1. (a) Nchifukwa wuli kulimbana ndi Satana nkhwakukhumbika ukongwa sonu? (b) Kumbi tiziŵa wuli kuti tingamupunda Satana?

 SATANA walimbana ndi Akhristu akusankhika ndipuso a “mbereri zinyaki.” (Yoh. 10:16) Iyu wakhumba kuti wamezi ateŵeti aku Yehova anandi pa nyengu yimanavi yo waja nayu. (Ŵerengani Chivumbuzi 12:9, 12.) Kumbi Satana tingamupunda? Hinya! Bayibolo likamba kuti: “Mikiranani ndi Diabolo yo, ndipu wathaŵengi imwi.”​—Yak. 4:7.

2, 3. (a) Kumbi fundu yakuti Satana kulivi yitimuwovya wuli kuti wafiski vilatu vaki? (b) Kumbi muziŵa wuli kuti Satana waliku?

² Ŵanthu anandi awona kuti Satana kulivi. Yiwu awona kuti nkhani zo zisanirika m’mabuku ndi m’mavidiyo zakukwaskana ndi Satana ndi nthanu waka. Ŵanthu aviyo awona kuti munthu yo we ndi zeru wangagomezga cha kuti kwe angelu aheni. Kumbi muŵanaŵana kuti Satana ndi angelu ŵaki adandawula asani awona kuti ŵanthu anandi agomezga viyo? Iyu watenere kuti wadandawula cha! Ndipu nkhwambula kusuzga kuti Satana wabulumutizgi ŵanthu wo agomezga kuti iyu kulivi. (2 Ŵakor. 4:4) Satana wachitiska kuti ŵanthu agomezgengi kuti iyu kulivi ndipu iyi ndiyu nthowa yimoza yo wagwiriskiya nchitu kuti walandizgi ŵanthu.

 ³ Nge ateŵeti aku Yehova, tilandizgika cha ndi fundu zaboza zaku Satana. Tiziŵa kuti Diabolo waliku ndipu ndiyu wangulongoro ndi Eva kuporote m’njoka. (Chiy. 3:1-5) Satana wangunyoza Yehova pa nkhani yaku Jobu. (Jobu 1:9-12) Kweniso, ndi Satana mwenuyu yo wanguyesa Yesu. (Mat. 4:1-10) Ndipu Ufumu waku Chiuta wati wayamba kuwusa mu 1914, iyu wangwamba “kurwana” ndi Akhristu akusankhika wo ŵenga pacharu chapasi. (Chiv. 12:17) Mazuŵa nganu, Satana walutirizga kuchita nkhondu ndi Akhristu a 144,000 ndipuso a mbereri zinyaki ndi chilatu chakuti aleki kugomezgeka. Kuti tipundi nkhondu iyi, tikhumbika kumikirana ndi Satana ndipuso kulutirizga kuja ndi chivwanu chakukho. Nkhani iyi yikonkhoskengi vinthu vitatu vo vingatiwovya kuti tipundi Satana.

4. Kumbi Satana wangulongo wuli kuti ngwakujikuzga ukongwa?

⁴ Satana ngwakujikuzga ukongwa. Kukamba uneneska, iyu ngwakujikuzga nadi kweniso ngwakudelera ukongwa chifukwa wangususka muwusu waku Yehova ndi kujiwonesa nge kuti wayanana ndi Chiuta. Mwaviyo, nthowa yimoza yo tingapundiya Satana nkhuleka kujikuzga kweniso kuyesesa kuja akujiyuyuwa. (Ŵerengani 1 Petro 5:5.) Kumbi kujikuzga kung’anamuwanji? Kumbi kujikuzga nkhuheni nyengu zosi?

5, 6. (a) Kumbi kujikuzga nkhuheni nyengu zosi? Konkhoskani. (b) Kumbi nkhujikuzga nunkhu ko nkhuheni, nanga ndi vakuwoniyapu va m’Malemba nivi vo vilongo uheni wakuja ndi jalidu lenili?

