Kumbi Titenere Kuromba kwa Atuŵa Mtima?

KUMBI walipu munthu yo wechendakumanepu ndi masuzgu, ndi kuluta ku munyaki kuti wamuwovyi? Mwakukoliyana ndi masuzgu ngo takumana nangu, tingasankha munthu yo titimuwona kuti ngwalisungu ndipuso wakukumanapu ndi masuzgu ngo takumana nangu. Asani munthu ngwalisungu ndipuso wakukumanapu ndi masuzgu, iyu wangaja bwezi lakukhumbirika.

Anyaki angawona so viyo pa nkhani ya rombu. M’malu mwakuromba kwaku Chiuta yo yiwu awona kuti ngwapachanya ndipuso ngwakofya, aŵanaŵana kuti nkhwamampha kuromba kwaku yumoza wa atuŵa mtima. Yiwu akamba kuti atuŵa mtima akukumanapu ndi mayeseru nganandi ndipuso masuzgu ngo ŵanthu anandi akumana nangu. Mwaviyo, yiwu angaja alisungu ukongwa. Mwakuyeruzgiyapu, ŵanthu wo vinthu vawu vakukhumbika ukongwa vasoŵa, atanja kuromba kwaku Anthony “Mutuŵa Mtima” wa ku Padua, yo aŵanaŵana kuti wangaŵawovya kuti asaniyi katundu wawu ndipuso vinthu vo aŵabiya. Asani akhumba kurombe nyama yo yatama, asankha kuromba kwaku Francis “Mutuŵa Mtima” wa ku Assisi ndipuso asani awona kuti palivi chamampha cho angasaniya chifukwa cha masuzgu ngo akumana nangu, aromba kwaku Jude Thaddeus “Mutuŵa Mtima.”

Kumbi tingaziŵa wuli asani nkhwakwenere kuromba ku atuŵa mtima mwakukoliyana ndi Malemba? Chifukwa chakuti m’marombu ndimu tikonkhoska vo tikhumba kwaku Chiuta, tikhumbika kuziŵa asani Chiuta wavwisiya nadi marombu ngidu. Ndipuso tikhumbika kujifumba kuti: Kumbi Chiuta watiŵawona wuli ŵanthu wo aromba kwa atuŵa mtima?

VO BAYIBOLO LIKAMBA PA NKHANI YA KUROMBA KWA ATUŴA MTIMA

Ŵanthu aromba kwa atuŵa mtima chifukwa chakuti Chisopa cha Katolika, chisambiza kuti ŵanthu atenere kuromba kuporote mwa atuŵa mtima. Fundu yo ŵe nayu njakuti, “asani munthu yo waŵeyere kwaku Chiuta ndi murunji ndikuti wakhoza kuwovya munthu yo wakhumbika chovyu.” (New Catholic Encyclopedia) Mwaviyo, munthu yo waromba kwa atuŵa mtima wagomezga kuti rombu laki limukikengi chifukwa chakuti ndiwu ŵe ndi udindu wakuŵeyere kwaku Chiuta.

Kumbi Bayibolo lisambiza venivi? Anyaki akamba kuti wakutumika Paulo, ndiyu wangwambisa kuti ŵanthu arombengi kwa atuŵa mtima kuziya mu vo wangulemba. Mwakuyeruzgiyapu, iyu wangulembe Akhristu a ku Roma kuti: “Kweni ndikuŵeyereni, mwa abali, pa chifukwa cha Ambuyafwi Yesu Khristu, ndi pa chifukwa cha chanju cha Mzimu . . . kuti mulimbiyi pamoza nani mu marombu kwaku Chiuta nga pa chifukwa changu.” (Ŵaroma 15:30) Kumbi Paulo wangung’anamuwa kuti warombengi kwaku Chiuta kuporote mwa Akhristu anyaki? Awa. Paulo walongonga kuti nkhwakwenere kupempha Mkhristu munyidu kuti watirombe kwaku Chiuta. Kweni fundu yeniyi njakupambana ukongwa ndi fundu yakuti ŵanthu arombengi ku munthu munyaki yo agomezga kuti we kuchanya ndi chilatu chakuti waperekengi  marombu ngawu kwaku Chiuta. Nchifukwa wuli tikamba viyo?

Mu Uthenga Wamampha waku Yohane, Yesu wangukamba kuti: ‘Ini ndini nthowa, ndi uneneska wo, ndi umoyu wo; kuti yumoza wangaza kwa Ada cha, kwambula kuti watuziya mwaku ini.’ (Yohane 14:6) Iyu wangukamba so kuti: “Ada akupaskeningi chechosi cho mungapempha kuporote mu zina langu.” (Yohane 15:16, The New Jerusalem Bible) Yesu wakukamba cha kuti tirombengi kwaku iyu ndipu iyu ndiyu waperekengi marombu ngidu kwaku Chiuta. M’malu mwaki, kuti Chiuta wavwisiyengi marombu ngidu, tikhumbika kuromba kwaku iyu kuporote mwaku Yesu kweni ku munthu munyaki weyosi cha.

