Kumbi Muŵanda Wamagomekezgeka Ndi Wakuwamu Ndiyani?
Kumbi Muŵanda Wamagomekezgeka Ndi Wakuwamu Ndiyani?
‘Na, ndiyani muŵanda wamagomekezgeka yo ndi wakuwamu [“wazeru,” NW], asi ndi mweniyo mbuyaki wamuŵika pa ŵa munyumba yaki?’—MAT. 24:45.
KUMBI MUNGASANIYA KWAMUKA?
Kumbi muŵanda wamagomekezgeka ndi wakuwamu ndiyani?
Kumbi a munyumba yaki mbayani, nanga Yesu wangumupaska zukwanji muŵanda wakugomezgeka udindu wakuŵawonere?
Kumbi Khristu wamupaskengi zukwanji muŵanda wakugomezgeka udindu wakuwonere vaki vosi, nanga nchinthu wuli chinyaki cho che mugulu la vaki vosi?
1, 2. Kumbi ndi nthowa niyi yo Yesu watitiliskiya mazuŵa nganu, nanga nchifukwa wuli tikhumbika kuyiziŵa?
“ABALI, ndingakwaniska cha kukamba nyengu zo ndaja ndichiŵerenga nkhani zo ndakhumbikiyanga kweniso pa nyengu yo ndazikhumbanga.” Mzichi munyaki wangukamba mazu yanga mukalata yaki yakuwonga, yo wangulembe abali wo agwira nchitu ku likulu lidu la pacharu chosi. Kumbi namwi muŵanaŵana viyo? Tanandi tikhoza kuŵanaŵana nadi viyo. Kumbi venivi vitenere kutiziziswa? Viŵi cha.
2 Chakurya cho tilonde pa nyengu yaki, mbukaboni wakuti Yesu yo ndi Mutu wa mpingu, walutirizga kufiska layizgu laki kuti watiliskengi. Kumbi wachita venivi kuziya mwaku yani? Pa nyengu yo wakonkhoskanga chisimikizgu cha kuŵapu kwaki, Yesu wangukamba kuti wazamugwiriskiya nchitu ‘muŵanda wamagomekezgeka yo ndi wakuwamu, kwachipaska chakurya pa nyengu yaki’ ku a munyumba yaki. a (Ŵerengani Mateyu 24:45-47.) Muŵanda wakugomezgeka ndiyu nthowa yo Yesu waliskiya akusambira ŵaki auneneska mazuŵa nganu ngakumaliya. Mwaviyo, tikhumbika kumuziŵa muŵanda wakugomezgeka. Kuti tilutirizgi kusambira ndipuso kuja pa ubwezi wakukho ndi Chiuta, vithemba pa muŵanda mwenuyu.—Mat. 4:4; Yoh. 17:3.
3. Kumbi mabuku ngidu ngakukonkhoskanji pa nkhani ya ntharika ya muŵanda wamagomekezgeka?
3 Kumbi tingachita wuli kuti tiziŵi ntharika yaku Yesu yakukamba za muŵanda wakugomezgeka? Mu nyengu yakuvuli, mabuku ngidu ngakukamba kuti: Pa Pentekoste wa mu 33 C.E., Yesu wangupaska muŵanda wakugomezgeka udindu wakuti wawoneriyengi a munyumba ya mbuyaki. Muŵanda, wamiya Akhristu akusankhika wosi wo akujapu kwambiya mu 33 C.E. ndipu a munyumba yaki, amiya so Akhristu ŵenaŵa weyosi pakuyija. Mu 1919, Yesu wakupaska muŵanda wakugomezgeka udindu wakuti wawoneriyengi “vaki vosi,” kung’anamuwa vinthu vosi vaku Yesu vo vitovya pa nchitu ya Ufumu ya pacharu chapasi. Kweni tati tasanda mwakuphwere ndipuso kuromba ndi kulunguruka, tawona kuti tikhumbika kuyikonkhoska so ntharika yaku Yesu yakukamba za muŵanda wamagomekezgeka ndi wakuwamu. (Nthanthi 4:18) Tiyeni tikambiskani ntharika yeniyi ndipu tiwoni mo yititikwaskiya, kaya tilindizga kuluta kuchanya pamwenga kuzihara charu chapasi.
