NDATI ndafika vyaka 9 ndinguleka kukuwa. Ivi vinguchitikiya ku Côte d’Ivoire vyaka 34 vo vajumpha. Msinkhu wangu ukwana 1 mita. Apapi ŵangu ŵati aziŵa kuti ndaleka kukuwa, angundikambiya kuti ndilimbikiyengi ntchitu kuti ndileki kuŵanaŵaniya ukongwa za msinkhu wangu. Ndingukhoma benchi kumasu kwa nyumba yidu kuti ndigulisiyengepu vipasu. Benchi langu ndaliphweriyanga kuti liwonekengi umampha. Ivi vakopanga makasitomala nganandi.

Kweni kulimbikiya ntchitu kungusintha vinthu cha. Ndenga mufupi mbwenu ndipu vinthu vipusu vandisuzganga kuchita. Mwakuyeruzgiyapu, ndasuzgikanga kugula vinthu kusitolu chifukwa cha ufupi. Ndawonanga kuti vinthu vinandi angupangiya ŵanthu atali pe. Ndajivwiyanga lisungu ukongwa, kweni ivi vingusintha ndati ndafika vyaka 14.

Zuŵa linyaki, anthukazi ŵaŵi wo ŵenga Akaboni aku Yehova anguza kuzigula vipasu pa benchi langu ndipu pavuli paki angwamba kusambira nani Bayibolu. Ndati ndayamba kusambira, ndinguwona kuti kuziŵa Yehova ndi vo wakhumba nkhwakukhumbika ukongwa kuluska kuŵanaŵaniya va msinkhu wangu. Ivi vingundiwovya ukongwa. Ndingwamba kwanja lemba la Sumu 73:28. Chigaŵa chakwamba cha lemba ili chititi: “Kundere kwaku Chiuta nkhwamampha kwaku ini.”

Banja lidu lingusamukiya ku Burkina Faso. Vinthu vingusintha ukongwa pa umoyu wangu. Po tenga ku Côte d’Ivoire, ŵanthu angundiziŵiliya. Kweni ko tajanga sonu, ndawonekanga wachilendu. Ŵanthu andilereskanga ukongwa. Pa chifukwa ichi, ndinguja munyumba kwa masabata nganandi. Pavuli paki, ndingukumbuka kuti kundere kwaku Yehova nkhwamampha kwaku ini. Mwaviyo, ndingulemba kalata ku ofesi ya nthambi ya Akaboni aku Yehova. M’mishonale munyaki zina laki Nani, wangwamba kundiyende pa muthuthuthu.

Ko tajanga kwenga msewu wa fuvu ndipu nyengu zosi watelemukanga. Ndi chifuku msewu uwu wachitanga vimawulambwi. Nyengu zinandi Nani wawanga pa muthuthuthu pakuza kuzindisambiza, kweni wanguleka cha. Zuŵa linyaki wangundipempha kuti tiluti ku mawunganu. Ndinguziŵa kuti asani ndayamba kuluta ku mawunganu, ŵanthu amulereskanga waka ini pe. Ndinguziŵa so kuti asani tingapakana pa muthuthuthu ndisazgiyengeku uzitu. Ivi vatingi vichitiskengi kuti usuzgi ukongwa kwendeska. Chinanga kuti venga viyo, ndinguzomera chifukwa ndaziŵanga vo chigaŵa chachiŵi  cha lemba lo nditanja chikamba. Chititi: “Ambuya Yehova Wanthazizosi ndiyu kwakuthaŵiya kwangu.”

Nyengu zinyaki ini ndi Nani tawanga mu mawulambwi, kweni tadandawulanga cha chifukwa tayanjanga maunganu. Ŵanthu wo ndasaniyanga ku Nyumba ya Ufumu andimwetuliyanga. Ivi venga vakupambana ukongwa ndi ŵanthu wo andileresanga waka dodoli. Ndingubatizika pati pajumpha myezi 9.

Chigaŵa chachitatu cha lemba lo nditanja chititi: “Kuti ndipharazgi ntchitu zinu.” Ndinguziŵa kuti ndikumanengi ndi masuzgu pakupharazga. Ndechekukumbuka vo vinguchitika kakwamba ndati ndaluta kuchipharazga kunyumba ndi nyumba. Ŵana ndi arara andilereskanga ukongwa, andindondoloskanga ndipuso ayezganga mo ndayendiyanga. Ivi vandikwiyisanga kweni ndaziŵanga kuti nawu akhumbikiya Paradayisu nge mo nani ndamukhumbiyanga. Mwaviyo, ndinguleka cha kupharazga.

Kuti ndileki kusuzgika pakwenda, ndingusaniya njinga ya matayala ngatatu yakupalasiya manja. Asani tikwera phiri, munyangu yo ndayendanga nayu mu uteŵeti wanditutuzanga kweni asani tayamba kusika phiri nayu wadukiyangapu. Chinanga kuti pakwamba ndasuzgikanga kupharazga, kweni pavuli paki ndingwamba kukondwa ukongwa, mwakuti mu 1998 ndingwamba upayiniya wanyengu zosi.

Ndachitiskanga masambiru nganandi nga Bayibolu ndipu 4 pa ŵanthu yaŵa akubatizika. Kweniso, nde wakukondwa ukongwa chifukwa mvurwa wangu yimoza wakusambira uneneska. Ndichiskika asani ndituvwa kuti ŵanthu wo ndasambiranga nawu aluta panthazi. Mwakuyeruzgiyapu, zuŵa linyaki po ndatamanga maleriya, munthu yo ndasambiranga nayu Bayibolu wangundilembe kalata kutuliya ku Côte d’Ivoire. Munthu uyu ndingwamba kusambira nayu kunu ku Burkina Faso po wasambiranga sukulu pa univesite yinyaki. Sambiru ili ndinguleke m’bali. Pavuli paki, munthu uyu wangusamukiya ku Côte d’Ivoire. Ndingukondwa ukongwa kuvwa kuti sonu ndi mupharazgi wambura kubatizika.

Kumbi ndisaniya wuli vo ndikhumba pa umoyu? Wupu unyaki wo utovya ŵanthu akupunduka ungwamba kundisambiza kusona. Msambizi wangu munyaki wati wawona mo ndagwiriyanga ntchitu wangukamba kuti: “Tikusambizi kupanga sopu.” Ivi ndivu anguchita nadi. Ndipanga sopu wakuchapiya ndi wakusambiya. Ntchitu iyi ndichitiya panyumba. Ŵanthu atimuyanja ukongwa sopu wangu. Asani agula akambiyaku so anyawu. Ndipereke ndija pa muthuthuthu wangu wa matayala ngatatu.

Mu 2004 ndinguleka kuchita upayiniya chifukwa chakusuzgika ndi msana. Ivi vingundikwaska ukongwa. Kweni ndeche kupharazga mwaphamphu.

Ŵanthu akamba kuti nditanja kumwemwete. Nde ndi chifukwa chakuvwika chakukondwe pakuti kundere kwaku chiuta kwaja kwamampha kwaku ini.​—Yikukambika ndi Sarah Maiga.