Aliska, Muyezgengi Aliska Ŵara Ukongwa
Aliska, Muyezgengi Aliska Ŵara Ukongwa
“Khristu nayu wangukomwa chifukwa chinu, ndipu wamusiyiyani chandiru, kuti mundondoloskemu mu menderu ngaki.”—1 PET. 2:21.
KUMBI MUNGAMUKA WULI?
Nge aliska, kumbi ŵara angamuyezga wuli Yehova?
Kumbi ŵara angamuyezga wuli Yesu Khristu?
Nchifukwa wuli ŵara achita nchitu ya uliska?
1, 2. (a) Nchinthu wuli cho chichitika asani aliska aphwere umampha mbereri? (b) Nchifukwa wuli ŵanthu anandi m’nyengu yaku Yesu ajanga nge mbereri zambula muliska?
MBERERI zikuwa umampha asani muliska waphwere umampha mskambu waki. Pa nkhani yakuŵeta mbereri, buku linyaki likukonkhoska kuti, “asani wakuŵeta mbereri watizisiya ŵaka kuti zikaryengi zija kwambula kuziwonere ndi kuziphwere, ziswera cha kutama ndipu ziyandana ukongwa cha.” Mskambu uyandana liŵi asani mbereri ziphwerereka umampha.
2 Asani aliska aphwere umampha mbereri yeyosi pakuyija, mpingu wosi uluta panthazi. Yesu wanguvwiya lisungu wumba wa ŵanthu chifukwa ‘wenga wakusuzgika ndi wakuparanyika, nge ndi mbereri zambura muliska.’ (Mat. 9:36) Nchifukwa wuli ŵanthu ŵenga akuparanyika viyo? Nchifukwa chakuti wo ŵenga ndi udindu wakuŵasambiza Dangu laku Chiuta ŵenga akali, ambula kugutiskika, ndipuso achinyengu. M’malu mwakovya ndi kuphwere mbereri, alongozgi a Yisraele azipingizganga “mphingu zizitu ndi zambura mapingika.”—Mat. 23:4.
3. Kumbi ŵara atenere kukumbukanji asani aphwere mbereri mumpingu?
3 Ŵara achikhristu a mazuŵa nganu nawu ŵe ndi udindu ukulu ukongwa. Mskambu wo aliska ngwaku Yehova ndi Yesu yo ndi muliska wamampha. (Yoh. 10:11) Mbereri izi ‘zikugulika ndi mtengu’ wo Yesu wakulipira ndi “ndopa [zaki] zakuzirwa.” (1 Ŵakor. 6:20; 1 Pet. 1:18, 19) Iyu watiziyanja ukongwa, mwakuti wangupereka umoyu waki kuti waziwombo. Nyengu zosi ŵara atenere kukumbuka kuti mbaliska amanaamana, wo atenere kujithereska ku ulongozgi wa Mwana Waku Chiuta, Yesu Khristu, mweniyo ndi “muliska yo mura.”—Ŵah. 13:20.
4. Kumbi tikambiskanengenji m’nkhani iyi?
4 Kumbi ŵara akhumbika kuziphwere wuli mbereri? Mbuneneska kuti ŵanthu mumpingu atenere ‘kuvwiya alongozgi ŵawu.’ Kweni ŵara achikhristu achiskika kuti atenere cha ‘kutufuliya’ ŵanthu wo nchihara chaku Chiuta. (Ŵah. 13:17; Ŵerengani 1 Petro 5:2, 3.) Kumbi ŵara angalongozga wuli mskambu kwambula kuwutufuliya? Tingafumba so kuti, kumbi ŵara angaphwere wuli mbereri kwambula kugwiriskiya nchitu uheni nthazi zo Chiuta wakuŵapaska?
‘WAKAŴANYAMUWANGA PACHIFUŴA CHAKI’
5. Kumbi lemba la Yesaya 40:11 litimukonkhoska wuli Yehova?
5 Mchimi Yesaya wangukamba kuti Yehova, “wakaliskanga mskambu waki nge ndi muliska, wakawunjikanga twana mbereri mumanja ngaki wakatunyamuwanga pachifuŵa chaki, ndipu wenguwengu wakalongozganga zo ze ndi ŵana.” (Yes. 40:11) Lemba ili lilongo kuti Yehova waphwere akulopwa kweniso wo awoneka kuti mbambula kuvikilirika mumpingu. Muliska waphwere mbereri yeyosi pakuyija ndipu waja wakunozgeka kovya mskambu wosi. Mwakuyana ŵaka, Yehova nayu waziŵa vo mbereri zikhumba mumpingu ndipu wakondwa kuziwovya. Nge mo muliska wanyamuliya pachakuvwala chaki kamwana ka mbereri ko kawaku ŵaka, Yehova, ‘Wuskefwi wa malisungu’ watinyamuwengi mu nyengu za masuzgu. Iyu watipembuzgengi asani tikumana ndi mayeseru ngakulu pamwenga asani tikhumbika chovyu.—2 Ŵakor. 1:3, 4.