KUMBI NTHARIKA YENIYI YIKUFISKIKA ZUKWANJI?
4-6. Nchifukwa wuli tingakamba kuti ntharika yaku Yesu ya muŵanda wamagomekezgeka yikwamba kufiskika pavuli pa chaka cha 1914?
4 Mo ntharika ya muŵanda wamagomekezgeka ndi wakuwamu yikonkhoskeke, vilongo kuti yikwamba kufiskika pa Pentekoste wa mu 33 C.E. cha, kweni mu nyengu yinu ya umaliru. Tiyeni tiwoni mo Malemba ngatiwovye kuziŵa fundu yeniyi.
5 Ntharika yeniyi nchigaŵa cha uchimi waku Yesu wo ukamba za “chisimikizgu cha uzi [‘kuŵapu kwaki,’ NW] . . . ndi cha umaliru wa mgonezi wo.” (Mat. 24:3) Chigaŵa chakwamba cha uchimi waku Yesu wo ukulembeka pa Mateyu 24:4-22 chifiskika mu nthowa ziŵi, kakwamba chikufiskika kutuliya mu 33 C.E. mpaka mu 70 C.E., kachiŵi, mu nyengu yidu yinu. Kumbi venivi ving’anamuwa kuti mazu ngaku Yesu ngakukamba za muŵanda wamagomekezgeka ngafiskikengi so mu nthowa ziŵi? Awa.
6 Chinanga kuti Yesu wangwamba kukamba mazu ngo nge pa Mateyu 24:29, wangukonkhoska dankha vo vatingi vichitikengi mu mazuŵa ngidu nganu. (Ŵerengani Mateyu 24:29, 30, 42, 44.) Pakukamba vo vazamuchitika pa chisuzgu chikulu, iyu wangukamba kuti ŵanthu ‘azamuwona Mwana wa munthu wachiza pa mitambu ya kuchanya.’ Pakukamba za ŵanthu a mu mazuŵa ngakumaliya, wangukamba kukhumbika kwakuja masu, iyu wanguti: ‘Mulivi kuziŵa zuŵa mwaku lenilo Ambuyamwi ŵaziyengi’ ndipuso ‘Mwana wa munthu wazengi mu ora lenilo mulivi kulunguruka.’ b Mu uchimi wenuwu, po Yesu wakambanga vinthu vo vazamuchitika mu mazuŵa ngakumaliya, wangukonkhoska so ntharika ya muŵanda wamagomekezgeka. Mwaviyo, tingakamba kuti mazuŵa ngakumaliya ngati ngayamba mu 1914, pavuli paki ndipu ntharika ya muŵanda wamagomekezgeka yo Yesu wangukamba yingwamba kufiskika. Fundu yeniyi njakuvwika. Nchifukwa wuli tikamba viyo?
7. Kumbi ndi fumbu lakukhumbika nili lo lengapu po nyengu yakuvuna yingwamba, nanga nchifukwa wuli?
7 Ŵanaŵaniyani fumbu ili kwa kanyengu kamanavi: ‘Na, ndiyani muŵanda wamagomekezgeka ndi wakuwamu?’ Mu nyengu ya akutumika, pengavi chifukwa chakufumbiya fumbu lenili. Nge mo tawone munkhani yaluta, akutumika achitanga vakuziziswa ndipuso awovyanga anyaki kuti achitengi vakuziziswa nge ukaboni wakuti awovyeka ndi Chiuta. (Mac. 5:12) Mwaviyo, pengavi chifukwa chakuti munthu wafumbiyi kuti, ndiyani yo wakusankhika ndi Khristu kuti waje muŵanda? Kweni vinthu vingusintha ukongwa mu 1914. Nyengu yakuvuna yingwamba m’chaka chenichi ndipu yenga nyengu yakutuzgiya duru mu tirigu. (Mat. 13:36-43) Nyengu yeniyi yati yayamba, penga fumbu lakukhumbika ukongwa lakuti: Kumbi Akhristu akusankhika wo ŵenga nge tirigu atingi aziŵikengi wuli, pakuti penga Akhristu aboza anandi wo akambanga kuti alondo nadi Yesu? Kwamuka kusanirika mu ntharika ya muŵanda. Akhristu akusankhika atingi aziŵikengi chifukwa aliskikanga umampha.
