1, 2. Kumbi mbuchimi nuwu wo ukamba za mazuŵa ngakumaliya, wo utenere kuti unguŵakondwesa akusambira aku Yesu, nanga nchifukwa wuli?

 PANGUJUMPHA ŵaka nyengu yimanavi kutuliya po Yesu wangukambiya akusambira ŵaki za kubwangandulika kwa kasopi. Vo Yesu wangukamba vinguguŵiska Petro, Yakobe, Yohane ndi Andreya. (Marko 13:1-4) Ndichu chifukwa chaki yiwu angumufumba kuti: “Tineniyeni, viŵengepu venivo zuŵanji? Ndipu chiŵengi chine chisimikizgu cha uzi winu, ndi cha umari wa mgonezi wo?” (Mat. 24:1-3) Yesu wangwamba kuŵakambiya vo vatingi vizichitikengi, Yerusalemu wechendabwanganduliki ndipuso vo vatingi vizichitikengi m’mazuŵa ngakumaliya. Kweni penga chinthu chimoza mwa vinthu venivi, cho chinguŵakondwesa akusambira ŵaki. Wati waŵakambiya za vinthu vakusuzga nge nkhondu, nja ndi kuleka kuvwiya marangu, Yesu wanguŵakambiya so chinthu chamampha ukongwa cho chatingi chizilongongi kuti te m’mazuŵa ngakumaliya. Iyu wangukamba kuti: “Evangeli [uthenga] wenuwu wa Ufumu umemezekengi m’charu chosi chapasi uli mbukaboni ku mitundu yosi; pavuli ndipu ukazanga umari wo.”​—Mat. 24:7-14.

² Akusambira aku Yesu akondwanga ukongwa kupharazga uthenga wamampha wa Ufumu limoza ndi Khristu. (Luka 8:1; 9:1, 2) Atenere kuti akumbukanga vo Yesu wangukamba kuti: “Chivuna ndichu nchikuru, kweni anchitu mbamanavi: Viyo ŵeyereni Mbuya wa chivuna cho, kuti waponyeku [watumizi] anchitu ku chivuna chaki cho.” (Luka 10:2) Kumbi yiwu atingi afiskengi wuli kupharazga “m’charu chosi chapasi” ndipuso kuchitiya ‘ukaboni ku mitundu yosi’? Kumbi anchitu atingi atuwengi pani? Yiwu atingi aziŵengi venivi, asani anguziŵa vo Yesu wang’anamuwanga pa nyengu yo wakambiskananga nawu.  Mwambula kukayika, yiwu atingi azizwengi kuwona mazu nga pa Mateyu 24:14, ngachifiskika.

3. Kumbi lemba la Luka 21:34 lifiskika wuli mazuŵa nganu, ndipu ndi mafumbu nanga ngo tingajifumba?

³ Te mu nyengu yo uchimi waku Yesu ufiskika. Ŵanthu mamiliyoni nganandi agwira nchitu yakupharazga uthenga wamampha wa Ufumu pacharu chosi. (Yes. 60:22) Yesu wangulongo kuti m’mazuŵa ngakumaliya, ŵanthu anandi azamutondeka kuŵika mtima wawu wosi pa nchitu yeniyi. Yiwu azamuwere vuli ndipu ‘azamuvimbirwa.’ (Ŵerengani Luka 21:34.) Mazuŵa nganu, nasi tiwona kufiskika kwa mazu ngenanga. Ateŵeti anyaki aku Chiuta, awere vuli. Ivi viwoneka asani asankha nchitu, masambiru ngapachanya, vinthu vakuliŵavu kweniso nyengu yo amaliya pa masaza ndi vinthu vakusangaruska. Akhristu anyaki avuka chifukwa cha masuzgu nga zuŵa ndi zuŵa. Mwaviyo, jifumbeni kuti: ‘Kumbi ini ndichita wuli pankhani yeniyi? Kumbi vo ndisankha vilongo kuti mtima wangu we pa vinthu nivi?’

