Uchimi 4. Kuŵavi Chanju

“Ŵanthu azamuja . . . ambula chanju chakuwa nachu.”—2 TIMOTE 3:1-3

● Munthukazi munyaki yo wagwira ntchitu ku wupu wo utovya ŵanthu wo akumana ndi nkhaza za mu banja ku North Wales, zina laki Chris wanguti: “Zuŵa linyaki kuntchitu kwidu kunguza munthukazi yo wangupumika ukongwa, ndipu ndingutondeka kumuŵanika chinanga kuti tikukumanapu.” Chris wangukamba so kuti. “Anthukazi anyaki asuzgika ukongwa maŵanaŵanu mwakuti achita ndi soni kuti akulereski.”

KUMBI MAUKABONI NGALONGONJI? Mucharu chinyaki ku Africa, munthukazi yumoza pa anthukazi atatu akumuchitiyapu nkhaza zakugonana weche mwana. Pakafukufuku yo wanguchitika so mucharu chenichi, angusaniya kuti anthulumi anandi awona kuti palivi suzgu kupuma awolu ŵawu. Kweni mbanthukazi pe cha wo atiŵachitiya nkhaza mu mabanja. Mwakuyeruzgiyapu, ku Canada, anthulumi atatu pa anthulumi 10 awolu ŵawu akuŵachitiyapu nkhaza pamwenga akuŵapumapu ukongwa.

VO ŴANTHU ANANDI AKAMBA PAKUSUSKA UCHIMI UWU Kutuwa kali mu mabanja mwaja muchichitika nkhaza zakupambanapambana. Kweni mazuŵa nganu nkhani zenizi titizivwa waka kaŵikaŵi kuluska kali.

KUMBI FUNDU YENIYI NJAKUVWIKA? Mu vyaka va pambula kuswera, papangika mawupu nganandi ngo ngalimbana ndi nkhani za nkhaza mu mabanja. Kweni kumbi mawupu ngenanga ngafiska kumalisa suzgu lenili? Awa! Ŵanthu anandi mazuŵa nganu alivi mbwenu chanju chakuwa nachu.

KUMBI YIMWI MUWONA WULI? Kumbi lemba la 2 Timote 3:1-3 lifiskika? Kumbi anandi atondeka kuŵalongo chanju ŵanthu a mu mabanja ngawu nge mo vitenere kuŵiya?

Uchimi wachinkhondi wo mutiwuwona kuti ufiskika ukwaskana ndi charu cho tijapu. Wonani vo Bayibolu likamba pa nkhani iyi.

[Fundu yikulu]

“Pacharu chapasi ŵanthu anandi abisa kuti atiŵachitiya nkhaza mu banja. Pa avereji, munthukazi waluta kupolisi kuchikamba, pavuli pakuti wapumika maulendu 35 ndi mulumu waki.”—MUNTHUKAZI YO WAGWIRA NTCHITU KU WUPU WA WALES DOMESTIC ABUSE HELPLINE.