NA, NDIYANI MUŴANDA WAMAGOMEKEZGEKA NDI WAKUWAMU?
8. Nchifukwa wuli kagulu ka muŵanda wakugomezgeka katenere kuja ndi Akhristu akusankhika pe?
8 Kagulu ka muŵanda wakugomezgeka katenere kuja ndi Akhristu akusankhika pe. Akhristu ŵenaŵa adanika kuti, “asembi ndipuso mafumu” ndipu akulangulika kuti “‘apharazgengi kwekosi mijalidu yamampha’ yaku mweniyo wanguŵadana kuti atuwi mu mdima aluti ku ukweru waki wakuziziswa.” (1 Pet. 2:9, NW) Mwaviyo, mphakwenere kuti “asembi ndipuso mafumu” ngenanga ndingu pe ngatenere kusambiza Akhristu anyawu uneneska.—Mal. 2:7; Chiv. 12:17.
9. Kumbi muŵanda wakugomezgeka wamiya Akhristu akusankhika wosi? Konkhoskani.
9 Kumbi muŵanda wakugomezgeka wamiya Akhristu akusankhika wosi wo ŵe pacharu chapasi? Awa, mbakhristu akusankhika wosi cha wo ŵe ndi udindu wakugaŵiya chakurya Akhristu anyawu pacharu chosi. Akhristu akusankhika anyaki mbateŵeti akovya pamwenga ŵara mu mipingu yo awungana. Yiwu asambiza nyumba ndi nyumba kweniso mu mipingu yo awungana ndipu avwiya ulongozgi wakutuliya ku likulu la pacharu chosi. Kweni anozgaku nawu cha chakurya cho abali ndi azichi alonde pacharu chosi. Anyaki mwa Akhristu akusankhika ŵenaŵa mbazichi akujiyuyuwa, wo aŵanaŵanapu cha za kuja ndi udindu wakusambiza mu mpingu.—1 Ŵakor. 11:3; 14:34.
10. Kumbi ndiyani muŵanda wamagomekezgeka ndi wakuwamu?
10 Na, ndiyani muŵanda wamagomekezgeka ndi wakuwamu? Nge mo venge kuti Yesu wangugwiriskiya nchitu ŵanthu amanavi kuliska ŵanthu anandi, muŵanda mwenuyu wamiya kagulu ka abali akusankhika wo aja achinozga ndi kugaŵa chakurya kutuliya m’chaka cha 1919. Mu mazuŵa ngosi ngakumaliya, abali akusankhika wo amiya muŵanda wakugomezgeka aja achiteŵete ku likulu lidu la pacharu chosi. Muŵanda mwenuyu, ndi Wupu Wakulongozga wa Akaboni aku Yehova. Chinanga kuti ŵanthu amanavi ndiwu amiya muŵanda kweni ntharika yaku Yesu yilongo kuti “muŵanda” ndi munthu yumoza. Mwaviyo, vo Wupu Wakulongozga wasankha vija nge wasankha ndi munthu yumoza.
KUMBI A MUNYUMBA YAKI MBAYANI?
11, 12. (a) Kumbi ndi maudindu ngaŵi nanga ngo muŵanda wamagomekezgeka ndi wakuwamu wapaskika? (b) Kumbi Yesu wangumupaska zukwanji muŵanda wamagomekezgeka udindu wakuwonere a munyumba yaki, nanga wangusankha yani?