4. (a) Nchinthu wuli cho Paulo wangurombe Akhristu a ku Filipi, nanga nchifukwa wuli? (b) Kumbi tikambiskanengenji m’nkhani iyi kweniso yakulondopu, ndipu nchifukwa wuli?

⁴ Akhristu a ku Filipi, akhumbikanga kuchita phamphu kuti alutirizgi kuŵika uteŵeti waku Chiuta pa malu ngakwamba mu umoyu wawu. Wakutumika Paulo, wanguwona kuti kwenga kwakukhumbika kurombe Akhristu a ku Filipi, kuti ‘apanikizgi cho nchamampha.’ (Ŵerengani Ŵafilipi 1:9-11.) Akhristu anandi mu nyengu yaku Paulo, angulongo chiganga pakupharazga mazu ngaku Chiuta. (Ŵaf. 1:12-14) Mwakuyana ŵaka, mazuŵa nganu anandi mwaku isi tipharazga Mazu ngaku Chiuta mwachiganga. Mwaviyo, asani tilunguruka pa vinthu vo vifiskika sonu mu gulu laku Yehova, kungatiwovya kuŵika mtima widu wosi pa nchitu yakukhumbika ukongwa yakupharazga. M’nkhani iyi, tikambiskanengi vo Yehova wachita kuti wafiski mazu nga pa Mateyu 24:14. Kumbi gulu laku Yehova lichitanji, nanga isi ndi mabanja ngidu tichiskika kuchitanji? M’nkhani yakulondopu, tikambiskanengi cho chingatiwovya kuti tikunthiyepu kweniso tilutirizgi kwende limoza ndi gulu laku Yehova.

5, 6. (a) Nchifukwa wuli Yehova wangulongo chiwona cha mo gulu laki litende kuchanya? (b) Kumbi Ezekiele wanguwonanji?

⁵ Pe vinthu vinandi vo Yehova wakukhumba cha kuti vilembeki m’Mazu ngaki. Mwakuyeruzgiyapu, iyu wakutikonkhoske cha mo wongu wa munthu ndipuso chilengedu chigwiriya nchitu chinanga kuti vatingi viŵengi vakukondwesa ukongwa! M’malu mwaki, Yehova wakutipaska nkhani zo zititiwovya kuziŵa vo iyu wakhumba kweniso kuti vo tichita vikoliyanengi ndi khumbu laki. (2 Tim. 3:16, 17) Nchinthu chakukondwesa ukongwa kuti Bayibolo lititikonkhoske mo gulu laku Yehova la kuchanya liliri. Tikondwa asani tiŵerenga vo wakulemba Yesaya, Ezekiele ndipuso Danyele kweniso nkhani ya mu Chivumbuzi chaku Yohane, ya mo Yehova watendese vinthu kuchanya. (Yes. 6:1-4; Ezek. 1:4-14, 22-24; Dan. 7:9-14; Chiv. 4:1-11) Ve nge kuti, Yehova watitijuliya kuchanya kuti tiwoni vo vichitika. Nchifukwa wuli wakutipaska nkhani zenizi?

⁶ Yehova wakhumbanga kuti tingaluwanga cha kuti nasi te mu gulu laki. Gulu laku Yehova la kuchanya lichita phamphu ukongwa kuchita khumbu laku Chiuta. Mwakuyeruzgiyapu, Ezekiele wanguwona gulu laku Yehova la kuchanya lo lawonekanga nge gareta likulu. Gareta lenili, layendanga ndipuso lasinthanga ko layanga mwaliŵi ukongwa. (Ezek. 1:15-21)  Ilu latchimbiyanga ukongwa ndipu Ezekiele wanguwona so yo Wayendesanga. Iyu wangukamba kuti: “Ndinguwona ulaka nkhugadima kwa mkuŵa, nge nkhawonekeru ka motu zingirizgi; . . . yanga ndingu ngenga mawonekeru nga chikozgu cha unkhankhu wa Ambuya [Yehova].” (Ezek. 1:25-28) Ezekiele watenere kuti wanguchita mantha wati wawona chiwona chenichi. Iyu wanguwona Yehova wachilongozga gulu laki mwakugwiriskiya nchitu mzimu wakupaturika. Kayendelu ka gareta lenili, kalongo umampha mo Yehova walongozge gulu laki la kuchanya.

