VO ANYAKI AKAMBA: “Chifukwa chakuti Chiuta ndiyu wawusa charu, ndikuti ndiyu ŵachitiska ngozi zachilengedu, mwaviyo ngwankhaza.”

VO BAYIBOLO LIKAMBA: “Charu chosi chira mu nthazi ya muheni yo.” (1 Yohane 5:19) Kumbi “muheni yo” ndi yani? Bayibolo litimukamba kuti ndi Satana. (Mateyu 13:19; Marko 4:15) Kumbi venivi vawuneneska? Ŵanaŵaniyani fundu iyi: Asani Satana ndiyu wawusa charu ichi, ndikuti ndiyu wachitiska ŵanthu kuti aje ndi jalidu la kujanja, la mbunu ndipuso achitengi vinthu mwambula zeru nge mo iyu wachitiya. Venivi vititiwovya kuziŵa kuti ndichu chifukwa chaki ŵanthu ananga vachilengedu pacharu chapasi. Ŵanthu wo aziŵa za chilengedu akamba kuti kuleka kuphwere chilengedu kutovya kuti ngozi zichitikengi. Ivi vingachitiska kuti kuchitikengi ngozi zinandi pamwenga vingachitiska kuti ŵanthu asuzgikengi ukongwa ndi ngozi zachilengedu.

Nanga Chiuta watimuzomerezgiyanji Satana kuti wachitengi vinthu vinandi viheni? Kuti timuki fumbu ili, tiyeni tikumbuki vo vinguchitika apapi widu akwamba ŵati akana kuti Chiuta waŵawusengi. Kwambiya kali ŵanthu anandi aja achilondo vo Adamu ndi Eva anguchita. Kukana muwusu waku Chiuta, kukuchitiska kuti ŵanthu wosi pacharu chapasi aje m’manja mwaku Satana, yo watinkhana ndi Chiuta. Ndichu chifukwa chaki Yesu wakukamba kuti Satana ndi “fumu ya charu chinu.” (Yohane 14:30) Kumbi iyu wawusengi mpaka muyaya? Awa!

Yehova * wakondwa cha ndi masuzgu ngo Satana wachitiska mazuŵa nganu. Kukamba uneneska, Chiuta wachita chitima ukongwa chifukwa cha masuzgu ngo ŵanthu akumana nangu. Mwakuyeruzgiyapu, pa masuzgu ngosi ngo Ayisraele angukumana nangu, Bayibolo likamba mo Chiuta wanguvwiya kuti: “Mu kuyuzgika kwawu kosi iyu nayu wanguyuzgika.” (Yesaya 63:9) Chifukwa cha lisungu, Chiuta wanozga kuti watuzgengepu muwusu wankhaza waku Satana pambula kuswera yapa! Chiuta wasankha Mwana waki, Yesu Khristu kuti wazije Fumu yamampha ndipuso ya urunji mpaka muyaya.

MO VITIKUKWASKIYANI: Muwusu waku Satana watondeka kuvikiliya ŵanthu ku ngozi zachilengedu kweni muwusu waku Yesu wazakuŵavikiliya. Nyengu yinyaki Yesu wanguvikiliya akusambira ŵaki ku chimphepu chikulu. Bayibolo likamba kuti: “Wanguyichenya mphepu, ndipu wanguyinene nyanja, ‘Chetama ja bata!’ Ndipu mphepu yingureka, ndipu kunguŵa bata likuru.” Akusambira ŵaki angufumba kuti: “Njani mwenuyu na, pakuti chingana ndi mphepu ndi nyanja yitimuvwiya?” (Marko 4:37-41) Nkhani iyi yititovya kugomezga kuti Yesu wazamuvikiliya ŵanthu wosi wo avwiya panyengu yo wazamuwusa nge Fumu.—Danyele 7:13, 14.