Nchifukwa Wuli Kwe Masuzgu Nganandi Viyo?

Kuti tivwisi chifukwa cho pacharu chapasi paŵiya masuzgu nganandi viyo ndipuso chifukwa cho ŵanthu atondeke kungamaliska, tikhumbika kuziŵa dankha cho chichitiska masuzgu ngenanga. Chinanga kuti pe vinthu vinandi ndipuso vakupambanapambana, titenere kuwonga kuti Bayibolo lingatiwovya kuviziŵa. M’nkhani yeniyi, tikambiskanengi vinthu vikuluvikulu vinkhondi vo vichitiska masuzgu ngenanga. Titikupemphani kuti muŵanaŵaniyi mwakuphwere vo Bayibolo likamba ndipu muwonengi mo Mazu ngaku Chiuta ngakuwovyiyeningi kuziŵa cho chichitiska masuzgu ngenanga.—2 Timote 3:16.

◼ VO MABOMA NGAHENI NGACHITA

Bayibolo likamba kuti: “Asani amphulupulu ateruzga ŵanthu atamantha.”—Nthanthi 29:2.

Mbiri yikamba za alongozgi anandi wo awusanga mwankhaza, vo vachitiskanga kuti ŵanthu wo aŵawusanga akumani ndi masuzgu nganandi. Mbuneneska kuti mbalongozgi wosi cha wo aja ankhaza. Alongozgi anyaki atiŵaŵanaŵaniya vamampha ŵanthu a m’charu chawu. Kweni asani ayamba kuwusa, kanandi asaniya kuti afiska cha vo akhumbanga kuchita chifukwa cha mphindanu kweniso kulimbiyana udindu. Nyengu zinyaki angagwiriskiya nchitu nthazi zawu mu nthowa iheni ndipu venivi vichitiska kuti ŵanthu asuzgikengi ukongwa. Henry Kissinger, yo wenga Mlembi waku Pulezidenti ku America, wakukamba kuti: “Mbiri yikonkhoska vinthu vinandi vo vakhumbikanga kuchitika kweni vikutondeka.”

Bayibolo likamba so kuti: “Nkhwa munthu yo watenda cha kunyoroska menderu ngaki.” (Yeremiya 10:23) Ŵanthu ambula kufikapu aziŵa cha vakunthazi ndipuso alivi zeru za mo angachitiya vinthu kuti viyendengi umampha pa umoyu wawu. Asani ŵanthu atondeka kunyoroska menderu ngawu, kumbi anganyoroska wuli menderu nga anyawu? Kumbi mwachiwona chifukwa cho alongozgi acharu atondeke kumaliska masuzgu? Kukamba uneneska, kanandi maboma ngaheni pamwenga muwusu uheni ndiwu uzisa masuzgu.

◼ VO VISOPA VABOZA VICHITA

Yesu wakukamba kuti: “Mwaku ichi ŵanthu wosi aziŵengi kuti mwe [akusambira, NW] ŵangu, asani mwe ndi chanju yumoza ku munyaki.”—Yohane 13:35.

Alongozgi avisopa vosi apharazga kuti ŵanthu ayanjanengi ndipuso akoliyanengeku. Uneneska ngwakuti, yiwu atondeka kuchitiska ŵanthu ŵawu kuti ayanjanengi, vo vingachitiska kuti paŵevi sankhu. M’malu mwakuwovya ŵanthu kuti ayanjanengi, visopa vichitiska ŵanthu kuti apatukanengi, asankhanengi ndipuso ayambanengi. Hans Küng, yo wasanda masambiru nga visopa, wakumaliza kulemba buku laki ndi mazu ngakuti: “Visopa ndivu vikhuŵizga kweniso kuzomerezga mphindanu zo andali achita, zo zichitiska kuti ŵanthu asuzgikengi ukongwa.”—Christianity and the World Religions.

 Kusazgiyapu pa venivi, alongozgi avisopa vinandi azomerezga kusompholana, azomerezga ŵanthu akutorana kuchitanga vigololu ndipuso kugonana kwa anthurumi pamwenga anthukazi pe. Venivi vachitiska kusapaliya kwa matenda, kutuzga nthumbu, kuto nthumbu zambula kunozgeke ndipuso kumala kwa nthengwa ndi mabanja, vo vachitiska masuzgu nganandi.

◼ KULEKA KUFIKAPU KWA ŴANTHU NDIPUSO MALIKHUMBIRA NGAHENI

“Munthu weyosi wateseka, pakuguguzika ndi likhumbira laku yija. Pavuli penipo likhumbira lo, lati lakuwa, lipapa ulakwi.”—Yakobe 1:14, 15.

