NKHANI YA PAPEJI LAKWAMBA: CHARU CHAMBULA SANKHU CHAZAMUŴAKU ZUKWANJI?

Sankhu Ndi Suzgu ya Pacharu Chosi

JONATHAN yo wakuwiya ku America kweni apapi ŵaki mba ku Korea, ŵanthu amuyanjanga cha wechemwana chifukwa wenga wa mtundu unyaki. Pa nyengu yo wakuwanga, wapenjanga kuja m’dera lo ŵanthu atingi alekengi kumutinkha chifukwa cha mo wawonekeyinga kweniso mtundu waki. Iyu wanguluta ku nkhondi kwa msumba wa Alaska, ku America, ko wagwiranga nchitu ya udokotala kweniso ko ŵanthu anandi wo waŵawovyanga awonekanga nge mo iyu wawoneke. Iyu wagomezganga kuti wakumanengi ndi masuzgu cha ku dera lenili.

Vosi vo iyu waŵanaŵananga vingumala panyengu yo wawovyanga munthukazi munyaki wa vyaka 25. Munthukazi mwenuyu wati wasisipuka, wangulereska Jonathan ndipu wangwamba kumunyoza kulongo kuti watinkhanga ŵanthu a ku Korea. Venivi vingumupweteka ukongwa Jonathan chifukwa chakuti waŵanaŵananga kuti ko wangusamiya watingi wakumanengi ndi ŵanthu ambula sankhu.

Vo vingumuchitikiya Jonathan vilongo kuti ŵanthu  mba sankhu. Viwoneka kuti kwekosi ko kwe ŵanthu kwe sankhu.

Chinanga kuti sankhu le peposi, kweni ŵanthu anandi athaŵiriya kukamba kuti jalidu lenili ndiheni. Kukamba uneneska, nkhwakusuzga kuvwisisa fundu yeniyi. Kumbi vingachitika wuli kuti cho ŵanthu atinkhana nachu chisanirikengi peposi? Vakuwoneke limu kuti ŵanthu anandi wo atinkhana ndi jalidu la sankhu atondeka kuziŵa kuti nawuso ŵe nalu. Kumbi ndimu vilili ndi imwi?

NKHANI IYI YIKWASKA MUNTHU WEYOSI

Kaya tiziŵa pamwenga cha, nkhwakusuzga kuziŵa kuti te ndi jalidu la sankhu mumtima mwidu. Bayibolo likonkhoska chifukwa chaki ndipu likamba kuti: “Mtima ngwakunyenga ukongwa kuluska chinthu chechosi.” (Yeremiya 17:9, Holman Christian Standard Bible) Mwaviyo, tingajipusika mwakuŵanaŵana kuti tikoliyanaku ndi ŵanthu a mitundu yosi. Pamwenga tingajiŵikiya kuvuli kuti te ndi vifukwa vakwenere vakuwone kuti mitundu yinyaki ya ŵanthu njambula kukhumbika.

Kuti tikonkhoski mo kuŵiya kwakusuzga kuziŵa kuti te ndi jalidu la sankhu, tiyeni tiyeruzgiyi kuti: Mutenda mwija mumsewu usiku. Anyamata ŵaŵi wo mwechendakumanepu nawu kali atuza kunthazi kwinu. Yiwu awoneka kuti mbanthazi ndipu yumoza wawoneka kuti wapinga chinthu kujanja.

Kumbi mungathaŵiriya kuŵanaŵana kuti akhumba kukupwetekani? Kukamba uneneska, vo mukukumanapu navu vingakuchitiskani kuti panyengu iyi muphwere, kweni kumbi vo mukukumanapu navu vingakuchitiskani kuŵanaŵana kuti anyamata ŵaŵi yaŵa akupwetekeningi? Fumbu linyaki lingaŵa lakuti, kumbi mungaŵanaŵana kuti ŵanthu ŵenaŵa mba mtundu nuwu? Vo mungamuka pa fumbu ili, vingalongo vo ve mu mtima mwinu. Vingalongo kuti mwe ndi jalidu la sankhu.

Kukamba uneneska, tikhumbika kuzomerezga kuti tosi nyengu zinyaki tija ndi sankhu mu nthowa zakupambanapambana. Chinanga ndi Bayibolo nalu lizomerezga kuti ŵanthu ŵe ndi jalidu la sankhu. Ilu likamba kuti: “Ŵanthu ayeruzga anyawu chifukwa cha mo awoneke.” (1 Samuele 16:7, Contemporary English Version) Pakuti tosi te ndi jalidu lenili lo kanandi lizisa masuzgu ngakulu, kumbi tigomezga kuti nyengu yinyaki tazamuleka kuja nalu? Kumbi pazamukuŵa nyengu yo tazamuwona kuti sankhu lamala pacharu chapasi?

[Bokosi papeji 3]

SANKHU NDI SUZGU YA PACHARU CHOSI CHAPASI

Canada: “Chinanga kuti boma likuzomerezga ndipuso likujalikiska marangu nganandi kuti ŵanthu a mitundu yakupambanapambana ajengi ndi wanangwa, kusankhana mtundu ndi nkhani yikulu ukongwa pa wanangwa wa ŵanthu.”—Amnesty International briefing on Canada, 2012.

Europe: “Ku Europe, ŵanthu 48 pa ŵanthu 100 awona kuti charu chawu chiŵikiyapu mtima cha kuti chimaliski kutinkhana.”—Intolerance, Prejudice and Discrimination: A European Report, 2011.

Africa: “Kubaya anthukazi kweniso kuŵatinkha, kuluta panthazi muvyaru vinandi.”—Amnesty International Report 2012.

Nepal: “Ŵanthu anyaki wo adanika kuti Adalit, (adanika so kuti “akufipiskika”) asuzgika ukongwa chifukwa cha sankhu ndipu apaskika ndalama zimanavi, azomerezgeka cha kucheza ndi ŵanthu a mitundu yinyaki kweniso kuchita midawuku yawu.”—Human Rights Watch World Report, 2012.

Kuvuma kwa Europe: “Ŵanthu wo adanika kuti Aromani, asani ŵe m’charu chawu atinkhika ndipu asani ŵe kucharu chinyaki atiŵapusikiya vinthu vakuti ndiwu cha achita, kweni ŵaraŵara andali akhumba cha kuŵawovya.”—The Economist, September 4, 2010.

[Bokosi papeji 4]

KUMBI SANKHU NCHINTHU WULI?

Ŵanthu akufufuza, asuzgika kukamba vo sankhu ling’anamuwa. Anyaki akamba kuti ling’anamuwa “kutinkha munthu chifukwa chakuti ngwa mtundu unyaki.” Anyaki akamba kuti ŵanthu aja ndi jalidu lenili “pa vifukwa vambula kuvwika,” vo vichitiska kuti “munthu watinkhengi gulu linyaki la ŵanthu pambula chifukwa.” Mwemosi mo vingaŵiya, ŵanthu aja ndi sankhu chifukwa cha mtundu, mo munthu wawoneke, chifukwa chakuti ndi munthukazi pamwenga munthurumi, chineneru, chisopa kweniso chechosi cho ŵanthu awona kuti apambana ndi anyawu.

[Chithuzi papeji 3]

[Chithuzi papeji 4]

Kumbi mungavwa wuli asani mungakumana ndi ŵanthu yaŵa usiku?