Pambula Kuswera Yapa Masuzgu Ngosi Ngamalengi!

Ŵanaŵaniyani kuti mwe m’charu chambula masuzgu, ŵanthu avwiya marangu, kulivi nkhondu, matenda kweniso ngozi zachilengedu. Asani muyuka mulenji, mufipa mtima cha chifukwa cha kusankhana mitundu, kukandilizgana ndipuso chifukwa chakuŵavi ndalama. Kumbi muŵanaŵana kuti venivi vingachitika nadi? Kukamba uneneska palivi munthu pamwenga wupu wa ŵanthu wo ungachitiska kuti vinthu vije viyo. Kweni Chiuta walayizga kuti watuzgengepu vinthu vosi vo vichitiska kuti ŵanthu asuzgikengi, kusazgapu vo takambiskana m’nkhani yaluta. Awonani malayizgu yanga ngo nge m’Mazu ngaku Chiuta, Bayibolo:

◼ MUWUSU WA BOMA LAMAMPHA

“Chiuta wakuchanya wakamikanga ufumu wo kuti ubwangandulikengi cha, nanga nkhuti mazaza ngaki ngapere [ngaperekekengi] ku fuku linyaki cha. Ubwanganduwengi maufumu ngosi yanga kungamara; ndipu ukaŵangaku muyaya.”—Danyele 2:44.

Ufumu waku Chiuta, ndi boma lakuchanya. Yesu Khristu, yo wakusankhika kuwusa boma lenili wazamuwusa m’malu mwa maboma ngosi nga ŵanthu ndipu wazamuwonesesa kuti khumbu laku Chiuta lafiskika kuchanya kweniso panu pasi. (Mateyu 6:9, 10) Boma laku Chiuta, lazamuharika ndi boma lelosi cha la ŵanthu chifukwa ndi ‘ufumu wamuyaya wa Ambuyafwi ndi Mtaski Yesu Khristu.’ Mwaviyo, kwazamuja chimangu mpaka muyaya.—2 Petro 1:11.

◼ KWAZAMUŴAVI VISOPA VABOZA

“Satana nayu watijisanduska kuŵa mungelu wa ukweru. Viyo kuti nchilendu cha, asani ateŵeti ŵaki nawu atijisanduska nge mbateŵeti a urunji. Waku ŵeniwo umari ukaŵanga wakulingana ndi nchitu zawu.”—2 Ŵakorinte 11:14, 15.

Visopa vaboza, vazamuwoneke limu kuti vilongozgeka ndi Diabolo ndipu vazamutuzgikapu pacharu chapasi. Kusankhana mitundu ndi kubayana ko kuchitika chifukwa cha visopa, kwazamuŵapu so cha. Venivi vazamuchitiska kuti ŵanthu wosi wo atanja “Chiuta wamoyu ndi muneneska” asopengi ndi “chivwanu chimoza” ndipuso “mu mzimu ndi mu uneneska.” Mwaviyo, ŵanthu azamuja mwachimangu kweniso mwakukoliyana.—1 Ŵatesalonika 1:9; Ŵaefesu 4:5; Yohane 4:23.

◼ ŴANTHU WOSI AZAMUJA AKUFIKAPU

“Chiuta iyu waŵengi pamoza nawu, Chiuta wawu. Ndipu waleskengeku sozi losi ku masu ngawu, ndi nyifwa kuti yikaŵangapu so cha; chingana nchitenje, chingana ndi nkhuta, chingana mburwirwi, kuti vikaŵangapu so cha: chifukwa vakudanga vo varutapu.”—Chivumbuzi 21:3, 4.

Yehova Chiuta, wachitengi venivi kuporote mwa Mwana waki Yesu, yo wangupereka umoyu waki chifukwa cha ŵanthu wosi. (Yohane 3:16) Mu muwusu waku Yesu, ŵanthu azamuja akufikapu. Kwazamuja masuzgu ngengosi cha chifukwa ‘Chiuta iyu wazamukuŵa  pamoza nawu’ ndipu wazamuleska “sozi losi ku masu ngawu.” Pambula kuswera yapa, kuleka kufikapu ndipuso masuzgu vazamuŵaku so cha, “ŵakurunjika ŵaharengi charu, ndipu ŵakajanga paku cho muyaya.”—Sumu 37:29.

◼ KWAZAMUWAVI ANGELU AHENI

“[Yesu Khristu] wanguko nchalinda yo, njoka yo yamwaka, yo ndi Diabolo ndi Satana; ndipu wangumumanga virimika chikwi [1,000], wangumuponya muchizenji cho, ndi wanguchijara ndi kuchizighiriya [kumata] pachanya paki, mwakuti wareki kurandizga so mitundu.”—Chivumbuzi 20:2, 3.

