Yehova Ngwakugomezgeka Ndipuso Wagoŵoka

“Pakuti mwe amampha, Ambuya, ndi akugowoke; mwaŵakuzara chanju chakufikapu kwaku wosi wo adana kwaku imwi.”​—SALIMO 86:5.

KUMBI MUNGAKONKHOSKA?

Kumbi tingaja wuli akugomezgeka nge Yehova?

Kumbi tingaja wuli akugowoka nge Yehova?

Nchifukwa wuli mukhumba kulutirizga kuziŵa mijalidu yaku Yehova?

1, 2. (a) Nchifukwa wuli tiwona kuti mabwezi ngakugomezgeka kweniso ngakugoŵoka ngakuzirwa? (b) Kumbi tikambiskanengi mafumbu nanga?

 KUMBI bwezi la uneneska tingalikonkhoska wuli? Mzichi munyaki zina laki Ashley wakukamba kuti: “Ini ndiwona kuti bwezi launeneska ndi munthu yo ngwakunozgeka kundovya ndipuso watindigowoke asani ndanangisa.” Tosi tiwona kuti mabwezi ngakugomezgeka kweniso ngakugowoka ngakuzirwa. Mabwezi ngaviyo, ngatitiwovya kuja ndi likondwa chifukwa chakuti tiziŵa kuti ngatitanja ndipu nyengu zosi ngatiwovyengi.—Nthanthi 17:17.

² Yehova ndi Bwezi lakugomezgeka kweniso lakugowoka kuluska bwezi le losi lo tingaŵa nayu. Wakulemba sumu wakukamba kuti: “Mwe amampha, Ambuya, ndi akugowoke; mwaŵakuzara chanju chakufikapu [chanju chambula kumala] kwaku wosi wo adana kwaku imwi.” (Sumu 86:5) Kumbi kuja wakugomezgeka ndipuso wakugowoka kung’anamuwanji? Kumbi Yehova walongo wuli mijalidu yamampha yeniyi? Ndipu tingalondo wuli chakuwoniyapu chaki? Kwamuka kwa mafumbu ngenanga, kutiwovyengi kuziŵa mo tingachitiya kuti timuyanjengi ukongwa Yehova kweniso tiyanjengi abali ndi azichi ŵidu.—1 Yoh. 4:7, 8.

YEHOVA NGWAKUGOMEZGEKA

3. Kumbi kugomezgeka kung’anamuwanji?

³ Kugomezgeka ndi jalidu lamampha lo lisazgapu kujipereka ndipuso kovyana nyengu zosi. Munthu wakugomezgeka wasintha cha. M’malu mwaki, walutirizga kwanjana ndi mubwezi waki chinanga mpha nyengu ya masuzgu. Kukamba uneneska, Yehova “ngwakugomezgeka” kuruska weyosi.​—Chiv. 16:5, NW.

4, 5. (a) Kumbi Yehova walongo wuli kuti ngwakugomezgeka? (b) Kumbi tichiskika wuli asani tiŵanaŵaniya mo Chiuta wachitiya vinthu mwakugomezgeka?

⁴ Kumbi Yehova walongo wuli kuti ngwakugomezgeka? Iyu  waleka cha kuŵawovya ateŵeti ŵaki akugomezgeka. Yumoza wa ateŵeti ŵenaŵa wenga Fumu Davidi, iyu wanguchitiya ukaboni kuti Yehova ngwakugomezgeka nadi. (Ŵerengani Sumu 101:6.) Pa nyengu yo Davidi wakumananga ndi masuzgu, Yehova wanguleka cha kumulongozga, kumuvikiriya kweniso kumutaska. (2 Sam. 22:1) Davidi wanguziŵa kuti Yehova wakamba ŵaka cha kweni wachita nadi vinthu mwakugomezgeka. Nchifukwa wuli Yehova wangumuchitiya vinthu Davidi mwakugomezgeka? Chifukwa chakuti nayu wenga ‘wakugomezgeka.’ Yehova watanja ateŵeti ŵaki akugomezgeka ndipu watiŵapaska vitumbiku chifukwa chakugomezgeka.—Nthanthi 2:6-8.

