Fiskani Udindu Winu Wakupharazga
Fiskani Udindu Winu Wakupharazga
“Chita mlimu wa evangeli, fiska uteŵeti waku.”—2 TIM. 4:5.
KUMBI MUNGAMUKA WULI?
Kumbi mbayani wo nchakuwoniyapu chamampha pa nkhani yakupharazga uthenga wamampha?
Nchifukwa wuli tikhumbika kupharazgiya ŵanthu uthenga wamampha?
Kumbi tingachita wuli kuti tije apharazgi alusu?
1. Nchifukwa wuli Yehova wakambika kuti ndiyu wenga wakwamba kweniso wakuruska wosi kupharazga uthenga wamampha?
YEHOVA CHIUTA, ndiyu wenga wakwamba kweniso wakuruska wosi kupharazga uthenga wamampha. Adamu ndi Eva ŵati abuda ŵaka, Yehova wangupharazga uthenga wamampha wakuti njoka, yo ndi Satana Diabolo wazamubayika. (Chiy. 3:15) Kwa vyaka mahandiredi nganandi, Yehova wangukambiya ŵanthu akugomezgeka kuti alembi nkhani zakukwaskana ndi mo wazamutoweske zina laki, mo wazamutuzgiyapu masuzgu ngo Satana wachitiska ndipuso mo ŵanthu angazijaliya ndi umoyu wamuyaya wo Adamu ndi Eva akutaya.
2. (a) Kumbi angelu agwira nchitu wuli? (b) Kumbi Yesu wakulongo chakuwoniyapu wuli kwa apharazgi?
2 Angelu nawu mbapharazgi. Yiwu apharazga uthenga wamampha ndipuso atovya anyaki kuwupharazga. (Luka 1:19; 2:10; Mac. 8:26, 27, 35; Chiv. 14:6) Kumbi Mikaeli, mungelu mura, nayu wapharazganga? Pa nyengu yo Yesu wenga pacharu chapasi, wangulongo chakuwoniyapu chamampha kwa apharazgi. Iyu wangupharazga uthenga wamampha pa umoyu waki wosi.—Luka 4:16-21.
3. (a) Kumbi ndi uthenga wuli wamampha wo tipharazga? (b) Kumbi tikambiskanengi mafumbu nanga ngakukhumbika?
3 Yesu wakulanguliya akusambira ŵaki kuti apharazgengi. (Mat. 28:19, 20; Mac. 1:8) Wakutumika Paulo wanguchiska Timote, yo wateŵetiyanga nayu limoza kuti: “Chita mlimu wa evangeli, fiska uteŵeti waku.” (2 Tim. 4:5) Kumbi ndi uthenga wuli wamampha wo tipharazga? Uthenga wenuwu, usazgapu kukambiya ŵanthu uneneska wakuti Yehova, Awuskefwi akuchanya, atitanja. (Yoh. 3:16; 1 Pet. 5:7) Ufumu waku Chiuta, ulongo kuti Yehova watanja ŵanthu. Mwaviyo, tikondwa kuŵakambiya ŵanthu kuti, wosi wo athera ku Ufumu wenuwu, avwiya Chiuta kweniso achita vinthu vaurunji, angaja pa ubwezi wamampha ndi iyu. (Sumu 15:1, 2) Yehova wakhumba kuti watuzgepu masuzgu ngosi ngo ngachitika chifukwa chambula urunji. Iyu wazamuchitiska kuti ŵanthu azileki kusuzgika maŵanaŵanu chifukwa cha kukumbuka masuzgu ngo akumananga nangu. Uwu ndi uthenga wamampha ukongwa! (Yes. 65:17) Chifukwa chakuti tipharazga, tiyeni tikambiskani mafumbu ngakukhumbika ngaŵi yanga: Nchifukwa wuli tikhumbika kupharazgiya ŵanthu uthenga wamampha mazuŵa nganu? Nanga tingachita wuli kuti tipharazgengi mwalusu?