Vinthu vosi vo vichitika ndi Satana vazamujaku cha chifukwa iyu limoza ndi angelu ŵaki aheni azamumangika ndi kuponyeka “muchizenji,” kung’anamuwa kuti azamuŵavi nthazi yakuchita chechosi. Yiwu azamulongozga so cha ŵanthu kuti achitengi vinthu viheni. Vazamuja vakunozga ukongwa kuja m’charu chambula fuzi yaku Satana ndipuso angelu aheni!

◼ KWAZAMUŴAVI “MAZUŴA NGAKUMALIYA”

“Mazuŵa ngakumariya” ngazamumala pa “chisuzgu chikuru.” Yesu wakukamba kuti: “Chiŵengeku penipo chisuzgu chikuru, chakuti chengavi kuŵapu chaviyo kutuwa ku mtendeku wacharu mpaka kunu ku le, chingana nkhuti chikaŵangapu so cha.”—Mateyu 24:21.

Chisuzgu chikulu, chazamukuŵa chakofya chifukwa chakuti kwazamuja masuzgu ngakuti ngechendachitikepu kali. Ndipu chazamumala pa “nkhondu yo ya zuŵa likulu laku Chiuta Wanthazizosi,” yo yiziŵika kuti “Haramagedone.”—Chivumbuzi 16:14, 16.

Ŵanthu wosi wo atanja vinthu va urunji, alindizga umaliru wacharu chiheni ichi. Tiyeni tikambiskani ŵaka vitumbiku vimanavi vo ŵanthu ŵenaŵa alindizga kuzilonde mwakulongozgeka ndi Ufumu waku Chiuta.

CHIUTA WAZAMUCHITA VINTHU VINANDI!

“Mzinda ukuru” pamwenga kuti ŵanthu anandi azamuvikilirika kuti azije m’charu chifya chachimangu: Mazu ngaku Chiuta, ngakamba kuti kwazamukuŵa “mzinda ukuru” wa ŵanthu wo ‘azamutuwa mu suzgu yikuru’ ndipu azamuvikilirika kuti azije ndi umoyu m’charu chifya cha urunji. (Chivumbuzi 7:9, 10, 14; 2 Petro 3:13) Yiwu azamutumbika Yesu Khristu, “mwanambereri waku Chiuta, yo watuzgapu ulakwi wacharu” chifukwa chakuŵataska.—Yohane 1:29.

Ŵanthu azamuyanduwa ukongwa chifukwa chakusambizika ndi Chiuta: M’charu chifya, “charu chapasi chikazazikanga ndi zeru za Ambuya.” (Yesaya 11:9) Fundu zo Chiuta wazakuŵasambiza, zazamukuŵa so ndi ulongozgi wa mo azamuchitiya kuti azijengi mwachimangu ndi ŵanthu wosi, mwakukoliyana ndi mo charu chifya chazamuŵiya. Chiuta walayizga kuti: “Ndini [Yehova] Ambuya Chiuta waku, mweniyo watikurunguchizga kusakata, mweniyo watikurongozga munthowa yeniyo utenere kwendamu.”—Yesaya 48:17.

Akwanjiwa ŵidu wo akutayika azamuyuskika kutuwa m’miwunda: Pa nyengu yo Yesu wenga pacharu chapasi, wanguyusa mubwezi waki Lazaro yo wangufwa. (Yohane 11:1, 5, 38-44) Venivi vilongo kuti wazamuchita vinandi mwakulongozgeka ndi Ufumu waku Chiuta.—Yohane 5:28, 29.

Kwazamuja chimangu ndi urunji mpaka muyaya: Mu muwusu waku Khristu, kwazamuŵavi ŵanthu wo azamuleka kuvwiya marangu. Tiziŵa wuli venivi? Yesu waziŵa vo ve mumitima ya ŵanthu ndipu wazamugwiriskiya nchitu zeru zenizo pakuyeruzga arunji ndi aheni. Wosi wo akana kusintha nthowa zawu ziheni, azamuzomerezgeka cha kuzija m’charu chifya chaku Chiuta.—Sumu 37:9, 10; Yesaya 11:3, 4; 65:20; Mateyu 9:4.

Takambiskana ŵaka mauchimi ngamanavi mwa mauchimi nganandi nga m’Bayibolo, ngo ngakonkhoska vinthu vamampha vo vazamuchitika munthazi. Pa nyengu yo Ufumu waku Chiuta wazamuyamba kuwusa charu chapasi, kwazamuja “chimangu chikuru” mpaka muyaya. (Sumu 37:11, 29) Vinthu vosi vo vichitiska kuti ŵanthu asuzgikengi, vazamuŵaku so cha. Tingagomezga venivi chifukwa chakuti Chiuta walayizga kuti: “Awonani; [ndipanga, NW] vinthu vosi viŵi vifya. . . . Mazu yanga ngamagomekezgeka ndi ngakuneneska.”—Chivumbuzi 21:5. ▪

[Chithuzi papeji 5]

[Kukonkhoska Chithuzi]

© Silke Woweries/Corbis