Tosi te ndi nyengu yimana ukongwa yakusambiriya pakutija. Kumbi tingachita wuli kuti tiyigwiriskiyengi ntchitu umampha nyengu yeniyi? Chakwamba, mumaliyengi nyengu yinandi pa vo muŵerenga. Muyanduwengi ukongwa asani musambira vinthu vimanavi mwakuphwere mumalu mwakusambira vinthu vinandi mwakuthaŵiriya.

Pavuli paki wonani vinthu vo mukhumbika kwamba kusambira. (Aefe. 5:15, 16) Masachizgu yanga ngangakuwovyani:

• Muŵerengengi Bayibolu zuŵa lelosi. (Salimo 1:2) Mungachita umampha kwamba kuŵerenga malemba ngo nge pa ndondomeku ya kuŵerenga Bayibolu nga mu unganu wa mkati mwa sabata.

• Munozgekiyengi Sambiru la Chigongwi cha Mlinda kweniso unganu wa mkati mwa sabata. Munozgekiyengi umampha kuti mukamukengepu.​—Salimo 22:22.

• Muyesesengi so kuŵerenga magazini ngakugaŵiya, muwoneriyengi mavidiyo kweniso kusambira vinthu vinyaki vo viŵikika pa jw.org.

• Mufufuzengi pamwenga kusambira nkhani zo mungayanja. Mungafufuza nkhani yakukwaskana ndi suzgu yo mukumana nayu, fumbu lo mwenalu pamwenga nkhani yinyaki ya mu Bayibolu yo mukhumba kuyivwisa. Kuti musaniyi masachizgu wonani nkhani zo ze pa kamutu kakuti, “Zoti Muchite Pophunzira Baibulo” pa jw.org/ny.