Marangu Ngaku Yehova Ngakugomezgeka

“Chisimisimi cha Ambuya nchakukho, muzereza chitimusanduska wazeru.”—SUMU 19:7.

KUMBI MUNGAMUKA WULI?

Kumbi ndi marangu wuli ngo Yehova wakupereka m’Malemba?

Kumbi marangu ngaku Yehova ngatiŵawovya wuli Akhristu mazuŵa nganu?

Kumbi te ndi vifukwa nivi vo tigomezge marangu ngaku Yehova?

1. Kumbi ndi nkhani nizi zo ŵanthu aku Chiuta asambira mwakuwerezgawerezga, nanga tiyanduwa wuli asani tichita viyo?

 ASANI munozgeke Sambiru la Chigongwi cha Alinda, panyaki mukujifumbapu kuti, ‘Kumbi tikusambirapu cha nkhani iyi?’ Vingachitika kuti mwaja muchiwungana ndi mpingu wachikhristu kwa nyengu yitali, mukuwona kuti pe nkhani zinyaki zo zikonkhoskeka mwakuwerezgawerezga. Taja tichisambira nkhani za Ufumu waku Chiuta, sembi yaku Yesu, nchitu yakusambiza ŵanthu kweniso za mijalidu yamampha nge chanju ndi chivwanu. Kusambira nkhani zenizi mwakuwerezgawerezga, kutitiwovya kuja ndi chivwanu chakukho kweniso kuti tije “akuchita mazu, ndi akungavwa pe cha.”—Yak. 1:22.

2. (a) Kumbi visimisimi vaku Chiuta ving’anamuwanji? (b) Kumbi marangu ngaku Chiuta ngapambana wuli ndi marangu nga ŵanthu?

² Mazu nga Chihebere ngo akungafwatuliya kuti “chisimisimi,” ngang’anamuwa marangu ngo Chiuta wapereka ku ŵanthu ŵaki. Mwakupambana ndi marangu nga ŵanthu ngo kanandi atinganozga so pamwenga kungasintha, marangu ngaku Yehova ngakugomezgeka nyengu zosi. Chinanga kuti marangu nganyaki ngo nganguperekeka kali ngagwira nchitu cha mazuŵa nganu, ving’anamuwa kuti ngaheni cha. Wakulemba sumu wakukamba kuti: “Virunguchizgu vinu vakurunjika muyaya.”—Sumu 119:144.

3, 4. (a) Kumbi marangu ngaku Yehova ngasazgapunji? (b) Kumbi Ayisraele atingi ayanduwengi wuli asani anguvwiya marangu ngenanga?

³ Mungawona kuti nyengu zinyaki marangu ngaku Yehova, ngasazgapu mauthenga ngakutcheŵeska. Kanandi, Chiuta watumanga achimi ŵaki kuchitcheŵeska Ayisraele. Mwakuyeruzgiyapu, kwati kwaja kamanavi kuti Ayisraele asere m’Charu Chakurayizgika, Mosese wanguŵatcheŵeska kuti: “Chenjeni, vinu mtima winu unganyengeka, ndipu mungang’anamuka ndi kuteŵete achiuta anyaki ndi  kuŵasopa kuti ukari wa Ambuya ukole kumikana namwi.” (Mar. 11:16, 17) Bayibolo likonkhoska kuti Chiuta wangupaska ŵanthu ŵaki marangu nganandi ngakovya.

⁴ Pa vakuchitika vinandi, Yehova wangulangula Ayisraele kuti amuwopengi, avwiyengi mazu ngaki kweniso atowesengi zina laki. (Mar. 4:29-31; 5:28, 29) Yiwu atingi alondiyengi vitumbiku vinandi asani anguvwiya marangu ngenanga.—Ŵal. 26:3-6; Mar. 28:1-4.

MO AYISRAELE ANGUCHITIYA NDI MARANGU NGAKU CHIUTA

5. Nchifukwa wuli Yehova wangurwiya nkhondu Karonga Hezekiya?

⁵ M’mbiri yosi ya Ayisraele, Chiuta wangufiska malayizgu ngaki. Mwakuyeruzgiyapu, pa nyengu yo Senakaribu, Karonga wa Asiriya wanguyukiya Yuda ndi kuwofyeza kuti wapundengi Karonga Hezekiya, Yehova wangusereliyapu mwakutumiza mungelu. Mu usiku umoza pe, mungelu waku Chiuta wangubaya asilikali “wosi ŵara” ŵa Asiriya, mwakuti Senakaribu wanguwere kwawu we ndi soni ukongwa. (2 Mik. 32:21; 2 Ŵakar. 19:35) Nchifukwa wuli Chiuta wangurwiya nkhondu Karonga Hezekiya? Chifukwa chakuti “iyu [Hezekiya] wangumeremete ukongwa ku Ambuya, wengavi kutuwaku kukulondo yiwu, kweni wangusunga marangu.”—2 Ŵakar. 18:1, 5, 6.