6. Kumbi ŵara achikhristu, angamuyezga wuli Yehova?
6 Yehova ndi muliska wamampha ukongwa yo ŵara atenere kuyezga. Yiwu atenere kuziŵa vo mbereri zikhumba, nge mo Yehova wachitiya. Asani muliska waziŵa masuzgu ngo mbereri zikumana nangu kweniso nkhani zo wakhumbika kuphwere mwaliŵi, wasuzgika cha kovya ndi kuchiska mskambu. (Nthanthi 27:23) Ivi vilongo kuti mura watenere kukambiskananga umampha ndi Akhristu anyaki. Asani wavwa nkhani, mura wasunga chisisi ndipu watijipereka “kuwovya ŵakutomboroka” mwachanju.—Mac. 20:35; 1 Ŵat. 4:11.
7. (a) Kumbi aliska a m’nyengu yaku Ezekiele ndi Yeremiya achitanga wuli ndi mbereri zaku Chiuta? (b) Kumbi tingasambiranji pa kususkika kwa aliska ambula kugomezgeka?
7 Yehova wangususka aliska wo ŵengaku m’nyengu yaku Ezekiele ndi Yeremiya, chifukwa chakuti atondekanga kuphwere umampha mbereri. Mbereri zaliwanga ndi kumbininika chifukwa chakuti pengavi wakuziphwere. M’malu mwakuliska mbereri, aliska yaŵa azisuzganga ndi ‘kujiliska yiwu ŵeneku.’ (Ezek. 34:7-10; Yer. 23:1) Chiuta wasuska so alongozgi a visopa vachikhristu mazuŵa nganu. Ndipu ivi vitenere kovya ŵara achikhristu kuti aphweriyengi ndi kwanja mskambu waku Yehova.
NDAKUPASKANI CHAKUWONIYAPU
8. Kumbi Yesu wangulongo wuli chakuwoniyapu chamampha pa nkhani yakulunguchizga ŵanthu?
8 Akhristu anyaki aswera kuvwisa vo Yehova wakhumba kuti achitengi chifukwa cha ubudi wakuwa nawu. Yiwu angatondeka kuchita vo Malemba ngakamba pamwenga angachita vinthu mwaunamana. Kumbi asani vinthu ve viyo, ŵara atenere kuchita wuli? Yiwu atenere kwezga Yesu yo wanguzikira pa nyengu yo akusambira ŵaki apindananga kuti ndiyani yo wamuja mura ukongwa mu Ufumu. M’malu mwakuŵakwiyiya, Yesu wangulutirizga kuŵasambiza ndi kuŵalunguchizga mwachanju kuti ajengi akujiyuyuwa. (Luka 9:46-48; 22:24-27) Iyu wanguŵasambisa malundi kuti waŵasambizi jalidu lakujiyuyuwa lo ŵara achikhristu atenere kuja nalu.—Ŵerengani Yohane 13:12-15; 1 Pet. 2:21.
9. Kumbi Yesu wangukamba kuti akusambira ŵaki akhumbikanga kuja ndi mtima wuli?
9 Yakobe ndi Yohane awonanga udindu nge mo Yesu wawuwoniyanga cha. Akutumika ŵaŵi yaŵa akhumbanga kuzilonde udindu wapachanya mu Ufumu. Kweni Yesu wanguŵalunguchizga kuti: “Muziŵa kuti akuwusa mitundu yinyaki atufuliya ŵanthu ŵawu. Ndipu ŵaraŵara ŵawu achita mtufu pa munthu weyosi yo atimuwusa. Kweni mungachitanga nge yiwu cha. Asani mukhumba kuŵa mura muteŵetiyengi anyinu wosi.” (Mat. 20:25, 26, Contemporary English Version) Akutumika akhumbikanga cha kuja ndi mtima ‘wakutufuliya’ anyawu.
