NKHANI YA PAPEJI LAKWAMBA

KUMBI muwona kuti fumbu lo le papeji lakwamba la magazini iyi ndakuziziswa ukongwa? Ŵanthu anyaki awona kuti Chiuta ngwankhaza cha penipo anandi aziŵa cha asani Chiuta ngwankhaza pamwenga ngwambula nkhaza. Nchifukwa wuli tikamba viyo?

Ŵanthu anyaki wo akupozomoka pa ngozi za chilengedu, afumba kuti: “Nchifukwa wuli Chiuta wazomereza kuti ngozi zenizi zichitikengi? Kumbi iyu vitimukwaska cha? Pamwenga ngwankhaza?”

Anyaki avwisisa cha asani aŵerenga Bayibolo. Ukongwa asani aŵerenga nkhani ya Zandi wa mu nyengu yaku Nowa, yiwu afumba kuti, ‘Nchifukwa wuli Chiuta wachanju wangubaya ŵanthu wosi yaŵa? Kumbi iyu ngwankhaza?’

Kumbi nyengu zinyaki mukujifumbapu mafumbu ngenanga? Kumbi muwona kuti mungatondeka kumuka ŵanthu wo aŵanaŵana kuti Chiuta ngwankhaza? Mwemosi mo vingaŵiya, ŵanaŵaniyani fumbu ili lo lingakuwovyani.

NCHIFUKWA WULI TITINKHANA NDI NKHAZA?

Tingakamba kuti, titinkhana ndi nkhaza chifukwa chakuti tiziŵa chamampha ndi chiheni. Taŵanthu tipambana ukongwa ndi nyama chifukwa chakuti Chiuta wakutilenga “mu chikozgu cha mweneku.” (Chiyambo 1:27) Kumbi venivi ving’anamuwanji? Iyu wakutilenga munthowa yakuti tilongongi mijalidu yaki, mijalidu yamampha kweniso tiziŵengi chamampha ndi chiheni. Ŵanaŵaniyani fundu iyi: Chiuta wakutipaska zeru zakuziŵiya chamampha ndi chiheni, ndichu chifukwa chaki titinkhana ndi nkhaza. Kumbi venivi vilongo cha kuti Chiuta watinkhana ndi nkhaza?

Bayibolo lititisimikizgiya kuti asani isi titinkhana ndi nkhaza ndikuti Chiuta nayu watinkhana nazu ukongwa. Iyu wakamba kuti: ‘Nthowa zangu zapachanya kuruska nthowa zinu ndi maŵanaŵanu ngangu kuruska maŵanaŵanu nginu.’ (Yesaya 55:9) Asani tingakamba kuti Chiuta ngwankhaza, ndikuti tisuska vo Bayibolo likamba ndipu tichita nge tikamba kuti nthowa zidu zapachanya kuluska nthowa zaki. Vingaŵa vazeru kufufuza dankha umamphaumampha techendaŵanaŵani viyo. Titenere cha kukamba kuti Chiuta ngwankhaza kweni panyaki tingakhumba kuziŵa chifukwa cho vinthu vinyaki vo iyu wachita viwoneka nge kuti ngwankhaza. Kuti tivwisisi, tiyeni tikambiskani vo mazu ngakuti “nkhaza” ngang’anamuwa.

Asani tikamba kuti munthu munyaki ngwankhaza, ting’anamuwa kuti we ndi vilatu vamampha cha. Munthu wankhaza ndi mweniyo wakondwa asani wawona ŵanthu anyaki asuzgika pamwenga yo waleka kutoliyaku kanthu za masuzgu ngawu. Mwaviyo, asani ada alanga mwana wawu munthurumi chifukwa chakuti akhumba ŵaka kumusuzga, ndikuti mbankhaza. Kweni asani atimulanga kuti amusambizi pamwenga amuvikiliyi ndikuti mbamampha. Nyengu zinandi tiziŵa cha chifukwa cho ŵanthu achitiya vinthu vinyaki, mwaviyo, nkhwambula kusuzga kuŵayeruzga mwambula kwenere nge mo ŵanthu anyaki anguchitiya nasi.

Tiyeni tikambiskani vifukwa viŵi vo vichitiska ŵanthu anyaki kuŵanaŵana kuti Chiuta ngwankhaza. Pe ngozi zachilengedu zo zichitika mazuŵa nganu ndipuso nkhani za m’Bayibolo zo zikonkhoska mo Yehova wangulangiya ŵanthu. Kumbi fundu zenizi zilongo kuti Chiuta ngwankhaza?

[Chithuzi papeji 3]

Tikuwa kuti tichitiyengi ŵanthu lisungu, titinkhengi nkhaza