7. Nchifukwa wuli chiwona chaku Danyele chititiwovya kuja ndi chigomezgu?

⁷ Danyele wanguwona so chiwona cho chititiwovya kuja ndi chigomezgu. Iyu wanguzomerezgeka kuwona Yehova yo wawonekanga nge ‘wa Mazuŵa nga Mwaka,’ iyu wanguja pampandu wa chifumu wo wenga nge mulipu wa motu. Mpandu wa chifumu, wenga pachanya pa mukombelu. (Dan. 7:9) Yehova wakhumbanga kuti Danyele wawoni kuti gulu laku Yehova liluta panthazi, kung’anamuwa kuti lifiska khumbu laki. Danyele wanguwona so “yumoza wakukozgana ndi mwana wa munthu,” Yesu, yo wangupaskika udindu wakulongozga gulu laku Yehova la pacharu chapasi. Muwusu waku Khristu, ngwa kanyengu kamanavi cha, kweni ndi “muwusu wamuyaya, wo kuti umarengi cha. Ndipu ufumu waki kuti ubwangandukengi cha.” (Dan. 7:13, 14) Chiwona chenichi, chititichitiska kugomezga Yehova kweniso kuziŵa vo wafiska. Yehova wakupereka “mtufu, unkhankhu, ndi ufumu,” ku Mwana waki Yesu, yo wanguyeseka ndipuso wanguzomerezgeka. Iyu watimugomezga Mwana waki, nasi titenere so kugomezga muwusu waku Yesu.

8. Kumbi chiwona chakutuliya kwaku Yehova chingumuchiska wuli Ezekiele ndi Yesaya, nanga isi tisambiranjipu?

 ⁸ Kumbi chiwona cha mo gulu la kuchanya laku Yehova litende chititichiska wuli? Nge Ezekiele, tichiskika ndi vo Yehova wachita. (Ezek. 1:28) Kulunguruka pa vo gulu laku Yehova la kuchanya lichita, kungatiwoyva kuti nasi tichitepu kanthu nge mo wanguchitiya Yesaya. Wati wapaskika mwaŵi kuti wakakambiyi anyaki vo Yehova wachita, wanguzomera mwambula kuzeleza. (Ŵerengani Yesaya 6:8.) Iyu wangugomezga kuti Yehova wamuwovyengi kumalana ndi masuzgu ngo watingi wakumanengi nangu. Mwakuyanana ŵaka ndi Yesaya, nasi tichiskika kuti tiwovyengi gulu laku Yehova mwakuchita vinandi mu uteŵeti. Nchinthu chakuchiska ukongwa kuziŵa kuti gulu lenili, liluta mbwenu panthazi ndipu likhumba kuti mpaka lifiski vo Yehova wakhumba.

9, 10. Nchifukwa wuli gulu laku Yehova la pacharu chapasi ndakukhumbika?

⁹ Kuporote mu Mwana waki, Yehova wajalikiska gulu laki pacharu chapasi lo lichita vinthu mwakukoliyana ndi gulu la kuchanya. Nchifukwa wuli gulu la pacharu chapasi likhumbika kufiska nchitu yo yikukambika pa Mateyu 24:14? Tiyeni tikambiskani vifukwa vitatu ivi.

