ANITA a wati wabatizika kuja Kaboni waku Yehova, murumu waki wangwamba kumususka ukongwa. Iyu wangukamba kuti: “Murumu wangu wandikanizganga kuluta ku maunganu kweniso kuzumbuwa zina laku Chiuta. Ndipu asani ndakamba ŵaka kuti Yehova, iyu wakwiyanga ukongwa.”

Anita wasuzgikanga so ukongwa kusambiza ŵana ŵaki vakukwaskana ndi Yehova. Iyu wangukamba kuti: “Murumu wangu wangundikaniza kusopa Yehova. Kwenga kwakusuzga kusambiza ŵana ŵangu pakweru kweniso kuluta nawu ku maunganu.”

Chakuwoniyapu chaku Anita chilongo kuti kususkika ndi ŵanthu a m’banja lidu kungayesa chigomezgu chidu. Chigomezgu chidu chingayeseka so asani tatama ukongwa, mwana pamwenga munthu yo tikutorana nawu watayika kweniso asani m’bali widu waleka kuteŵete Yehova. Sonu, kumbi ndi vinthu wuli vo vingatiwovya kuti tilutirizgi kuja akugomezgeka kwaku Yehova?

Kumbi mungachita wuli asani mwakumana ndi masuzgu ngaviyo? Wakutumika Paulo wangukamba kuti: “Mutenere kukunthiyapu.” (Ŵah. 10:36) Kweni ndi vinthu wuli vo vingakuwovyani kukunthiyapu?

Kuromba kwaku Chiuta kungatiwovya ukongwa kukunthiyapu masuzgu ngo tikumana nangu. Ŵanaŵaniyani chakuwoniyapu ichi. Zuŵa linyaki ndi musana, Ana wangukumana ndi suzgu likulu ukongwa. Murumu waki yo wanguja nayu kwa vyaka 30 wangutayika mwamabuchibuchi. Ana wangukamba kuti: “Pa nyengu iyi, murumu wangu wenga ndi vyaka 52 ndipu wanguweku cha ku ntchitu pa zuŵa ili.”

Kumbi Ana wangukunthiyapu wuli suzgu yeniyi? Chifukwa chakuti ntchitu yaki yakhumbanga kuŵikapu mtima ukongwa, iyu wanguweriyaku liŵi chifukwa wawonanga kuti yimuwovyengi kuluwaku nyifwa ya murumu waki. Kweni ivi vingumuwovya cha kuti waleki kusuzgika maŵanaŵanu. Iyu wangukamba kuti: “Ndarombanga kwaku Yehova kuti wandiwovyi kukunthiyapu nyifwa ya murumu wangu.” Kumbi Yehova wangumuka marombu ngaki? Iyu wagomezga kuti Yehova wangumuka. Iyu wangukamba kuti: “Chimangu cho Chiuta wapereka chingundiwovya ukongwa kuti ndileki kusuzgika maŵanaŵanu. Ndikayika cha kuti Yehova wazamuyuska murumu wangu m’charu chifya.”​—Ŵaf. 4:6, 7.

Yehova yo ‘wamuka marombu’ wakulayizga ateŵeti ŵaki kuti waŵawovyengi kuti alutirizgi kuja akugomezgeka kwaku iyu. (Sumu 65:2) Kumbi muwona kuti fundu iyi njakuchiska cha? Kumbi muwona kuti yingakuwovyani cha kukunthiyapu asani mwakumana ndi masuzgu?

Kwamba kali, Yehova watovya ateŵeti ŵaki kuziya mumpingu wachikhristu. Mwakuyeruzgiyapu, pa nyengu yo Akhristu a mumpingu wa ku Tesalonika angukumana ndi mayeseru, wakutumika Paulo wanguŵakambiya kuti “chiskanani, ndi zenganani, wuli ndimo muchitiya.” (1 Ŵat. 2:14; 5:11) Akhristu a ku Tesalonika ayanjananga kweniso awovyananga ukongwa ndipu ivi vinguŵawovya kukunthiyapu mayeseru. Yiwu nchakuwoniyapu chidu chamampha ukongwa mazuŵa nganu ndipu vo anguchita vititiwovya kuziŵa vo nasi tingachita kuti tikunthiyengepu.