11 Viwoneka kuti mu ntharika yaku Yesu, muŵanda wamagomekezgeka ndi wakuwamu wapaskika maudindu ngaŵi ngakupambana. Wakwamba, ngwakuwonere a munyumba ya mbuyaki ndipu wachiŵi, ngwakuwonere vinthu vosi va mbuyaki. Pakuti ntharika iyi yifiskika mu nyengu yinu yakumaliya, muŵanda watingi wapaskikengi maudindu ngenanga pavuli pakuti Yesu wayamba kuwusa mu Ufumu waki, wo ukujalikiskika mu 1914.
12 Kumbi Yesu wangumupaska zukwanji muŵanda wakugomezgeka udindu wakuwonere a munyumba yaki? Kuti timuki fumbu lenili, tikhumbika kuŵanaŵaniya vo vikuchitika mu 1914, nyengu yo kuvuna kukwambiya. Nge mo tasambiriya kali, magulu nganandi nga ŵanthu ngakambanga kuti ngenga mu Chikhristu pa nyengu yo. Kumbi Yesu watingi wasankhengi gulu nili kuti lije muŵanda wakugomezgeka? Fumbu lenili likumukika po Yesu ndi Awiski anguza kuziyendere mu 1914 kuzifika mkatikati mwa chaka cha 1919, kuti aziwoni asani Akhristu akusankhika alondonga vo Yehova wakujalikiska pa nkhani ya kusopa kwauneneska. c (Mal. 3:1) Yiwu angukondwa ukongwa chifukwa angusaniya kagulu ka Akusambira Bayibolo kakugomezgeka, ko kangulongo kuti kayanjanga Yehova ndipuso Mazu ngaki. Yiwu akhumbikanga kutoweseka ndipu angujiyuyuwa, anguzomera kuyeseka ndi kuyengeka ko kunguchitika kwa kanyengu. (Mal. 3:2-4) Akusambira Bayibolo ŵenaŵa, ŵenga nadi Akhristu auneneska. Mu 1919, ŵati ayamba so kupharazga mwaphamphu, Yesu wangusankha abali wo ŵenga akwenere kutuliya mu kagulu ka Akhristu ŵenaŵa kuja muŵanda wamagomekezgeka ndi wakuwamu, ndipu wanguŵapaska udindu wakuti awoneriyengi a munyumba yaki.
13. Kumbi mbayani anyaki wo amiya a munyumba yaki, nanga chifukwa wuli?
13 Kumbi a munyumba yaki mbayani? Mwakudumuwa tingakamba kuti mbeniwo aliskika. Kukwambiriya kwa mazuŵa ngakumaliya, a munyumba yaki wosi ŵenga Akhristu akusankhika. Pavuli paki, mbereri zinyaki nazu zenga a munyumba yaki. Mbereri zenizi sonu zinandi ukongwa ndipu zipanga “mskambu umoza” wo ulongozgeka ndi Khristu. (Yoh. 10:16) Magulu ngosi ngaŵi ngayanduwa mwakuyanana ndi chakurya cha pa nyengu yaki cho muŵanda wakugomezgeka wapereka. Nanga abali wo ŵe mu Wupu Wakulongozga, wo mazuŵa nganu amiya muŵanda wamagomekezgeka ndi wakuwamu? Abali ŵenaŵa nawu akhumbika kusambizika Mazu ngaku Chiuta. Mwakujiyuyuwa aziŵa kuti weyosi pakuyija ngwa munyumba ya mbuyaki, nge mo aliri akusambira auneneska wosi aku Yesu.
14. (a) Kumbi muŵanda wakugomezgeka wakupaskika udindu wuli, nanga wawonere so vinthu nivi? (b) Kumbi Yesu wangumutcheŵeskanji muŵanda wamagomekezgeka ndi wakuwamu? (Wonani bokosi lakuti: ‘Asani Muŵanda Muheni Yo . . .’)