¹⁰ Chakwamba, Yesu wangukamba kuti akusambira ŵaki azamupharazga mpaka “ku vigoti va panu pasi.” (Mac. 1:8) Chachiŵi, gulu lenili latingi liziperekengi ulongozgi wa m’Bayibolo ndipuso kuzichiska ŵanthu wo atingi azigwirengi nchitu yakupharazga. (Yoh. 21:15-17) Chachitatu, latingi liziwovyengi apharazgi kuti aziwunganengi pamoza kusopa Yehova ndipuso kuzisambizika mo angazigwiriya nchitu yakupharazga. (Ŵah. 10:24, 25) Kuti vinthu vosi ivi vifiskiki, pakhumbikanga ulongozgi. Mwaviyo, kuti akulondo Khristu afiski venivi, nchitu yawu yakhumbikanga kulongozgeka umampha.

11. Kumbi isi tilongo wuli kuti tikoliyanaku ndi ulongozgi wo gulu laku Yehova lipereka?

¹¹ Kumbi isi tilongo wuli kuti tikoliyanaku ndi ulongozgi wo gulu laku Yehova lipereka? Nyengu zosi, tikhumbika kugomezga abali wo Yehova ndi Yesu aŵasankha kuti alongozgengi nchitu yakupharazga. Abali ŵenaŵa, atingi agwiriskiyengi nchitu nyengu ndi nthazi zawu kuti amalani ndi masuzgu ngo akumana nangu m’charu ichi, kweni yiwu achita viyo cha. Tiyeni tikambiskani cho gulu laku Yehova la pacharu chapasi liŵikapu mtima ukongwa.

12, 13. Kumbi ŵara achikhristu afiska wuli nchitu yawu, nanga nchifukwa wuli venivi vakuchiska kwaku imwi?

¹² Ŵara akwenere wo ŵe pacharu chosi chapasi, aŵikika kuti awovyi kulutiska panthazi nchitu yakupharazga uthenga wa Ufumu mu vyaru vo ateŵete. Asani akhumba kusankha vinthu, apenja ulongozgi kutuliya m’Mazu ngaku Chiuta ngo atingawona nge ‘nyali yaku marundi ngawu ndi ukweru wa nthowa yawu,’ ndipu aromba kwaku Yehova ndi mtima wosi kuti waŵalongozgi.—Sumu 119:105; Mat. 7:7, 8.

¹³ Nge mo achitiyanga ŵara a mu nyengu ya akutumika, mazuŵa nganu ŵara achikhristu wo alongozga nchitu yakupharazga atijipereka “pa uteŵeti wa Mazu.” (Mac. 6:4) Yiwu akondwa ukongwa chifukwa chakuluta panthazi kwa nchitu yakupharazga uthenga wamampha mu madera ngo ateŵete kweniso pacharu chosi chapasi. (Mac. 21:19, 20) Ŵara ŵenaŵa, ajalikiska marangu nganandi cha ndipuso nthowa zo yiwu aŵanaŵana. M’malu mwaki, asani akhumba kuchita vinthu vakovya nchitu yakupharazga kuti yiluti panthazi, yiwu alondo vo Malemba kweniso  mzimu wakupaturika ulongozga. (Ŵerengani Machitidu 15:28.) Asani achita viyo, abali ŵenaŵa alongo chakuwoniyapu chamampha ku ŵanthu wosi mumpingu.—Ŵaef. 4:11, 12.

14, 15. (a) Kumbi ndi nchitu nizi zo zikunozgeke kuti zitiwovyi pa nchitu yakupharazga pacharu chosi chapasi? (b) Kumbi mutiwuwona wuli mwaŵi wo mwenawu wakovya nchitu yakupharazga uthenga wa Ufumu?

¹⁴ Pe nchitu zinandi zo ŵanthu atiziwona cha zo zigwirika nyengu zosi nge, nchitu yakunozga nkhani zo zilembeka m’mabuku, nkhani za mawunganu nga mpingu ndipuso ngakulungakulu. Ŵanthu anandi agwira nchitu yakufwatuliya mabuku mwaphamphu mu vineneru vakujumpha 600, kuti ŵanthu anandi asambiri “vinthu vikulu vaku Chiuta,” kuziya mu vineneru vawu. (Mac. 2:7-11) Abali ndi azichi, asindikiza ndi kupanga mabuku mwakugwiriskiya nchitu makina ngo ngagwira nchitu mwaliŵi ukongwa. Mabuku ngenanga, ngatumizika mumpingu yosi kusazgapu yo ye kumizi.

