Kumbi mukuŵerenga magazini ngosi nga Chigongwi cha Alinda ngo ngatuwa pambula kuswera yapa? Asani ndi viyo, yesani kumuka mafumbu yanga:

Kumbi ndi vinthu nivi vinyaki vo vazamumala pakumala kwa charu?

Vinthu vinyaki vo vazamumala ndi maboma nga ŵanthu, nkhondu, vinthu vambula urunji, visopa vaboza ndi ŵanthu ambula kopa Chiuta.—7/1, peji 3-5.

Kumbi Gogi wa ku Magogi yo wazumbulika m’buku la Ezekiele ndiyani?

Gogi wa ku Magogi wamiya Satana cha, kweni viwoneka kuti wamiya mitundu yo yazamukoliyana kuti yiyukiyi ateŵeti aku Chiuta asani chisuzgu chikulu chaziyamba.—5/15, peji 29-30.

Kumbi ndi vinthu 6 nivi vo vingawovya munthu kuti wakondwengi asani wakota?

Bayibolu likamba kuti (1) tijengi akujiyuyuwa, (2) tichitengi vinthu mwazeru, (3) tiŵanaŵanengi mwakwenere, (4) tijengi akupaska, (5) tingajipatuwanga cha ndipuso (6) tiwongengi. Kuŵanaŵaniya fundu izi kungawovya munthu kuti wakondwengi asani wakota.—7/1, peji 9-11.

Kumbi vakuziziswa vo Yesu wachitanga vilongo wuli kuti ngwakupaska?

Pa phwandu la nthengwa lo linguchitika ku Kana, Yesu wangusanduska malita 380 nga maji kuja vinyu. Nyengu yinyaki, wanguryiska ŵanthu akujumpha 5,000. (Mat. 14:14-21; Yoh. 2:6-11) Pa vakuchitika vosi viŵi, iyu walondonga Awiski wo mbakupaska.—6/15, peji 4-5.

Kumbi tingakamba kuti ŵanthu wosi amuvisopa vaboza azamukufwa pa Chisuzgu Chikulu?

Viwoneka kuti ndimu viliri cha. Lemba la Zekariya 13:4-6 lilongo kuti alongozgi anyaki avisopa vaboza azakuvikana visopa vawu.—7/15, peji 15-16.

Nchifukwa wuli Baraki wakhumbanga kuti waluti ndi Debora ku nkhondu?

Baraki wenga ndi chivwanu. M’malu mwakupempha Yehova kuti wamupaski vidya vinandi, iyu wanguwona kuti mphakwenere kuluta ndi Debora, munthu yo wamiyanga Chiuta kuti wakamuchiskengi iyu ndi anthurumi wo wanguluta nawu. (Ŵer. 4:6-8; 5:7)—9/1, peji 13.

Kumbi ndi vinthu nivi vinyaki vo tikhumbika kuŵanaŵaniya?

Vinthu vaki ndi vo Yehova wakulenga, Mazu ngaki, rombu, ndi sembi yaku Yesu.—8/15, peji 10-13.

Chifukwa chakuti tikhumba cha kucheza ndi ŵanthu aheni, kumbi mbanthu amtundu wuli wo titenere cha kuja nawu pa chibwezi?

Tikhumbika kuŵachitiya vinthu vamampha ŵanthu wo aleka kuvwiya marangu ngaku Chiuta. Kweni kungaŵa kunanga kuchita chibwezi ndi munthu yo ndi Kaboni cha kweniso yo waleka kulondo fundu zaku Chiuta. (1 Ŵakor. 15:33)—8/15, peji 25.

Kumbi Petro wanguchita wuli kuti chivwanu chaki chimali kweniso kuti waje so ndi chivwanu?

Petro wangutuwa muboti ndi kwamba kwenda pa maji chifukwa chakuti wenga ndi chivwanu. (Mat. 14:24-32) Kweni wati wawona chimphepu, wanguchita mantha. Pavuli paki wangulereska kwaku Yesu ndipu wanguzomera kuti wamuwovyi.—9/15, peji 16-17.

Lemba la Machitidu 28:4 likamba kuti ŵanthu a ku Melita aŵanaŵananga kuti Paulo wabayanga ŵanthu. Nchifukwa Wuli aŵanaŵananga viyo?

Njoka yati yaluma Paulo, panyaki ŵanthu a ku Melita awonanga kuti Dike, chiuta wawu waurunji, wamulanga.—11/1, peji 14.

Marta wangutangwanika ndi vinthu vinyaki. Kumbi venivi vititisambizanji?

Nyengu yinyaki, Marta wangutangwanika kunozga vakurya vinandi. Yesu wangukamba kuti Mariya wangusankha chigaŵa chamampha chifukwa wavwisiyanga vo Yesu wasambizanga. Nasi titenere kuphwere kuti vinthu vambula kukhumbika vileki kutimbanyizga vinthu vauzimu.—10/15, peji 18-20.