⁵ Dikishonale yinyaki yikamba kuti kujikuzga kung’anamuwa “kujipaska ulemu” kweniso “kukhorwa ndi vo we navu chifukwa chakuti iwi pamwenga ŵanthu anyaki achita vinthu vamampha pamwenga ŵe ndi vinthu vamampha.” Kuchita viyo nkhuheni cha. Wakutumika Paulo wangukambiya mpingu wa ku Ŵatesalonika kuti: “Ifwi titijikuzga mwaku imwi mu mipingu yaku Chiuta chifukwa cha unkhunthiya winu ndi chivwanu chinu mu viŵembu vinu vosi ndi mu visuzgu vinu venivo muvwiyapu.” (2 Ŵat. 1:4) Mwaviyo, kukondwa ndi nchitu yo tachita kweniso vo anyaki achita kungatiwovya kuja ndi umoyu wamampha. Tikhumbika cha kuchita soni ndi banja lidu, mtundu widu pamwenga chigaŵa cho takuliya.​—Mac. 21:39.

⁶ Kweni kujikuzga kunyaki nkhuheni chifukwa kungachitiska kuti ŵanthu aleki kutiyanja ndipuso kungananga ubwezi widu ndi Yehova. Kujikuzga kwenuku kungachitiska kuti tikani ulongozgi wakukhumbika m’malu mwakuwulonde mwaulemu. (Sumu 141:5) Anyaki akamba kuti kujikuzga kwaviyo kung’anamuwa “kujiwona kuti ndiwi wapachanya ukongwa” pamwenga “we ndi zeru ukongwa kuluska anyaku ndipu uwona kuti anyaku mbakukhumbika cha.” Yehova watiŵatinkha ukongwa ŵanthu aviyo. (Ezek. 33:28; Amosi 6:8) Kweni Satana wakondwa ukongwa kuwona kuti ŵanthu atijikuzga viyo chifukwa ndivu nayu wachita. Iyu watenere kuti wangukondwa limu wati wawona kujikuzga kwaku Nimirode, Farao ndi Absalomu ndipu ŵanthu ŵenaŵa angukumana ndi masuzgu chifukwa cha jalidu lenili. (Chiy. 10:8, 9; Chit. 5:1, 2; 2 Sam. 15:4-6) Kaini nayu wangukumana ndi masuzgu chifukwa chakujikuzga. Chiuta wati wamupaska ulongozgi, iyu wanguchita mtafu ndipu wangukana kuvwiya Yehova. Ivi vinguchitiska kuti wakumani ndi masuzgu ngakulu.​—Chiy. 4:6-8.

7, 8. (a) Kumbi kusankhana mitundu kung’anamuwanji, nanga tingalongo wuli kuti tayamba kujikuzga? (b) Konkhoskani mo kujikuzga kungatimbanyizgiya chimangu m’mpingu.

⁷ Mazuŵa nganu, ŵanthu alongo jalidu lakujikuzga munthowa ziheni. Nyengu zinyaki, kujikuzga kuchitiska kuti ŵanthu asankhanengi mitundu. Dikishonale yinyaki yikamba kuti kusankhana mitundu kung’anamuwa “kutinkha  ŵanthu a mtundu unyaki” kweniso “kugomezga kuti ŵanthu a mtundu unyaki ŵe ndi mijalidu ndi malusu ngakupambana ndi ŵanthu a mtundu unyaki ndipu mbapachanya ukongwa kuluska anyaki.” Kusankhana mitundu kwachitiska kuti ŵanthu ayambanengi, achitengi nkhondu ndipuso kuti ŵanthu anandi afwengi.

⁸ Jalidu ili likhumbika cha m’mpingu wachikhristu. Kweni nyengu zinyaki, abali ndi azichi angayambana chifukwa cha kujikuzga. Ivi ndivu Akhristu anyaki a mu nyengu ya akutumika anguchita. Ndipu Yakobe wanguŵafumba kuti: “Nchine cho chichitiska mahomwa ndi nchine cho chichitiska mapindanu mukati mwinu?” (Yak. 4:1) Kukamba uneneska, kusankhana mitundu kweniso kujiŵikamu kungachitiska kuti tikambengi ndi kuchita vinthu vo vingaguŵiska anyaki. (Nthanthi 12:18) Ivi viwoneke limu kuti kujikuzga kungatimbanyizga chimangu m’mpingu.