CHO TIPHARAZGIYA UTHENGA WAMAMPHA
4. Kumbi ndi nkhani nizi zaboza zakukwaskana ndi Chiuta zo ŵanthu akambirika nyengu zinyaki?
4 Yeruzgiyani kuti munthu munyaki watikupusikani kuti awiskemwi akukuthaŵani. Ndipu wakamba so kuti, mbakujanja, mbakufwatuka cha, mbankhaza ndipuso akufwa, mwaviyo palivi chifukwa chakuŵafufuziya. Mwakuyanana ŵaka, ŵanthu anandi akambirika nkhani nge zenizi zakukwaskana ndi Chiuta. Asambizika kuti iyu angamuvwisisa cha, angamuziŵa cha kweniso ngwankhaza. Mwakuyeruzgiyapu, alongozgi anyaki avisopa akamba kuti Chiuta wazamutombozga ŵanthu aheni ndi motu kwamuyaya. Anyaki akamba kuti Chiuta ndiyu wachitiska ngozi za chilengedu zo zichitiska kuti ŵanthu asuzgikengi. Chinanga kuti ngozi zachilengedu zibaya ŵanthu amampha ndi aheni, kweni ŵanthu akamba kuti nchilangu chakutuliya kwaku Chiuta.
5, 6. Kumbi chisambizu chakuti vinthu vikuchita kusambuka kweniso visambizu vaboza, vachitiska kuti ŵanthu achitenji?
5 Anyaki agomezga kuti Chiuta kulivi. Mwakukoliyana ndi nkhani iyi, ŵanaŵaniyani nkhani yakuti vinthu vikuchita kusambuka. Ŵanthu wo azomerezga fundu yeniyi akamba kuti vinthu vikuchita kulengeka cha, yiwu akamba kuti kulivi Chiuta. Anyaki akamba kuti munthu wakutuliya ku nyama ndipu tingazizwanga cha asani ŵanthu achita vinthu vankhaza kweniso mwambunu nge nyama. Anyaki akamba kuti vichitika ŵaka vija kuti ŵanthu anthazi achitiyengi nkhaza ŵanthu ambula nthazi. Ndichu chifukwa chaki anandi agomezga kuti vinthu vambula urunji vilutiriyengi kuchitika. Mwaviyo, ŵanthu wo agomezga kuti vinthu vikuchita kusambuka alivi chilindizga cheneku.
6 Kukamba uneneska, nkhani yakuti vinthu vikuchita kusambuka kweniso visambizu vaboza, vachitiska kuti ŵanthu akumanengi ndi masuzgu nganandi m’mazuŵa ngakumaliya. (Ŵar. 1:28-31; 2 Tim. 3:1-5) Visambizu venivi, vitiŵazisiya uthenga wamampha cha ŵanthu. M’malu mwaki, nge mo wakutumika Paulo wangukambiya, vachitiska kuti ŵanthu aleki kuŵanaŵana umampha ndipuso ‘agaukeku ku umoyu waku Chiuta.’ (Ŵaef. 4:17-19) Kusazgiyapu pa venivi, chisambizu chakuti vinthu vikuchita kusambuka kweniso visambizu vaboza vachitiska kuti ŵanthu aleki kuvwisiya uthenga wamampha wakutuliya kwaku Chiuta.—Ŵerengani Ŵaefesu 2:11-13.
7, 8. Kumbi ndi nthowa niyi yo yingawovya ŵanthu kuti aziŵi uthenga wamampha?
7 Asani ŵanthu akhumba kuja pa ubwezi ndi Chiuta, chakwamba akhumbika kuziŵa vo Bayibolo lisambiza. Tikhumbika kuŵawovya kuti aziŵi kwamuka kwa mafumbu ngo ŵe nangu ngakukwaskana ndi Chiuta. Mwaviyo, tingagwiriskiya nchitu kabuku kakuti, Uthenga Wamampha Wakutuliya Kwaku Chiuta. Mwakuyeruzgiyapu, tingakambiskana nawu mafumbu yanga, Kumbi akufwa tazakuŵawona so? Kumbi Chiuta wazomerezgiyanji vinthu viheni ndi masuzgu?
8 Kusambira Bayibolo ndi nthowa yija yo yingawovya ŵanthu kuti aziŵi uthenga wamampha waku Chiuta ndipuso khumbu laki. Te ndi udindu ukulu wakuwovya ŵanthu kuti asaniyi kwamuka kwa mafumbu ngawu. Kuti tiŵawovyi umampha, tikhumbika cha kuŵakonkhoske ŵaka fundu kweni tikhumbika kuŵachitiska kuti agomezgengi vo titiŵakambiya. (2 Tim. 3:14) Tingachita viyo, mwakuchita vo Yesu wachitanga. Nchinthu wuli cho wachitanga kuti ŵanthu agomezgi vo wakambanga? Iyu wafumbanga mafumbu mwalusu. Kumbi tingamulondo wuli?
