Vo Ŵanthu Wo Aŵerenga Magazini Yanga Afumba . . .

Nchifukwa wuli ŵanthu anyaki akuzumbulika cha mazina ngawu m’Bayibolo?

M’buku la Ruti, munthu yo wangukana kuhara Ruti nge mo Chilangulu chaku Mosese chakambiyanga, m’Bayibolo akumukamba ŵaka kuti bwezi. (Ruti 4:1-12) Kumbi tingakamba kuti ŵanthu wosi wo akuleka kuzumbulika mazina ngawu m’Bayibolo ŵenga aheni pamwenga ŵenga ambula kukhumbika ukongwa? Awa.

Aŵanaŵaniyani chakuwoniyapu chinyaki ichi. Achinozgeke kuti achiti Paska wakumaliya, Yesu wangukambiya akusambira ŵaki kuti ‘akasere mumsumba kwaku yanimweni’ ndipu akanozgi malu munyumba yaki. (Mateyu 26:18) Kumbi tingakamba kuti munthu yo wadanika kuti “yanimweni” mu vesi ili, wenga muheni panyaki wenga wambula kukhumbika kumuzumbuwa zina? Awa. Mwambula kukayika, munthu mwenuyu wenga wakusambira waku Yesu. Pa nkhani iyi, zina laki lenga lambula kukhumbika kuzumbulika.

Kusazgiyapu pa fundu yeniyi, m’Bayibolo mwe mazina nganandi nga ŵanthu aheni kweni mazina nga ŵanthu anandi akugomezgeka akungazumbuwa cha. Mwakuyeruzgiyapu, zina laku Eva, yo wenga munthukazi wakwamba kulengeka ndakuziŵika ukongwa. Chifukwa chakuti Eva wangujikuzga ndipuso wanguvwiya cha vinguchitiska kuti Adamu wabudi ndipu venivi vikutizisiya masuzgu nganandi. (Ŵaroma 5:12) Mwakupambana ndi fundu yeniyi, zina la muwolu waku Nowa likuzumbulika cha m’Malemba kweni tisambira vinandi chifukwa chakujipereka kwaki ndipuso kuvwiya, iyu wanguwovya murumu waki nchitu yakukhumbika ukongwa. Ivi vilongole limu kuti kuleka kuzumbulika kwa zina laki m’Bayibolo, kung’anamuwa kuti wenga wambula kukhumbika cha pamwenga kuti wayanjikanga cha ndi Chiuta.

Pe so ŵanthu anyaki wo angugwira nchitu yikulu ukongwa pakuwovya kuti khumbu laku Yehova lifiskiki kweni mazina ngawu mulivi m’Bayibolo. Ŵanaŵaniyani msungwana wachiyisraele yo wenga muŵanda munyumba yaku Namani, mura wa asilikali ankhondu a ku Siriya. Iyu wangukambiya muwolu waku Namani mwambula mantha za mchimi waku Yehova yo wenga ku Yisraele. Ivi vinguchitiska kuti pachitiki chakuziziswa chikulu. (2 Ŵakaronga 5:1-14) Mwana munthukazi waku Jefta, yo wenga mweruzgi wa Ayisraele wangulongo so chakuwoniyapu chamampha ukongwa cha chivwanu. Iyu wanguzomerezga ndi mtima wosi kuti wayirwengi cha ndipuso kubala ŵana kuti wafiski layizgu la awiski. (Ŵeruzgi 11:30-40) Mwakuyanana ŵaka, ŵanthu akujumpha 40, wo akulembaku buku la sumu kweniso achimi wo angugwira nchitu zakuzirwa mwakugomezgeka akuzumbulika cha.—1 Ŵakaronga 20:37-43.

Chakuwoniyapu chamampha ukongwa ncha angelu akugomezgeka. Chinanga kuti kwe angelu mamiliyoni nganandi kweni ŵaŵi pe ndiwu azumbulika m’Bayibolo, Gabriele ndi Mikaeli. (Danyele 7:10; Luka 1:19; Yuda 9) Angelu anyaki wosi azumbulika cha mazina ngawu m’Bayibolo. Mwakuyeruzgiyapu, Manowa, awiski aku Samson angufumba mungelu kuti: ‘Zina laku ndiwi yani, alinga kuti penipo mazu ngaku ngalongongi uneneska, tizikutumbiki?’ Iyu wanguti, “Chifukwa chine ufumba zina langu?” Mungelu yo wangujiyuyuwa ndipu wangukana kulonde ulemu wo wenga wakwenere kuperekeka kwaku Chiuta pe.—Ŵeruzgi 13:17, 18.

Bayibolo likonkhoska cha chifukwa cho ŵanthu ndi angelu anyaki akuzumbulikiya mazina ngawu penipo anyaki akuzumbulika cha. Kweni tingasambira vinandi ku ŵanthu ndipuso angelu akugomezgeka, wo ateŵetiyanga Chiuta chifukwa chakukhumba kutchuka cha pamwenga kulonde udindu.

[Chithuzi papeji 30]