6. Kumbi Karonga Josiya wangulongo wuli kuti wagomezganga Yehova?

⁶ Munthu munyaki yo wanguvwiya marangu ngaku Yehova, wenga Karonga Josiya. Kwambiya pa nyengu yo wenga ndi vyaka 8, “wanguchita cho nchamampha mu masu ngaku Chiuta, . . . wangupatukiya cha ku lamaryi pamwenga lamazge.” (2 Mik. 34:1, 2) Josiya, wangulongo kuti wagomezganga Yehova mwakutuzga angoza m’charu cho ndi kwambisa so kusopa kwauneneska. Josiya pamoza ndi Ayisraele wosi, angutumbikika chifukwa cha vo wanguchita.—Ŵerengani 2 Mikoka 34:31-33.

7. Nchinthu wuli chachitikanga asani Ayisraele aleka kuvwiya marangu ngaku Yehova?

⁷ Vakuchitiska chitima kuti ndi nyengu zosi cha po ŵanthu aku Yehova agomezganga marangu ngaki ndi mtima wosi. Yiwu avwiyanga kweni nyengu zinyaki avwiyanga cha ndipu achitanga venivi kwa vyaka vinandi. Pa nyengu yo chivwanu chawu chadewezekanga, kanandi achitanga vo wakutumika Paulo wangukamba kuti, ‘ayungwiskika ndi mphepu yosi ya kasambizidu.’ (Ŵaef. 4:13, 14) Nge mo vingukambikiya limu, asani Ayisraele aleka kugomezga marangu ngaku Chiuta, akumananga ndi masuzgu ngakulu.—Ŵal. 26:23-25; Yer. 5:23-25.

8. Kumbi tingasambiranji pa vo Ayisraele achitanga?

⁸ Kumbi tingasambiranji pa vo Ayisraele achitanga?  Nge mo venge ndi yiwu, ateŵeti aku Chiuta mazuŵa nganu achenyeka kweniso apaskika ulongozgi. (2 Pet. 1:12) Asani tiŵerenga Mazu ngakukambirika ngaku Chiuta, tikumbuka marangu ngaki. Pakuti te ndi wanangwa wakusankha vo tingachita, tikhoza kusankha kuvwiya ulongozgi waku Yehova pamwenga cha. (Nthanthi 14:12) Tiyeni tikambiskani vifukwa vinyaki vo titenere kugomezge marangu ngaku Yehova kweniso mo tingayanduliya asani titingavwiya.

VWIYANI CHIUTA KUTI MUJE NDI UMOYU

9. Kumbi Yehova wangulongo wuli kuti wenga ndi Ayisraele pa nyengu yo ŵenga mubozwa?

⁹ Pa nyengu yo Ayisraele angwamba ulendu wawu wakusuzga wo angwenda kwa vyaka 40 mu “mabozwa ngakuru ndi ngakofya,” Yehova wanguŵakonkhoske limu cha mo watingi waŵalongozgiyengi, kuŵavikiliya kweniso kuŵaphwere. Chinanga kuti venga viyo, iyu wanguŵalongo mu nthowa zinandi kuti watingi waŵawovyengi, vo vatingi viŵachitiskengi kuti amugomezgi ndipuso agomezgi ulongozgi waki. Msana, Yehova wagwiriskiyanga nchitu mtambu ndipu usiku wagwiriskiyanga nchitu motu, kuti wakumbuski Ayisraele kuti wenga nawu pa nyengu yo ayendanga m’malu ngaheni. (Mar. 1:19; Chit. 40:36-38) Iyu waŵaphweriyanga so mwakuliŵavu, ‘vakuvwara vengavi kuguga ndipu marundi ngawu ngengavi kutupa.’ Mbuneneska kuti “pengavi kakuŵasoŵa.”—Neh. 9:19-21.

