NGE mo takambiskiyana m’nkhani yaluta, Yesu wajanga ndi umoyu walikondwa. Mwaviyo, asani tikhumba kuti umoyu widu uje walikondwa, titenere kulondo vo Yesu wachitanga ndipuso kuvwiya ulongozgi waki.

Ndichu chifukwa chaki Yehova watitichiska kuziya m’lemba lo le pachanya yapa kuti nasi tichitengi viyo. Kwenda nge mo Yesu wayendiyanga kung’anamuwa kuti, vakuchita vidu vosi vitenere kukolerana ndi vo iyu wachitanga ndipuso vo wasambizanga. Kuchita ivi kutiwovyengi kuti Chiuta watiyanji ndipuso tije ndi umoyu walikondwa.

Pa fundu zo Yesu wasambizanga, wangukambapu so za mo tingachitiya kuti tiyendengi nge mo iyu wayendiyanga. Fundu zenizi zisanirika mu upharazgi waki wa paphiri wo ŵanthu anandi atiwuziŵa. Tiyeni tikambiskanepu fundu zimanavi ŵaka ndipuso mo tingazigwiriskiya nchitu pa umoyu widu.

MO FUNDU IYI YINGAWOVYE MUNTHU KUJA NDI UMOYU WALIKONDWA:

Yesu wakulongo kuti munthu weyosi wakuwa ndi mtima wakukhumba kusopa Chiuta. Mwaviyo, tikhumbisiska kuziŵa kwamuka kwa mafumbu yanga: Nchifukwa wuli te pacharu chapasi? Nchifukwa wuli taŵanthu tisuzgika viyo? Kumbi Chiuta watitiphwere nadi? Asani munthu wafwa, kumbi wazamuja so ndi umoyu? Titenere kuziŵa kwamuka kwa mafumbu ngenanga kuti tije ndi umoyu walikondwa. Yesu wanguziŵa kuti Bayibolo lija ndilu lingamuka mafumbu yanga. Pa nyengu yo warombanga kwa Awiski, Yesu wanguti: “Mazu nginu mbuneneska.” (Yohane 17:17) Kumbi Mazu ngaku Chiuta ngangatiwovya nadi kuti tiziŵi Chiuta ndipuso tije ndi umoyu walikondwa?

CHAKUWONIYAPU CHO CHIKUCHITIKA NADI:

Esa walongozganga gulu linyaki la akumba sumu ndipu wakhumbisiskanga kuzija wakutchuka. Chinanga kuti venga viyo, Esa wakondwanga cha. Iyu wangukamba kuti: “Chinanga wuli ndenga mu gulu la akumba sumu kweni ndakhumbanga kuti ndijengi ndi umoyu walikondwa.” Pa nyengu yinyaki, Esa wangukumana ndi Kaboni waku Yehova. Iyu wanguti: “Ndingumugundizga ndi mafumbu. Vo wangumuka kutuliya m’Bayibolo, vingundichontha limu ndipu ndinguzomera kuti wandisambizengi Bayibolo.” Vo Esa wangusambira vingumuchitiska kuti wajipatuliyi kwaku Yehova. Iyu wangukamba so kuti: “Ndakumananga ndi masuzgu kaŵikaŵi kweni sonu ndija umoyu walikondwa.” a

MO FUNDU IYI YINGAWOVYE MUNTHU KUJA NDI UMOYU WALIKONDWA:

Lisungu ling’anamuwa kuchitiya chitima anyidu, kuŵachitiya vinthu vamampha ndipuso kuŵaŵanaŵaniya. Yesu wanguchitiya lisungu ŵanthu wo akhumbikanga chovyu. Iyu wawovyanga ŵanthu akusuzgika chifukwa cha lisungu lo wenga nalu. (Mateyu 14:14; 20:30-34) Asani tichitiya ŵanthu lisungu nge mo Yesu wachitiyanga, tijengi ndi umoyu walikondwa chifukwa ŵanthu wo achitiya anyawu lisungu aja alikondwa. (Machitidu 20:35) Tingalongo kuti tichitiya anyidu lisungu mwa vakukamba ndi vakuchita vidu ndipu venivi vingakondwesa wo akhumbika kuwovyeka. Kumbi kulongo lisungu kungachitiska kuti tije ndi umoyu walikondwa?

CHAKUWONIYAPU CHO CHIKUCHITIKA NADI:

Maria ndi murumu waki, Carlos, mbanthu a chakuwoniyapu chamampha pa nkhani ya lisungu. Anyina aku Maria ŵati atayika, m’vyaka va pambula kuswera yapa awiski angwamba kutama ukongwa. Maria ndi Carlos akuŵatole kunyumba kwawu kuti akaŵatamizgengi. Nyengu zinyaki agonanga cha ndipu nyengu zinandi atchimbiriyanga nawu kuchipatala asani nthenda yawu ya shuga yayuka. Maria ndi Carlos akamba kuti nyengu zinyaki  avuka ukongwa. Kweni yiwu mbakukondwa, mwakukoliyana ndi vo Yesu wangukamba, chifukwa chakuti afiska udindu wawu pakuwovya awiski aku Maria.

