Ndingugula vidya vakumbiya sumu ndipu ndingwambisa gulu lakumba sumu. Pati pajumpha nyengu yimanavi, ini ndini ndenga mulongozgi wa gulu la akumba ŵenaŵa. Asani nditumba, ndachitanga vinthu nge ndafuntha. Chifukwa chakuti gulu lidu lakumba lenga lakofya kweniso tawonekanga mwachiuzgauzga, kamana ndi kamana lingwamba kutchuka. Mwaviyo, ŵanthu anandi azanga kuzivwisiya sumu zidu. Tingujambula sumu zimanavi ndipu ŵanthu anguyiyanja ukongwa sumu yakumaliya yo tingujambula. Kukumaliya kwa 1980, tinguluta ku United States kuti tikasaniyi ndalama zakuwovye gulu lidu kuti liluti panthazi. Tati tafika, tingumba sumu zidu mu malu ngamanavi ku New York ndi ku Los Angeles ndipu techendawere ku Finland, tinguziŵana ndi ŵanthu anyaki wo aziŵanga ukongwa kumba sumu.

Chinanga kuti ndakondwanga kuja mu gulu ili, kweni ndakhumbanga kuti ndikondwengi ukongwa pa umoyu wangu. Ndatinkhananga ndi jalidu la maphara kweniso la nkhaza lo ŵanthu akumba sumu ŵenga nalu ndipuso ndinguguŵa chifukwa cha jalidu langu lauzeleza. Ndawonanga kuti ndenga munthu muheni ukongwa ndipu ndawopanga kuti chiuta wazakundiwotcha ndi motu. Ndinguyesesa kusaniya kwamuka m’mabuku ngakupambanapambana nga visopa. Ndarombanga ukongwa kwaku Chiuta kuti wandiwovyi chinanga kuti, ndawonanga kuti wangakondwa cha ndi chechosi cho ndingachita.

Ndingumukambiya Kaboni yo wandisambizanga Bayibolo kuti, ndikhumba kuchijambulisa sumu zenizi pe ndipu pavuli paki ndazamukwamba kugwiriskiya nchitu fundu za m’Bayibolo pa umoyu wangu. Iyu wangumuka kanthu cha kweni wangundikambiya ŵaka kuti ndiŵerengi mazu ngaku Yesu ngo nge pa Mateyu 6:24. Vesi ili likamba kuti: “Palivi yumoza waziŵa kuteŵete ambuya ŵaŵi.” Ndinguzizwa ukongwa ndati ndaziŵa vo Yesu wang’anamuwanga. Pati pajumpha mazuŵa ngamanavi, yo wandisambizanga Bayibolo ndiyu sonu wanguzizwa. Ndingumukambiya kuti ndaleka kumba chifukwa chakuti ndikhumba kulondo Yesu.

Bayibolo lenga nge gilasi chifukwa linguvumbuwa vinthu viheni vo ndachitanga. (Yakobe 1:22-25) Ndinguwona kuti ndenga wankhaza, wakujikuzga ndipu mijalidu yangu yosi yenga yambula kukhumbirika. Ndatukanga, ndachitanga ndewu, ndakweŵanga foja ndipuso ndamwanga moŵa mwa uroŵevu. Ndati ndaziŵa kuti mijalidu yangu yikolerana cha ndi fundu za m’Bayibolo, ndingujilenge lisungu ukongwa. Chinanga kuti kwenga kwakusuzga kuleka vo ndachitanga kweni ndakhumbisiskanga kusintha.​—Ŵaefesu 4:22-24.

Pakwambiriya ndenga ndi chitima ukongwa chifukwa cha vinthu viheni vo ndachitanga. Kweni Kaboni yo wandisambizanga wangundiwovya ukongwa. Wangundilongo vo Bayibolo likamba pa Yesaya 1:18, kuti: “Chingana uheni winu ungaŵa wakuchesama, ukaŵanga utuŵa nge ndi nyankhuŵinda.” Vesi lenili ndipuso mavesi nganyaki nga m’Bayibolo, ngangundichontha kuvwa kuti Ada ŵidu akuchanya mbalisungu ndipu akhumbisiska kuchizga vilonda va ŵanthu wo alapa asani abuda.

Ndati ndaziŵa Yehova ndi kumwanja, ndakhumbanga kujipatuliya kwaku iyu. (Sumu 40:8) Ndingubatizika mu 1992, pa unganu wa vyaru wa Akaboni aku Yehova wo unguchitikiya mumsumba wa St. Petersburg ku Russia.

Asani ndenga Kaboni waku Yehova cha, mphanyi sonu ndikufwa. Kuvuli uku, ndakumananga ndi masuzgu ngakupambanapambana ndipuso ngakulungakulu. Sonu nde nadi ndi likondwa ndipu ndiwona kuti chechosi che umampha pa umoyu wangu.