10. Kumbi Yehova watiŵalongozga wuli ŵanthu ŵaki mazuŵa nganu?

¹⁰ Mazuŵa nganu, ateŵeti aku Chiuta ŵe pafupi kusere m’charu chifya chaurunji. Kumbi tigomezga kuti Yehova watitipaska vosi vo tikhumbikiya kuti tiziponi pa “chisuzgu chikuru” cho chituza? (Mat. 24:21, 22; Sumu 119:40, 41) Mbuneneska kuti Yehova watitipaska mtambu cha pamwenga motu kuti utilongozge m’charu chifya. Kweni iyu wagwiriskiya nchitu gulu laki kutiwovya kuti tilutirizgi kuja masu. Mwakuyeruzgiyapu, gulu lenili laja lichikonkhoska mwakuwerezgawerezga kuti kuŵerenga Bayibolo pakutija, kuchita Kusopa kwa Pabanja kweniso kusanirika pa maunganu ndi kupharazga nyengu zosi, kutiwovyengi kuja pa ubwezi wakukho ndi Chiuta. Kumbi tayesa kusintha vinthu vinyaki kuti tilondo ulongozgi wenuwu? Kuchita venivi, kutiwovyengi kuja ndi chivwanu chakukho cho chazakutiwovya kuti tizisere m’charu chifya.

11. Kumbi Chiuta walongo kuti watitiphwere mu nthowa nizi?

¹¹ Ulongozgi wo tilonde utitiwovya kuja masu kweniso pa umoyu widu wa zuŵa ndi zuŵa. Mwakuyeruzgiyapu, tifipa ukongwa mtima cha chifukwa tiwona vinthu vakuliŵavu mwakwenere ndipuso tija ndi jisu lakulereska pa chinthu chimoza. Tayanduwa so ukongwa ndi ulongozgi wakukwaskana ndi vakuvwala, kujitoweska, kusankha vakusangaluska ndipuso masambiru ngapachanya. Aŵanaŵaniyani ulongozgi wo tilonde wakukwaskana ndi nyumba zidu, magalimotu, Nyumba za Ufumu kweniso kunozgeke ngozi zamabuchibuchi. Ulongozgi waviyo, ulongo kuti Chiuta waphwere umoyu widu.

MARANGU NGANGUWOVYA AKHRISTU KUJA AKUGOMEZGEKA

12. (a) Kumbi ndi nkhani niyi yo Yesu wakambiyanga akusambira ŵaki mwakuwerezgawerezga? (b) Nchinthu wuli cho Yesu wanguchita chenicho Petro wanguchiluwa cha, nanga venivi vitenere kutikwaska wuli?

¹² Mu nyengu ya akutumika, ŵanthu aku Chiuta alondiyanga marangu nyengu zosi. Yesu wakambiyanga akusambira ŵaki mwakuwerezgawerezga kuti akhumbikanga kuja akujiyuyuwa. Chinanga kuti venga viyo, iyu waŵakambiyanga ŵaka vo kujiyuyuwa kung’anamuwa cha kweni waŵalongonga mo angajaliya akujiyuyuwa. Pazuŵa lakumaliya lo wenga pacharu chapasi, Yesu wanguwunganiska akutumika ŵaki kuti achiti Phaska. Akutumika ŵaki achirya, iyu wangusoka ndi kusambisa marundi ngawu, venivi kanandi vachitikanga ndi muŵanda.  (Yoh. 13:1-17) Kuchita vinthu mwakujiyuyuwa kwenuku, kunguwovya akutumika kuti aleki kuluwa vo Yesu wanguŵachitiya. Pafupifupi vyaka 30 pavuli paki, wakutumika Petro yo wengapu pa nyengu ya Phaska, wangukambiya Akhristu anyaki za kukhumbika kwa jalidu lakujiyuyuwa. (1 Pet. 5:5) Vo Yesu wanguchita, vitenere kutichiska kuti tichitengi vinthu mwakujiyuyuwa.—Ŵaf. 2:5-8.