MO FUNDU IYI YINGAWOVYE MUNTHU KUJA NDI UMOYU WALIKONDWA:

Mazu ngakuti “ŵakutata chimangu,” ngang’anamuwa munthu yo wachitiska kuti paje chimangu. Kumbi kuja munthu wachimangu kungatiwovya wuli kuti tijengi ndi umoyu walikondwa? Kungatiwovya chifukwa chakuti tija paubwezi wamampha ndi anyidu. Tikhumbika kuvwiya ulongozgi wa m’Bayibolo wakuti: “Asani nkhwamachitika, uli ndimo muziŵiya, muŵi mu chimangu ndi ŵanthu wosi.” (Ŵaroma 12:18) “Ŵanthu wosi,” asazgapu ŵanthu a m’banja lidu ndipuso anyaki wo mbakaboni cha. Kumbi kuja mwachimangu ndi “ŵanthu wosi” kungatiwovya nadi kuja ndi umoyu walikondwa?

CHAKUWONIYAPU CHO CHIKUCHITIKA NADI:

Ŵanaŵaniyani vo wangukumana navu Nair. Kwa vyaka vinandi ŵanthu amusuzganga, ukongwa a m’banja laki ndipu watondekanga kuja mwachimangu. Iyu waja wachilera yija ŵana kutuliya po murumu waki wakumupatiya vyaka pafupifupi 15 vajumpha. Mwana waki munthurumi wagwiriskiyanga nchitu munkhwala wakutimbanyizga wongu ndipu kanandi wasuzganga ukongwa, wamuwofyezanga ndipuso wawofyezanga mzichi waki. Nair wagomezga kuti vo wakusambira m’Bayibolo ndivu vamuwovya kuti wajengi mwachimangu chinanga kuti wakumana ndi masuzgu ngakulu ngenanga. Nair wasuskananga nayu cha mwana waki pamwenga kupindana nayu. Iyu wayesesa kuchita vinthu mwaulemu, mwalisungu ndipuso wavwisisa mo ŵanthu anyaki avwiya. (Ŵaefesu 4:31, 32) Nair wawona kuti vo wakusambira kuti wajengi mwachimangu, vamuwovya kuti wayesesi kwanjana ndi a m’banja laki ndipuso ŵanthu anyaki.

Asani tilondo ulongozgi wamampha wo Yesu wakupereka, tijengi ndi umoyu walikondwa ndipuso wakugutiskika. Tikhumbika so kuziŵa vo vazamuchitika kunthazi asani tikhumba kuja nadi ndi umoyu walikondwa. Tingaja ndi umoyu walikondwa cha asani tingaŵa ndi maŵanaŵanu ngakuti tikuwaku ndipu kwaja ŵaka kukota, kutama ndi kufwa. Chinanga kuti venivi ndivu nadi vichitikiya ŵanthu anandi m’charu ichi.

Chinanga kuti ve viyo, kweni pe nkhani yakukondwesa ukongwa! Yehova wasungiya vitumbiku vinandi ŵanthu wosi wo atesesa ‘kwenda nge mo Yesu wanguyende.’ Yehova walayizga kuti pambula kuswera yapa wazisengi charu chifya chaurunji, mwenimo ŵanthu akugomezgeka azamuja ndi umoyu wambula kutama, wamuyaya nge mo iyu wangukhumbiya. Mazu ngaki ngakamba kuti: “Awonani, hema lo laku Chiuta le mukati mu ŵanthu, ndipu wagoŵiyengi mukati mwawu, ndipu yiwu ŵaŵengi makamu ngaki, ndipu Chiuta iyu waŵengi pamoza nawu, Chiuta wawu. Ndipu waleskengeku sozi losi ku masu ngawu, ndi nyifwa kuti yikaŵangapu so cha; chingana nchitenje, chingana ndi nkhuta, chingana mburwirwi, kuti vikaŵangapu so cha: chifukwa vakudanga vo varutapu.”​—Chivumbuzi 21:3, 4.

Maria wa vyaka 84, yo tamuzumbuwa m’nkhani yakwamba, ngwakukondwa po walindizga kuziwona mazu yanga ngachifiskika. Kumbi imwi mulindizganji? Kumbi mungayanja kuziŵa vinandi vakukwaskana ndi mo ŵanthu azamujaliya ndi ‘umoyu wenechu,’ mu Ufumu waku Chiuta wo utuza? (1 Timote 6:19) Asani ndi viyo, mungafumba Akaboni aku Yehova wo aja m’chigaŵa chinu pamwenga mungalembe wo apharazga magazini iyi. b