Kwanjana ukongwa ndi Akhristu anyidu mumpingu kungatiwovya kuti tichitengi vinthu “vakuzengana.” (Ŵar. 14:19) Ndipu ivi vakukhumbika ukongwa pa nyengu ya suzgu. Paulo nayu wangukumana ndi masuzgu nganandi ndipu Yehova wangumuwovya kukunthiyapu. Nyengu zinyaki, Chiuta wamuchiskanga ukongwa kuporote mwa Akhristu anyaki. Mwakuyeruzgiyapu, pa nyengu yo Paulo watawuzganga Akhristu a mumpingu wa ku Kolose, wangukamba kuti: “Wosi ŵandiŵiya sangarusku.” (Ŵakol. 4:10, 11) Kukamba uneneska, yiwu angumuchiska  ukongwa Paulo pa nyengu yo wangukumana ndi mayeseru chifukwa chakuti amuyanjanga. Panyaki namwi mukuchiskikapu ndi abali kweniso azichi a mumpingu winu.

Chiuta watitiwovya so ukongwa kuziya mwa ŵara mumpingu. Abali ŵenaŵa mbakukho ukongwa ndipu angaja “wuli ndi malu ngakubisamamu ku mphepu, musana wakubisamaku ku lirondu, nge nthumisinji ta maji mu charu chiyumu, nge nchiduzi cha jarawi likulu mu charu chakuvuka.” (Yes. 32:2) Fundu iyi njakuchiska ukongwa! Kumbi mwagwiriskiyapu ntchitu mwaŵi wenuwu? Ŵara angakuchiskani kweniso kukuwovyani kuti mukunthiyepu masuzgu.

Kweni ŵara achita vinthu mwakuziziswa cha. Nawu mbambula kufikapu “kwakulingana ndi” isi. (Mac. 14:15) Kweni marombu ngawu ngangatiwovya ukongwa. (Yak. 5:14, 15) M’bali munyaki wa ku Italy yo wasuzgika kwa vyaka vinandi ndi nthenda yinyaki wangukamba kuti: “Abali ndi azichi andiyanjanga ukongwa ndipu andiwonanga pafupipafupi. Ivi vandiwovyanga ukongwa kuti ndikunthiyepu.” Kumbi namwi mungayanduwa cha ndi chawanangwa cha ŵara cho Yehova watipaska?

Pe vinthu vinyaki vo tingachita kuti tikunthiyepu. Tikhumbika kulutirizga kuchita vinthu vauzimu. Ŵanaŵaniyani chakuwoniyapu chaku John wa vyaka 39. Iyu wangusanirika kuti we ndi khansa ya mtundu unyaki. Iyu wangukamba kuti: “Chifukwa chakuti ndenga mwana, ndawonanga kuti atindipusika ŵaka.” Pa nyengu iyi, mwana waki munthurumi wenga ndi vyaka vitatu. John wangukamba so kuti: “Muwolu wangu wakhumbikanga kuphwere mwana wangu kweniso ini. Iyu wakhumbikanga kuchindiperekeza kuchipatala.” Munkhwala wo John walondiyanga wamuchitiskanga mseru kweniso wamumalanga nthazi. Penga so suzgu yinyaki yo angukumana nayu. Awiski aku John angutama ukongwa ndipu akhumbikanga so kuŵaphwere.

Kumbi John ndi banja laki angukunthiyapu wuli suzgu yo angukumana nayu? John wangukamba kuti: “Chinanga kuti ndatamanga, ndayesesanga kuwovya banja langu kuti lilutirizgi kuchita vinthu vauzimu. Tasanirikanga pa maunganu ngosi nga mpingu, tapharazganga sabata yeyosi kweniso nyengu zosi tachitanga kusopa kwa pabanja chinanga mphanyengu yo vinthu vasuzga.” Ndichu chifukwa chaki, John wanguwona kuti kulutirizga kuchita vinthu vauzimu ndiku kungawovya kukunthiyapu masuzgu. Iyu wangukamba fundu yinyaki yo yingawovya ŵanthu wo akumana ndi masuzgu ndipu wanguti: “Asani mwakumana ndi suzgu, Yehova wangakuchiskani kweniso kukuwovyani kuti muleki kusuzgika maŵanaŵanu. Ndipu wangakuwovyani kuja ndi nthazi nge mo wachitiya ndi ini.”

Tikayika cha kuti Chiuta wangatiwovya kukunthiyapu masuzgu ngo tingakumana nangu sonu kweniso ngo tingazikumana nangu kunthazi. Mwaviyo, tiyeni tilutirizgi kuromba kwaku Yehova, kwanja ukongwa abali ndi azichi mumpingu, kupempha chovyu kwa ŵara ndipuso kulutirizga kuchita vinthu vauzimu. Asani tichita ivi, tichitengi vinthu mwakukoliyana ndi mazu ngo Paulo wangukamba ngakuti: “Mutenere kukunthiyapu.”