APHARAZGI ALUSU AGWIRISKIYA NCHITU UMAMPHA MAFUMBU
9. Kumbi tikhumbika kuchitanji kuti tiwovyi ŵanthu kuti aje pa ubwezi ndi Chiuta?
9 Nchifukwa wuli tikhumbika kugwiriskiyanga nchitu mafumbu nge mo Yesu wachitiyanga asani tipharazga? Tiyeruzgiyi kuti mutama ndipu dokotala watikukambiyani kuti muchilengi asani wangakuchitani upaleshoni. Panyaki mungagomezga vo wakamba. Kumbi vingaŵa wuli asani wangakamba kuti wakuchiteni upaleshoni wechendakufumbeni mo muvwiya mu liŵavu linu? Kukamba uneneska, kungaŵa kwakusuzga kumugomezga. Chinanga kuti wangaŵa ndi lusu, iyu wakhumbika dankha kukufumbani ndi kuvwisiya vo mukonkhoska wechendakupangeni upaleshoni. Mwakuyanana ŵaka, asani tikhumba kuti tiwovyi ŵanthu kuti avwisiyi uthenga wamampha wa Ufumu, tikhumbika kuziŵa mo tingafumbiya mafumbu mwalusu. Tingawovya ŵanthu pijapija asani tingaziŵa vo yiwu akhumbika kuwovyeka.
10, 11. Kumbi kusambiza nge mo Yesu wachitiyanga kungatiwovya wuli?
10 Yesu waziŵanga kuti kufumba mafumbu mwalusu kutovya musambizi kumuziŵa umampha wakusambira waki ndipuso kutovya wakuvwisiya kuti wamukengepu. Mwakuyeruzgiyapu, pa nyengu yo Yesu wasambizanga akusambira ŵaki nkhani yakujiyuyuwa, chakwamba wanguŵafumba fumbu lo linguŵawovya kuŵanaŵana. (Marko 9:33) Yesu wangufumba Petro mafumbu ngakupambanapambana kuti wamuwovyi kuŵanaŵana dankha wechendamuki. (Mat. 17:24-26) Nyengu yinyaki, Yesu wakhumbanga kuziŵa vo venga mumtima wa akusambira ŵaki, iyu wanguŵafumba mafumbu ngakupambanapambana. (Ŵerengani Mateyu 16:13-17.) Yesu wachitanga kuŵakambiya cha ŵanthu vo akhumbikanga kuchita. Mo waŵafumbiyanga, vachitiskanga kuti ŵanthu avwisiyengi uthenga wamampha ndi kusintha umoyu wawu.
11 Asani tifumba mafumbu mwalusu nge mo Yesu wachitiyanga, ndikuti tichita vinthu vitatu ivi: Tiziŵa vo tingachita kuti tiwovyi umampha ŵanthu, timuki ŵanthu wo atitisuska kweniso tisambizi ŵanthu wo akhumba kuvwisiya mo angayanduliya asani asambira. Tiyeni tikambiskani vakuyeruzgiyapu vitatu vo vilongo mo tingagwiriskiya nchitu mafumbu mwalusu.
12-14. Kumbi mungamuwovya wuli mwana winu kuti waleki kuchita mantha pakupharazga uthenga wamampha? Kambani chakuyeruzgiyapu.
12 Chakuyeruzgiyapu chakwamba: Kumbi mungachita wuli asani mwana winu watopa kukambiskana ndi anyaki ku sukulu za vo wagomezga? Kumbi mungamuwovya wuli kuti waŵapharazgiyengi mwambula mantha? M’malu mwakumukalipiya pamwenga kumukambiya ŵaka fundu zakuti wakakambi, mungamufumba mafumbu ngo ngangamuwovya kuti wakonkhoski vo waŵanaŵana nge mo Yesu wachitiyanga. Kumbi mungachita wuli venivi?
