Edward Herbert, wakulemba mbiri waku Britain yo wengaku vyaka 400 vajumpha, wangukamba kuti: “Munthu yo waleka kugowoke anyaki wabwanganduwa mtanthu wo iyu wayambukengepu.” Mazu ngenanga ngalongo chifukwa cho tikhumbikiya kugowoke anyidu. Nyengu zinyaki tosi tikhumbika kuti anyidu atigowoke. (Mateyu 7: 12) Kweni pe chifukwa chikulu ukongwa cho tikhumbikiya kugowoke anyidu. Wakutumika Paulo wangukambirika kulemba kuti: “Muŵi akukunthiriyana ndi akurekiyana [akugowokiyana], yumoza ndi munyaki; asani munthu wangaŵa ndi kafukwa pa munyaki uli ndimo Ambuya [Yehova] agowoke imwi, namwi so muchiti viyo.”​—Ŵakolose 3:13.

Chifukwa chakuti tosi te ambula kufikapu, nyengu zinyaki tingaguŵiska anyidu ndipu nawu angachita so viyo. (Ŵaroma 3:23) Kumbi tingachita wuli kuti tilutirizgi kuja mwachimangu ndi abali ŵidu ambula kufikapu? Mwakukambirika ndi Chiuta, Paulo watitilunguchizga kuti tizizipizgengi ndipuso tigowokengi. Ulongozgi wenuwu ngwakukhumbika ukongwa mazuŵa nganu nge mo venge pa nyengu yo ungulembeke pafupifupi vyaka 2000 vajumpha. Tiyeni sonu tikambiskani mazu ngo Paulo wangulemba.

“Muŵi akukunthiriyana . . . yumoza ndi munyaki.” M’chigiriki, mazu ngakuti “muŵi akukunthiriyana” ngang’anamuwa kuja wakuzizipizga pamwenga wakukunthiyapu. Buku linyaki likamba kuti, Akhristu alongo jalidu lenili chifukwa “akhumbisiska kukunthiyapu vo ŵanthu anyaki anangiska kweniso mijalidu yiheni yo yitiŵaguŵiska.” Mazu ngakuti “yumoza ndi munyaki,” ngang’anamuwa kuti wosi azizipizgengi. Mwaviyo, asani tikumbuka kuti nasi te ndi mijalidu yo yingaguŵiska anyidu, tizomerezgengi cha kuti tileki kuja mwachimangu ndi anyidu chifukwa cha mijalidu yawu yo titiyitinkha. Nanga tingachita wuli asani anyidu atibudiya?

“Muŵi . . . akurekiyana, yumoza ndi munyaki.” Munthu munyaki wakusambira wakukamba kuti, mazu ngachigiriki ngo akufwatuliya kuti “akurekiyana,” “ngang’anamuwa ŵaka kugowoke cha . . . kweni kugowoke chifukwa cha lisungu.” Buku linyaki likamba kuti mazu ngenanga, ngangang’anamuwa “kuchita vinthu mwalikondwa, mwalisungu ndipuso kukhumba kuwovya.” Mwaviyo, tilongo kuti te ndi lisungu asani tikhumbisiska kugowoke anyidu chinanga tingaŵa nawu “ndi kafukwa.” Nchifukwa wuli titenere kuchitiya lisungu anyidu? Chifukwa chimoza cho titenere kugowoke anyidu nchakuti, nyengu yinyaki tikhumbengi kuti atichitiyi lisungu ndi kutigowoke asani taŵanangiya.

“Uli ndimo Ambuya agowoke imwi, namwi so muchiti viyo.” Chifukwa chikulu cho titenere kugowoke anyidu nchakuti, Yehova Chiuta watitigowoke ndi mtima wosi. (Mika 7:18) Ŵanaŵaniyani lisungu likulu lo Yehova wachitiya ŵanthu akubuda wo alapa. Mwakupambana ndi isi, Yehova wabuda cha. Iyu ngwakunozgeka kugowoke ŵanthu wo alapa ndipuso watiŵagowoke ndi mtima wosi, chinanga kuti waziŵa kuti iyu wakhumbika cha kuti ŵanthu akubuda amuchitiyi lisungu ndi kumugowoke. Kukamba uneneska, Yehova nchakuwoniyapu chamampha pa nkhani yakuŵagowoke ndi mtima wosi ŵanthu wo alapa!

Lisungu laku Yehova lititichitiska kuti tije nayu pa ubwezi kweniso kuti timulondongi. (Ŵaefesu 4:32–5:1) Tingachita umampha kujifumba kuti, ‘Asani Yehova watindichitiya lisungu ndi kundigowoke, kumbi ini ndingatondeka wuli kuŵagowoke anyangu wo alapa ndi mtima wosi asani andibudiya?’​—Luka 17:3, 4.