13. Kumbi Yesu wangukumbuska akusambira ŵaki kuti atenere kuja ndi jalidu lakukhumbika ukongwa nili?

¹³ Nkhani yinyaki yo kanandi Yesu wakambiskananga ndi akusambira ŵaki, yenga kukhumbika kwa chivwanu chakukho. Akusambira ŵaki ŵati atondeka kutuzga demoni mwa mnyamata munyaki, yiwu angufumba Yesu kuti: “Chifukwa chine ifwi tengavi nthazi kumutuzga?” Iyu wangumuka kuti: “Chifukwa cha chivwanu chinu chimana: Chifukwa ndikuneneskiyani, asani mwenachu chivwanu nge ndi nje ya kamuganji . . . kanthu kosi kuti katondekengi kwaku imwi cha.” (Mat. 17:14-20) Pa uteŵeti waki wosi, Yesu wangusambiza akusambira ŵaki kuti chivwanu ndi jalidu lakukhumbika ukongwa. (Ŵerengani Mateyu 21:18-22.) Kumbi tigwiriskiya nchitu ulongozgi wo uperekeka pa unganu wachigaŵa, wadera ndipuso mawunganu ngachikhristu kuti tije ndi chivwanu chakukho? Asani te pa mawunganu ngenanga tikondwa ŵaka cha kweni tilongo kuti tigomezga Yehova.

14. Nchifukwa wuli mazuŵa nganu tikhumbika kuja ndi chanju nge mo Khristu wachitiyanga?

¹⁴ M’Malemba nga Chigiriki nga Chikhristu, mwe fundu zinandi zo zititikumbuska kuti tiyanjanengi. Yesu wakukamba kuti ‘kwanja munyaku nge ndiwi wamweni’ ndi dangu lachiŵi likulu ukongwa. (Mat. 22:39) Mwakuyanana ŵaka, Yakobe mvurwa waku Yesu, wangukamba kuti chanju ndi “dangu la ufumu.” (Yak. 2:8) Wakutumika Yohane wakulemba kuti: “Mwaŵakwanjiwa, kuti ndikulembiyani dangu lifya cha, kweni dangu lakali, lenilo mwaŵa nalu kutuwa ku mtendeku.” (1 Yoh. 2:7) Kumbi Yohane wang’anamuwanganji po wangukamba kuti “dangu lakali”? Iyu wang’anamuwanga dangu lo lakambanga za chanju. Dangu lenili lenga “lakali” mu nthowa yakuti Yesu wangulipereka “kutuwa ku mtendeku.” Kweni lenga so “lifya” chifukwa chakuti munthu wakhumbikanga kupereka umoyu waki chifukwa cha munyaki, venivi ndivu akusambira ŵaki akhumbikanga kuzichita kunthazi po atingi akumanengi ndi masuzgu. Nge akusambira aku Khristu, titenere kuwonga marangu ngo ngatititcheŵeska kuti tileki kuja ndi jalidu lakujiyanja lo lawanda m’charu ichi, lo lingachitiska kuti tileki kwanja anyidu.

15. Kumbi nchitu yikulu yo Yesu wachitanga pacharu chapasi yenga niyi?

¹⁵ Yesu walongonga kuti wayanjanga  ŵanthu. Tiziŵa venivi chifukwa wanguchizga ŵanthu akutama, akupunduka ndipuso wanguyuska ŵanthu akufwa. Kweni nchitu yaki yikulu yenga yakuchizga ŵanthu cha. Vo wapharazganga ndi kusambiza vinguwovya ŵanthu kwa nyengu yitali. Kumbi tiziŵa wuli venivi? Mwakuyeruzgiyapu, tiziŵa kuti ŵanthu wo Yesu wanguchizga ndi kuŵayuska mu nyengu ya akutumika angukota ndipuso kufwa kweni ŵanthu wo anguzomerezga uthenga waki akusaniya mwaŵi wakuti azije ndi umoyu wamuyaya.—Yoh. 11:25, 26.

16. Kumbi nchitu yakupharazga Ufumu ndi kusambiza ŵanthu yaluta panthazi wuli mazuŵa nganu?

¹⁶ Nchitu yakupharazga yo Yesu wangwambisa mu nyengu ya akutumika, yaluta panthazi ukongwa mazuŵa nganu. Yesu wangulangula akusambira ŵaki kuti: “Viyo rutani, sambizani mitundu yosi.” (Mat. 28:19) Yiwu angusambiza nadi, nasi so tingakamba kuti tisambiza nadi ŵanthu amitundu yosi. Akaboni aku Yehova akujumpha 7 miliyoni apharazga Ufumu waku Chiuta mwaphamphu muvyaru vakujumpha 230, ndipuso asambiza Bayibolo ŵanthu mamiliyoni nganandi. Nchitu yakupharazga yeniyi, yilongo kuti te mu mazuŵa ngakumaliya.