⁵ Tichiskika asani tiŵanaŵaniya kugomezgeka kwaku Yehova. Mubali munyaki yo wateŵete mwakugomezgeka zina laki Reed, wakukamba kuti: “Ndiwovyeka asani ndiŵerenga nkhani za mo Yehova wanguchitiya ndi Davidi pa nyengu yo wangukumana ndi masuzgu. Chinanga kuti Davidi wathaŵangathaŵanga, wajanga ku mphanji ndipuso ku dondu kweni nyengu zosi Yehova wamuvikiriyanga. Venivi vakuchiska ukongwa! Vitindikumbuska kuti kaya suzgu yingaŵa yikulu wuli, kaya yingawoneka kuti yimalengi cha kweni Yehova wandiwovyengi asani ndilutirizga kuja wakugomezgeka kwaku iyu.” Mwambula kukayika, namwi so muwona viyo.—Ŵar. 8:38, 39.

6. Kumbi ndi nthowa nizi zinyaki zo Yehova walongore kuti ngwakugomezgeka, nanga ateŵeti ŵaki ayanduwa wuli?

⁶ Kumbi ndi nthowa nizi zinyaki zo Yehova walongore kuti ngwakugomezgeka? Iyu wachita vinthu mwakukoliyana ndi fundu zaki. Iyu watitisimikizgiya kuti: ‘Chingana ndi mu ukhongwi winu ndini iyu [ndisintha cha].’ (Yes. 46:4) Ivi vilongo kuti nyengu zosi wachita vinthu mwakukoliyana ndi fundu zaki ndipu fundu zaki zisintha cha. (Mal. 3:6) Kusazgiyapu pa fundu yeniyi, Yehova walongo kuti ngwakugomezgeka chifukwa wafiska vo walayizga. (Yes. 55:11) Mwaviyo, ateŵeti wosi akugomezgeka ayanduwa chifukwa chakuti iyu ngwakugomezgeka. Kumbi tingayanduwa mu nthowa wuli? Asani titesesa kulondo fundu zaku Yehova, tingaja ndi chigomezgu kuti iyu wafiskengi vo wakutilayizga kuti watitumbikengi.—Yes. 48:17, 18.

JANI AKUGOMEZGEKA NGE YEHOVA

7. Kumbi ndi nthowa niyi yo tingalongole kuti ndisi akugomezgeka nge Yehova?

 ⁷ Kumbi tingaja wuli akugomezgeka nge Yehova? Nthowa yimoza yakuchitiya venivi, nkhuwovya wo akumana ndi masuzgu. (Nthanthi 3:27) Mwakuyeruzgiyapu, kumbi pe Mkhristu munyinu yo muziŵa kuti wadandawula chifukwa cha kutama, kususkika ndi a m’banja laki pamwenga chifukwa cha vinthu vo watondeka kufiska? Yesesani kwamba ndimwi kumuwovya, mukambiyeni ‘mazu ngamampha ndipuso ngakusangaruska.’ (Zek. 1:13) a Asani mungachita viyo, mulongo kuti ndimwi akugomezgeka kweniso bwezi launeneska, lo ‘limeremete kuruska mubali.’—Nthanthi 18:24.

8. Kumbi tingaja wuli akugomezgeka nge Yehova, mwakuyeruzgiyapu, m’banja?

⁸ Tingaja so akugomezgeka nge Yehova asani tilutirizga kuŵachitiya vinthu mwauneneska ŵanthu wo titiŵayanja. Mwakuyeruzgiyapu, asani tikuto pamwenga kuyirwa tiziŵa kuti titenere kuja akugomezgeka ku munthu yo tikutolana nayu. (Nthanthi 5:15-18) Mwaviyo, tikhumbika cha kwambiya dala kusere munthowa yo yingatilongozge ku ureŵi. (Mat. 5:28) Kusazgiyapu pa venivi, tilongo kuti ndisi akugomezgeka kwa Akhristu anyidu asani tikana jalidu lakusuza pamwenga kukamba boza, kukambanga nkhani ziheni zakukwaska Akhristu anyidu ndipuso chinanga nkhuzivwisiya.—Nthanthi 12:18.

9, 10. (a) Kumbi tikhumbika kuja akugomezgeka ukongwa kwaku yani? (b) Nchifukwa wuli kuvwiya marangu ngaku Yehova kungaŵa kwakusuzga nyengu zinyaki?