13 Muŵerenge limoza ndi mwana winu nkhani zinyaki zo ze mu kabuku kakuti, Uthenga Wamampha Wakutuliya Kwaku Chiuta. Mungawona mitu ya nkhani yo ye ku umaliru kwa kabuku kenaka ndipu fumbani mwana winu mutu wo wamukondwesa ukongwa. Muchiskeni kuti wakonkhoski vifukwa vo wakambiya kuti mutu wo ngwakukondwesa kweniso wakambi mo wangakonkhoske ku ŵanthu anyaki.—Ŵar. 12:2.
14 Mukambiyeni mwana winu kuti wakakonkhoske munyaki kusukulu nge mo mwakambiskiyana nayu. Iyu wakafumbi vo munyaki wa kusukulu wagomezga pa nkhani yo. Mwakuyeruzgiyapu, wakamupemphi kuti waŵerengi ndimi 2, mu Sambiru 6, pavuli paki wakafumbi fumbu la ndimi yo, lo lititi, Kumbi nchinthu wuli cho chichitika asani munthu wafwa? Iyu wakafumbi so kuti, “Kumbi Lazaro wati wayuskika ndi Yesu, wangukamba kuti wanguwonanji wati wafwa?” Panyaki, munyaki wa kusukulu wangachimuka kuti palivi cho wangukamba. Ndipu mwana winu wangachikamba kuti, “Vo wamuka vauneneska, sonu kumbi chingaŵa chazeru cha kugomezga kuti vo Bayibolo likamba vauneneska, kuti asani munthu wafwa waziŵa kanthu kekosi cha?” Kuti mwana winu wakakambiskani ndi anyaki mwambula mantha vo wagomezga, mutenere kuyesere vo wamukamba. Asani musambiza mwana winu kuti wagwiriskiyengi nchitu mafumbu mwalusu, mumuwovyengi kuti waje mupharazgi walusu.
15. Kumbi tingachita wuli kuti timuki ŵanthu wo agomezga kuti masuzgu ngo ŵanthu akumana nangu, nchilangu chakutuliya kwaku Chiuta?
15 Chakuyeruzgiyapu chachiŵi: Nyengu zinyaki tingakumana ndi munthu yo wagomezga kuti masuzgu ngo ŵanthu akumana nangu, nchilangu chakutuliya kwaku Chiuta. Tingamufumba mwaulemu chifukwa cho wagomezge viyo. Asani tavwa mo wamukiya, tingamukambiya kuti tiziŵa kuti wakuŵanaŵaniyapu ukongwa pa vo wagomezga. Pavuli paki, tingamupempha kuti asani wangayanja wakaŵerengi kabuku ko kakonkhoska vifukwa vo Chiuta wazomerezge kuti vinthu viheni ndipuso masuzgu vichitikengi. Asani wazomera, tingamupaska kabuku kakuti, Uthenga Wamampha Wakutuliya Kwaku Chiuta. Tikhoza kumufika pa mtima ndi uthenga wamampha asani tingamupharazgiya mwalusu kweniso kumufumba mwaulemu.
16. Nchifukwa wuli tikhumbika cha kuzomerezga kuti wakusambira widu nyengu zosi wamukengi mwakuchita kuŵerenga?
16 Chakuyeruzgiyapu chachitatu: Nchinthu wuli chingachitika asani munthu yo tisambira nayu Bayibolo, nyengu zosi wamuka mwakuchita kuŵerenga kutuliya m’buku? Asani tingamuzomerezga kuchita viyo, wangaluta panthazi cha. Nchifukwa wuli tikamba viyo? Chifukwa chakuti wakusambira yo wamuka mafumbu mwakuchita kuŵerenga kwambula kulunguruka, wangayanana ndi chimiti cho misisi yaki yikusere ukongwa cha pasi. Munthu waviyo, wangalutirizga cha kusambira asani ŵanthu atimususka. (Mat. 13:20, 21) Kuti ivi vileki kuchitika, tikhumbika kufumba wakusambira widu mo wawone vo wasambira. Yesesani kuziŵa asani wagomezga nadi vo wasambira. Tikhumbika kumufumba kuti wakonkhoski chifukwa cho wagomezge pamwenga cho waleke kugomezge vo wasambira. Pavuli paki, timuwovyi kuti wamukengi vinthu kutuliya m’Malemba ndi chilatu chakuti kamana ndi kamana waziŵengi kuti vo wasambira vituliya m’Bayibolo. (Ŵah. 5:14) Asani tigwiriskiya nchitu mafumbu mwalusu, ŵanthu wo titiŵasambiza akhoza kuja ndi chigomezgu chakukho ndipuso ajengi akunozgeka kumuka ŵanthu wo atiŵasuska pamwenga wo angaŵalandizga. (Ŵakol. 2:6-8) Nchinthu wuli chinyaki cho tingachita kuti tifiski udindu widu wakupharazga?
