PACHARU chosi ŵanthu amidawuku kweniso a visopa vakupambanapambana apemphera. Yiwu apemphera asani ŵe ŵija ndipuso asani ŵe pagulu. Apemphera asani ŵe mutchalitchi, mumasinagogi ndipuso mumizikiti. Anyaki ajikama pakapeti, anyaki agwiriskiya ntchitu tivingelingeli to tija ndi malembu, timakolona to tija ndi timikanda kweniso anyaki agwiriskiya ntchitu vikozgu pakupemphera. Penipo anyaki aŵerenga waka mapempheru ngo ngakulembeka mumabuku pamwenga pamapepala ngo abatika muvimati va nyumba.

Pacharu chapasi, pempheru litovya kupambanisa ŵanthu ndi nyama. Mbuneneska kuti pe vinandi vo tiyanana ndi vinyama. Mwakuyanana ndi vinyama, nasi tikhumbika chakurya, mphepu ndipuso maji. Nasi tibalika, tija ndi umoyu ndipuso titufwa. (Wakutawula 3:19) Kweni mbanthu pe wo apemphera, vinyama vipemphera cha. Chifukwa?

Chifukwa ntchakuti isi tikulengeka ndi khumbu lakuti tipempherengi. Pempheru ndiyu nthowa yo ŵanthu anandi awona kuti angakambiskiyana ndi chinthu chinyaki chauzimu cho atichiwona kuti ntchakupaturika, ntchituŵa ndipuso ntchamuyaya. Bayibolu lilongo kuti taŵanthu tikulengeka ndi mtima wakukhumba kuchita vinthu vauzimu. (Wakutawula 3:11) Nyengu yinyaki Yesu Khristu wangukamba kuti: “Mbakukondwa akavu mwauzimu.”—Mateyu 5:3, mazu ngamumphata.

Ŵanthu azenga nyumba zakusopiyamu zikuluzikulu ndipuso amaliya maora nganandi pakupemphera kuti amalisi ‘ukavu wawu wauzimu.’ Ŵanthu anyaki atijithemba pamwenga athemba ŵanthu anyaki kuti amalisi ‘ukavu wawu wauzimu.’ Kumbi muwona kuti ŵanthu angafiska kuwovya anyawu pa nkhani iyi? Taŵanthu tilivi nthazi, tija umoyu ufupi kweniso tiziŵa vinandi cha. Munthu wazeru ukongwa, wanthazi ukongwa ndipuso yo waja umoyu utali kuluska isi ndiyu wangatiwovya. Kweni kumbi ndi vinthu wuli vauzimu vo tikavuka vo vititichitiska kuti tipempherengi?

Ŵanaŵaniyani mafumbu yanga: Kumbi nyengu yinyaki mukupenjapu munthu wakuti wakupaskeni ulongozgi, zeru pamwenga wakumukeni fumbu lo ŵanthu asoŵa chakumuka? Kumbi mukukhumbisiskapu kuti munthu munyaki wakupembuzeni mubali winu wati watayika? Kumbi mukupenjapu chovyu mwati mwasuzgika kusankha vakuchita pa nkhani yinyaki yakukhumbika? Pamwenga mwati mwachita ubudi unyaki, kumbi mukujifumbapu kuti ndiyani yo wangakugowokiyani?

Mwakukoliyana ndi vo Bayibolu likamba, venivi ndi vinyaki mwa vifukwa vakuvwika vo munthu wangapemphere. Bayibolu ndi buku lo likonkhoska vinthu vakuvwika umampha ukongwa pa nkhani ya pempheru. Ndipu mu Bayibolu mwe mapempheru nganandi nga anthulumi ndi anthukazi akugomezgeka. Yiwu apempheranga kuti apembuzgiki, asaniyi ulongozgi, agowokereki kweniso kuti amukiki mafumbu ngakusuzga ukongwa.—Masalimo 23:3; 71:21; Daniyeli 9:4, 5, 19; Habakuku 1:3.

Chinanga kuti mapempheru ngo ngazumbulika mu Bayibolu ngapambana, kweni ngayanana pa fundu yinyaki. Fundu yaki njakuti, ŵeneku a mapempheru yanga aziŵanga chinthu chinyaki chakukhumbika ukongwa pa nkhani ya pempheru cho ŵanthu anandi mazuŵa nganu atichitoliyaku kanthu cha. Yiwu amuziŵanga yo akhumbika kupempheraku.