Chifukwa chakuti tosi te ambula kufikapu, kuja kwambula kusuzga kunangiska vinthu kweniso kuchita ubudi ndipu tikhumbika kuyesesa kulimbana ndi jalidu ‘lakutataliya makhumbu nga liŵavu.’ (Ŵaefesu 2:3) Vingaja vakusuzga kukana malikhumbira ngaheni asani pangaŵa mpata wakungafiskiya. Kweni kungazomerezga kungachitiska kuti tikumani ndi masuzgu ngakulu.

Wakulemba mabuku P. D. Mehta, wakukamba kuti: “Masuzgu nganandi ngo tikumana nangu, ngachitika chifukwa cha malikhumbira ngidu ngaheni, kuleka kujiko pa vakusangaruska ndipuso kuviyanja ukongwa, mbunu kweniso kukhumba kutchuka.” Kwanja ukongwa moŵa, munkhwala wakutimbanyizga wongu, juga, kugonana kweniso vinthu vinyaki kwachitiska kuti ŵanthu wo kali “apaskikanga ulemu” aleki kutumbikika ndipu kwazisa masuzgu nganandi mu mabanja ngawu, ku mabwezi ndi ku ŵanthu anyaki. Pa nkhani ya kuleka kufikapu kwa ŵanthu, tikhumbika kuzomerezga vo Bayibolo likamba kuti: “Viwoneke limu ku munthu weyosi kuti mazuŵa nganu vinthu vosi vamoyu vo vikulengeka vitamantha chifukwa cha masuzgu ngo nge peposi.”—Ŵaroma 8:22, The New Testament in Modern English, wakufwatuliya ndi J. B. Phillips.

◼ VO ANGELU AHENI ACHITA

Bayibolo livumbuwa kuti Satana ndi ‘chiuta wa mgonezi wunu’ ndipuso kuti watovyeka ndi angelu aheni anthazi ukongwa wo adanika kuti mademoni.—2 Ŵakorinte 4:4; Chivumbuzi 12:9.

Nge mo Satana wachitiya, mademoni ngachitiska kuti ŵanthu achitengi vinthu viheni ndipuso ngatiŵalandizga. Wakutumika Paulo wanguzomerezga venivi po wangukamba kuti: ‘Limbanu lidu kuti le ku ŵanthu cha, kweni ndi maufumu, ndi mitufu, ndi ŵakuwusa charu ŵa mdima wamakonu [uwu], ndi va mzimu [angelu] aheni mu vakuchanya.’—Ŵaefesu 6:12.

Chinanga kuti mademoni ngatanja kusuzga ŵanthu kweni nge ndi chilatu chinyaki chikulu. Yingu ngakhumba kuti ŵanthu aleki kuja pa ubwezi ndi Yehova, Chiuta Mura Ukongwa. (Sumu 83:18) Vinthu nge kugomezga nyenyezi, ufwiti, masenga ndi kuwombeza, ndi vinyaki mwa vinthu vo mademoni ngagwiriskiya nchitu kunyenge ŵanthu ndipuso kuŵachitiska vinthu viheni. Ndichu chifukwa chaki Yehova watititcheŵeska ku vinthu viheni venivi ndipuso wavikiriya ŵanthu wosi wo akana Satana ndi angelu ŵaki.—Yakobe 4:7.

◼ TE “MU MAZUŴA NGAKUMARIYA”

Vyaka pafupifupi 2,000 vajumpha, Bayibolo likukambiya limu kuti: ‘Ziŵa chenichi, kuti m’mazuŵa ngakumariya zikabukanga nyengu zizitu.’

Pakukamba vo vichitiska nyengu kuti yije yakusuzga, Bayibolo lilutirizga kukamba kuti: ‘Chifukwa paŵengi ŵanthu akujanja, akwanja ndalama, akujiŵikamu, akujikuzga, . . . azira chanju chakawi, ambula matunizgika, apharamulu, ambula kujitintha, akari, azira kwanja umampha, zimphachi, akujivwa, akututumuka, akwaja kadara kwakuruska kwanja Chiuta.’ Mbuneneska kuti masuzgu ngosi yanga ngachitika, chifukwa chakuti te “m’mazuŵa ngakumaliya.”—2 Timote 3:1-4.

Mwakukoliyana ndi fundu zo takambiskana, kumbi tawona chifukwa cho ŵanthu atondeke kumaliska masuzgu chinanga kuti akhumba kungamaliska? Sonu ndi nunkhu ko tingasaniya chovyu? Tikhumbika kulereska ku Mulengi widu, yo walayizga kuti ‘wanangengi nchitu zaku Diabolo’ ndipuso wo atimulondo. (1 Yohane 3:8) Nkhani yakulondopu yikonkhoskengi vo Chiuta wachitengi kuti watuzgepu vinthu vosi vo vichitiska masuzgu.

[Chithuzi papeji 3]