“Uthenga Wamampha Uwu Wa Ufumu, Wazamupharazgika”

“Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”—MATEYU 24:14.

Kumbi Venivi Ving’anamuwanji? Luka yo wakulembaku Uthenga Wamampha wangukamba kuti Yesu “wangwamba kwenda tawuni ndi tawuni kweniso muzi ndi muzi kupharazga ndi kumemeza uthenga wamampha wa Ufumu waku Chiuta.” (Luka 8:1) Yesu mweneku wangukamba kuti: “Nditenere so kuchipharazga uthenga wamampha wa Ufumu waku Chiuta ku matawuni nganyaki, chifukwa chenichi ndichu ndikuziya.” (Luka 4:43) Iyu wangutuma akusambira waki kuti akapharazgi uthenga wamampha mumatawuni kweniso mumizi. Ndipu pakumaliya paki, wanguŵakambiya kuti: “Mwazamuja akaboni ŵangu . . . mpaka kuvigaŵa vakutali ukongwa va charu chapasi.”—Machitidu 1:8; Luka 10:1.

Kumbi Akhristu a mu Nyengu ya Akutumika Angufiska Wuli Venivi? Akusambira aku Yesu anguswera cha kwamba kuchita vo iyu wanguŵalamula. “Zuŵa lelosi alutirizganga kusambiza ndi kupharazga uthenga wamampha wakukwaskana ndi Khristu Yesu, munyumba yakusopiyamu ndipuso kunyumba ndi nyumba.” (Machitidu 5:42) Ŵanthu wosi mumpingu apharazganga. Neander yo walembanga mbiri wangukamba kuti: “Celsus yo wenga munthu wakwamba kulemba nkhani zakususkana ndi Chikhristu, waŵanyozanga Akhristu chifukwa chakuwona kuti ŵanthu ambula kusambira ndipuso akunyozeka nge akupanga salu, akusona sapatu kweniso akunyukuta vikopa nawu apharazganga mwaphamphu.” Munthu munyaki zina laki Jean Bernardi wangulemba mubuku laki kuti: “[Akhristu] apharazganga kwekosi ndipuso apharazgiyanga weyosi. Yiwu apharazganga mumisewu, mumatawuni, mumalu ngo mwasanirikanga ŵanthu anandi ndipuso kunyumba za ŵanthu. Yiwu alekanga cha kaya ŵanthu aŵalondere pamwenga cha. . . . Mpaka kuvigoti vacharu chapasi.”—The Early Centuries of the Church.

Mbayani wo Achita Venivi Mazuŵa Nganu? David Watson yo wenga wasembi wa tchalitchi la Anglican wangulemba kuti: “ŵanthu anandi ativitoliyaku kanthu cha vinthu vauzimu chifukwa tchalitchi liŵikiyapu mtima cha pa kupharazga kweniso kusambiza.” José Luis Pérez Guadalupe wakulemba mubuku laki vakukwaskana ndi ntchitu za matchalitchi nga Evangelical, Adventists ndipuso matchalitchi nganyaki kuti: “Yiwu apharazga kunyumba ndi nyumba cha.” (Why Are the Catholics Leaving?) Pakukamba za Akaboni aku Yehova, iyu wakulemba kuti: “Yiwu apharazga kunyumba ndi nyumba mwandondomeku.”

Jonathan Turley wangukamba fundu yinyaki yauneneska kweniso yakukondwesa ndipu yikulembeka mubuku linyaki. Iyu wanguti: “Asani munthu wavwa waka zina lakuti Akaboni aku Yehova, mumutu mutuza ŵanthu wo atuza kunyumba zidu mwamabuchibuchi. Akaboni aku Yehova awona kuti kupharazga kutovya waka kuti asaniyi ŵanthu akuti ayambi kugomezga vo yiwu agomezga pe cha, kweni awona so kuti kutiŵawovya kuja ndi chivwanu chanthazi pa vo agomezga.”—Cato Supreme Court Review, 2001-2002

 [Bokosi papeji 9]

Kumbi Mbayani wo Alongo Kuti Mbakhristu Auneneska?

Mwakukoliyana ndi fundu za mu Malemba zo takambiskana mu nkhani izi, kumbi yimwi muwona kuti mbayani wo achita vinthu vakulongo kuti mbakhristu auneneska? Chinanga kuti pacharu pe matchalitchi nganandi ngo ngatijikamba kuti mbakhristu, kweni kumbukani vo Yesu wangukambiya akusambira ŵaki kuti: “Ndi munthu weyosi cha yo watindidana kuti, ‘Ambuya, Ambuya,’ yo wazamusere mu Ufumu wakuchanya, kweni yija yo wachita khumbu la Ada wo ŵe kuchanya.” (Mateyu 7:21) Sonu kumbi yimwi muwona kuti mbayani wo achita khumbu la Ada pamwenga kuti wo achita vinthu vakulongo kuti mbakhristu auneneska? Tingazisaniya vitumbiku vo vizengi ndi Ufumu waku Chiuta pijapija asani tichita vinthu ndi ŵanthu ŵenaŵa. Titikupemphani kuti mufumbi Akaboni aku Yehova wo akukupaskani magazini iyi kuti muziŵi vinandi vakukwaskana ndi Ufumu waku Chiuta kweniso vitumbiku vo wazakutipaska.—Luka 4:43.