9. Kumbi Bayibolo lititiwovya wuli kuti tileki sankhu kweniso kujikuzga kuheni? (Wonani chithuzi cho che papeji 14.)

⁹ Asani titijiwona kuti te apachanya ukongwa kuluska anyidu, tikhumbika kukumbuka kuti “weyosi mweniyo ngwakujikuzga ngwa ukazuzi ku Ambuya.” (Nthanthi 16:5) Titenere so kujisanda kuti tiziŵi mo tiwone ŵanthu amitundu yinyaki pamwenga a m’vyaru vinyaki. Asani te ndi jalidu lakusankhana mitundu kweniso kujikuzga tiziŵi kuti tisuska fundu yakuti Chiuta “wangwata ku ndopa zimoza mtundu wosi wa ŵanthu.” (Mac. 17:26) Fundu iyi yilongo kuti te mtundu umoza chifukwa tosi mpapi widu ndi Adamu. Mwaviyo, nkhuŵavi zeru kukamba kuti mtundu unyaki ngwapachanya kuluska unyaki. Maŵanaŵanu ngaviyo ngayanana ndi vo Satana wakhumba kuti Akhristu aleki kwanjana ndipuso kukoliyana. (Yoh. 13:35) Kuti timikirani ndi Satana ndi kupunda, tikhumbika kukana kujikuzga kosi kuheni.—Nthanthi 16:18.

10, 11. (a) Nchifukwa wuli kungaja kwambula kusuzga kwamba kwanja vinthu va m’charu? (b) Kumbi Demase wangulongo wuli kuti watanja vinthu va m’charu?

¹⁰ Satana ndi “muwusi wa charu ichi” ndipu charu chosi che munthazi yaki. (Yoh. 12:31; 1 Yoh. 5:19) Mwaviyo, vinthu vinandi m’charu ichi vikoliyana cha ndi fundu za m’Bayibolo. Chinanga kuti ndi vinthu vosi cha viheni kweni titenere kuziŵa kuti Satana wagwiriskiya nchitu vinthu venivi kuti tibudi pamwenga kuti tiviyanjengi ukongwa ndi kuleka kusopa Yehova.​—Ŵerengani 1 Yohane 2:15, 16.

¹¹ Akhristu anyaki a mu nyengu ya akutumika angwamba kwanja vinthu va m’charu. Mwakuyeruzgiyapu, Paulo wangulemba kuti: “Demase wandisiya, wati wanja mgonezi wasonu.” (2 Tim. 4:10) Bayibolo likamba cha vinthu chayivu vo Demase wangwanja vo vinguchitiska kuti waleki kwenda ndi Paulo. Panyaki Demase wangwamba kwanja ukongwa vinthu va m’charu m’malu mwakwanja Chiuta. Asani venga viyo, ndikuti Demase wangutaya mwaŵi wakuja ndi maudindu m’mpingu. Kumbi Demase watingi wasaniyengi vinthu vakukhumbika ukongwa kuruska vitumbiku vo Yehova watingi wamupaskengi asani wangwenda ndi Paulo?​—Nthanthi 10:22.