14 Yesu wakupereka udindu ukulu ukongwa kwa muŵanda wamagomekezgeka ndi wakuwamu. Mu nyengu yakali, muŵanda yo wenga wakugomezgeka, wawoneriyanga nyumba yosi ya mbuyaki. (Luka 12:42) Mwaviyo, kwenga kwakwenere kuti muŵanda wamagomekezgeka ndi wakuwamu wapaskiki udindu wakuwonere ateŵeti wosi akugomezgeka aku Chiuta. Iyu wawonere so katundu, nchitu yakupharazga, nkhani za maunganu nga chigaŵa ndi nga dera, nchitu yakusindikiza mabuku ngo ngakonkhoska Bayibolo ngeningo tigwiriskiya nchitu pakupharazga, pakusambira pakutija kweniso ku mpingu. A munyumba yaki athemba chakurya chosi cho chinozgeka ndi kagulu ka muŵanda wakugomezgeka.
WAPASKIKENGI ZUKWANJI UDINDU WAKUWONERE VINTHU VOSI VA MBUYAKI?
15, 16. Kumbi Yesu wamupaskengi zukwanji muŵanda wakugomezgeka udindu wakuwonere vaki vosi?
15 Kumbi Yesu wamupaskengi zukwanji muŵanda udindu wachiŵi wakuwonere “vaki vosi”? Yesu wangukamba kuti: “Ngwamwaŵi muŵanda yo, mweniyo mbuyaki wachiza wamusaniyengi ngwakuchita viyo! Nadidi ndikuneniyani kuti wamuŵikengi pa vaki vosi.” (Mat. 24:46, 47) Wonani kuti Yesu wapereka udindu wachiŵi pavuli pakuti waza ndipu wasaniya kuti muŵanda waja ‘wachichita viyo,’ kung’anamuwa kupereka chakurya mwakugomezgeka. Ivi vilongo kuti maudindu yanga ngaperekeka pa nyengu yakupambana. Kuti tiziŵi nyengu yo Yesu wapaskiyengi muŵanda udindu wakuwonere vinthu vaki vosi kweniso mo wamupaskiyengi, tikhumbika kuziŵa vinthu viŵi: Nyengu yo waziyengi ndipuso vinthu vaki.
16 Kumbi Yesu wazengi zukwanji? Tisaniyengi kwamuka mu nkhani yeniyi. Kumbukani kuti mu vesi 30, 42 ndi 44 akambamu kuti Yesu “wazengi,” mazu yanga ngang’anamuwa kuti Yesu wazengi kuziyeruzga pakumaliya pa mgonezu wunu. d (Mat. 24:30, 42, 44) Mwaviyo, mazu ngakuti “wazengi” ngo nge mu ntharika ya muŵanda wamagomekezgeka ngalongo kuti, Yesu wazengi pa chisuzgu chikulu.
17. Kumbi vinthu vaku Yesu ndi nivi?
17 Kumbi “vaki vosi” vaku Yesu ndi nivi? Po iyu wangukamba kuti “vosi,” wang’anamuwanga vinthu va pacharu chapasi pe cha. Yesu we ndi udindu ukulu ukongwa kuchanya. Iyu wangukamba kuti: “Wapaskika kwaku ini mtufu wosi kuchanya ndi panu pasi.” (Mat. 28:18; Ŵaef. 1:20-23) Ufumu wo wakupaskika kwambiya 1914, wo wazamugaŵiyaku Akhristu akusankhika wo mbakusambira ŵaki, we mu gulu la vaki vosi.—Chiv. 11:15.
18. Nchifukwa wuli Yesu wazamukondwa kupereka udindu ku muŵanda wakuwonere vaki vosi?
18 Kumbi tingakambanji pa vinthu vosi vo takambiskana? Po Yesu waziyengi kuziyeruzga pa chisuzgu chikulu, wazamusaniya kuti muŵanda wamagomekezgeka walutirizga kupereka chakurya pa nyengu yaki kwa a munyumba ya ambuyaki. Pavuli paki, Yesu wazamukondwa kupereka udindu wachiŵi ku muŵanda, wakuwonere vaki vosi. Wosi wo amiya muŵanda wakugomezgeka, azamupaskika udindu wenuwu asani aziluta kuchanya kweniko azamuwusa ndi Khristu.