⁹ Kwakuruska vosi, tikhumbika kuja akugomezgeka kwaku Yehova nyengu zosi. Kumbi  tingachita wuli venivi? Tikhumbika kuyesesa kuwona vinthu nge mo Chiuta wativiwone, kwanja vo iyu watanja ndi kutinkha vo iyu watinkhana navu kweniso kuja ndi mijalidu yamampha. (Ŵerengani Sumu 97:10.) Asani tichita vinthu mwakukoliyana ndi mo Yehova waŵanaŵaniya, tikhumbisiskengi kuvwiya marangu ngaki.—Sumu 119:104.

¹⁰ Mbuneneska kuti nyengu zinyaki kungaŵa kwakusuzga kuvwiya marangu ngaku Yehova. Tikhumbika kuyesesa kuja akugomezgeka. Mwakuyeruzgiyapu, abali ndi azichi anyaki angakhumba kuto pamwenga kuyirwa kweni ŵechendasaniyi munthu wakwenere kuti atolani nayu mu gulu laku Yehova. (1 Ŵakor. 7:39) Vingachitika kuti muzichi wagwira nchitu ndi ŵanthu wo mbakaboni cha, ndipu yiwu angamulongo anthurumi amampha kuti wasankhepu yo wangatolana nayu. Mbuneneska kuti panyaki muzichi yo wachita phukwa chifukwa chambula kuyirwa, kweni watesesa kulutirizga kuja wakugomezgeka kwaku Yehova. Kumbi tiwonga cha chakuwoniyapu chamampha ukongwa cha viyo chakugomezgeka? Yehova wazamutumbika wosi wo aja akugomezgeka kwaku iyu chinanga kuti akumana ndi masuzgu.​—Ŵah. 11:6..

YEHOVA WAGOŴOKA

11. Kumbi kugowoka kung’anamuwanji?

¹¹ Kugowoka, ndi jalidu linyaki lamampha lo Yehova we nalu. Kumbi kugowoka kung’anamuwanji? Kanandi, munthu wagowoka asani yo wamulakwiya walapa ndi mtima wosi. Kuchita viyo, nkhuzomerezga cha vo munthu yo wanangiska pamwenga kuleka kukhumba kulongo kuti vinthu vo vikuchitika nadi. M’malu mwaki, iyu wasankha kuti waleki kusunga vifukwa mumtima. Malemba ngasambiza kuti Yehova ngwakunozgeka ‘kugowoke’ ŵanthu wo alapa nadi.—Sumu 86:5.

12. (a) Kumbi Yehova walongo wuli kuti wagowoka? (b) Kumbi maubudi nga munthu ‘ngasisitika’ wuli?

¹² Kumbi Yehova walongo wuli kuti wagowoka? Iyu wagowoka “kwakuzala,” kung’anamuwa kuti wagowoka ndi mtima wosi ndipu wativikumbuka so cha vo tanangisa. (Yes. 55:7) Tiziŵa wuli kuti Yehova wagowoka ndi mtima wosi? Ŵanaŵaniyani fundu yo ye pa Machitidu 3:19.  (Ŵerengani.) Wakutumika Petro wanguchiska wo amuvwisiyanga kuti, ‘ang’anamuki . . . ndipuso anyongoki.’ Asani munthu yo wabuda wang’anamuka pamwenga kuti walapa nadi, watijisuska kuti vo wanguchita venga viheni. Mwaviyo, iyu watesesa kuleka kuchita so ubudi. (2 Ŵakor. 7:10, 11) Munthu yo walapa mwauneneska, ‘wanyongoka,’ kuleka nthowa yaki yiheni ndi kwamba kuchita vinthu vo vikondwesa Chiuta. Asani ŵanthu wo avwiskiyanga Petro angulapa mwauneneska, nchinthu wuli cho chatingi chichitikengi? Petro wangukamba kuti maubudi ngawu ngatingi ‘ngasisitikengi.’ Mwaviyo asani Yehova wagowoka, wasisitiya limu nge mo asisitiya pa sileti. Iyu wagowoka ndi mtima wosi.—Ŵah. 10:22; 1 Yoh. 1:7.