10. Kumbi Yesu wakhumba kuti ŵara ajengi nawu wuli mskambu, nanga Paulo wangulongo chakuwoniyapu wuli?
10 Yesu wakhumba kuti ŵara achikhristu achitengi nge mo iyu wachitiyanga ndi mskambu. Ŵara akhumbika kuteŵete Akhristu anyawu m’malu mwakuŵatufuliya. Wakutumika Paulo wenga wakujiyuyuwa, ndipu wangukambiya ŵara a mumpingu wa ku Efeso kuti: “Mwaŵeni muziŵa kutuwa ku zuŵa lakudanga po ndinguziya mu Asia, mo ndingujaliya pamoza namwi nyengu yo yosi, wakuteŵete Ambuya ndi kujiyuyuwa mtima.” Wakutumika Paulo wakhumbanga kuti ŵara awovyengi anyawu mwakukhumbisiska kweniso mwakujiyuyuwa. Iyu wangukamba kuti: “Mwaku vosi ndakulongoni, kuti mwaŵakutakatakiya viyo mutenere kuwovya ŵakutomboroka.” (Mac. 20:18, 19, 35) Paulo wangukambiya Akhristu a ku Korinte kuti iyu watufuliyanga pa chivwanu chawu cha. Kweni wateŵetiyanga nawu limoza mwakujiyuyuwa kuti akondwengi. (2 Ŵakor. 1:24) Ŵara atenere kulondo chakuwoniyapu chamampha chaku Paulo pa nkhani yakujiyuyuwa ndi kugwira nchitu mwaphamphu.
KOLESKANI “MAZU NGAMAGOMEKEZGEKA”
11, 12. Kumbi mura wangawovya wuli Mkhristu munyaki kuti wasankhi vakuchita?
11 Pakusambiza mumpingu, mura watenere kugwiriskiya nchitu “mazu ngamagomekezgeka ngo ngakuyana ndi chisambizu cho.” (Tito 1:9) Kweni watenere kuchita viyo ndi “mzimu wa upovu [wakufwasa].” (Ŵag. 6:1) M’malu mwakuchichizga ŵanthu mumpingu kuti achitengi vinthu mo iyu wakhumbiya, muliska wamampha watesesa kuŵakambiya fundu zo zingaŵawovya kusankha vinthu mwakwenere. Mura wakhoza kukonkhoska fundu ya m’Malemba yo mubali wangagwiriskiya nchitu pakusankha vinthu. Nyengu zinyaki wangakambiskana nayu fundu yinyaki ya m’mabuku ngidu yakukwaskana ndi nkhani yo. Iyu wangapempha so mubali yo kuti waŵanaŵaniyi mo ubwezi waki ndi Yehova ungakwaskikiya ndi vo wangachita. Mura wangamuchiska kuti watenere kuromba dankha kwaku Chiuta wechendasankhi vakuchita pa nkhani yinyaki. (Nthanthi 3:5, 6) Asani mura wakambiskana nayu fundu zenizi, Mkhristu watenere kusankha yija vakuchita.—Ŵar. 14:1-4.
12 Ŵara achikhristu agwiriskiya nchitu mazaza ngakutuliya m’Malemba pe mbwenu. Mwaviyo, yiwu atenere kugwiriskiya nchitu Bayibolo mwalusu ndi kuchita vo likamba. Ivi vitovya ŵara kuti alekengi kugwiriskiya nchitu nthazi zo ŵe nazu mwambula kwenere. Kweniso yiwu atenere cha kuluwa kuti mbaliska amanaamana ndipuso kuti Mkhristu weyosi wakujimukiya yija kwaku Yehova ndi Yesu chifukwa cha vinthu vo wasankha.—Ŵag. 6:5, 7, 8.
VAKUWONIYAPU KU MSKAMBU
13, 14. Kumbi mura wangalongo chakuwoniyapu ku mbereri m’nthowa nizi?
13 Wati walunguchizga ŵara kuti angatufuliyanga mbereri cha, wakutumika Petro wanguŵachiska kuti atenere ‘kuŵa vikozgu [vakuwoniyapu] va ku mskambu wo.’ (1 Pet. 5:3) Kumbi mura wangachita wuli kuti mbereri zisambirengi kwaku iyu? Ŵanaŵaniyani fundu ziŵi zo munthu yo “walembe [wakhumba] ura wa mpingu,” watenere kufiska dankha. Iyu wakhumbika kuja “wakujitintha,” pamwenga kuti wakuŵanaŵana umampha ndipuso “wakweruzga umampha nyumba yaku yija.” Asani mura ngwakuto ndipu we ndi ŵana, watenere kulongozga umampha banja laki chifukwa “asani munthu waleka kuziŵa kweruzga nyumba yaku yija, waphwerengi wuli eklesiya laku Chiuta?” (1 Tim. 3:1, 2, 4, 5) Kuti munthu waje mura, watenere kuja wakuŵanaŵana umampha m’nthowa yakuti wavwisengi fundu za m’Bayibolo ndi kuziŵa mo wangazigwiriskiya nchitu pa umoyu waki. Watenere kuja wakufwasa ndipuso wambula kuthaŵiriya kweruzga. Asani ŵara mumpingu ŵe ndi mijalidu yeniyi, abali atiŵagomezga ukongwa.