19. Kumbi muŵanda wakugomezgeka wazamulonde mphotu yikulu kuruska Akhristu akusankhika anyaki wosi? Konkhoskani.
19 Kumbi muŵanda wakugomezgeka wazamulonde mphotu yikulu kuruska Akhristu akusankhika anyaki wosi? Awa. Mphotu yo ŵanthu amanavi angalayizgika, pakumaliya angagaŵiyaku so ŵanthu anyaki. Mwakuyeruzgiyapu, ŵanaŵaniyani vo Yesu wangukambiya akutumika ŵaki 11 akugomezgeka usiku, iyu wechendafwi. (Ŵerengani Luka 22:28-30.) Yesu wangulayizga kagulu ka anthurumi ŵenaŵa kuti azamulonde mphotu chifukwa cha kugomezgeka kwawu. Iyu watingi waziŵagaŵiyengeku udindu wakuwusa nge mafumu. Pati paluta vyaka, Yesu wangulongo kuti ŵanthu 144,000, wosi azamuja pa chitengu ndipu azamuwusa nayu. (Chiv. 1:1; 3:21) Mwakuyanana ŵaka, nge mo lemba la Mateyu 24:47 likambiya, Yesu wangulayizga kagulu ka anthurumi, abali akusankhika wo amiya muŵanda wakugomezgeka, kuti azamupaskika udindu wakuwonere vinthu vaki vosi. Tingakamba kuti wosi 144,000, azamuwusiya limoza ndi Khristu kuchanya.—Chiv. 20:4, 6.
20. Nchifukwa wuli Yesu wakusankha muŵanda wakugomezgeka, nanga imwi muyesesengi kuchitanji?
20 Yesu wagwiriskiya nchitu muŵanda wamagomekezgeka ndi wakuwamu, kuliska ŵanthu anandi nge mo wanguchitiya mu nyengu ya akutumika. Iyu wangusankha muŵanda wakugomezgeka mwenuyu kuti waziyesesengi kupereka chakurya pa nyengu yaki kwa Akhristu akusankhika ndi a mbereri zinyaki, mu mazuŵa ngosi ngakumaliya. Tiyeni tiyesesengi kulongo kuti tiwonga mwakuja akugomezgeka ndipuso tiŵawovyengi abali akusankhika wo amiya muŵanda wamagomekezgeka ndi wakuwamu.—Ŵah. 13:7, 17.
MAZU NGAKUMALIYA: (Asani muŵerenga ndimi, mazu yanga ngaŵerengeki nge mazu nga mumphata.)
[Mazu ngam’mphata]
a Ndimi 2: Pakwambiriya, Yesu wangukamba ntharika yakuyanana ndi yeniyi ndipu wangumukonkhoska “muŵanda” nge “mlinda,” “a munyumba yaki” nge “mbumba yaki.”—Luka 12:42-44.
b Ndimi 6: Mazu nga Chigiriki ngo akufwatuliya kuti “wazengi” (erʹkho·mai) pa Mateyu 24:42, 44, ngapambana ndi mazu nga Chigiriki ngakuti “uzi” (pa·rou·siʹa) ngo nge pa Mateyu 24:3. Yesu wakwamba kali kuwusa kweni cheruzgu wazamupereka kunthazi.
c Ndimi 12: Wonani nkhani yakuti: “Awonani, Ini Nde Namwi Mazuŵa Ngosi,” pa peji 17-18 ndimi 7-10.
d Ndimi 16: Wonani nkhani yakuti: “Tineniyeni, Viŵengepu Venivo Zuŵanji?” pa peji 13-14 ndimi 14-18.
[Mafumbu]
[Chithuzi papeji 27]
[Bokosi papeji 28]
KUMBI MWAVWISISA?