13. Kumbi mazu ngakuti, “uheni [ubudi] wawu kuti ndikawukumbukanga so cha” ngatitisimikizgiyanji?

¹³ Kumbi tiziŵa wuli kuti asani Yehova wagoŵoka wativikumbuka so cha vo tabuda? Ŵanaŵaniyani uchimi waku Yeremiya wo ukamba za phanganu lifya, lakukwaskana ndi Akhristu akusankhika ndipu lichitiska kuti wosi wo agomezga sembi yaku Yesu agowokereki maubudi ngawu. (Ŵerengani Yeremiya 31:34.) Yehova wakukamba kuti: “Ndikagowokiyanga mautimbanyizgi ngawu, ndipu uheni [ubudi] wawu kuti ndikawukumbukanga so cha.” Mwaviyo, Yehova watitisimikizgiya kuti asani wagowoka, wazakutilanga so cha kunthazi chifukwa cha maubudi ngo tikuchita. Iyu wakumbuka so cha maubudi ngidu ndi chilatu chakuti watimbi mulandu pamwenga kutilanga nyengu yosi yo tananga. M’malu mwaki, iyu wagowoka ndi mtima wosi ndipu watingaluwa maubudi ngidu.—Ŵar. 4:7, 8.

14. Kumbi tingachiskika wuli asani tilunguruka zakuti Yehova wagowoke? Kambani chakuyeruzgiyapu.

¹⁴ Tingachiskika ukongwa asani tilunguruka za jalidu la kugowoka laku Yehova. Ŵanaŵaniyani chakuyeruzgiyapu ichi. Vyaka vinandi vajumpha, mzichi munyaki wangusezgeka mu mpingu. Pangujumpha vyaka vinandi kuti wawezgekiyemu. Iyu wangukamba kuti: “Chinanga kuti ndaŵanaŵananga kweniso ndakambiyanga ŵanthu anyaki kuti Yehova wakundigowoke, nyengu zosi ndawonanga kuti we kutali ndi ini kweni ŵanthu anyaki ndiwu ŵe nayu pafupi ndipuso amuwonanga kuti waliku nadi.” Chinanga kuti venga viyo, iyu wachiskikanga ukongwa asani waŵerenga ndi kulunguruka ntharika zo ze m’Bayibolo zo zilongo kuti Yehova wagowoka. Mzichi mwenuyu wangukamba so kuti: “Ndawonanga kuti Yehova watindanja kweniso ngwamampha kuruska mo ndamuwoniyanga kali.” Iyu wachiskikanga so ndi fundu yakuti: “Asani Yehova watigowoke maubudi ngidu, tikhumbika so cha kuŵanaŵana kuti ndisi akunanga pa umoyu widu wosi.” b Iyu wangukamba kuti: “Ndinguziŵa kuti ndagomezganga cha kuti Yehova wangandigowoke ndi mtima wosi ndipu ndaŵanaŵananga kuti ndijengi ndi mphingu yeniyi pa umoyu wangu wosi. Ndiziŵa kuti vito nyengu yitali, kweni ndayamba kuwona kuti ndingandere kufupi ndi Yehova ndipuso ndiwona kuti mphingu yikulu yatuwapu.” Nchakukondwesa kuti titeŵete Chiuta wachanju kweniso wakugowoka!—Sali. 103:9.

JANI AKUGOŴOKE NGE YEHOVA

15. Kumbi tingaja wuli akugowoke nge Yehova?

¹⁵ Tingaja akugowoke nge Yehova mwakugowokiyanga abali ndi azichi wo atinangiya asani alapa ndi mtima wosi. (Ŵerengani Luka 17:3, 4.) Mutenere kukumbuka kuti asani Yehova wagowoka, waluwa maubudi ngidu ndipu watingaŵanaŵana so cha. Asani tigowoke anyidu, nasi tikhumbika kuluwa vo anyidu atinangiya mwa kuleka kuzivikumbuka so kunthazi.

16. (a) Kumbi kuja wakugowoka kung’anamuwa kuti tizomerezga vo munthu watinangiya pamwenga kuti tikondwa asani ŵanthu anyaki atinangiya? Konkhoskani. (b) Kumbi tikhumbika kuchitanji kuti Chiuta watigowokiyengi?