12. Kumbi ndi vinthu nivi vo vingalongo kuti tayamba kwanja “usambasi”?

¹² Nasi tingachita vakuyanana ndi vo Demase wanguchita. Nge Akhristu, tosi tikhumbika kusaniya vinthu vo vingawovya isi kweniso banja lidu. (1 Tim. 5:8) Yehova wakhumba kuti tijengi ndi umoyu wamampha. Ndichu chifukwa chaki wangupasa Adamu ndi Eva vinthu vamampha ukongwa. (Chiy. 2:9) Kweni Satana wangayamba kutinyenga kuti tiyambi kwaja ukongwa “usambasi.” (Mat. 13:22) Ŵanthu anandi aŵanaŵana kuti ndalama kweniso kuja ndi vinthu  vinandi va m’charu ichi ndivu vingaŵawovya kuja ndi likondwa. Maŵanaŵanu yanga ngaboza ndipu ngangachitiska kuti titayi mwaŵi ukulu ukongwa wakuja pa ubwezi ndi Yehova. Yesu wangutcheŵeska akumulondo kuti: “Palivi yumoza waziŵa kuteŵete ambuya ŵaŵi: chifukwa pamwenga wamtinkhengi yumoza, ndi wamwanjengi munyaki; pamwenga wajiperekengi ku yumoza, ndi wamtozengi munyaki. Kuti muziŵa kuteŵete Chiuta ndi chuma so cha.” (Mat. 6:24) Asani tayamba kwaja ukongwa Chuma, tilekengi kuteŵete Yehova ndipu ivi ndivu Satana wakhumba kuti tichiti. Mwaviyo, tingazomerezganga cha kuti ndalama pamwenga katundu vitimbanyizgi ubwezi widu ndi Yehova. Kuti tipundi Satana, tikhumbika cha kuŵika ukongwa mtima widu pa vinthu va charu.​—Ŵerengani 1 Timote 6:6-10.

13. Kumbi ŵanthu atiyiwona wuli nthengwa?

¹³ Ureŵi ndi nthowa yinyaki yo Satana wagwiriskiya nchitu kuti watimbanyizgi ubwezi widu ndi Yehova. Mazuŵa nganu, ŵanthu anandi awona kuti kugomezgeka m’banja nkhwakusuzga kweniso nkhwakali. Mwakuyeruzgiyapu, munthukazi munyaki wakutchuka wangukamba kuti: “Vingachitika cha kuti ŵanthu akutorana aje akugomezgeka. Ndipu ndiwona kuti kulivi munthu wakugomezgeka pamwenga yo wangakhumba kuchita viyo.” Munthurumi munyaki wangukamba so kuti: “Ndiziŵa cha asani tikhumbika nadi kuja ndi munthu yo tikutorana nayu kwa umoyu widu wosi.” Satana watenere kuti wakondwa ukongwa asani wawona kuti ŵanthu atumbika cha chawanangwa cha nthengwa cho Chiuta wakupereka. Diabolo wakhumba cha kuti ŵanthu atumbikengi nthengwa nge mo Chiuta wakhumbiya. Mwaviyo, kuti timikirani ndi Satana ndi kupunda, tikhumbika kuvwiya ulongozgi waku Chiuta wakukwaskana ndi nthengwa.

14, 15. Nchinthu wuli cho chingatiwovya kuti tileki kuchita ureŵi?

¹⁴ Kaya te pa nthengwa pamwenga cha titenere kuyesesa kukana mtundu wosi wa ureŵi. Kumbi kuchita ivi nkhupusu? Awa! Mwakuyeruzgiyapu, asani mwe achinyamata, mungavwa anyinu kusukulu achimalika kuti agonananga pamwenga atumiziyananga mauthenga, vithuzi pamwenga mavidiyo ngakukwaskana ndi nkhani za kugonana. Kuchita viyo nkhunanga ndipu m’vyaru vinyaki, kuyanana ŵaka ndi kugaŵa vithuzi va ŵana vakuyuska chiryokuryoku chakugonana. Bayibolo likamba kuti: “Yo ngwakureŵa walakwiya liŵavu laku yija.” (1 Ŵakor. 6:18) Ŵanthu asuzgika kweniso atufwa chifukwa cha matenda ngakuyambuzgiyana pakugonana. Ndipu achinyamata anandi wo akuchitapu ureŵi adandawula kuti angunanga ukongwa. Kweni vinthu vo ŵanthu anandi pa TV akamba vingachitiska kuti tigomezgengi kuti tingakumana ndi masuzgu cha asani tingaleka kuvwiya marangu ngaku Chiuta. Ivi vichitiska kuti ŵanthu anandi achitengi “ulakwi.”​—Ŵah. 3:13.

