“Ndaŵaziŵisa Zina Linu”

“Ŵanthu wo mwandipaska kutuliya pacharu, ndaŵaziŵisa zina linu. . . . Ndaŵaziŵisa zina linu, ndipu ndazakuliziŵisa so.”—YOHANE 17:6, 26.

Kumbi Venivi Ving’anamuwanji? Yesu wanguziŵisa ŵanthu zina laku Chiuta chifukwa waligwiriskiyanga ntchitu asani wapharazga. Kanandi Yesu waŵerengiyanga ŵanthu Malemba, ndipu tikayika cha kuti wazumbuwanga zina laku Chiuta asani watingaŵerenga. (Luka 4:16-21) Iyu wangusambiza akusambira ŵaki kuti apempherengi kuti: “Ada, zina linu litoweseki.”—Luka 11:2.

Kumbi Akhristu a mu Nyengu ya Akutumika Angufiska Wuli Venivi? Wakutumika Peturo wangukambiya ŵara ku Yerusalemu kuti Chiuta watomu ŵanthu mu mitundu yinyaki “akuti aziŵikengi ndi zina laki.” (Machitidu 15:14) Akutumika limoza ndi Akhristu anyawu apharazganga kuti “weyosi yo wadaniya pa zina laku Yehova wazamutaskika.” (Machitidu 2:21; Aroma 10:13) Yiwu agwiriskiyanga so ntchitu zina laku Chiuta mu vinthu vawu vo alembanga. Buku linyaki la malangu nga Chiyuda lo lingulembeka cha m’ma 300 C.E., lingukamba fundu yinyaki pakukonkhoska vo arwani achitanga pakotcha mabuku nga Akhristu. Buku ili linguti: “Mabuku nga ŵanthu wo apharazganga uthenga wamampha kweniso nga a minim [ŵanthu aŵanaŵana kuti ŵenga Akhristu achiyuda] angalekeliyanga cha. Kweni angawotchanga pamotu kwekosi ko angasaniya, . . . yiwu awotchanga mabuku ngenanga kweniso buku lelosi lo musanirika zina chayilu laku Chiuta.”—Tosefta.

Mbayani wo Achita Venivi Mazuŵa Nganu? Kukwamba kwa Bayibolu la Revised Standard Version lo likuzomerezeka ndi wupu wa National Council of the Churches of Christ ku United States, kwe mazu ngakuti: “Chikhristu chechendayambi, chisopa cha Chiyuda ndipu chakaniza kali kugwiriskiya ntchitu zina chayilu laku Chiuta yumoza pe, chifukwa venivi vingalongo nge kuti tikhumba kumupambanisa ndi achiuta anyaki. Kugwiriskiya ntchitu zina chayilu laku Chiuta nkhwambula so kwenere kwa Akhristu wosi.” Mwaviyo, mu Bayibolu ili akutuzamu zina chayilu laku Chiuta ndipu akugwiriskiya ntchitu zina la udindu lakuti “AMBUYA.” Kweniso pambula kuswera yapa, ku likulu la Katolika ku Vatican kungutuwa uthenga wo unguluta kwa mabishopu ngawu ngosi wakuti: “Tileki kugwiriskiya ntchitu pamwenga kuzumbuwa zina laku Chiuta lo likutuliya ku vilembu vinayi va YHWH * lo lisanirika mu sumu ndipuso mu mapempheru ngidu.”

Mazuŵa nganu kumbi mbayani wo agwiriskiya ntchitu kweniso aziŵisa ŵanthu zina laku Chiuta? Pa nyengu yo Sergey wenga ndi vyaka pafufupi 15 ku Kyrgyzstan, wanguwonere vidiyo yo yakambanga kuti zina laku Chiuta ndi Yehova. Kwa vyaka pafufupi 10 kutuliya pa nyengu yeniyi iyu wangulivwapu so cha zina laku Chiuta. Sergey wangusamiya ku United States, ndipu pati pajumpha nyengu Akaboni aku Yehova ŵaŵi wo apharazganga kunyumba kwaki angumulongo zina laku Chiuta mu Bayibolu. Sergey wangukondwa ukongwa kusaniya gulu lo lagwiriskiya ntchitu zina laku Yehova. Muzizwengi so kuziŵa kuti mu dikishonale yinyaki, pa mazu ngakuti “Jehovah God,” pasanirika fundu yakuti, “ndi chiuta wanthazi yo waziŵika ndi Akaboni aku Yehova kweniso ndi chiuta mwenuyu pe yo yiwu asopa.”—Webster’s Third New International Dictionary.

[Mazu ngamumphata]