 ¹⁶ Kuja wakugowoke kung’anamuwa kuti tizomerezga cha vo munthu watinangiya pamwenga kuti tikondwa cha asani ŵanthu anyaki atinangiya. M’malu mwaki, kung’anamuwa kuleka  kusunga vifukwa mumtima. Chinthu chakukhumbika ukongwa asani tikhumba kuti Chiuta watigowokiyengi nchakuti, nasi tilondongi chakuwoniyapu chaku Yehova pa nkhani ya kugowoke asani tichita vinthu ndi ŵanthu anyaki. (Mat. 6:14, 15) Kuruska vosi, chifukwa chakuti Yehova ngwalisungu, iyu wakumbuka kuti “te fuvu.” (Sumu 103:14) Mwaviyo, tikhumbika kuchitiya lisungu anyidu mwakuŵagowoke ndi mtima wosi.—Ŵaef. 4:32; Ŵakol. 3:13.

17. Kumbi nchinthu wuli cho chingatiwovya asani Mkhristu munyidu watiguŵiska?

 ¹⁷ Mbuneneska kuti nyengu zinyaki kugowoke nkhwakusuzga. Chinanga mbakhristu akusankhika a mu nyengu ya akutumika, angusuzgika kuti amaliski mphindanu pakati pawu. (Ŵaf. 4:2) Kumbi nchinthu wuli cho chingatiwovya asani Mkhristu munyidu watiguŵiska? Ŵanaŵaniyani nkhani yaku Jobu. Iyu wanguguŵa ukongwa pa nyengu yo “mabwezi” ngaki, Elifazi, Bildadi ndi Zophara amunyozanga. (Jobu 10:1; 19:2) Pakumaliya, Yehova wanguchenya mabwezi ngaboza ngaku Jobu. Chiuta wanguŵakambiya kuti aluti kwaku Jobu kuti akapereki sembi chifukwa cha maubudi ngawu. (Jobu 42:7-9) Kweni Yehova wakhumbanga so kuti Jobu wachitepu kanthu. Kumbi wakhumbikanga kuchitanji? Yehova wangukambiya Jobu kuti warombi m’malu mwa mabwezi ngaki ngaboza. Iyu wanguchita vo Yehova wangumukambiya ndipu wangumutumbika chifukwa cha mtima waki wakugowoke. (Ŵerengani Jobu 42:10, 12, 16, 17.) Kumbi isi tisambiranjipu? Asani tirombe ndi mtima wosi munthu yo watinangiya, vingatiwovya kuleka kumusungiya vifukwa.

LUTIRIZGANI KUZIŴA MIJALIDU YAKU YEHOVA

18, 19. Kumbi tingalutirizga wuli kuziŵa mijalidu yamampha yaku Yehova?

¹⁸ Tachiskika ukongwa chifukwa chakusambira mijalidu yamampha yakupambanapambana yaku Yehova. Tasambira kuti Yehova ngwakufikirika, walivi sankhu, ngwakupaska, ngwakoroŵa, ngwakugomezgeka ndipuso wagowoka. Kukamba uneneska, tasambira ŵaka mijalidu yimanavi ukongwa. Tazamukondwa kusambira mijalidu yinandi yaku Yehova kwamuyaya. (Wak. 3:11) Tizomerezgana ndi wakutumika Paulo yo wakulemba kuti: “Ndimba nayu ya usambasi wa zeru ndi so wa mziŵiru waku Chiuta.” Tingakamba so viyo pa mijalidu yinyaki yaku Chiuta nge chanju kweniso mijalidu 6 yo takambiskana mu nkhani zenizi.—Ŵar. 11:33.

¹⁹ Tiyeni tosi tilutirizgi kuziŵa mijalidu yamampha yaku Yehova mwakusambira, kulunguruka ndi kuyigwiriskiya nchitu pa umoyu widu. (Ŵaef. 5:1) Asani tichita viyo, mwambula kukayika tilutirizgengi kukoliyanaku ndi wakulemba sumu yo wakukamba kuti: “Kwaku ini, awa, naku nkhuzirwa kuŵa pafupi ndi Chiuta.”—Sumu 73:28.

[Mazu ngam’mphata]

[Mafumbu]

[Chithuthuzi papeji 19]

‘Pe bwezi lo limeremete kuruska mubali.’—Nthanthi 18:24 (Wonani pa  ndimi 7)

‘Mugowokiyanengi.’—Ŵaef. 4:32 (Wonani pa  ndimi 16)

[Chithuthuzi papeji 21]

Tirombengi kutuliya pasi pa mtima (Wonani pa  ndimi 17)