14 Ŵara alongo so chakuwoniyapu chamampha kwa Akhristu anyawu asani atamba ndiwu kugwira nchitu yakupharazga mwaphamphu. Yesu nchakuwoniyapu chamampha ukongwa kwa ŵara pa nkhani yeniyi. Nchitu yakupharazga uthenga wamampha wa Ufumu ndiyu yenga yakuzirwa ukongwa kwaku Yesu. Iyu wangulongo akusambira ŵaki mo atenere kugwiriya nchitu iyi. (Marko 1:38; Luka 8:1) Mazuŵa nganu, apharazgi achiskika ukongwa asani apharazga limoza ndi ŵara kweniso kuwona phamphu lawu pa nchitu yakutaska umoyu iyi. Yiwu asambira vinandi asani awona mo ŵara asambiziya mwalusu. Asani ŵara achita phamphu pa nchitu yakupharazga uthenga wamampha, chinanga kuti aja ndi vakuchita vinandi, atovya mpingu wosi kuti upharazgengi mwaphamphu. Ŵara alongo so chakuwoniyapu chamampha asani anozgeke ndi kumuka pa maunganu nga mpingu. Abali ndi achizi achiskika so ukongwa asani ŵara agwiraku nchitu zinyaki nge kupeya, kukolopa ndi kunozga Nyumba ya Ufumu.—Ŵaef. 5:15, 16; Ŵerengani Ŵahebere 13:7.
“CHIRIKIZGANI ŴANTHOMBORU”
15. Nchifukwa wuli ŵara achita maulendu nga uliska?
15 Muliska wamampha waswera cha kovya mbereri yo yapwetekeka pamwenga yo yatama. Mwakuyana ŵaka, ŵara atenere kovya mwaliŵi weyosi yo wasuzgika pamwenga wakhumbika kuwovyeka kuti waje pa ubwezi wamampha ndi Chiuta. Akukota kweniso akutama angakhumbika chovyu chakuliŵavu, kweni akhumbika so kuŵawovya ndi kuŵachiska kuti alutirizgi kwanja Chiuta. (1 Ŵat. 5:14) Ampupuka mumpingu angakumana ndi masuzgu nge kulimbana ndi “maulakalaka ngauhurwa.” (2 Tim. 2:22) Mwaviyo, kuliska kusazgapu kuluta kunyumba za abali ndi achizi pafupipafupi ndi chilatu chakukhumba kuziŵa vo vitiŵachitikiya ndi kuŵapaska ulongozgi wakwenere wa m’Malemba. Asani abali ndi achizi atovyeka mwaliŵi, vitovya kuti aleki kuchita maubudi ngakulungakulu.
16. Asani Mkhristu mumpingu wakhumbika chovyu, kumbi ŵara angamuwovya wuli?
16 Asani Mkhristu munyaki wabuda, kumbi watenere kuchitanji? Yakobe wakulemba kuti: “Kumbi watama yumoza wamwaku imwi? Wajidaniyi ŵara wo ŵampingu ndipu ŵarombiyepu paku iyu, ndi kumtukutizga ndi mafuta mu zina la Ambuya. Ndipu rombu lo la chivwanu limutaskengi murwali yo, ndipu Ambuya akamuyuskanga; ndipu asani wachita vilakwa, vilekekiyengeku kwaku iyu.” (Yak. 5:14, 15) Asani Mkhristu yo wabuda watondeka ‘kujidaniya ŵara,’ yiwu atenere kuchimuwovya mwaliŵi asani aziŵa vo wachita. Ŵara asisipuwa ndi kuchiska abali ndi achizi asani atiŵarombe, aromba nawu limoza ndi kuŵawovya pa nyengu ya masuzgu.—Ŵerengani Yesaya 32:1, 2.
17. Nchinthu wuli chichitika asani ŵara ayezga “muliska yo mura”?
17 Ŵara achikhristu atesesa kuyezga “muliska yo mura,” Yesu Khristu, pa vakuchita vawu vosi m’gulu laku Yehova. Mskambu uyanduwa ukongwa ndi kuluta panthazi asani ŵara atiwuwovya. Tiwonga ndi kuthamika Muliska widu mura ukongwa Yehova, chifukwa cha vosi vo ŵara atitichitiya.
[Mafumbu]
[Chithuzi papeji 27]
[Chithuzi papeji 30]
Ŵara atovya mabanja ngawu kunozgeke upharazgi (Wonani ndimi 13)
[Vithuzi papeji 31]
Ŵara alongo chakuwoniyapu chamampha pakupharazga (Wonani ndimi 14)