APHARAZGI ALUSU AWOVYANA
17, 18. Asani mupharazga limoza ndi munyinu, kumbi mungawovyana wuli?
17 Yesu wangutumiza akusambira ŵaki kuti akapharazgi ndipu wanguŵagaŵa ŵaŵi ŵaŵi. (Marko 6:7; Luka 10:1) Pavuli paki, wakutumika Paulo wangukamba za ŵanthu wo wapharazgiyanga nawu limoza kuti, “anchitu anyangu.” (Ŵaf. 4:3) Mu 1953, gulu lingunozga nthowa yapade yakuti apharazgi awovyengi anyawu mu uteŵeti.
18 Asani mupharazga limoza ndi Mkhristu munyinu, kumbi mungawovyana wuli? (Ŵerengani 1 Ŵakorinte 3:6-9.) Pa nyengu yo munyinu waŵerenga lemba, namwi mujulengi Bayibolo linu. Muvwisiyengi vo munyinu pamwenga mweneku wanyumba wakamba. Muyilondongi umampha nkhani yo akambiskana, kuchitiya kuti mumuwovyi munyinu asani mweneku wanyumba wasuska. (Wak. 4:12) Chinanga kuti ve viyo kweni ziŵani ivi: Mungamutimbanyizganga cha munyinu pa nyengu yo wakonkhoska fundu zakuvwika umampha kweniso asani mweneku wanyumba wakamba. Asani mungatimbanyizga vo akambiskana, mukhoza kuguŵiska munyinu ndipuso kutimbanyizga mweneku wanyumba. Nyengu zinyaki mungachita umampha kumukapu. Asani mumukapu mutenere kukamba fundu yimoza pamwenga ziŵi mwakudumuwa. Pavuli paki, munyinu walutirizgi vo wakambanga.
19. Kumbi tikhumbika kukumbukanji, nanga nchifukwa wuli?
19 Nanga mungawovyana wuli asani mupharazga nyumba ndi nyumba? Asani muluta panyumba yinyaki, kambiskanani mo mungachikambiya panyumba yo muluta. Mutenere cha kukambiskananga fundu zambula kuchiska zakukwaskana ndi ŵanthu a m’chigaŵa cho mupharazgaku. Mwakuyanana ŵaka, tikhumbika cha kukambanga za mijalidu yiheni ya abali ndi azichi asani te mu uteŵeti. (Nthanthi 18:24) Titenere kuziŵa kuti tosi te viyaŵi va dongu. Yehova wakutichitiya lisungu ukongwa, wakutipaska nchitu yakuzirwa, yo mbuteŵeti wakupharazga uthenga wamampha. (Ŵerengani 2 Ŵakorinte 4:1, 7.) Mwaviyo, tiyeni tosi tilongo kuti tiwonga nchitu yeniyi, mwakuyesesa kufiska udindu widu wakupharazga.
[Mafumbu]
[Chithuzi papeji 7]
[Fundo yo yakonkhoskeka papeji 9]
Kuti tiŵafiki pa mtima akuvwisiya ŵidu tikhumbika kuŵachitiska kuti agomezgi vo titiŵakambiya
[Chithuzi papeji 10]
Kufumba mafumbu mwalusu kungawovya ŵanthu kuziŵa vifukwa vo agomezge viyo
[Chithuzi papeji 10]
Kufumba mafumbu mwalusu kungawovya kuti tiŵafiki pa mtima ŵanthu wo titiŵapharazgiya ndipuso aŵanaŵanengi ndi kugomezga vo taŵapharazgiya
[Chithuzi papeji 10]
Kufumba mafumbu mwalusu kungaŵawovya kuti agomezgengi kuti vo asambira vituliya m’Bayibolo