Akusambira aku Yesu ŵati amufumba kuti waŵakambiyi mo angarombiyanga, iyu wangumuka kuti: “Penipo muromba, nenani, ‘Ada, lipatuliki zina linu.’” (Luka 11:2) Kukamba uneneska, “penipo” tiromba, tikhumbika kuromba kwaku Yesu cha kweni kwaku Chiuta. Mo tawone visambizu vaku Yesu vambula kusuzga, kumbi nkhwakwenere cha kukamba kuti marombu ngidu ngatenere kuluta kwaku Chiuta kuporote mwaku Yesu Khristu m’malu mwakuromba kuporote kwa “atuŵa mtima”?

Rombu ndakukhumbika ukongwa pakusopa kwidu ndipu kusopa munthu weyosi m’malu mwakusopa Chiuta, kukoliyana cha ndi vo Bayibolo lisambiza. (Yohane 4:23, 24; Chivumbuzi 19:9, 10) Ndichu chifukwa chaki titenere kuromba kwaku Chiuta pe.

KUMBI MUTENERE KOPA KUROMBA KWAKU CHIUTA?

Pa Upharazgi wa pa Phiri, Yesu wangukamba chakuwoniyapu cha mwana yo wapemphanga awiski chakurya. Kumbi awiski atingi amupaskengi mwa m’malu mwa chiŵandi? Pamwenga atingi amupaskengi njoka m’malu mwa somba? (Mateyu 7:9, 10) Mupapi wachanju wangachita cha venivi!

Ŵanaŵaniyani chakuwoniyapu cho che ndi fundu yakuyanana ya mo apapi awone vinthu. Tiyeruzgiyi kuti mwana winu watikupemphani chinthu cho watichikhumba ukongwa. Imwi mutanjana ukongwa ndi mwana winu ndipu nyengu zosi muja akufikirika. Pavuli paki, pachifukwa chambula kuziŵika, mwana winu wachita mantha kuti wakupempheni ndipu wakambiya munthu munyaki kuti wazikukambiyeni vo wakhumba. Kumbi mungavwa wuli? Nanga asani nyengu zosi wachita kutuma munthu kuti ndiyu wakukambiyeninga vo wakhumba ndipu viwoneka kuti wasinthengi cha vo wachita? Kumbi mukondwengi ndi nthowa yo wasankha yakuti wakambiskiyanengi namwi? Kukamba uneneska, mungakondwa cha! Apapi achanju akhumba ŵana ŵawu kuti akambiskanengi nawu masu ndi masu ndipuso ajengi akufwatuka kuŵapempha chechosi cho angakhumba.

Mwakugwiriskiya nchitu chakuwoniyapu cha mwana yo wapempha chakurya, Yesu wangukambiya gulu la ŵanthu kuti: ‘Viyo asani imwi chingana mwe aheni, muziŵa kupaska mipasku yamampha ku ŵana ŵinu, na uli ukongwa Awiskemwi akuchanya apaskengi vamampha ku ŵakuŵapempha?’ (Mateyu 7:11) Mwambula kukayika, mpapi wakhumbisiska kupaska mwana waki vinthu vamampha. Ada ŵidu akuchanya nawu akhumbisiska ukongwa kuvwisiya ndi kumuka marombu ngidu.

Chiuta wakhumba kuti tikambiskanengi ndi iyu murombu chinanga mpha nyengu yo tasuzgika maŵanaŵanu chifukwa cha vo tanangiska. Iyu watuma ŵanthu anyaki cha kuti ndiwu avwisiyi marombu ngidu. Bayibolo lititichiska kuti: “Taya pa Ambuya mphingu yaku, ndipu yiwu akakuchirikizganga.” (Sumu 55:22) M’malu mwakuthembanga atuŵa mtima pamwenga munthu weyosi, tingachita umampha kumuwona mwakwenere Yehova Chiuta.

Ada ŵidu akuchanya aphwere weyosi pakuyija. Yiwu akhumba atiwovyi masuzgu ngidu ndipu atitidana kuti tindere kufupi nawu. (Yakobe 4:8) Ndisi akukondwa ukongwa kuti te ndi mwaŵi wakuromba kwaku Chiuta widu, yo mbawuskefwi, kweniso yo ‘wamuka marombu’!—Sumu 65:2.

[Chithuthuzi papeji 28]

[Chithuthuzi papeji 29]

Nge mo ada achanju achitiya ndi mwana wawu, Chiuta wakhumba kuti tikambiskanengi nayu