‘Muŵanda Wamagomekezgeka ndi Wakuwamu’: Wamiya kagulu ka abali akusankhika wo aja achinozga ndi kugaŵa chakurya kutuliya m’chaka cha 1919. Mazuŵa nganu, abali akusankhika ŵenaŵa ndiwu ŵe mu Wupu Wakulongozga
‘Ŵa munyumba yaki’: Wosi wo aliskika, kaya mbakusankhika pamwenga a mbereri zinyaki
‘Wakumuŵika pa ŵa munyumba yaki’: Mu 1919, Yesu wangusankha abali wo ŵenga akwenere kutuliya mu kagulu ka abali akusankhika kuti aje muŵanda waki
‘Wazakumuŵika pa vaki vosi’: Wo amiya muŵanda wamagomekezgeka azamupaskika udindu wenuwu asani azilonde mphotu yawu yakuluta kuchanya. Muŵanda limoza ndi anyaki wo ŵe mu kagulu ka 144,000, azamuwusiya limoza ndi Khristu kuchanya
Kaya tilindizga kuluta kuchanya pamwenga kuzihara charu chapasi, tosi ndisi a munyumba yaki ndipuso tikhumbika chakurya chakuyanana pa nyengu yaki
[Bokosi papeji 30]
‘ASANI MUŴANDA MUHENI YO . . .’
Yesu wakupereka udindu ukulu ukongwa kwa muŵanda wamagomekezgeka ndi wakuwamu kuti wawoneriyengi a munyumba ya mbuyaki kweniso waŵapaskengi chakurya pa nyengu yaki. Yesu wanguziŵa kuti ŵanthu wo ŵe ndi udindu ukulu ukongwa aja so ndi mulandu ukulu ukongwa. (Luka 12:48) Mwaviyo, iyu wakumaliza ntharika yaki ya muŵanda wamagomekezgeka ndi wakuwamu ndi kutcheŵeska.
Yesu wangukonkhoska vo vatingi vizichitikiyengi muŵanda muheni, yo waŵanaŵananga kuti ambuyaki aswera ndipu wangwamba kupuma aŵanda anyaki. Yesu wangukamba kuti po mbuyaki waziyengi, “wamudumuwengi” muŵanda muheni yo.—Ŵerengani Luka 12:45, 46.
Kumbi Yesu wangukambiya limu kuti kwazamukuŵa gulu la muŵanda muheni mu mazuŵa ngakumaliya? Awa. Ŵanthu anyaki alongo kuti ŵe ndi jalidu lakuyanana ndi la muŵanda muheni yo Yesu wangukamba. Kaya ŵenga Akhristu akusankhika pamwenga a “mzinda ukuru,” tingaŵakamba kuti mba mpatuku. (Chiv. 7:9) Kweni ŵanthu ŵenaŵa ndi gulu la muŵanda muheni cha chifukwa chakuti Yesu wangukamba cha kuti wazamusankha muŵanda muheni. Vo wangukamba vilongo kuti watcheŵeskanga muŵanda wamagomekezgeka ndi wakuwamu.
Wonani kuti Yesu pakutcheŵeska watamba ndi mazu ngakuti “asani.” Mazu yanga ngang’anamuwa kuti vo wangukamba viwoneka kuti vatingi vichitikengi cha. Panyaki iyu wang’anamuwanga kuti: ‘Asani muŵanda wamagomekezgeka ndi wakuwamu watingi wazisuzgengi aŵanda anyaki munthowa zenizi, mbuyaki watingi wazimudumuwengi po watingi waziyengi.’ Chinanga kuti ve viyo, kagulu ka muŵanda wamagomekezgeka ndi wakuwamu kalutirizga kuja masu ndi kupereka chakurya chamampha.
Abali akusankhika wo ateŵete limoza nge muŵanda wamagomekezgeka, aziŵa kuti Mbuyawu wazakuŵamba mulandu chifukwa cha mo aphwere a munyumba yaki. Abali akusankhika ŵenaŵa, akhumbisiska kufiska udindu wawu mwakugomezgeka kuti Mbuyawu wachiza pakumaliya waziŵakambiyi kuti, “mwachita umampha.”
[Chithuzi papeji 31]
Wosi 144,000, azamuwusiya limoza ndi Yesu kuchanya (Wonani pandimi 19)