MUGOMEZGENGI YEHOVA NGE MO AKHRISTU A MU NYENGU YA AKUTUMIKA ANGUCHITIYA

17. Kumbi Paulo ndi Petro angupereka ulongozgi wuli?

¹⁷ Vakuwoneke limu kuti marangu nganguwovya Akhristu a mu nyengu ya akutumika kuti alutirizgi kuja ndi chivwanu chakukho. Ŵanaŵaniyani mo Timote wanguchiskikiya, wakutumika Paulo yo wenga mujeri ku Roma, wati wamukambiya kuti: “Koreskanga chandiru [chakuwoniyapu] cha mazu ngazirima ngeningo wavwa kwangu.” (2 Tim. 1:13) Wati wachiska Akhristu anyaki kuti ajengi ndi mijalidu nge kukunthiyapu, kwanja abali ndipuso kujiko, wakutumika Petro wangukamba kuti: ‘Ndiphweriyengi kumukumbuskani rutaruta ndi venivi, chingana mutiviziŵa, ndipu mukhozgeka mu uneneska.’—2 Pet. 1:5-8, 12.

18. Kumbi Akhristu a mu nyengu ya akutumika anguwuwona wuli ulongozgi wo angupaskika?

¹⁸ Mbuneneska kuti makalata ngo Paulo ndi Petro angulemba ngenga ndi “manenedu ngo ngangukambikiya limu ndi achimi akupaturika.” (2 Pet. 3:2) Kumbi abali ŵidu a mu nyengu ya akutumika angukwiya ndi ulongozgi wenuwu? Awa, chifukwa chakuti Chiuta wangulongo kuti waŵayanjanga ndipu ulongozgi wo, unguŵawovya kuti alutirizgi kuja ndi “wezi ndi mziŵiru wa Ambuyafwi ndi Mtaski Yesu Khristu.”—2  Pet. 3:18.

19, 20. Nchifukwa wuli tikhumbika kugomezga marangu ngaku Yehova, nanga tiyanduwa wuli asani tichita viyo?

¹⁹ Mazuŵa nganu te ndi vifukwa vinandi vakugomezge marangu ngaku Yehova ngo ngasanirika m’Mazu ngaki ngakugomezgeka, Bayibolo.(Ŵerengani Yoswa 23:14.) Bayibolo likonkhoska mo Chiuta wanguchitiya vinthu kwa vyaka masawuzandi ndi ŵanthu ambula kufikapu. Venivi vikulembeka kuti vitiwovyi. (Ŵar. 15:4; 1 Ŵakor. 10:11) Tawona mo mauchimi nga m’Bayibolo ngafiskikiya. Mauchimi ngayanana ndi fundu zo zikukambikiya limu. Mwakuyeruzgiyapu, ŵanthu mamiliyoni asopa Yehova mwauneneska nge mo uchimi ukukambiya kuti vazamuchitika “mu mazuŵa ngapavuli” pamwenga kuti ngakumaliya. (Yes. 2:2, 3) Masuzgu nganandi nga pacharu ngafiska so uchimi wa m’Bayibolo. Nge mo vakonkhoskeke kali, nchitu yakupharazga yo yichitika pacharu chosi, nkhufiskika kwa mazu ngo Yesu wangukamba.—Mat. 24:14.

²⁰ Vinthu vo Mulengi widu wachitanga, vititiwovya kuti timugomezgengi. Kumbi tiyanduwa ndi vo wachitanga? Kukamba uneneska, tikhumbika kugomezga marangu ngaki. Venivi ndivu wanguchita Rosellen. Iyu wangukamba kuti: “Ndati ndayamba kugomezga ukongwa Yehova, ndingwamba kuwona kuti watindiphwere ndipuso watindichiska.” Nasi so tiyanduwengi asani tivwiya marangu ngaku Yehova.

[Mafumbu]

[Chithuzi papeji 7]

[Chithuzi papeji 8]

Marangu ngaku Yehova nganguwovya Josiya kuti wachiti vinthu mwakukoliyana ndi kusopa kwauneneska (Wonani pandimi 6)

[Chithuzi papeji 10]

Kugwiriskiya nchitu marangu ngaku Yehova kutiwovyengi kuti tiphweriyengi Nyumba za Ufumu (Wonani pandimi 11)