¹⁵ Kumbi mungachitanji asani muyeseka kuti muchiti ureŵi? Ziŵani vo vingachitiska kuti muchiti ureŵi. (Ŵar. 7:22, 23) Rombani kwaku Chiuta kuti wakupaskeni nthazi. (Ŵaf. 4:6, 7, 13) Mutenere kukhwecha vinthu vo vingachitiska kuti muchiti ureŵi. (Nthanthi 22:3) Ndipu mukanengi mwaliŵi mayeseru.​—Chiy. 39:12.

16. Kumbi Yesu wangukana wuli mayeseru ngaku Satana, nanga isi tisambiranjipu?

¹⁶ Yesu wangulongo chakuwoniyapu chamampha ukongwa cha mo tingakaniya mayeseru. Iyu wangupusisika cha ndi vo Satana wamulayizganga pamwenga kuŵanaŵaniya umampha ndi uheni waki. Kweni iyu wangumumuka mwaliŵi kuti: “Kwalembeka.” (Ŵerengani Mateyu 4:4-10.) Yesu wangaziŵanga umampha Mazu Ngaku Chiuta. Ivi vingumuwovya kuti wachitengepu kanthu mwaliŵi kweniso wagwiriskiyengi nchitu malemba asani  wakumana ndi mayeseru. Kuti timikirani ndi Satana ndi kupunda, tikhumbika cha kuchita chinthu chechosi cho chingachitiska kuti tichiti ureŵi.​—1 Ŵakor. 6:9, 10.

17, 18. (a) Kumbi ndi nthowa nizi zinyaki zo Satana wagwiriskiya nchitu, nanga nchifukwa wuli tikhumbika cha kuzizwa? (b) Kumbi ndi vinthu wuli vo vichitikiyengi Satana, nanga ivi vitikuchiskani wuli?

¹⁷ Kujikuzga, kwanja chuma kweniso ureŵi ndivu pe cha vo Satana wagwiriskiya nchitu kuti watimbanyizgi ŵanthu aku Chiuta. Pe nthowa zinandi zo iyu wagwiriskiya nchitu. Mwakuyeruzgiyapu, Akhristu anyaki asuskika ndi ŵanthu a m’banja lawu, anyozeka ndi ŵana anyawu kusukulu ndipuso muvyaru vinyaki boma litiŵakanizga kupharazga. Tizizwa cha asani tikumana ndi masuzgu ngenanga chifukwa Yesu wangutcheŵeska akusambira ŵaki kuti: “Muŵengi ŵakutinkhika ndi wosi pa chifukwa cha zina langu: kweni wakukunthiyapu mpaka umari, ndiyu wakataskikanga.”​—Mat. 10:22.

¹⁸ Kumbi tingamikirana wuli ndi Satana ndi kumupunda? Yesu wangukambiya akusambira ŵaki kuti: “Mu unkhunthiya winu mwanduliyengi mizimu yinu.” (Luka 21:19) Palivi cho ŵanthu angatichitiya cho chingazitondekeska Yehova kuti wazitipaski umoyu wamuyaya. Ndipu palivi so munthu yo wangachitiska kuti tileki kuja pa ubwezi ndi Chiuta pijapija asani tasankha kuchita viyo. (Ŵar. 8:38, 39) Asani ateŵeti aku Yehova afwa vilongo kuti Satana wapunda cha chifukwa Yehova wazakuŵayuska. (Yoh. 5:28, 29) Satana ndiyu walindizga masuzgu ngakulu. Asani ŵanthu aheni azibayika, Satana wazamuponyeka mu chizenji kwa vyaka 1,000. (Chiv. 20:1-3) Kukumaliya kwa Muwusu Waku Yesu wa Vyaka 1,000, Satana “wazamufwatulika ku kumangika kwaki” kwa kanyengu kamanavi kuti wayesi kakumaliya ŵanthu akufikapu. Pavuli paki, Diabolo wazamubayikiya limu. (Chiv. 20:7-10) Satana walivi chilindizga kweni yimwi mulindiza vinthu vamampha! Mwaviyo, lutirizgani kumikirana nayu ndipu jani ndi chigomezgu chakukho chifukwa mungamikirana ndi Satana ndipu mungapunda!