Kweniso, mungasimikizga kuti Yehova waliku nadi asani wamuka marombu nginu. Ndipu  ubwezi winu ukho ukongwa asani mutimukambiya vo ve m’mtima winu.

¹⁵ Ŵanaŵaniyani nkhani yaku Kathy. b Iyu wakondwanga cha ndi nchitu yakupharazga chinanga kuti nyengu zosi waserenga mu uteŵeti. Iyu wangukamba kuti: “Ndakondwanga cha ndi uteŵeti wakumunda. Kukamba uneneska, ndawuyanjanga cha chinanga nkhamanavi. Ndati ndato peshoni pa nchitu yo ndagwiranga, mura munyaki m’mpingu wangundikambiya kuti ndingafiska kuchita upayiniya wa nyengu zosi ndipu wangundipasa fomu. Ndinguŵanaŵana kuti ndiyambi kuchita upayiniya, kweni ndingwamba so kuromba zuŵa lelosi kuti Yehova wandiwovyi kuti ndiwuyanjengi ukongwa uteŵeti wakumunda.” Kumbi Yehova wangumuka marombu ngaki? Kathy wangukamba kuti: “Ndachita upayiniya kwa vyaka vitatu sonu. Chifukwa chakuti ndipharazga kwa nyengu yitali ndipuso ndisambira kwa azichi anyaki, lusu langu mu uteŵeti laluta panthazi. Mazuŵa nganu nditiwuyanja ukongwa uteŵeti wakumunda. Kweniso, ubwezi wangu ndi Yehova wakho ukongwa kuluska kali.” Kukamba uneneska, rombu lingumuwovya ukongwa Kathy kuziŵa kuti we pa ubwezi nadi wakukho ndi Yehova.

16, 17. (a) Kumbi titenere kuchitanji kuti tilutirizgi kuja pa ubwezi wakukho ndi Yehova? (b) Kumbi nkhani yakulondopu yimukengi fumbu nili?

¹⁶ Tikhumbika kuja pa ubwezi wakukho ndi Yehova kwa umoyu widu wosi. Titenere kuyesesa kuja pa ubwezi ndi Chiuta asani tikhumba kuti nayu waje nasi pa ubwezi. Mwaviyo, tiyeni tilutirizgi kulongoro ndi Chiuta nyengu zosi mwa kusambira Bayibolo ndipuso kuromba. Ndipu kuja pa ubwezi wakukho ndi Yehova kutiwovyengi kuti timalani ndi masuzgu ngo tingakumana nangu.

¹⁷ Nyengu zinyaki, tingasuzgika maŵanaŵanu asani tiwona kuti masuzgu ngidu ngamala cha chinanga kuti tiromba kutuliya pasi pa mtima. Ivi vingachitiska kuti tileki kugomezga Yehova. Kweniso tingayamba kukayikiya asani Yehova watuvwa nadi marombu ngidu, pamwenga asani iyu wawona kuti we nasi pa ubwezi. Kumbi tingamalana wuli ndi masuzgu ngenanga ndi chigomezgu chakuti ubwezi widu ndi Chiuta wulipu nadi? Nkhani yakulondopu, yimukengi fumbu lenili.