¹⁵ Pe nchitu zinandi zo zikunozgeka kuti zitiwovyi kuŵika mtima widu wosi pa nchitu yakupharazga uthenga wamampha limoza ndi mpingu widu. Mwakuyeruzgiyapu, pe ŵanthu masawuzandi nganandi wo akujipereka pa nchitu yakuzenga Nyumba za Ufumu, Malu Ngakuchitiyapu Unganu, atovya ŵanthu wo akwaskika ndi ngozi za chilengedu pamwenga wo akhumbika chovyu cha kuchipatala mwaliŵi. Pe so anyaki wo anozga unganu wapade, wadera ndi wachigaŵa ndipuso asambiza ŵanthu wo asere sukulu zachikhristu. Tazumbuwapu ŵaka nchitu zimanavi pa nchitu zosi zo zichitika. Nchifukwa wuli ŵara agwira nchitu zenizi? Nchitu zenizi zilutiska panthazi uthenga wamampha wa Ufumu, zititiwovya kuti tiluti panthazi mu uneneska kweniso zitovya ŵanthu anandi kuti aje ateŵeti aku Yehova. Kukamba uneneska, gulu laku Yehova la pacharu chapasi laja lichiŵika mtima pa vinthu vakukhumbika ukongwa.

16. Kumbi ndi nkhani niyi ya m’Bayibolo yo imwi pamwenga banja linu mwawona kuti mungasambira?

¹⁶ Kumbi nyengu zosi tisaniya nyengu yakulunguruka pa vo gulu laku Yehova lichita? Ŵanthu anyaki afufuza ndi kulunguruka pa vo gulu lichita asani achita kusopa kwa pabanja pamwenga asani achita sambiru la pakuŵija. Vingaŵa vakukondwesa ukongwa kusambira chiwona chaku Yesaya, Ezekiele, Danyele ndi Yohane. Pe mabuku nganyaki ndipuso ma DVD ngo ngakonkhoska nkhani zinandi zakukondwesa zakukwaskana ndi gulu laku Chiuta.—Jehovah’s Witnesses—Proclaimers of God’s Kingdom.

17, 18. (a) Kumbi mwayanduwa wuli ndi sambiru lenili? (b) Kumbi ndi mafumbu nanga ngo tikhumbika kungaŵanaŵaniya?

¹⁷ Kulunguruka pa vo Yehova wafiska kuziya mu gulu laki, nkhwamampha kwaku isi. Tiyeni limoza ndi gulu laku Yehova, tisimikizgi kuti tiŵikengi mtima widu wosi pa cho nchamampha. Asani tichita viyo, tijengi akukhwima ndipu tiyesesengi kuchita vo Paulo wangulemba kuti: “Pakuŵa nawu uteŵeti wenuwu, uli ndimo tarondere lisungu laku Chiuta, kuti tidembereka cha.” (2 Ŵakor. 4:1) Iyu wanguchiska so Akhristu anyaki kuti: ‘Tingavukanga cha pakuchita cho nchamampha: chifukwa pa nyengu yaki . . . tikavunanga, asani tareka kuropwa.’​—Ŵag. 6:9.

¹⁸ Kumbi pe vinthu vinyaki vo tikhumbika kusintha pakutija pamwenga nge banja, kuti tisimikizgiyi cho nchakukhumbika pa vo tichita zuŵa ndi zuŵa? Kumbi tingayesa kuleka kuja ndi vinthu vinandi vo vingatitimbanyizga kuti tileki kuŵika mtima widu wosi pa nchitu yakupharazga? M’nkhani yakulondopu, tikambiskanengi vinthu vinkhondi vo vitiwovyengi kuti tichitengi vinthu mwakukoliyana ndi gulu laku Yehova.