Ndikuwiya ku Santo Domingo, Dominican Republic, nde wakumaliya m’banja la ŵana anayi. Apapi ŵangu ŵenga akusambira ukongwa ndipu akhumbisiskanga kusambiza ŵana ŵawu kuti aje ndi mijalidu yamampha. Vyaka vinayi ndechendawi, apapi ŵangu angukumana ndi amishonale achimormon. Chifukwa chakukondwa ndi mo anyamata awonekiyanga umampha, apapi ŵangu anguwona kuti banja lidu lije lakwamba kusere Chisopa chaku Yesu Khristu cha Ŵanthu Atuŵa Mtima, pamwenga kuti chisopa cha Mormon.

Ndakondwanga ukongwa ndi vakuchitika vakupambanapambana va chisopa chenichi kutuliya pa unamana wangu ndipu ndatumbikanga vo chisopa cha Mormon chasambizanga pankhani ya banja ndipuso mijalidu yamampha. Ndanyadiyanga kuja mu chisopa cha Mormon ndipu ndakhumbisiskanga kuzija m’mishonale.

Panyengu yo ndenga ndi vyaka 18, banja lidu lingusamiya ku United States kuti nkhalutirizgi masambiru ngangu ngaku koleji. Pati pajumpha chaka chimoza, ama amana ndi arumu ŵawu wo mbakaboni aku Yehova anguza kuzitiwona ku Florida. Angutidana kuti tikachiti nawu unganu wachigaŵa. Ndinguzizwa kuwona kuti weyosi wajulanga Bayibolo laki ndi kulemba fundu zo wavwa. Nani ndingupempha pepala ndi chakulembe kuti ndilembengi fundu zo ndavwa.

Unganu wati wamala, ama amana ndi arumu ŵawu angundikambiya kuti akhoza kundiwovya kusambira Bayibolo chifukwa chakuti ndakhumbanga kuzija mishonale. Ndinguwona kuti yenga fundu yamampha chifukwa pa nyengu yo, ndaziŵanga vinandi va m’Buku la chisopa cha Mormon kuluska Bayibolo.

Asani tisambira Bayibolo kuziya pa foni, ama amana ndi arumu ŵawu nyengu zosi andichiskanga kuti ndiwonengi asani vo ndigomezga vikoliyanaku ndi vo Bayibolo lisambiza. Akhumbanga kuti ndisimikiziyi ndija vo Bayibolo lisambiza.

 Penga vinthu vinandi vo ndagomezganga vakukwaskana ndi chisopa cha Mormon, kweni ndaziŵanga cha vo Malemba ngakamba pa fundu zenizi. Ama amana angunditumiziya magazini ya Galamukani! ya November 8, 1995, yakupharazgika ndi Akaboni aku Yehova, yo yikonkhoska vo a chisopa cha Mormon agomezga. Ndinguzizwa kuti ndaziŵanga visambizu vinandi cha va chisopa cha Mormon. Ivi vingundichitiska kuti ndifufuzi so pa Intaneti kuti ndisimikiziyi kuti vo Galamukani! yo yikamba vauneneska. Ndingusaniya kuti fundu zo zenga nadi zauneneska ndipu ndinguchisimikiziya ndati ndaluta kunyumba yo asungiyaku vinthu vakali va chisopa cha Mormon ku Utah.

Ndagomezganga kuti Buku la chisopa cha Mormon ndi Bayibolo vakoliyanangaku. Kweni ndati ndayamba kuŵerenga Bayibolo mwakuphwere, ndinguwona kuti vo chisopa cha Mormon chisambiza vipambana ndi vo Bayibolo likamba. Mwakuyeruzgiyapu, Bayibolo pa Ezekiele 18:4 likamba kuti umoyu utufya, kweni Buku la Mormon pa Alma 42:9 likamba kuti “umoyu utufwa cha.”

Kusazgiyapu pa kupambana kwa visambizu, ndatondekanga kuvwisa pa nkhani ya sankhu yo chisopa cha Mormon chasambizanga. Mwakuyeruzgiyapu, chisopa cha Mormon chasambizanga kuti munda wa Edene wenga ku dera la Jackson County, ku Missouri, U.S.A. Alongozgi achisopa chenichi akambanga so kuti, asani “Ufumu waku Chiuta waziyamba kuwusa, mbendera ya charu cha America yazamukwezeka pachanya ndipu ŵanthu wosi azamuja ndi wanangwa wakuyanana.”

Ndakhumbanga kuziŵa asani vo a Mormon asambizanga vatingi vizichitikengi nadi mu vyaru vinyaki kusazgapu charu cho ndikuwiya. Zuŵa linyaki mazulu, mnyamata munyaki wa chisopa cha Mormon, yo wasambiranga za umishonale wangundimbiya foni ndipu ndingukambiskana nayu nkhani yeniyi. Ndingumufumba mwambula kubisa kuti, “Kumbi ungabaya a Mormon anyaku asani charu chaku chingachita nkhondu ndi charu chinyaki?” Ndinguzizwa kuti wanguzomera. Ndingufufuza ukongwa vo chisopa cha Mormon chisambiza kweniso ndinguchifumba alongozgi a chisopa cho. Angundikambiya kuti mafumbu ngangu ngenga ngakusuzga kungamuka ndipu ngazamumukika zuŵa linyaki panyengu yo ukweru wazamulutirizga kuŵala.

Ndinguguŵa ndi vo angundikonkhoske ndipu ndingwamba kujifumba ndipuso kufufuza chifukwa cho ndakhumbiyanga kuja mishonale wa chisopa cha Mormon. Ndinguwona kuti ndakhumbanga kuja mishonale kuti ndiziwovyengi ŵanthu kweniso ndakhumbanga kuti ŵanthu azinditumbikengi. Chinanga kuti nkhani iyi yakwaskanga Chiuta kweni ndaziŵanga vinandi cha vakukwaskana ndi iyu. Ndaja ndichiŵerenga Bayibolo nyengu zinandi kuvuli uku kweni ndavigwiriskiyanga nchitu cha vo likamba. Ndaziŵanga cha vo Chiuta wakhumba kuzichita pacharu chapasi ndipuso kuchitiya ŵanthu.

Panyengu yo ndasambiranga Bayibolo ndi Akaboni aku Yehova, ndaziŵa vinthu vinandi nge, zina laku Chiuta, vo vichitika asani munthu wafwa ndipuso udindu waku Yesu pakufiska khumbu laku Chiuta. Pavuli paki, ndinguliziŵa umampha ukongwa Bayibolo ndipu ndakondwanga kukambiyaku ŵanthu anyaki uneneska wo ndasambiranga. Ndaziŵanga kuti Chiuta waliku nadi kweni sonu nditimukambiya vinthu murombu nge Munyangu wa pamtima. Ndikubatizika pa July 12, 2004, kuti ndije yumoza wa Akaboni aku Yehova ndipu pavuli pa myezi 6, ndingwamba uteŵeti wa nyengu zosi.

Kwa vyaka vinkhondi ndagwiranga nchitu ku likulu la Akaboni aku Yehova pacharu chosi ku Brooklyn, New York. Ndakondwanga ukongwa kuwovya nchitu yakupanga Mabayibolo kweniso mabuku ngakukonkhoska Bayibolo ngo ngatovya ŵanthu mamiliyoni pacharu chosi ndipu sonu ndilutirizga kuwovya ŵanthu anyaki kusambira zaku Chiuta.